Maan e yo nzan’n i cɛcɛ

SƐ Ɔ ti kɛ Toni mɔ e kɛnnin i ndɛ fluwa nga i su fitilɛ’n su’n, ɔ dili i nanwlɛ kɛ nzan’n kle i yalɛ’n, nn i mɛn dilɛ’n w’a yoman kɛ ng’ɔ fa yoli lɛ’n sa. Sanngɛ, kɛ m’ɔ yo i kɛ ɔ kwla nɔn nzan kaka naan ɔ su yomɛn i like fi’n ti’n, ɔ lafili su kɛ w’a wie klanmɔ fuɛn cici. ?Ngue ti yɛ akunndan tɛ yɛ ɔ buli ɔ?

Nzan’n sacili i akunndan ng’ɔ bu’n. Kannzɛ Toni si sɔ o, annzɛ ɔ siman sɔ o, kɛ ɔ ko nɔn nzan’n, i ti nun miɛn mɔ yɛ maan ɔ kwla like kwlaa yo’n, ɔ kwlá diman junman kpa kun. Kɛ ɔ́ nɔ́n nzan kpa kɔ́ i ɲrun’n, nn i ti nun miɛn’n i ukalɛ ng’ɔ kwla ukɛ i naan w’a wun sa wlɛ’n, ɔ́ kpɛ́ su kɔ́.

Like nɲɔn su nga ti yɛ kɛ Toni lafi i wun su dan’n ɔ timan kpa’n, yɛle klolɛ m’ɔ kloman mlɔnmlɔn kɛ ɔ́ yáci nzan nɔnlɛ’n. Allen mɔ e dun mmua kɛnnin i ndɛ’n, i waan nzan’n klemɛn i yalɛ. Ɔ di i nanwlɛ kɛ: “Min waan ń yó naan sran’m b’a siman kɛ n nɔn nzan. Kpɛkun n se min wun kɛ ɔ timan tɛ. Like nga n kunndɛ i kpa’n yɛle kɛ kannzɛ ɔ́ yó sɛ’n, maan n nɔn nzan’n titi.” Kannzɛ bɔbɔ sran’m be wun kɛ nzan’n su kun Toni nin Allen be kpo’n, sanngɛ be nɲɔn sɔ’n be se be wun kɛ like fi yoman be. Ɔ fata kɛ be fa ajalɛ naan nzan nɔnlɛ’n w’a saciman be. ?Sanngɛ ngue ajalɛ yɛ be kwla fa ɔ?

Maan e fa ajalɛ!

Sran kpanngban mɔ be yacili nzan dan nɔnlɛ’n, be niannin Zezi i ndɛ nga su be fali ajalɛ. I waan: “Sɛ ɔ nyinma fama’n maan a yo sa tɛ’n, tu yi i blo mmua. Ɔ flunman kɛ ɔ wunnɛn’n i lika kun tu lɛ naan a di lɛ, ɔ tra kɛ Nyanmiɛn fa ɔ wunmuan’n yi nyrɛnnɛn lika’n nun’n.”—Matie 5:29.

Zezi w’a seman mlɔnmlɔn kɛ e yo e wun like yaya. Sanngɛ ɔ fa akunndan nun ndɛ sɔ’n fa kle e kɛ like ng’ɔ kwla yo e tɛ Ɲanmiɛn ninnge’m be nun’n, sɛ é kwlá sé’n, ɔ fata kɛ e kplin su kɛ é kpɛ́ é yí i blo. Ɔ ti su kɛ ajalɛ nga é fá’n ɔ kwla yo kekle kpa. Sanngɛ ɔ sasa e akunndan nin blɛ nga be kwla yo naan y’a nɔn nzan kpanngban’n be lika. Ɔ maan sɛ sran’m be kannin nzan nga e nɔn’n i ndɛ’n, e fa ajalɛ naan w’a saciman e.a Sɛ e wun i weiin kɛ e kwlá nianman e wun su nzan nɔnlɛ’n nun’n, maan e yaci i nɔnlɛ mlɔnmlɔn. Kannzɛ bɔbɔ i sɔ’n kwla yo kekle sɛ’n, sanngɛ ɔ flunman tra kɛ ɔ saci e’n.

