Maan e si ‘Nyanmiɛn ndɛ’n b’ɔ ti kɛ i Wawɛ’n i tokofi’n sa’n’ i nun junman di
‘An fa Nyanmiɛn ndɛ’n b’ɔ ti kɛ i Wawɛ’n i tokofi’n sa’n.’—EFƐ. 6:17.
1, 2. ?Kɛ mɔ be mian Ɲanmiɛn Sielɛ’n i jasin bofuɛ’m be wun’n, ngue yɛ ɔ fata kɛ e yo ɔ?
ZEZI wunnin kɛ sran kpanngban nga be o lɛ’n, ɔ fata kɛ be nian be lika Ɲanmiɛn ninnge’m be nun. Ɔ maan, ɔ seli i sɔnnzɔnfuɛ’m be kɛ: “Fie’n w’a yo ye, sanngɛ i su junman difuɛ’m b’a sɔn-man. I sɔ’n ti, an se fie i fuɛ’n maan ɔ fa sran wie mun ekun maan be ko di i junman’n.” Sanngɛ nán ndɛ ngbɛn kanlɛ yɛ Zezi kannin ɔn. Afin, kɛ ɔ wieli ndɛ sɔ’n i kan’n, ɔ “flɛli i sɔnnzɔnfuɛ blu-nin-nnyɔn’n,” kpɛkun ɔ sunmannin be kɛ be ko bo jasin fɛ’n, annzɛ sɛ é kwlá sé’n, be ko ‘di fie mɔ w’a yo ye’n i su junman’n.’ (Mat. 9:35-38; 10:1, 5) I sin’n, Zezi “kpali sran ableso-nin-nnyɔn ekun, ɔ sunmannin be nnyɔn-nnyɔn” kɛ be ko di junman kunngba’n.a—Lik 10:1, 2.
2 Andɛ kusu’n, e sa w’a mian Ɲanmiɛn Sielɛ’n i jasin fɛ’n i bofuɛ’m be wun. Afuɛ 2009 nun’n, E Wla Kpɛnlɛ Cɛn’n i bo’n, sran 18.168.323 yɛ be bali ɔ. Be nun sran miliɔn lele 10 tra su be timan Zoova i Lalofuɛ. Ɔ maan, e kwla se kɛ fie’n w’a yo ye naan ɔ fata kɛ e di nun junman. (Zan 4:34, 35) I ti’n, ɔ fata kɛ e srɛ Ɲanmiɛn kɛ ɔ uka junman difuɛ’m be su. ?Sanngɛ wafa sɛ yɛ e kwla yo e srɛlɛ sɔ’n i nuan su sa ɔ? Sɛ e waan é yó i nuan su sa’n, ɔ fata kɛ e yo naan e jasin fɛ’n ba nvlɛ. Kpɛkun juejue su e bo Sielɛ Blɛ’n i jɔ yɛ e kle sran’m be like naan be kaci Zezi i sɔnnzɔnfuɛ.—Mat. 28:19, 20; Mar. 13:10.
3. ?Wafa sɛ yɛ Ɲanmiɛn wawɛ’n uka e kpa naan e jasin fɛ’n bolɛ’n w’a ba nvlɛ ɔ?
3 Like suanlɛ ng’ɔ sinnin lɔ’n kleli e wafa nga Ɲanmiɛn wawɛ’n yɛ ɔ uka e naan y’a ‘kan Nyanmiɛn ndɛ’n yakpa su’n.’ (Yol. 4:31) Wawɛ kunngba’n kwla uka e wie naan y’a yo jasin bofuɛ kpa. E kwla yo like kun naan e jasin fɛ’n w’a ba nvlɛ. Yɛle kɛ like kpa nga Ɲanmiɛn Zoova fa mannin e’n, e si nun junman di. Like sɔ’n, yɛle i Ndɛ’n nga i wawɛ’n ti be klɛli mɔ yɛle Biblu’n. (2 Tim. 3:16) Ɲanmiɛn yɛ maan be klɛli Biblu’n nun ndɛ’n niɔn. I ti’n, sɛ e si Ɲanmiɛn Ndɛ’n nun junman di kpa e jasin fɛ’n i bolɛ’n nun’n, ɔ ti kɛ Ɲanmiɛn wawɛ’n kle e atin sa. Ka naan y’a kan wafa nga e kwla yo sɔ’n i ndɛ’n, maan e dun mmua nian wafa nga Ɲanmiɛn Ndɛ sɔ’n le tinmin’n.
