Nán an bo zoova i wawɛ’n i wla

“Nán an bo Nyanmiɛn Wawɛ’n i wla, afin i yɛ Nyanmiɛn fa mannin amun b’ɔ kle kɛ an ti i liɛ [...] nin-ɔn.”—EFƐ. 4:30.

1. ?Ngue yɛ Zoova yoli mannin sran miliɔn kpanngban ɔn? ?Yɛ ngue yɛ ɔ fata kɛ be yo ɔ?

ZOOVA yoli like ngunmin kun mannin sran miliɔn kpanngban mɔ be o mɛn sukusuku yɛ nun. Ɔ yoli maan Zezi Klist m’ɔ ti i Wa kunngba cɛ’n i dunman nun’n, be kwla fa be wun be mɛntɛn i. (Zan 6:44) Sɛ amun fali amun wun mannin Ɲanmiɛn naan amun niɛn i sɔ’n su be nanti’n, amun ti i sɔfuɛ’m be nun kun. Kɛ mɔ be yoli amun batɛmu Ɲanmiɛn wawɛ’n i dunman nun’n ti’n, ɔ fata kɛ amun nian atin nga wawɛ sɔ’n kle amun’n su nanti.—Mat. 28:19.

2. ?Kosan benin yɛ é wá tɛ́ be su ɔ?

² E mɔ e “lua like nga Nyanmiɛn Wawɛ’n klo i’n,” e fa nzuɛn uflɛ’n. (Gal. 6:8; Efɛ. 4:17-24) Sanngɛ akoto Pɔlu man e afɔtuɛ yɛ ɔ wla e su nun kɛ nán e bo Ɲanmiɛn wawɛ’n i wla. (An kanngan Efɛzfuɛ Mun 4:25-32 nun.) Siɛn’n maan e fa e ɲin e sie i akoto’n i afɔtuɛ sɔ’n su kpa. ?Ɲanmiɛn wawɛ’n i wla bolɛ’n ndɛ nga Pɔlu kannin’n i bo’n yɛle benin? ?Ɔ yo sɛ ti yɛ sran kun m’ɔ fɛli i wun mannin Zoova’n, ɔ kwla bo i wawɛ’n i wla yɛ? ?Yɛ ngue yɛ e kwla yo naan y’a boman Zoova i wawɛ’n i wla ɔ?

Pɔlu i ndɛ’n i bo’n

3. ?Ndɛ ng’ɔ o Efɛzfuɛ Mun 4:30 nun’n, i bo’n yɛle benin?

³ Pɔlu i ndɛ ng’ɔ o Efɛzfuɛ Mun 4:30 nun’n, maan e dun mmua fa e ɲin sie su. Ɔ klɛli i kɛ: “Nán an bo Nyanmiɛn Wawɛ’n i wla, afin i yɛ Nyanmiɛn fa mannin amun b’ɔ kle kɛ an ti i liɛ lele fá jú cɛn nga é nyán e ti mlɔnmlɔn nin-ɔn.” Pɔlu kunndɛman kɛ i wiengu Klistfuɛ m’ɔ klo be’n, be nin Ɲanmiɛn be afiɛn’n saci. Zoova i wawɛ’n m’ɔ fa mannin be’n yɛ ɔ ‘kle kɛ be ti i liɛ lele fa ju cɛn nga bé nyán be ti mlɔnmlɔn nin-ɔn.’ Ɲanmiɛn wawɛ’n yɛ be fa sieli be nga be kpali be sieli be ngunmin mɔ be nin Ɲanmiɛn be nanti klanman’n be nzɔliɛ ɔ. Yɛle kɛ i yɛ be fa ‘trali be ase ɔ.’ Andɛ’n be te fa Ɲanmiɛn wawɛ sɔ’n te sie be nzɔliɛ. (2 Kor. 1:22) Nzɔliɛ nga be sie be’n, ɔ kle kɛ be ti Ɲanmiɛn liɛ naan bé kó trán ɲanmiɛn su lɔ. I agualiɛ su’n, be nga bé síe be nzɔliɛ’n, bé yó sran 144.000.—Ngl. 7:2-4.

