?Ɲanmiɛn su lɔ kɔlɛ’n i su nanwlɛ ndɛ’n yɛle benin?

KƐ BE se sran’m be kɛ bé kɔ́ ɲanmiɛn su’n, ɔ yo be fɛ kpa! Wafa nga Ɲanmiɛn Flɛfuɛ nin Ɛndu nin Budafuɛ nin be nga be waan be ti Klistfuɛ’n, ɔ nin be nga bɔbɔ be suman Ɲanmiɛn’n, be wla o su kɛ sɛ be wu’n bé trán nguan nun ekun’n, ɔ ti fanunfanun. Sran’m be kɛn i titi kɛ ɲanmiɛn su lɔ’n ti lika klanman kpa naan alaje’n o lɔ naan kɛ sran’m be kɔ lɔ’n, be su afɛ’n nin ɲrɛnnɛn’n be wie. Kpɛkun be nin be “awlɛn su sran nga be wuli’n” bé kó trán ekun. Sanngɛ kusu lalafuɛ ndɛ yɛ’n, ɔ kpɛn su sran sunman lika. Yɛle kɛ sran’m be kwlaa be kunndɛ kɛ bé kɔ́ ɲanmiɛn su, sanngɛ ɔ leman kun m’ɔ kunndɛ kɛ ɔ́ wú naan w’a wɔ lɔ ɔ. ?Ngue ti yɛ ɔ ti sɔ ɔ?

Ɲanmiɛn yili e kwlaa’n kɛ cɛn wie lele’n, e ja bla. Ɔ maan kɛ ba’m be yo kpɛnngbɛn’n, ɔ ju cɛn kun’n, be kunndɛ kpa kɛ bé já bla annzɛ bian. ?Nɛ́n i ɔ? Sɛ Ɲanmiɛn yili e kɛ cɛn wie lele e wu naan e wɔ ɲanmiɛn su’n, nn saan é kúnndɛ kɛ é wú. Sanngɛ sran’m be sunman lika be kunndɛman kɛ bé wú.

Kannzɛ bɔbɔ ɔ ti sɔ’n, sanngɛ Ɲanmiɛn ndɛ kanfuɛ wie’m be bɔbɔ be waan kɛ e ko tran asiɛ’n su wa kan’n, kpɛkun e su kɔ ɲanmiɛn su lɔ m’ɔ ti e tranwlɛ’n. I wie yɛle Theodore Edgar McCarrick i liɛ’n. Ɔ ti Plɛti’m be su kpɛnngbɛn laa, sanngɛ ɔ te yo sran cinnjin kun. Ɔ o Amlɛnkɛn’m be lika nga be flɛ i Washington, D.C., nun lɔ. I waan: “Mɛn nga e di i asiɛ’n su yɛ’n, nɛ́n i ti yɛ be yili e ɔ. Be yili e kɛ e tran ɲanmiɛn su lɔ.” I kunngba’n, be waan bian kun mɔ laa ɔ ti Amlɛnkɛn’m be lɔ asɔnun nga be flɛ be Evanzeliki’n be anuannzɛ’n i su kpɛn’n, ɔ seli kɛ: “Be yili e kɛ e manman Ɲanmiɛn naan i sin’n e wɔ ɲanmiɛn su [...] afin ɲanmiɛn su lɔ yɛ ɔ ti e tranwlɛ ɔ.”

Be nga be lafi su kɛ, kɛ sran wu’n ɔ kɔ ɲanmiɛn su’n, ndɛ nga ti yɛ be lafi su sɔ’n ti sa kaan sa. George Barna ti anuannzɛ kun mɔ be kunndɛ like nga Ɲanmiɛn sulɛ wafa’m be lafi su’n be su like’n, i su kpɛn. Ɔ wunnin i wlɛ kɛ “dɔ nga su mɛn dilɛ’n, ɔ nin kɛ be ko wu’n mɛn nga bé dí’n, i su akunndan ng’ɔ o ninnge fanunfanun kɛ flimu nin jue nin fluwa mun sa’n be nun’n,” i su yɛ sran kpanngban be lafi ɔ. Nvle nga be flɛ i Floride nun lɔ asɔnun Katoliki’m be wafa kun i su pastɛli kun seli kɛ: “Ɲanmiɛn su lɔ’n, i su like kunngba nga e si i’n yɛle kɛ lɔ yɛ Ɲanmiɛn o ɔ.”

Sanngɛ Biblu’n nun’n, ɲanmiɛn su’n ti like cinnjin kpa kun. ?Ɲanmiɛn Ndɛ’n waan ɲanmiɛn su lɔ’n ti sɛ? ?Be yili sran’m be kɛ be tran ɲanmiɛn su lɔ? ?Sɛ sran’m be kɔ ɲanmiɛn su’n, ngue yɛ bé kó yó i lɔ ɔ?

[Ndɛ kwle, bue 3]

?Ngue ti yɛ sran kpanngban be waan bé kɔ́ ɲanmiɛn su mɔ sanngɛ be nun sunman lika be kunndɛman kɛ bé wú naan b’a wɔ lɔ ɔ?