‘Nyanmiɛn Ndɛ’n maan sran’m be kaci’
4. ?Wafa sɛ yɛ Ɲanmiɛn Ndɛ’n kwla kaci sran kun ɔn?
4 Nanwlɛ, Ɲanmiɛn Ndɛ’n le tinmin! (Ebr. 4:12) Sɛ é kwlá sé’n, ndɛ ng’ɔ o Biblu’n nun’n, ɔ la tra tokofi kwlaa nga sran’m be yo’n. Afin, ɔ wɔ ɔ wlu lele ɔ ju be owie i klun lui’m be nun. Ɲanmiɛn Ndɛ’n nun ndɛ nanwlɛ’n kan sran’n i awlɛn’n, kpɛkun ɔ wlu i akunndan’n nun yɛ ɔ yi i sran wafa ng’ɔ ti sakpa’n i nglo. Biblu’n nun ndɛ nanwlɛ’n kwla ɲan ta sran kun i su kpɛkun ɔ yo naan sran sɔ’n kaci. (An kanngan Kolɔsfuɛ Mun 3:10 nun.) Nanwlɛ, Ɲanmiɛn Ndɛ’n kwla kaci sran’m be mɛn dilɛ wafa’n sakpa!
5. ?Wafa sɛ yɛ Biblu’n kwla kle e atin ɔn? ?Yɛ wafa sɛ yɛ i bo’n gúa’n?
5 Asa ekun’n, ngwlɛlɛ ng’ɔ o Biblu’n nun’n, be ɲɛnmɛn i wunsu. Ndɛ ng’ɔ o nun’n kwla kle sran mun wafa nga be kwla tran klanman mɛn tɛ yɛ’n nun’n. Nán dɔ nga su ngunmin yɛ sɛ é kwlá sé’n, Ɲanmiɛn Ndɛ’n kpaja e bo ɔ. Sanngɛ ɔ kpaja e ɲrun lɔ wie. (Jue. 119:105) Kɛ sa’m be tɔ e su annzɛ kɛ é fá ajalɛ janvuɛ tralɛ nun’n, e ɲin su yiyilɛ nun annzɛ junman dilɛ nun, annzɛ kusu e wun wlawlalɛ’n nun yɛ ninnge uflɛ wie’m be nun’n, ɔ uka e kpa liɛ su. (Jue. 37:25; Nya. 13:20; Zan 15:14; 1 Tim. 2:9) Mmla nga be o Ɲanmiɛn Ndɛ’n nun’n, be su falɛ’n yo maan e nin e wiengu mun e tran klanman. (Mat. 7:12; Fil. 2:3, 4) Kɛ e yaci Ɲanmiɛn Ndɛ’n nun m’ɔ kpaja e ɲrun atin’n su’n, e kwla wun wafa nga kɛ e fa ajalɛ’n i bo’n gúa e ɲrun mmua lɔ’n, i wlɛ. (1 Tim. 6:9) Asa ekun’n, Ɲanmiɛn Ndɛ’n kan like nga Ɲanmiɛn waan ɔ́ yó i e ɲrun lɔ’n i ndɛ. I sɔ’n uka e naan e mɛn dilɛ wafa’n ɔ nin like sɔ mɔ Ɲanmiɛn waan ɔ́ yó’n b’a wɔ likawlɛ. (Mat. 6:33; 1 Zan 2:17, 18) Nanwlɛ, sɛ sran kun yaci Ɲanmiɛn i mmla’m be nun naan be kle i atin’n, i mɛn dilɛ’n yo kpa!
6. ?Ɲanmiɛn ninnge’m be nun alɛ’n nga e di’n nun’n, wafa sɛ yɛ Biblu’n le ta kpa ɔ?
