Like nga Zezi kleli i Ɲanmiɛn i Sielɛ’n su’n

Ɔ “ɔli klɔ dandan nin kanngan’n kwlaa be su, [...] ɔ boli Nyanmiɛn sielɛ jasin fɛ’n kleli be.”—LIK 8:1.

NINNGE nga be ti e cinnjin mɔ be ti e awlɛn su like’n yɛ e klo be ndɛ kanlɛ ɔ. Kɛ nga Zezi bɔbɔ kannin’n sa’n, “ndɛ kwlaa ng’ɔ o sran anwlɛn’n nun’n yɛ ɔ fite i nuan-an.” (Matie 12:34) I nun mɔ Zezi bó i jasin fɛ’n, sɛ e nian ndɛ ng’ɔ kɛnnin i Ɲanmiɛn i Sielɛ’n su’n, e kwla se kɛ ndɛ sɔ’n yoli i awlɛn su like.

?Ngue yɛle Ɲanmiɛn Sielɛ’n? Ɲanmiɛn Sielɛ’n ti awa kun mɔ famiɛn kun yɛ ɔ ti su kpɛn ɔn. Yɛ Ɲanmiɛn bɔbɔ yɛ ɔ takali Sielɛ sɔ’n niɔn. Zezi kannin Sielɛ sɔ’n i ndɛ kpa. I yɛ ɔ yoli i ndɛ’n i ba i jasin fɛ’n i bolɛ’n nun ɔn. Jasin fɛ’n nga Zezi boli’n i su fluwa nnan nga be klɛli’n be nun’n, be kan Sielɛ sɔ’n i ndɛ kpɛ 110 tra su. Sanngɛ Zezi i like klelɛ’n nun’n, w’a fɛmɛn i nuan nun ndɛ sa ngbɛn. Sa ng’ɔ yoli be’n, be kusu be kleli ninnge kpanngban Ɲanmiɛn i Sielɛ’n su. Yɛ be kleli like nga Sielɛ sɔ’n wá yó’n.

?Wan yɛ ɔ ti famiɛn’n niɔn? Sran’m be yoman vote naan b’a sie Ɲanmiɛn Sielɛ’n i su Famiɛn. Sanngɛ Ɲanmiɛn bɔbɔ yɛ ɔ sie famiɛn sɔ’n niɔn. Zezi i like klelɛ’n nun’n, ɔ kleli kɛ i bɔbɔ yɛ Ɲanmiɛn fɛli i kɛ ɔ yo Famiɛn sɔ’n niɔn.

Zezi sili kɛ Biblu’n nun’n, Ɲanmiɛn dun mmua kɛnnin i kɛ Mɛsi kun wá bá naan i Famiɛn Dilɛ liɛ’n su wieman le. (2 Samiɛl 7:12-14; Daniɛl 7:13, 14; Matie 26:63, 64) Nán e wla fi su kɛ Zezi bɔbɔ seli kɛ Mɛsi nga be kɛnnin i ndɛ’n yɛle i bɔbɔ. Ɔ maan Zezi su kle weiin kɛ i yɛ ɔ ti Famiɛn mɔ Ɲanmiɛn sieli i’n niɔn. (Zan 4:25, 26) Kɛ m’ɔ ti sɔ’n, Zezi seli kpɛ sunman kɛ: “Min famiɛn [diwlɛ’n].”—Zan 18:36.

Asa ekun’n, Zezi kleli kɛ sran uflɛ’m be nin i yɛ bé wá dí famiɛn Ɲanmiɛn Sielɛ sɔ’n nun ɔn. (Lik 22:28-30) Ɔ flɛli sran sɔ’m be kɛ “bua akpasua kaan.” Afin, b’a sɔnman. Ɔ seli be kɛ: “Amun Si klo kɛ ɔ́ fá famiɛn diwlɛ’n mán amun.” (Lik 12:32, NW) Biblu’n nun fluwa kasiɛn’n kle kɛ sran nga be nin Klist bé dí famiɛn sɔ’n, be ti sran 144.000. I sɔ’n ti be cenjele like.—Sa Nglo Yilɛ 5:9, 10; 14:1.

?Nin yɛ Sielɛ sɔ’n o ɔ? Zezi seli Pɔnsu Pilati m’ɔ ti Rɔmufuɛ m’ɔ sie nvle’n i kɛ: “Nán mɛn nga nunfuɛ mun yɛ be sieli min famiɛn-ɔn.” (Zan 18:36) Ɲanmiɛn Sielɛ mɔ Klist yɛ ɔ ti su famiɛn’n, ɔ sinman klɔ sran’m be ja nun sieman asiɛ’n. Kɛ Zezi kán Ɲanmiɛn Sielɛ’n i ndɛ’n, ɔ flɛli i kpɛ sunman kɛ “Nyanmiɛn i sielɛ blɛ’n [“ɲanmiɛn su lɔ famiɛn diwlɛ,” Anuãsɛ Fuflɛ].”a (Matie 4:17; 5:3, 10, 19, 20) Ɔ maan, Ɲanmiɛn Sielɛ’n ti awa kun m’ɔ o ɲanmiɛn su lɔ ɔ.