4. ?Ngue ti yɛ ɔ ti cinnjin kɛ nán e bo Ɲanmiɛn wawɛ’n i wla ɔ?

⁴ Like klikli m’ɔ kwla yo naan Klistfuɛ kun w’a ɲanman Ɲanmiɛn i wunmiɛn m’ɔ fa di i junman’n kun’n, yɛle Ɲanmiɛn wawɛ’n i wla bolɛ’n. Kɛ Davidi nin Bat-Seba be yoli sa tɛ’n, ndɛ nga Davidi kannin’n ɔ kle kɛ Ɲanmiɛn wawɛ’n kwla yaci sran kun i sielɛ. Davidi mɔ sa ng’ɔ yoli’n, ɔ yoli i nsisɔ’n, ɔ kpatali Zoova kɛ: “Nán fuan min maan n jaso ɔ nyrun lɛ, nán yi ɔ Wawɛ b’ɔ o min nun’n.” (Jue. 51:13) Be nga be kpali be sieli be ngunmin’n be nun’n, saan be nga ‘sɛ kunlɛ bɔbɔ yɛ bé kún be’n, be tra be anwlɛn’n,’ yɛ bé ɲán ‘famiɛn kle’n,’ niɔn. Kle sɔ’n ti anannganman nguan nga bé ɲɛ́n i ɲanmiɛn su lɔ’n i nzɔliɛ. (Ngl. 2:10; 1 Kor. 15:53) Sɛ Klistfuɛ nga be wla o su kɛ bé trán asiɛ’n su’n be kunndɛ kɛ be nin Ɲanmiɛn bé nánti klanman tititi’n, ɔ fata kɛ Ɲanmiɛn wawɛ’n sie be wie. Yɛ sɛ be kunndɛ kɛ Ɲanmiɛn jran be ti kpɔlɛ tɛ nga Klist yili’n su man be nguan’n, ɔ fata kɛ wawɛ sɔ’n sie be wie. (Zan 3:36; Rɔm. 5:8; 6:23) Ɔ maan ɔ fata kɛ e kwlaa e nian e wun naan y’a boman Zoova i wawɛ’n i wla.

?Wafa sɛ yɛ Klistfuɛ kun kwla bo Ɲanmiɛn wawɛ’n i wla ɔ?

5, 6. ?Wafa sɛ yɛ Klistfuɛ kun kwla bo Zoova wawɛ’n i wla ɔ?

⁵ E mɔ e ti Klistfuɛ’n, e kwla nian e wun naan y’a boman Ɲanmiɛn wawɛ’n i wla. Sɛ ‘e yo sa nga Nyanmiɛn Wawɛ’n kle e’ tititi’n, e kwla yo sɔ. Afin kɛ e yo sɔ’n like nga klɔ sran konvi sɔ i’n m’ɔ le ta kpa’n, ɔ su tinman e su naan y’a yo ninnge nga Ɲanmiɛn kloman be’n. (Gal. 5:16, 25, 26) Sanngɛ e kwla yaci i sɔ yolɛ. Yɛle kɛ sɛ like nga Ɲanmiɛn Ndɛ’n mɔ i wawɛ’n yɛ maan be klɛli’n bu i fɔ’n yɛ e yo e kɔ blɛblɛblɛ’n, é bó Ɲanmiɛn wawɛ’n i wla.

⁶ Sɛ e yaci like nga Ɲanmiɛn wawɛ’n kle e’n i lɛ naan i asabesin’n yɛ e yo’n, é bó Ɲanmiɛn wawɛ’n i wla. Yɛ é bó Zoova mɔ wawɛ sɔ’n fin i’n, i wla wie. Sɛ e fa e ɲin e sie i Efɛzfuɛ Mun 4:25-32 su’n, ɔ́ klé e wafa ng’ɔ fata kɛ e nanti’n. Kpɛkun ɔ kwla uka e naan y’a boman Ɲanmiɛn wawɛ’n i wla.