6 Sɛ é kwlá sé’n, Ɲanmiɛn ninnge’m be nun alɛ’n nun’n, Biblu’n ti like cinnjin kun. Maan e bu i akunndan wie e nian. Pɔlu waan Ɲanmiɛn ndɛ’n “ti kɛ i Wawɛ’n i tokofi’n sa.” (An kanngan Efɛzfuɛ Mun 6:12, 17 nun.) Sɛ e yiyi Biblu’n nun ndɛ’n nun kpa’n, ɔ kwla uka sran mun naan b’a flo Satan i sa nun. I sɔ tokofi liɛ’n ɔ kunman sran. Ɔ de sran. I ti’n, ɔ fata kɛ e si nun junman di kpa.
Maan e fa Ɲanmiɛn Ndɛ’n e di junman kpa
7. ?Ngue ti yɛ ɔ ti cinnjin kɛ e suan “Nyanmiɛn ndɛ’n b’ɔ ti kɛ i Wawɛ’n i tokofi’n sa’n,” i nun junman dilɛ kpa ɔ?
7 Sɛ sonja kun suɛn i alɛ ninnge’m be nun junman dilɛ naan i sa tɔ nun’n, alɛ nun’n, ɔ kwla fa di junman kpa. I kunngba’n yɛle Ɲanmiɛn ninnge’m be nun alɛ’n. Ɔ fata kɛ e si “Nyanmiɛn ndɛ’n b’ɔ ti kɛ i Wawɛ’n i tokofi’n sa’n,” i nun junman di kpa. Pɔlu klɛli i kɛ: “Mian ɔ nyin di junman kpa maan Nyanmiɛn yo wɔ mo, yo junman difuɛ bɔ nyannzuɛn kun-mɛn i i junman’n ti’n, b’ɔ kan ndɛ nanwlɛ-ɔ ɔ kpɛ-mɛn i wun’n.”—2 Tim. 2:15.
8, 9. ?Ngue yɛ ɔ́ úka e naan y’a wun ndɛ nga Biblu’n kan’n i wlɛ ɔ? An fa sa kun yiyi nun.
8 ?Ngue yɛ ɔ́ úka e naan jasin fɛ’n i bolɛ’n nun’n, kɛ é ‘kán ndɛ nanwlɛ’n y’a kpɛ-mɛn i wun’ ɔn? Ka naan y’a fa Biblu’n nun ndɛ’n y’a ko kle sran uflɛ’n, ɔ fata kɛ e bɔbɔ’n e wun i wlɛ. I ti’n, sɛ be kan Biblu’n nun ndɛ kun’n, ɔ fata kɛ e fa e ɲin e sie i sa nga be ba ndɛ sɔ’n i ɲrun’n nin i sin’n, be su.
9 Maan e fa sunnzun ase kun. Galasifuɛ Mun 5:13 nun’n, Pɔlu seli kɛ: “Aniaan mun, Nyanmiɛn flɛli amun kɛ an nyan amun ti, sanngɛ amun ti bɔ amun nyɛn i sɔ’n ti’n, nán an yo klɔ sran nyoliɛ’n, sanngɛ an bu amun wun kɛ an ti amun wiengu kanga, an uka amun wun klolɛ bɔ an klo amun wun’n ti.” ?Be ti ɲanlɛ benin yɛ Pɔlu kɛn i ndɛ wa ɔ? ?Be ti ɲanlɛ sa tɛ’n nin wie’n be sa nun annzɛ ato ndɛ’m be sa nun annzɛ kusu like uflɛ sa nun ndɛ yɛ ɔ su kan ɔn? Ndɛ nga Pɔlu dun mmua kannin naan w’a kan ndɛ sɔ’n ɔ nin ng’ɔ kɛnnin i kasiɛn’n be kle kɛ be ti ɲanlɛ nga “sannzan nga Nyanmiɛn boli ye mmla’n bɔ y’a fa-man su’n” ti e ɲɛnnin i’n, i ndɛ yɛ ɔ kan ɔn. (Gal. 3:13, 19-24; 4:1-5) Ɔ su kan be ti ɲanlɛ wafa uflɛ mɔ be nga be su Klist su’n be ɲɛn i’n, i ndɛ. Be nga be sili be ti ɲanlɛ sɔ’n i su ye’n, be dili junman mannin be wiengu klolɛ su. Be nga b’a kloman be wiengu’n, be kannin be wiengu wun ndɛ tɛ yɛ be kloli ndɛnngan.—Gal. 5:15.