Zezi lafili su kpa kɛ, kɛ like nga ti yɛ ɔ bali asiɛ’n su wa ko wie’n, saan ɔ́ sɛ́ i sin ɲanmiɛn su lɔ. Ɔ seli kɛ ɔ́ kɔ́ lɔ ‘kó síesíe lika’ naan be nga be nin i bé dí famiɛn’n, be to i lɔ.—Zan 14:2, 3.

?Ngue yɛ Sielɛ sɔ’n yo ɔ? Zezi kleli i ndɛ tiefuɛ’m be kɛ be srɛ Ɲanmiɛn be se kɛ: “Maan ɔ sielɛ blɛ’n ju, maan e bɔ e wo asiɛ’n su wa’n e yo ɔ klun sa kɛ be bɔ be o nyanmiɛn su lɔ’n be yo’n sa.” (Matie 6:9, 10) Kɛ é sé yɛ’n, be yo Ɲanmiɛn klun sa’n ɲanmiɛn su lɔ. Ɲanmiɛn Sielɛ’n yɛ Ɲanmiɛn fa yo naan like ng’ɔ sunnzunnin i asiɛ’n i lika’n w’a kpɛn su ɔ. Kɛ ɔ ko yo naan like sɔ’n w’a kpɛn su’n, Ɲanmiɛn i Sielɛ’n wá káci ninnge mun dan kpa asiɛ’n su wa.

?Ngue yɛ Sielɛ sɔ’n yó i asiɛ’n su wa ɔ? Zezi kan kleli sran’m be kɛ Ɲanmiɛn i Sielɛ’n wá núnnún sa tɛ’n. Yɛle kɛ ɔ́ wá núnnún be nga sa tɛ yolɛ’n ti be ajuin’n. (Matie 25:31-34, 46) I sɔ’n kle kɛ ndrunmun nin sa tɛ’n i wafa kwlaa wá wíe. Zezi kleli kɛ be nga be ti “wɛtɛɛfuɛ’n” nin sa kpa yofuɛ’n, ɔ nin aunnvuɛ sifuɛ’n, ɔ nin be “nga sa tɛ fi nunman be anwlɛn nun’n,” ɔ nin be nga be ti ndɛ siesiefuɛ’n, be yɛ bé wá trán asiɛ’n su ɔ.—Matie 5:5-9.

?Lika nga w’a saci’n i nun yɛ sran kpa sɔ’m bé trán ɔn? Cɛcɛ mlɔnmlɔn! Zezi tali nda kɛ Ɲanmiɛn i Sielɛ’n i bo’n, asiɛ’n wá káci lika klanman kpa. Bian kun mɔ be boboli i waka’n su Zezi wun lɛ’n, ɔ seli Zezi kɛ blɛ nga ɔ́ wá dí i famiɛn’n, ɔ bu i akunndan. Zezi tɛli i su kɛ: “Nian, maan n kan ndɛ kun n kle wɔ ndɛkɛn, min nin wɔ é jú Nyanmiɛn i lika klanman’n nun lɔ.” (Lik 23:43, NW) Sakpa, Ɲanmiɛn i Sielɛ’n wá yó maan asiɛ wunmuan’n káci klanman kpa. Ɔ́ wá yó i kɛ i bo bolɛ’n nun Edɛni fie’n sa.

?Like uflɛ benin yɛ Sielɛ sɔ’n wá yó mán sran mun ɔn? Like nga Ɲanmiɛn Sielɛ’n wá yó’n, nán be nda talɛ ngbɛn yɛ Zezi tali ɔ. Like ng’ɔ́ wá yó’n, Zezi kleli i wie. Zezi yoli abonuan sa kpanngban fa yoli sran’m be juejue. Ɔ yoli sɔ fa kleli kɛ, kɛ ɔ́ wá síe sran mun’n, like nga ɔ́ wá yó’n, ɔ́ yó dan trá ngalɛ’n. Zezi i jasin fɛ’n mɔ Ɲanmiɛn maan be klɛli’n, be nun kun nun’n, be waan: “Jésus wlan-wlan Galile akpasua’n kwlaa su, ɔ kle like Nyanmiɛn ndɛ suanlɛ nin i srɛlɛ sua’m be nun, ɔ kan Nyanmiɛn i sielɛ’n i jasin fɛ’n kle be, yɛ ɔ wie tukpacɛ kwlaa b’ɔ o sran’m be wun’n nin be wunnɛn ya’n kwlaa.”—Matie 4:23.