Like nga e kwla yo naan y’a boman Ɲanmiɛn wawɛ’n i wla’n

7, 8. Like nga ti yɛ ɔ fata kɛ e yo nanwlɛfuɛ’n, an yiyi nun.

⁷ Ɔ fata kɛ e yo nanwlɛfuɛ. Pɔlu klɛli i Efɛzfuɛ Mun 4:25 nun kɛ: “An yaci ato bualɛ’n, an di nanwlɛ kle amun wiengu, afin e kwlaa e ti sran wunmuan.” Kɛ mɔ ‘e kwlaa e ti sran wunmuan’n’ ti’n, ɔ fataman kɛ e kpɛ e wiengu Klistfuɛ’m be gblɛ. Afin gblɛ kpɛlɛ’n nin ato bualɛ’n ti kun. Sran kwlaa ng’ɔ fɛ i sɔ yolɛ’n cici i ti’n, i agualiɛ su’n ɔ nin Ɲanmiɛn be afiɛn’n sáci mlɔnmlɔn.—An kanngan Nyanndra Mun 6:16-19 nun.

⁸ Gblɛ kpɛlɛ nin gblɛ ninnge yolɛ’n kwla sanngan asɔnun’n nun bo kun yolɛ’n. Ɔ maan ɔ fata kɛ e yo nanwlɛfuɛ kɛ Ɲanmiɛn nuan ijɔfuɛ Daniɛli mɔ b’a kwlá wunman sa tɛ fi nin fɔnlɛ fi i wun’n sa. (Dan. 6:5) Pɔlu mannin Klistfuɛ nga bé kɔ́ ɲanmiɛn su’n be afɔtuɛ. I waan be nga be ti “Krist i wunnɛn’n” i nunfuɛ’n be kwlaa be ti sran wunmuan naan ɔ fata kɛ be nin Zezi i sɔnnzɔnfuɛ nga be kpali be sieli be ngunmin’n, be bo yo kun tititi. Ɔ fata kɛ i sɔ’n ka e klun wie. (Efɛ. 4:11, 12) Sɛ e klo kɛ é trán Mɛn klanman nun asiɛ’n su wa tititi’n, ɔ fata kɛ e di nanwlɛ. Afin i sɔ’n yó maan e nin e niaan nga be o asiɛ wunmuan’n su’n, e bo yó kun.

9. ?Ngue ti yɛ ndɛ ng’ɔ o Efɛzfuɛ Mun 4:26, 27 nun’n, i su falɛ’n ti wie nin nguan ndɛ ɔ?

⁹ Ɔ fata kɛ e jran Satan i ɲrun kekle. Nán maan e mɛn i atin naan ɔ saci e nin Ɲanmiɛn e afiɛn. (Zak 4:7) Ɲanmiɛn wawɛ’n kwla uka e naan y’a jran Satan i ɲrun kekle. Like kun mɔ e kwla yo naan y’a yo sɔ’n, yɛle kɛ nán maan e fa ya ble. Pɔlu klɛli i kɛ: “Sɛ an fa ya’n, nán an yo sa tɛ. Nán an fa ya sɔ’n lele maan wia’n tɔ su. Nán an man mmusu’m be si Satan’n i wluwlɛ.” (Efɛ. 4:26, 27) Wie liɛ’n, sa wie ti sɛ e fa ya’n, ɔ ti su. Sɛ ɔ yo sɔ’n maan e srɛ Ɲanmiɛn e klun lɔ. I sɔ’n úka e naan kɛ é ‘kán ndɛ ɔ, y’a bu i sin naan y’a kan.’ Yɛ e wla gúa ase naan y’a tra e awlɛn naan y’a yoman sa wie m’ɔ kwla bo Ɲanmiɛn wawɛ’n i wla ɔ. (Nya. 17:27) I sɔ’n ti’n, nán maan sran i wun ya ka e klun naan Satan yo naan e yo sa tɛ. (Jue. 37:8, 9) Like kun mɔ e kwla yo naan y’a jrɛn i ɲrun kekle’n, yɛle kɛ sɛ sa tɔ e afiɛn’n, maan e jran Zezi i ndɛ ng’ɔ kannin’n su e siesie i ndɛndɛ.—Mat. 5:23, 24; 18:15-17.