10. ?Sɛ e waan é wún ndɛ mma kun i bo kpa’n, ngue yɛ ɔ fata kɛ e kunndɛ ɔ? ?Yɛ wafa sɛ yɛ e kwla si ninnge sɔ mun ɔn?
10 Sɛ e waan é wún ndɛ mma kun i bo kpa’n, ɔ fata kɛ e kunndɛ i sin ndɛ wie mun. Yɛle kɛ ɔ fata kɛ e si sran ng’ɔ klɛli Biblu’n nun fluwa sɔ’n, ɔ nin blɛ ng’ɔ klɛli’n, ɔ nin sa nga be juli blɛ sɔ’n nun’n. Sɛ e si like nga ti yɛ be klɛli fluwa sɔ’n, ɔ nin sran’m be nzuɛn’n yɛ be Ɲanmiɛn sulɛ wafa’n, ɔ kwla uka e wie.b
11. ?Kɛ é yíyí Ɲanmiɛn Ndɛ’n nun’n, ngue nun yɛ ɔ fata kɛ e nian e wun su ɔ?
11 Kɛ be se kɛ ‘be kan ndɛ nanwlɛ ɔ be kpɛmɛn i wun’n’ nɛ́n i bo’n ngunmin yɛle kɛ be yiyi Ɲanmiɛn Ndɛ’n nun sɛsɛ su. I wie yɛle kɛ ɔ fata kɛ e nian e wun su naan y’a faman Biblu’n y’a wlaman sran’m be srɛ. Kannzɛ bɔbɔ e kwla fa Ɲanmiɛn Ndɛ’n e fa suan ndɛ nanwlɛ’n i bo kɛ nga Zezi fa yoli i blɛ nga mmusu’m be si Satan sɛli i niannin’n nun sa’n, sanngɛ Biblu’n timan nantiaan mɔ e fa bo e ndɛ tiefuɛ mun ɔn. (Mml. 6:16; 8:3; 10:20; Mat. 4:4, 7, 10) Maan e fa ndɛ yɛ mɔ akoto Piɛli fa wlali e su nun’n i su. I waan: “An bu Krist sran, yɛ an bu i amun Min. An bu sa ti yɛ amun wla o Krist su’n i akunndan sie naan sɛ be usa amun i su sa’n amu’an kwla tɛ su. Sanngɛ an tɛ be su amanniɛn su.”—1 Piɛ. 3:15, 16.
12, 13. ?“Awa ngblingbli” benin yɛ Ɲanmiɛn Ndɛ’n i nun ndɛ nanwlɛ’n kwla bubu be ɔ? An fa sa kun yiyi nun.
12 ?Sɛ e fa ndɛ nanwlɛ ng’ɔ o Ɲanmiɛn Ndɛ’n nun e di junman kpa’n, ngue yɛ ɔ kwla yo ɔ? (An kanngan 2 Korɛntfuɛ Mun 10:4, 5 nun.) Biblu’n nun ndɛ nanwlɛ’n kwla “bu awa ngblingbli mun.” Yɛle kɛ ato ndɛ nga sran’m be kle’n, ɔ nin aeliɛ tɛtɛ mun yɛ ninnge klelɛ nga be yi klɔ sran’m be ngwlɛlɛ’n i nglo’n, ɔ kwla yiyi be bo. E kwla fa Biblu’n e nunnun akunndan “nga b’ɔ maan sran’m be si-man Nyanmiɛn’n.” E kwla fa ninnge nga Biblu’n kle’n e uka sran mun naan be kaci be akunndan’n naan ɔ nin ndɛ nanwlɛ’n b’a ɔ likawlɛ.