?Kannzɛ e timan nzanbɔɛfuɛ’n, sanngɛ e ta nzan kpanngban nɔn? ?Sɛ ɔ ti sɔ’n, ajalɛ trele benin yɛ e kwla fa naan b’a uka e naan y’a yo nzan’n i cɛcɛ ɔ?

Lika nga e kwla ɲan ukalɛ’n

1. Ɲanmiɛn srɛlɛ nga be tu be klun be srɛ titi’n, maan e lafi su kpa. Be kwlaa nga be kunndɛ kɛ Ɲanmiɛn Zoova klun jɔ be wun’n, Biblu’n man be afɔtuɛ yɛ’n: “Sa’n kwlaa nun nin like kwlaa ng’ɔ mian amun’n, an kan kle Nyanmiɛn, an srɛ i, an jran su kpa, yɛ an lɛ i ase. Yɛ ɔ maan amun wun jɔ́ amun fɔuun, amun su wun-man sa ti bɔ amun wun jɔ amun fɔuun sɔ’n i bo mlɔnmlɔn. Aunjuɛ sɔ’n maan amun wla su bo-man, yɛ amun akunndan su sanngan-man sran wunmuan bɔ amun nin Krist-Jésus ti’n ti.” (Filipfuɛ Mun 4:6, 7) ?Ngue yɛ e kwla srɛ naan e wun w’a jɔ e ɔ?

Maan e di i nanwlɛ kɛ nzan nɔnlɛ’n ti ndɛ e sa nun, naan ɔ fata kɛ e bɔbɔ yɛ e fa ajalɛ ɔ. E se Zoova kɛ e kunndɛ kɛ é yáci i sɔ yolɛ yɛ ɔ́ rá e ɲin nga e mian naan y’a fin nun y’a fite’n i su naan sa kekle kpa uflɛ wa tɔman e su. Ɲanmiɛn Ndɛ’n waan: “Sran ng’ɔ fia sa tɛtɛ ng’ɔ yo be’n be su’n, ɔ yo-man kpa. Sanngɛ sran ng’ɔ kɛn i sɔ sa liɛ mun’n, b’ɔ yaci be yolɛ’n, Nyanmiɛn’n yaci wun sa’n cɛ i.” (Nyanndra Mun 28:13) Asa ekun’n, Zezi waan e kwla srɛ Ɲanmiɛn kɛ: “Nán yaci e lɛ maan Lakafuɛ’n laka e, sanngɛ de ye i sa nun.” (Matie 6:13) ?Yɛ wafa sɛ yɛ e kwla yo e srɛlɛ sɔ’m be nuan su sa ɔ? ?Yɛ kɛ e srɛ Ɲanmiɛn’n, nin yɛ e kwla wun e srɛlɛ’m be su tɛlɛ’n niɔn?

2. Maan Ɲanmiɛn Ndɛ’n wla e fanngan. “Nyanmiɛn i ndɛ nga ɔ ko kan’n, wuun w’a kan ɔ kaci-mɛn i, ɔ maan sran’m be kaci. [...] Ɔ si be klun akunndan’n, ɔ nin be klun sa’n.” (Ebre Mun 4:12) Biblu’n nun kannganlɛ nin i su akunndan bulɛ cɛn kwlaa’n, ɔ ukali laa nzanbɔɛfuɛ kpanngban. Jue tofuɛ kun mɔ i ɲin yi Ɲanmiɛn’n, ɔ klɛli i kɛ: “Sran ng’ɔ tie-man be nga be bu-man Nyanmiɛn nin i nuan ndɛ’n be like fi’n be afɔtuɛ’n, [...] i liɛ su ti ye! [...] Sran bɔ i like liɛ ng’ɔ klo i’n yɛlɛ Nyanmiɛn i mmla’n, b’ɔ bu i akunndan kɔnguɛ nin wia su’n, [...] like kwlaa nga i sɔ sran liɛ’n yo’n, san ɔ́ yó ye i sa nun.”—Jue Mun 1:1-3.

