Zezi Klist: Wafa nga i ndɛ’n kan amun’n

“Kɛ ɔ ko yo naan [...] b’a nyan nguan’n, naan b’a nyan be ti naan be wun a jɔ be fɔuun’n ti yɛ m bali-ɔ.”—ZAN 10:10.

LIKE cinnjin nga ti yɛ Zezi Klist bali asiɛ’n su’n yɛle kɛ ɔ́ wá mán sran’m be like. W’a baman kɛ be mɛn i like. Ɔ fali jasin fɛ’n ng’ɔ boli’n mannin klɔ sran’m be like kun m’ɔ leman wunsu’n. Yɛle kɛ i ndɛ’n yi Ɲanmiɛn i su nanwlɛ ndɛ’n, ɔ nin i klun sa’n be nglo. Kɛ nga Klistfuɛ miliɔn kpanngban be kwla kan’n sa’n, be nga dɔ nga su be fa ndɛ sɔ’n su’n, be mɛn dilɛ’n kwla yo kpa tra laa’n.a Sanngɛ like cinnjin kpa nga Zezi fali sran’m be ɲin sieli su i jasin fɛ bolɛ nun’n yɛle i nguan mɔ fɔ nunman nun m’ɔ́ fá tó be ti’n. Like sɔ m’ɔ yoli mannin e’n, ɔ lemɛn i wunsu. Wafa nga e sɔ Zezi i ndɛ cinnjin kpafuɛ sɔ’n i nun’n, yɛ maan é dí aklunjuɛ tititi ɔ.

Like nga Ɲanmiɛn nin Klist be mannin’n Zezi si kɛ ɔ fata kɛ ɔ wu ɲrɛnnɛn wie i kpɔfuɛ’m be sa nun. (Matie 20:17-19) Ɔ nin i sɔ ngba’n, i ndɛ ng’ɔ o Zan 3:16 nun mɔ sran’m be si i kpa’n i nun’n, ɔ seli kɛ: ‘Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlin-man, sanngɛ ɔ nyan anannganman nguan.’ Zezi seli ekun kɛ ɔ bali kɛ ‘ɔ́ sú sran, naan ɔ́ fɛ́ i wun kpɔ́ sran sunman be ti.’ (Matie 20:28) ?Ngue ti yɛ Zezi i wun m’ɔ fa kpɔli sran’m be ti’n, ɔ kle kɛ ɔ klo e ɔ?

Ɲanmiɛn i sran klolɛ m’ɔ leman wunsu’n ti’n, ɔ fali ajalɛ naan klɔ sran’m b’a fin sa tɛ m’ɔ sali be’n, ɔ nin i nuan su sa mɔ yɛle fɔ’n nin wie’n, be nun b’a fite. Wafa nga Ɲanmiɛn yoli sɔ’n yɛle kɛ ɔ sunmɛnnin i Wa kunngba cɛ’n asiɛ’n su naan i wie’n ɔ kpɔ e ti. Zezi i klunklo su ɔ kplinnin su. E ti’n, ɔ fɛli i nguan mɔ fɔ nunman nun’n mannin. I sɔ liɛ mɔ be flɛ i e ti kpɔlɛ tɛ’n, yɛ ɔ ti like danfuɛ nga Ɲanmiɛn fa cɛli klɔ sran mun’n niɔn.b Ɔ ti cɛlɛ like kun mɔ maan sran’m be kwla ɲan anannganman nguan ɔn.

Like ng’ɔ ti mɔ amun yo’n ?E ti kpɔlɛ tɛ’n ti amun bɔbɔ amun liɛ wie? Ɔ ti kɛ amun bɔbɔ sa. Maan ɔ yo e kɛ sran kun fa cɛlɛ like mɔ b’a cici i wun’n tinngɛ e ɲrun sa. Nanwlɛ, é wún kɛ like sɔ’n w’a yo e liɛ’n, nn y’a tinngɛ e sa’n y’a sɔ nun. I kunngba’n, Zoova fa e ti kpɔlɛ tɛ’n tinngɛ amun ɲrun. Sanngɛ sɛ amun a tinngɛman be sa nun b’a sɔman nun’n, cɛlɛ like sɔ’n kwlá yoman amun liɛ. ?Wafa sɛ yɛ amun kwla tinngɛ be sa’n nun naan b’a sɔ nun ɔn?

Zezi seli kɛ be nga be “lafi” i su’n yɛ bé ɲán anannganman nguan ɔn. Ɲanmiɛn sulafilɛ’n kan wafa nga e fa di mɛn’n. (Zak 2:26) Zezi i sulafilɛ’n i bo’n yɛle kɛ amun yo naan amun mɛn dilɛ wafa’n, ɔ nin ndɛ ng’ɔ kannin’n yɛ ninnge ng’ɔ yoli’n, be wɔ likawlɛ. Sɛ amun waan bé yó sɔ’n, ɔ fata kɛ amun si Zezi nin i Si be kpa. Zezi seli kɛ: “Kɛ be se kɛ bé nyán anannganman nguan’n, i bo’n yɛlɛ kɛ bé sí wɔ bɔ ɔ kunngba cɛ yɛ a ti Nyanmiɛn’n nin Jésus-Krist bɔ a sunmɛnnin i’n.”—Zan 17:3.

I afuɛ 2.000 yɛ’n, Zezi Klist boli jasin kun. Jasin sɔ’n wa kacili sran miliɔn kpanngban be mɛn dilɛ’n asiɛ’n wunmuan’n su. ?Amun kunndɛ kɛ amún sí i ndɛ sɔ’n i su like kpa ekun? ?Yɛ amun kunndɛ kɛ amún si wafa nga amun nin amun awlɛn su sran’m be kwlaa ɲan su ye tititi’n? Sɛ ɔ ti sɔ’n, Zoova i Lalofuɛ’m bé úka amun aklunjuɛ su.

[Ja ngua lɛ ndɛ mun]