13 I wie yɛle bla kun m’ɔ le afuɛ 93 i liɛ’n. Ɔ tran nvle nga be flɛ i Ɛndi’n i nun lɔ. Kɛ ɔ fɛ i bakan nun lele’n be kleli i kɛ sɛ be wu’n be ba ekun. Yɛle kɛ, kɛ bé bá’n, be kaci nnɛn annzɛ klɔ sran uflɛ. Bla sɔ’n ɔ nin i wa kun m’ɔ ɔli nvle uflɛ nun’n be suan Biblu’n nun like lɛtri nun. Kɛ be boli like suanlɛ’n i bo’n, ninnge ng’ɔ suan be Zoova nin ninnge nga Zoova waan ɔ́ yó be’n be su’n, ɔ fali be su. Sanngɛ like nga be kleli i kɛ sɛ be wu’n be ba ekun’n w’a tra ndin kpa i awlɛn’n nun. Ɔ maan kɛ i wa’n kannin sa ng’ɔ ju be nga be wu’n be su’n i ndɛ’n, w’a kplinman su. Ɔ seli kɛ: “Wafa nga amun yiyi Ɲanmiɛn Ndɛ’n nun’n n wunmɛn i wlɛ. Ɲanmiɛn sulɛ wafa kwlaa be waan like kun o e nun m’ɔ wuman ɔn. N lafili su tititi kɛ e wunnɛn’n liɛ’n ɔ wu sanngɛ e wunnɛn’n nun like kun mɔ be kwlá wunmɛn i’n, ɔ wlu wunnɛn uflɛ nun ekun naan ɔ yo sɔ lele kpɛ 8.400.000. ?Ngue ti yɛ i sɔ’n kwla yo ato yɛ? ?Naan Ɲanmiɛn sulɛ wafa’m be sunman lika be bua ato?” ?‘Nyanmiɛn ndɛ’n b’ɔ ti kɛ i Wawɛ’n i tokofi’n sa’n,’ ɔ kwla kaci akunndan sɔ mɔ be bu mɔ w’a tra ndin kpa’n? Kɛ be jrannin Ɲanmiɛn Ndɛ’n su be kokoli ndɛ sɔ’n i su yalɛ ekun m’ɔ dili le mɔcuɛ nɲɔn kun’n, bla’n klɛli i kɛ: “Siɛn’n, n su wun be nga be wuli’n be su ndɛ nanwlɛ’n i wlɛ. Kɛ n si kɛ, kɛ bé wá cɛ́n sran mun’n naan é kwlá wún e awlɛn su sran mun ekun’n, ɔ yo min fɛ kpa. N ra min nuan naan Ɲanmiɛn Sielɛ’n bla ndɛndɛ.”
Maan e fa di junman naan sran’m be fa su
14. ?Kɛ be se kɛ e tutu ndɛ’n i bo maan e ndɛ tiefuɛ’m be fa su’n, i bo’n yɛle benin?
14 Kɛ be se kɛ be fa Biblu’n be di junman kpa jasin fɛ’n i bolɛ’n nun’n, nɛ́n i yɛle i nun ndɛ mma’m be su bolɛ ngunmin. Pɔlu ‘tutuli i bo weiin [naan sran’m be fa su].’ Ɔ fata kɛ e yo sɔ wie. (An kanngan Sa Nga Be Yoli’n 19:8, 9; 28:23 nun.) Sran nga be ko tutu ndɛ’n i bo ko kle i m’ɔ ko kaci’n, “ɔ lafi su kpa ti ɔ fɛ i wla’n gua like kun su.” Kɛ e yiyi like nga Biblu’n kle’n nun e kle sran kun m’ɔ fa su’n, e yo maan ɔ lafi like nga Biblu’n kle sɔ’n su. Sɛ e waan é yó sɔ’n, ɔ fata kɛ e yo naan e ndɛ tiefuɛ’n wun i wlɛ kɛ ndɛ nga e kan’n, ɔ ti nanwlɛ. Wafa nga e kwla yo sɔ’n yɛ é wá wún i siɛn’n niɔn.
15. ?Wafa sɛ yɛ e kwla fa sran’m be ɲin e sie i Biblu’n su’n naan be ɲin w’a yi i ɔ?