Allen nin Zoova i Lalofuɛ’m be suannin Biblu’n nun like. I sɔ’n mɛnnin i wunmiɛn naan w’a yaci nzan dan nɔnlɛ’n. Ɔ se kɛ: “N lafi su kpa kɛ sɛ ɔ timan Biblu’n nin Biblu’n nun mmla mɔ be ukali min maan n yacili nzan nɔnlɛ be ti’n, nn kɛ ɔ o yɛ’n m’an wu.”

3. Maan e nian e wun su. Biblu’n kɛn i kɛ Klistfuɛ asɔnun’n nun’n, laa be nga be ti nzanbɔɛfuɛ’n, “e Nyanmiɛn” wa wunnzin be “i Wawɛ’n i fanngan nun.” (1 Korɛntfuɛ Mun 6:9-11) ?Wafa sɛ? I kun yɛle kɛ ɔ ukali be naan b’a kwla yo sa i nuan su. Nzuɛn sɔ’n Ɲanmiɛn wawɛ’n yɛ maan sran kun kwla yi i nglo ɔ. I sɔ’n ti’n, nzan dandan nɔnlɛ’n ɔ nin nga bé nɔ́n nn bé kpánkpán’n, be yacili. Biblu’n waan “nán an nɔn nzan bo, afin ɔ yo sran wanzo, sanngɛ maan Nyanmiɛn Wawɛ’n sie amun mlɔnmlɔn.” (Efɛzfuɛ Mun 5:18; Galasifuɛ Mun 5:21-23) Zezi Klist tali nda kɛ “e Si b’ɔ o nyanmiɛn su lɔ’n kusu, ɔ́ fɛ́ i Wawɛ’n mán be nga be srɛ i’n.” I sɔ’n ti’n, maan ‘e srɛ, bé fá mán e.’—Lik 11:9, 13.

Be nga be kunndɛ kɛ bé sú Zoova kɛ ɔ nin i fata’n sa’n, sɛ be kanngan Biblu’n nun yɛ be suan nun like’n, kpɛkun be tu be klun be srɛ Ɲanmiɛn kpɛ sunman’n, bé kwlá trá be awlɛn. Nán e sa sin bubu e. Sanngɛ e fa ndɛ yɛ m’ɔ o Ɲanmiɛn Ndɛ’n i nun’n i su. I waan: “Sɛ sran kun [...] lua like nga Nyanmiɛn Wawɛ’n klo i’n, i mma nga Wawɛ sɔ’n maan ɔ ti’n yɛlɛ anannganman nguan’n. Nán maan e sa sin bubu ye sa kpa yolɛ’n nun, afin sɛ y’a fɛ-man’n, cɛn wie é nyɛ́n i nuan like.”—Galasifuɛ Mun 6:8, 9.

4. Maan e nin sran kpa mun e san nun. “Sran ng’ɔ fɛ i wun mantan ngwlɛlɛfuɛ’n, ɔ kaci ngwlɛlɛfuɛ. Sran nga kusu b’ɔ fɛ i wun mantan sinnglinfuɛ’n, ɔ kaci sinnglinfuɛ.” (Nyanndra Mun 13:20) Maan e se e janvuɛ’m be kɛ y’a ta nda kɛ e su nɔnman nzan dan kun. Kusu Ɲanmiɛn Ndɛ’n dun mmua wla e su nun kɛ sɛ laa e nin e janvuɛ mun e ‘nɔnnin nzan boli, e yoli sa finfin mun, [yɛ] e yia nɔnnin nzan lelele’ naan e waan é yáci i sɔ liɛ’n, i sɔ’n ‘bo be nuan, yɛ be kpɛ e nzowa.’ (1 Piɛr 4:3, 4) Kɛ e ko ta nda kɛ e su nɔnman nzan dan kun’n, be nga be yo naan y’a kwlá nantiman i sɔ liɛ’n su’n, maan e nin be e yaci nun sanlɛ.