Zezi wieli tukpacɛ wafawafa mun. Ɔ ‘tikeli sran bɔ be wu i nin anyansi’n i nyinma.’ (Zan 9:1-7, 32, 33) Klolɛ su Zezi fɛli i sa kannin bian kun mɔ tukpacɛ kain mɔ yɛle kokowe’n w’a didi i wunnɛn wunmuan’n, naan w’a yo i juejue. (Mark 1:40-42) Kɛ be “fali sutrefuɛ kun b’ɔ kwlá ijɔ-man kpa’n blɛli” Zezi’n, ɔ kleli kɛ ɔ kwla yo maan “sutrefuɛ’m be ti sa yɛ bobofuɛ’m be ijɔ!”—Mark 7:31-37.

Wie’n bɔbɔ kwlá jranman Ɲanmiɛn i Famiɛn m’ɔ sieli’n, i ɲrun. Be klɛli i kpɛ nsan kɛ, Zezi cɛnnin sran wie mɔ be wuli’n, be nguan. Ɔ cɛnnin angbeti bla kun i wa kunngba cɛ’n, i nguan. Asa ekun’n, ɔ cɛnnin talua bla kan m’ɔ le afuɛ 12 i nguan. Yɛ ɔ cɛnnin i janvuɛ kpa Lazali i nguan wie.—Lik 7:11-15; 8:41-55; Zan 11:38-44.

Like kpa ng’ɔ o be nga bé wá trán Ɲanmiɛn i Sielɛ’n i bo’n be ɲrun lɔ’n, kɛ Zezi kɛ́n i ndɛ’n, ɔ sinnin akoto Zan lika seli kɛ: “Siɛn’n Nyanmiɛn i tranwlɛ’n wo sran’m be afiɛn! Ɔ nin bé trán, bé yó i sran, yɛ i bɔbɔ yó be Nyanmiɛn. Ɔ́ núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.” (Sa Nglo Yilɛ 1:1; 21:3, 4) Mɛn kun mɔ i nun’n, be su sunman kun, be su wunman ɲrɛnnɛn kun, afɛ’n su tranman lɛ yɛ be su wuman kun’n, amun bu i akunndan be nian! Kɛ ɔ yo sɔ’n, srɛlɛ nga e srɛ kɛ be yo Ɲanmiɛn klun sa asiɛ’n su wa kɛ be fa yo i nyanmiɛn su lɔ’n sa’n, ɔ́ kpɛ́n su mlɔnmlɔnmlɔn.

?Blɛ benin nun yɛ Ɲanmiɛn i Sielɛ’n táka ɔ? Zezi kleli kɛ i famiɛn’n dilɛ’n i bo bolɛ’n ɔ nin blɛ ng’ɔ kle kɛ ɔ ‘bali’ naan ɔ o lɛ’n bé kpánndan nun. Zezi dun mmua kannin ndɛ wie fa kleli blɛ nga ɔ́ bó famiɛn dilɛ bo’n. I sɔ blɛ’n nun’n, lika’n yó sukusuku. Yɛle kɛ bé dí alɛ, awe kpɛ́n, asiɛ’n kéje, tukpacɛ m’ɔ sa ndɛndɛ’n ɔ nin sa tɛ yolɛ’n bé sɔ́n. (Matie 24:3, 7-12; Lik 21:10, 11) Kɛ ɔ fɛ i afuɛ nga be flɛ i 1914 nun mɔ mɛn wunmuan’n nun alɛ klikli su’n boli i bo’n, ninnge ngalɛ mun nin nzɔliɛ uflɛ wie mun ekun mɔ Zezi kannin be ndɛ’n, be ɲin wa fiteli kpa. Ɔ maan kɛ é sé yɛ’n, Zezi ti Famiɛn. Yɛ ɔ cɛ kaan sa’n, Ɲanmiɛn i Sielɛ wá yó maan Ɲanmiɛn klun sa’n wá kpɛ́n su asiɛ’n su wa.b

?Kɛ Ɲanmiɛn Sielɛ’n ko ba’n ngue yɛ ɔ́ yó mán amun ɔn? Wafa nga amun fa sɔ Zezi i ndɛ’n nun yɛ bé fá wun like nga Ɲanmiɛn Sielɛ’n yó mán amun’n i wlɛ ɔ.

[Ja ngua lɛ ndɛ mun]