15 Maan wafa nga e fa sran’n i ɲin e sie i Ɲanmiɛn Ndɛ’n su’n, ɔ yo naan i ɲin yi i. Kɛ e bo ndɛ mma kun su’n, like nga ti yɛ ɔ ti cinnjin kɛ sran’n si akunndan nga Ɲanmiɛn bu i ndɛ sɔ’n su’n, e fɛ i ɲin sie su. Sɛ e ko usa awlofuɛ’n i kosan naan ɔ ko tɛ su’n, e kwla se kɛ: ‘Maan e nian akunndan nga Ɲanmiɛn bu i ndɛ sɔ’n su’n.’ Annzɛ e kwla usa kɛ: ‘?Ngue ndɛ yɛ Ɲanmiɛn kɛn i sa sɔ’n su ɔ?’ Sɛ e kɛn i sɔ ndɛ liɛ mun naan y’a kanngan ndɛ mma’n nun’n, i sɔ’n kle kpa kɛ Biblu’n fin Ɲanmiɛn. Kpɛkun i sɔ’n yo maan ndɛ tiefuɛ’n i ɲin yi i kpa. I li kɛ é bó jasin fɛ’n é klé sran kun m’ɔ lafi Ɲanmiɛn su sanngɛ ɔ siman like nga Biblu’n kle’n, yɛ ɔ ti cinnjin kɛ e yo sɔ’n niɔn.—Jue. 19:8-11.
16. ?Ngue yɛ ɔ́ úka e naan y’a yiyi ndɛ mma’m be nun kɛ ng’ɔ nin i fata’n sa ɔ?
16 Nán e kanngan ndɛ mma’m be nun sa ngbɛn. E yiyi be nun. Like nga Pɔlu kle’n ‘ɔ tu i bo weiin.’ I sɔ yolɛ’n ti i nzuɛn. (Yol. 17:3) Biblu’n nun ndɛ mma kun sa’n i nun ndɛ cinnjin’m be sɔnnin. Yɛ ndɛ mma kunngun nga be suan like nga e su koko su yalɛ’n i bo’n, ɔ fata kɛ e fa e ɲin sie be su. E kwla bo akunndan ng’ɔ o nun’n i kpɔlɛ wafa uflɛ. Annzɛ kosan nga bé úka awlofuɛ’n naan w’a wun ndɛ cinnjin nga be o nun’n be wlɛ’n, e kwla fa usɛ i. I sin’n maan e tutu ndɛ mma’n i bue sɔ’n i bo e kle i. Kɛ e ko yo sɔ’n, maan e uka e ndɛ tiefuɛ’n naan ɔ wun wafa nga ndɛ sɔ’n kɛn i bɔbɔ ba’n i wlɛ.
17. ?Wafa sɛ yɛ e kwla yiyi Ɲanmiɛn Ndɛ’n nun naan sran’m b’a fa su ɔ?
17 Maan e yiyi Ɲanmiɛn Ndɛ’n nun e kle sran mun naan be fa su. Pɔlu tuli i klun ‘ɔ nin [sran’m] be kannin Nyanmiɛn Ndɛ nga be klɛli’n i wun ndɛ’ blɛblɛblɛ nanwlɛ su. I ti’n be fali su. (Yol. 17:2, 4) Kɛ i sa’n maan e mian e ɲin naan e ndɛ’n kan e ndɛ tiefuɛ’m be awlɛn’n. Maan e fa kosan nga be kle kɛ sran’n i ndɛ lo e kpa’n e usɛ i amanniɛn su naan e ‘wun’ akunndan ng’ɔ o i klun’n. (Nya. 20:5) Nán maan e nuan nun ndɛ’n yo ya. Maan ndɛ nga é kán’n ɔ yo weiin. Ɔ fata kɛ be taka nanwlɛ ndɛ wie’m be su. Yɛ maan e jran Ɲanmiɛn Ndɛ’n su kpa e kan ndɛ’n. Sɛ e fa ndɛ mma kunngba naan e yiyi nun yɛ e fɛ i su sunnzun ase’n, ɔ flunman tra kɛ e kanngan ndɛ mma nɲɔn annzɛ nsan nun ndɛndɛ e lɔngɔ su’n. Sɛ e fa ninnge nga be kle weiin kɛ ndɛ nga e kan’n ti nanwlɛ’n e wla e ijɔlɛ’n nun’n, ɔ kwla yo maan sran’m be wun kɛ ‘ndɛ ng’ɔ fin e nuan fite’n, ɔ ti ngwlɛlɛ ndɛ.’ (Nya. 16:23) Ɔ ju wie’n, ɔ kwla yo cinnjin kɛ e kunndɛ ndɛ uflɛ wie mun e fa uka e ndɛ’n su. Like nga ti yɛ sran kpanngban be fa like klelɛ nga be waan sran le i sin like kun m’ɔ wuman’n su’n, ɔ fatali kɛ bla ng’ɔ le afuɛ 93 mɔ e kɛnnin i ndɛ icra’n, ɔ wun i wlɛ. Lika nga like klelɛ sɔ’n fin’n, ɔ nin like nga ti yɛ Ɲanmiɛn sulɛ wafa sunman be fa su’n, i wlɛ wunlɛ’n yoli cinnjin kpa mɛnnin i naan like nga Biblu’n kle i sa sɔ’n su’n, w’a fa su.c
Maan e si nun junman di titi
18, 19. ?Ngue ti yɛ ɔ fata kɛ e si ‘Nyanmiɛn ndɛ’n b’ɔ ti kɛ i Wawɛ’n i tokofi’n sa’n,’ i nun junman di titi ɔ?