5. Maan e si e awɛ. “Nán an yo kɛ sran mun bɔ be o lɛ ndɛ’n be sa, sanngɛ maan Nyanmiɛn kaci amun akunndan’n naan an kaci mlɔnmlɔn. Kɛ ɔ ko yo sɔ’n, amún wún Nyanmiɛn i klun sa’n i wlɛ, yɛ amún sí sa ng’ɔ ti kpa, b’ɔ jɔ i klun, b’ɔ maan amún yó kpa’n.” (Rɔmfuɛ Mun 12:2) Sɛ e yaci Ɲanmiɛn Ndɛ’n nun naan ɔ uka e naan e si e jranwlɛ naan y’a yaciman e wiengu mun annzɛ “sran mun bɔ be o lɛ ndɛ’n” be nun naan b’a kle e jranwlɛ’n, e mɛn dilɛ’n jɔ́ Ɲanmiɛn klun. Yɛ é dí su aklunjuɛ. ?Sanngɛ wafa sɛ yɛ e kwla si e jranwlɛ ɔ?

Nzan nga e nɔn’n sɛ ɔ sɔnnin o, sɛ w’a sɔnman o, sɛ ɔ yo maan e wunman sa wlɛ kpa kun’n, nn y’a nɔn nzan dan. I sɔ’n ti’n, sɛ e waan é nɔ́n nzan’n maan e si e jranwlɛ trele kun. Nán ɔ yo kɛ y’a wie bo’n yɛ é yáci i nɔnlɛ ɔ. I sɔ’n ti ndɛ nanwlɛ. Kannzɛ i sɔ’n yoman e fɛ’n sanngɛ nán i sɔ saci e nzan nɔnlɛ’n su ajalɛ kpa nga e fali’n. Maan e sie awɛ kun mɔ é fá su titi m’ɔ su yoman naan y’a tɔ nzan dan nɔnlɛ’n nun ɔn.

6. Nán e kplin i ngba su. ‘Sɛ an se kɛ ɛɛn, maan ɔ ka su, yɛ sɛ an se kɛ cɛcɛ’n, maan ɔ ka su.’ (Matie 5:37) Sɛ be jran su cinnjin kpa kɛ bé mán e nzan’n, amanniɛn su nán e kplin su. “Maan amun ijɔlɛ wafa’n yo sran’m be fɛ, maan amun nuan nun ndɛ’n yo fɛ kɛ njin sa naan amu’an tɛ sran ng’ɔ usa amun sa’n, i su klanman.”—Kolɔsfuɛ Mun 4:6.

7. Maan e kunndɛ ukafuɛ. E janvuɛ nga be kwla uka e naan y’a nanti nda nga e tali’n su, mɔ be kwla uka e Ɲanmiɛn ninnge’m be nun’n, maan e se be naan be uka e. “Sɛ sran nnyɔn be bo yo kun’n, ɔ ti kpa tra sran kunngba bɔ i ngunmin wo’n. Afin kɛ be ti nnyɔn’n, be nyan be junman’n i su mmlusuɛ dan. Yɛ sɛ kun tɔ-ɔ, i wiengu kun’n mɛn i su.” (Akunndanfuɛ’n 4:9, 10; Zak 5:14, 16) Anuannzɛ kun m’ɔ o Amlɛnkɛn’m be mɛn nun lɔ m’ɔ di nzan nɔnlɛ’n su junman’n seli kɛ: “Ɔ ju wie’n, nzan nɔnlɛ’n i yacilɛ’n kwla yo kekle man amun. Amun se amun awlofuɛ nin amun janvuɛ’m be kɛ be suan amun bo naan amun a kwla nanti nda nga amun tali’n su.”—The National Institute on Alcohol Abuse and Alcoholism.