10, 11. ?Ngue ti yɛ ɔ fataman kɛ e wua annzɛ e di ndrunmun ɔn?

¹⁰ Ɔ fataman kɛ e wua annzɛ e di ndrunmun. Awie’n i su ndɛ nga Pɔlu klɛli’n yɛ. I waan: “Sran ng’ɔ wua’n, maan ɔ yaci, ɔ di junman naan ɔ nyɛn i nuan nun aliɛ naan ɔ nyan wie ti sran wie’m be wun nyanman nun.” (Efɛ. 4:28) Sɛ Klistfuɛ kun m’ɔ fɛli i wun mannin Ɲanmiɛn’n ɔ wua’n, ɔ́ ‘gúa [Ɲanmiɛn] nyin ase.’ (Nya. 30:7-9) Nán yalɛ’n ti yɛ sɛ sran kun wua’n, ɔ ti kpa ɔ. Be nga be klo Ɲanmiɛn nin be wiengu’n, be wun i wlɛ kɛ awie wualɛ’n timan kpa mlɔnmlɔn.—Mar. 12:28-31.

¹¹ Nán like ng’ɔ fataman kɛ e yo’n i ngunmin ndɛ yɛ Pɔlu kan ɔn. Ɔ kan like ng’ɔ fata kɛ e yo’n i ndɛ wie. Sɛ e yo like nga Ɲanmiɛn wawɛ’n kle e’n, é mían e ɲin é dí junman naan y’a ɲan e sa ti like y’a nian e awlobofuɛ’m be lika. Yɛ é yó sɔ naan y’a “nyan wie [y’a] ti sran wie’m be wun nyanman nun.” (1 Tim. 5:8) Zezi nin i akoto’m be fali sika be sieli naan b’a fa uka yalɛfuɛ mun. Sanngɛ Zidas Iskariɔti m’ɔ fali Zezi mannin’n, ɔ wuali sika sɔ’n wie. (Zan 12:4-6) Nán Ɲanmiɛn wawɛ’n yɛ ɔ sieli i ɔ. E mɔ Ɲanmiɛn wawɛ’n sie e’n, “sa’n kwlaa nun e klo kɛ é yó sa ng’ɔ ti kpa’n,” kɛ Pɔlu sa. (Ebr. 13:18) Kɛ e yo sɔ’n, e boman Zoova i wawɛ’n i wla.

Like uflɛ nga e kwla yo naan y’a boman Ɲanmiɛn wawɛ’n i wla’n

12, 13. (a) ?Kɛ nga Efɛzfuɛ Mun 4:29 fa kan’n sa’n, ndɛ benin yɛ ɔ fataman kɛ e kan ɔn? (b) ?Yɛ ɔ fata kɛ ndɛ nga e kan’n yo sɛ?

¹² Ɔ fata kɛ e nian e nuan nun ndɛ’n su. Pɔlu seli kɛ: “Nán ndɛ tɛ kun sa fin amun nuan fite, sanngɛ an kan ndɛ ng’ɔ ti kpa bɔ sran ti-ɔ ɔ yo sran’n, naan ɔ yo be kwlaa nga be ti’n be fɛ.” (Efɛ. 4:29) Ndɛ nga nun ekun’n, akoto’n kanman like ng’ɔ fataman kɛ e yo’n i ngunmin i ndɛ. Ɔ kan like ng’ɔ fata kɛ e yo’n i ndɛ kle e wie. Sɛ Ɲanmiɛn wawɛ’n sie e’n, é ‘kán ndɛ ng’ɔ ti kpa bɔ sran ti-ɔ ɔ yo sran’n, naan ɔ yo be kwlaa nga be ti’n be fɛ.’ Asa kusu’n, ɔ fataman kɛ ‘ndɛ tɛ kun sa fin e nuan fite.’ Glɛki nun ndɛ mma nga be kacili i kɛ ndɛ “tɛ’n,” be fa kan ninnge kɛ lomin nin jue nin nnɛn kplɔwa sa’n, be ndɛ wie. Wafa nga i sɔ ninnge kplɔwa’m be yo e kain’n, i kunngba’n yɛ ndɛ ng’ɔ ti tɛ Zoova ɲrun’n, ɔ yo e kain ɔn.