18 Biblu’n waan: “Mɛn ng’ɔ o yɛ’n ɔ cɛ-man.” Klunwifuɛ’m be su yo tɛ kpa tra laa’n. (1 Kor. 7:31; 2 Tim. 3:13) I sɔ’n ti’n, ɔ ti cinnjin kpa kɛ e fa ‘Nyanmiɛn ndɛ’n b’ɔ ti kɛ i Wawɛ’n i tokofi’n sa’n,’ e bubu “awa ngblingbli” mun titi.
19 Nanwlɛ, kɛ Ɲanmiɛn Ndɛ’n mɔ yɛle Biblu’n wo e sa nun mɔ e fɛ i nun ndɛ m’ɔ le ta’n e yiyi like klelɛ ng’ɔ timan su’n i bo m’ɔ kan sran kpa’m be awlɛn’n, ɔ yo e fɛ! Awa ngblingbli wie fi kwlaman ndɛ sɔ’n. I ti’n, “Nyanmiɛn ndɛ’n b’ɔ ti kɛ i Wawɛ’n i tokofi’n sa” mɔ e fa di junman nga Ɲanmiɛn fa mannin e mɔ yɛle Sielɛ’n i jasin bolɛ’n, maan e bo manndrɛn e si nun junman di kpa.
[Ja ngua lɛ ndɛ mun]
a Laa Biblu’n wie’m be nun’n, be waan be ti ‘70,’ yɛ wie’m be waan be ti ‘72.’
b Ninnge kpakpa wie mɔ be kwla uka e naan y’a si Biblu’n i nun fluwa’m be su ndɛ’n yɛle fluwa “ Toute Écriture est inspirée de Dieu et utile ”, Étude perspicace des Écritures. Annzɛ e kwla nian ndɛ nga be flɛ i “Zoova kacimɛn i ndɛ ng’ɔ kan’n,” m’ɔ o Sasafuɛ Tranwlɛ’n nun’n i nun.
c An nian fluwa Que devient-on quand on meurt ? i bue 5-16 nun.
?Ngue yɛ amun suannin ɔn?
• ?Ta benin yɛ Ɲanmiɛn Ndɛ’n le i ɔ?
• ?Ngue yɛ ɔ kwla yo naan kɛ é ‘kán ndɛ nanwlɛ’n y’a kpɛ-mɛn i wun’ ɔn?
• ?Ngue yɛ Biblu’n nun ndɛ’n kwla yo “awa ngblingbli” mun ɔn?
• ?Wafa sɛ yɛ e kwla yo naan jasin fɛ’n i bolɛ’n nun’n kɛ e kan ndɛ’n sran’m b’a fa su kpa ɔ?
[Kuku/Foto, bue 21]
Wafa nga e kwla fa Ɲanmiɛn Ndɛ’n e di junman naan sran’m b’a fa su’n
▪ Maan e yo naan sran’m be ɲin yi Biblu’n
▪ Maan e yiyi ndɛ mma’m be nun
▪ Maan e yiyi nun kpa naan ɔ kan be awlɛn’n
[Foto, bue 20]
Maan e suan ‘Nyanmiɛn ndɛ’n b’ɔ ti kɛ i Wawɛ’n i tokofi’n sa’n,’ i nun junman di kpa.