8. Nán maan e kpɔci nda nga e tali’n. “Nyanmiɛn ndɛ nga an ti’n, an lafi su. Sɛ an tie i ngbɛn bɔ an fa-man su’n, wuun an su laka amun wun. Sanngɛ Nyanmiɛn mmla’n b’ɔ ti niannun kpa’n, b’ɔ maan sran’m be nyan be ti’n, sran ng’ɔ nian nun’n, b’ɔ nian nun tititi’n, bɔ kɛ ɔ ti mmla’n i wla fi-man sanngɛ ɔ fa su’n, Nyanmiɛn maan like ng’ɔ yo’n ɔ́ yó ye.”—Zak 1:22, 25.

Amun yaci nzanbɔɛ’n

Nán sran ngba nga be nɔn nzan kpanngban’n be kwlaa yɛ be kaci nzanbɔɛfuɛ ɔ. Sanngɛ sran wie’m be nɔn nzan lele annzɛ be nɔn i tititi, ɔ maan be kaci nzanbɔɛfuɛ. Kɛ mɔ nzan’n saci be wunnɛn’n nin be akunndan’n i tɛ kpa’n ti’n, nzanbɔɛfuɛ’m be klun nga be tu i kɛ bé yáci i nɔnlɛ’n, ɔ nin ukalɛ nga be uka be Ɲanmiɛn ninnge’m be nun’n, wie liɛ’n ɔ juman. Allen waan: “I nun mɔ ń yáci nzan nɔnlɛ’n, min wunnɛn’n wa yoli min ya dan kpa. Ɔ maan, n wunnin i wlɛ kɛ ɔ fata kɛ be yo min are be fa nannan ukalɛ nga be uka min Ɲanmiɛn ninnge’m be nun’n, i su.”

Ɔ fata kɛ be yo nzanbɔɛfuɛ kpanngban be are naan nzan dan nɔnlɛ’n i yacilɛ m’ɔ ti Ɲanmiɛn ninnge’m be nun alɛ’n, b’a kwla ɲan fanngan b’a yaci naan be sa w’a kɛnmɛn i kun.b Ɔ fata kɛ be la wie’m be dɔɔtrɔ naan kɛ bé yáci’n wafa nga be wun fa yo be’n b’a kwla suɛn i bo. Annzɛ ɔ fata kɛ be yo be sɔ naan b’a kwla man be are naan nzan awe m’ɔ kun be tɛtɛ kpa’n b’a kwla jrɛn i ɲrun naan b’a nɔnmɛn i kun. Ɲanmiɛn i Wa’n m’ɔ yoli abonuan sa kpanngban’n seli kɛ: “Nán sran ng’ɔ ti juejue’n yɛ ɔ kɔ ayrefuɛ sin-ɔn, tukpacɛfuɛ’n yɛ ɔ kɔ-ɔ.”—Mark 2:17.

Ɲanmiɛn i atin’n i su falɛ’n i su mmlusuɛ mun

Afɔtuɛ kpakpa nga Biblu’n mɛn i nzan’n su’n be fin Ɲanmiɛn Kpli m’ɔ sunnzun e nin like kpa’n. Ɔ kunndɛman kɛ e di aklunjuɛ dɔ nga su ngunmin, sanngɛ ɔ kunndɛ kɛ e di i tititi. Allen yacili nzan nɔnlɛ’n i afuɛ 24 yɛ. Sanngɛ i wla te kpɛn like kun su. I waan: “Kɛ n sili kɛ n kwla kaci naan Zoova kunndɛ kɛ ɔ́ úka min naan n yaci sa tɛ yolɛ’n, ɔ yoli min fɛ dan. Kɛ n sili kɛ [...].” Allen yaci i ndɛ’n i kanlɛ, afin kɛ i wla kpɛn i sɔ’n su’n, i kɔmin bo bo i kpɔlɛ. I sin’n i waan: “Nn, [...] kɛ n sili kɛ Zoova wun i wlɛ naan min ndɛ lo i yɛ ɔ uka min’n, nanwlɛ ɔ yoli abonuan min ɲrun.”