¹³ Ɔ fata kɛ ndɛ nga e kan’n, ɔ kle kɛ e bu sran’m be sran. Yɛ ɔ “yo fɛ kɛ njin sa.” (Kol. 3:8-10; 4:6) Kɛ sran’m be ti e nuan ndɛ’n, ɔ fata kɛ be wun i wlɛ kɛ e nin be nga mun e timan kun. I sɔ’n ti’n, “ndɛ ng’ɔ ti kpa bɔ sran ti-ɔ ɔ yo sran’n,” maan e fɛ i kanlɛ’n e uka sran mun. Kpɛkun maan e kan ndɛ kunngba nga jue tofuɛ’n kannin’n wie. I waan: “Anannganman, wɔ bɔ a ti kɛ yɔbuɛ sa bɔ n talo wɔ’n, wɔ bɔ a ti min defuɛ’n, ndɛ ng’ɔ fin min nuan fite’n, ɔ nin akunndan nga m bu be min klun lɔ’n, maan be jɔ ɔ klun.”—Jue. 19:15.

14. ?Ngue yɛ Efɛzfuɛ Mun 4:30, 31 waan e wlɛ i ase ɔ?

¹⁴ Maan e wla klunwi nin awlɛn fufu’n nin sran wun sacilɛ nin sran kpɔlɛ’n be kwlaa be ase. Kɛ Pɔlu wlali e su nun kɛ nán e bo Ɲanmiɛn wawɛ’n i wla’n, i sin’n ɔ klɛli i kɛ: “An wla klunwi’n, nin anwlɛn fufu’n, nin ya falɛ’n, nin ndɛnngan’n, nin sran wun sacilɛ’n, ɔ nin sran kpɔlɛ’n be kwlaa be ase.” (Efɛ. 4:30, 31) Kɛ mɔ fɔ o e klɔ sran mun e nun’n ti’n, ɔ fata kɛ e kwlaa e mian e ɲin naan e nian akunndan nga e bu nin ninnge nga e yo’n be su. Sɛ e yaci “klunwi’n, nin anwlɛn fufu’n, nin ya falɛ’n” be nun naan be sie e’n, é bó Ɲanmiɛn wawɛ’n i wla. Sɛ e fa sa nga be yoli e’n e sie e klun naan e waan e siesieman e afiɛn’n, é bó Ɲanmiɛn wawɛ’n i wla wie. Sɛ e ɲin kpa Biblu’n i afɔtuɛ’m be su kaan sa bɔɔ’n, e aeliɛ’n kwla yo tɛ. Ɔ maan é fɔ́n Ɲanmiɛn wawɛ’n i wun yɛ é ísɛ i bo nzuɛn’n.

15. ?Sɛ be yo e tɛ’n, ngue yɛ ɔ fata kɛ e yo ɔ?

¹⁵ Ɔ fata kɛ e yo e wiengu ye, e si e wun aunnvuɛ yɛ sa nga be yo e’n e yaci e cɛ. Pɔlu klɛli i kɛ: “An yo amun wun ye, an si amun wun aunnvuɛ, sa nga amun wiengu yo amun’n, an yaci cɛ i kɛ Nyanmiɛn kusu yaci sa nga an yoli i’n cɛli amun Krist ti’n sa.” (Efɛ. 4:32) Kannzɛ bɔbɔ sran wie yoli e sa tɛ naan ɔ yo e ya kpa’n, sanngɛ maan e yaci e cɛ i kɛ Ɲanmiɛn sa. (Lik 11:4) Maan ɔ yo e kɛ e wiengu Klistfuɛ kun w’a kan e wun ndɛ tɛ sa. Kɛ mɔ e kunndɛ kɛ é síesíe e afiɛn’n ti’n, e ko wun e niaan’n i wun. Kpɛkun ɔ se e kɛ e yaci naan sa ng’ɔ yoli w’a yoman kpa. E yaci i sa’n e cɛli i, sanngɛ nɛ́n i ngba ɔ. Saun Yolɛ 19:18 waan: “Nán amun se kɛ sran nga sa w’a yo amun sa ti amún yó i wie. Nán amun fa amun wiengu wun ndɛ be sie amun klun. Ɔ fata kɛ sran kun klo i wiengu kɛ ɔ fa klo i bɔbɔ i wun’n sa. Min yɛ n ti Anannganman nin-ɔn.”