Ɔ maan sɛ dɔ nga su nzan’n kle e yalɛ’n, nán e sa sin bubu e annzɛ kusu e se kɛ ɔ lemɛn i yowlɛ. I sɔ sa’n juli Allen nin sran kpanngban kpa’m be su wie. Dɔ nga su’n b’a yaci nzan dan nɔnlɛ annzɛ b’a yaci i nɔnlɛ mlɔnmlɔn. I sɔ’n w’a yoman be nsisɔ. Ɔ su yoman e nsisɔ wie.

Sɛ e waan é nɔ́n nzan kan o, annzɛ é kpɛ́ i kpo kɛ e nɔnmɛn i kun mlɔnmlɔn o, ndɛ yɛ mɔ Ɲanmiɛn kan kle e klolɛ su’n, maan e fa su. I waan: ‘Sɛ ɔ ti kɛ amun sie amun su mmla nga m mannin amun’n i bo’n, wuun amún dí alaje. Sɛ alaje sɔ’n ti nzue’n, wuun ń sé kɛ ɔ́ yó kɛ nzue ba kun b’ɔ sonji kpuu b’ɔ kpɛ-man’n sa. Sɛ ɔ ti kɛ amun sie amun su mmla sɔ’n i bo’n, wuun amún nyán muae. Sɛ muae sɔ’n ti jenvie’n, wuun ń sé kɛ ɔ́ bó gúa cenje’n su tititi.’—Ezai 48:18.

[Ja ngua lɛ ndɛ mun]

[Kuku, bue 8]

?N su kaci nzanbɔɛfuɛ?

Maan e usa e wun kɛ:

• ?N nɔn nzan dan n tra laa’n?

• ?Siɛn’n, n nɔn nzan kpɛ sunman n tra laa’n?

• ?Nzan kekleekle mun yɛ n nɔn be siɛn’n niɔn?

• ?Kɛ min akunndan sanngan’n annzɛ kɛ sa wie tɔ min su’n, n nɔn nzan naan min wla w’a fi su?

• ?Min janvuɛ wie annzɛ min osufuɛ wie w’a kan min nzan nɔnlɛ’n i ndɛ?

• ?Awlo lɔ annzɛ junman su lɔ annzɛ kɛ ń tú ajalɛ’n, nzan nɔnlɛ’n w’a man min ndɛ le?

• ?Sɛ n di le mɔcuɛ kun naan m’an nɔnman nzan’n, ɔ yo kekle man min?

• ?Kɛ sran uflɛ’m be nɔnman nzan’n, ɔ yo min kɛnsrɛn?

• ?N fa nzan nga n nɔn’n n fiɛ i sran ɲrun?

Sɛ amun tɛli kosan ngalɛ’m be nun kun annzɛ be nun kpanngban su kɛ ɛɛn’n, ɔ fata kɛ amun fa ajalɛ naan amun nian nzan nga amun nɔn’n su.

[Kuku/Foto, bue 9]

Maan e fa nzan nɔnlɛ’n i su ajalɛ kpa

Ka naan y’a nɔn nzan’n, maan e usa e wun kɛ:

• ?Ɔ ti kpa kɛ n nɔn nzan annzɛ ɔ fata kɛ n tra min awlɛn?

Afɔtuɛ: Sran ng’ɔ simɛn i jranwlɛ nzan nɔnlɛ’n nun’n, ɔ flunman kɛ nán ɔ nɔn.

• ?Ɔ fata kɛ n nɔn nzan’n lele n ju nin?

Afɔtuɛ: Ka naan nzan’n w’a sanngan amun akunndan’n, ɔ fata kɛ amun si amun jranwlɛ’n.

• ?Blɛ benin nun yɛ ń nɔ́n nzan ɔn?

Afɔtuɛ: Sɛ amún císan loto nun annzɛ amún wá yó like ng’ɔ fata kɛ amun ɲin tran su’n, ɔ fataman kɛ amun nɔn nzan. Ka naan amun a yo Ɲanmiɛn sulɛ’n nun like wie annzɛ kɛ amun ti wunnzɛfuɛ’n ɔ fataman kɛ amun nɔn nzan. Ɔ fataman kɛ amun nɔn nzan naan amun a nɔn are wie mun.

• ?Nin yɛ ń nɔ́n nzan ɔn?

Afɔtuɛ: Lika ng’ɔ nin i fata’n nun. Nán maan ɔ yo nvialiɛ nun. Nán maan ɔ yo sran nga nzan nɔnlɛ’n sanngan be akunndan’n be ɲrun.

• ?E nin wan yɛ é nɔ́n nzan ɔn?

Afɔtuɛ: Amun nin amun janvuɛ nin amun osufuɛ mɔ be kwla ɲan ta kpa amun su’n. Nán amun nin be nga nzan’n kle be yalɛ’n, be nɔn nzan.

[Kuku/Foto, bue 10]

Ɲanmiɛn Ndɛ’n ukali nzanbɔɛfuɛ kun

Supot tran nvle nga be flɛ i Thailand’n. Laa’n, ɔ ti nzanbɔɛfuɛ. I bo bolɛ’n nun’n, nnɔsua yɛ ɔ nɔn nzan ɔn. Blɛblɛblɛ, ɔ wa nɔnnin i nglɛmun nin like dilɛ blɛ’n nun. Kpɛ sunman ɔ kunndɛ kɛ ɔ́ nɔ́n nzan bó sa ngbɛn. Sanngɛ ɔ nin Zoova i Lalofuɛ’m be wa boli Biblu’n nun like suanlɛ bo. Kɛ Supot sili kɛ Ɲanmiɛn Zoova bu nzan dan nɔnlɛ’n i fɔ’n, ɔ yacili i nɔnlɛ. Sanngɛ kɛ ɔ dili le nɲɔn kun’n, ɔ sɛli i sin i nzan nɔnlɛ nzuɛn’n nun ekun. I awlobofuɛ’m be wla boli be wun.

Ɔ nin i sɔ ngba’n, Supot kloli Zoova yɛ ɔ kunndɛli kɛ ɔ́ sú i kɛ ng’ɔ nin i fata’n sa. Supot i janvuɛ’m be ukɛli i titi. Kpɛkun be wlɛli i yi nin mma nɲɔn’m be fanngan kɛ nán be yaci i nun sanngɛ be ukɛ i titi. I blɛ sɔ’n nun’n, ndɛ weiin ng’ɔ o 1 Korɛntfuɛ Mun 6:10 nun mɔ i waan ‘nzanboɛfuɛ mun Nyanmiɛn su sie-man be mlɔnmlɔn’n,’ ɔ ukali Supot maan ɔ wunnin i wlɛ kɛ nán aɔwi ndɛ yɛ ɔ o i su ɔ. Ɔ wunnin i kɛ ɔ fata kɛ ɔ tu i klun fa ajalɛ juejue su naan w’a kwla jran nzan dan nɔnlɛ’n i ɲrun kekle.

I lɛ nun’n, Supot miɛnnin i ɲin naan ɔ́ yáci nzan nɔnlɛ mlɔnmlɔnmlɔn. I agualiɛ su’n, Ɲanmiɛn i wawɛ’n i fanngan nun ɔ nin atin nga Ɲanmiɛn Ndɛ’n kleli i’n, yɛ ukalɛ nga i awlobofuɛ nin asɔnun’n nunfuɛ’m be ukɛli i ti’n, Supot ɲannin wunmiɛn. Ɔ maan ɔ kwla jrannin i konvi ng’ɔ sɔ nzan’n i ɲrun kekle. Kɛ ɔ fɛli i wun mannin Ɲanmiɛn mɔ be yoli i batɛmu’n, ɔ yoli i awlobofuɛ’m be fɛ dan. Andɛ’n, Supot di aklunjuɛ dan yɛle kɛ ɔ nin Ɲanmiɛn be afiɛn w’a mantan kpa kɛ ng’ɔ fa kunndɛli i titi’n sa. Kpɛkun ɔ fɛ i blɛ’n uka sran uflɛ mun Ɲanmiɛn ninnge’m be nun.