Ɔ fata kɛ e nian e wun kpa

16. Like ng’ɔ kle kɛ ɔ fata kɛ e fa ajalɛ wie mun naan y’a boman Zoova wawɛ’n i wla’n, an fa sa kun yiyi nun.

¹⁶ Kɛ e ngunmin e wo’n, e kwla yo like nga ɔ jɔman Ɲanmiɛn klun’n wie. I wie yɛle kɛ aniaan kun w’a tie jue wie m’ɔ nin Klistfuɛ fataman’n. Biblu’n nun afɔtuɛ mɔ be o fluwa nga “Sran kpa nanwlɛfuɛ b’ɔ si ngwlɛlɛ’n” klɛli be’n be nun’n, w’a nantiman be su. Ɔ maan i akunndan’n w’a sanngan. (Mat. 24:45) Sa sɔ’n ti’n, ɔ srɛ Ɲanmiɛn yɛ i wla kpɛn Pɔlu i ndɛ ng’ɔ o Efɛzfuɛ Mun 4:30 su. Ɔ ta nda kɛ ɔ su yoman like ng’ɔ kwla bo Ɲanmiɛn wawɛ’n i wla’n kun. Kpɛkun ɔ fa ajalɛ kɛ, kɛ ɔ fin lɛ’n, ɔ su tieman jue ng’ɔ nin Klistfuɛ fataman’n kun. Zoova rá aniaan sɔ’n i aeliɛ’n su. I sɔ’n ti’n, maan e nian e wun kpa titi naan y’a boman Ɲanmiɛn wawɛ’n i wla.

17. ?Sɛ y’a nianman e wun kpa naan y’a srɛman Ɲanmiɛn’n, ngue yɛ e kwla yo ɔ?

¹⁷ Sɛ e nian e wun kpa naan e srɛ Ɲanmiɛn’n, yɛ e su yoman sa tɛ wie m’ɔ́ bó Ɲanmiɛn wawɛ’n i wla ɔ. Kɛ mɔ Zoova i wawɛ’n yɛ ɔ fa yo i klun sa’n ti’n, like kwlaa nga wawɛ sɔ’n yo’n ɔ ti i klun su. Ɔ maan sɛ e bo Ɲanmiɛn wawɛ’n i wla’n nn y’a bo Zoova i wla. Kusu e kunndɛman mlɔnmlɔn kɛ é yó sɔ. (Efɛ. 4:30) Klistfuɛ klikli’m be blɛ su’n, Zuifu’m be mmla klefuɛ’m be waan Satan yɛ maan Zezi yo abonuan sa mun ɔn. (An kanngan Mark 3:22-30 nun.) Klist i kpɔfuɛ sɔ’m be ‘sacili Nyanmiɛn Wawɛ’n i dunman.’ Ɔ maan be sa tɛ nga be yoli’n be su yaci cɛman be le. Nán maan e yo sɔ wie le!

18. ?Wafa sɛ yɛ e kwla si kɛ y’a yoman sa tɛ nga Ɲanmiɛn yaci cɛman’n niɔn?

¹⁸ E kunndɛman kɛ é yó sa tɛ nga Ɲanmiɛn yaci cɛman’n. I ti’n, ɔ fataman kɛ e wla fi ndɛ nga Pɔlu kɛnnin i Ɲanmiɛn wawɛ’n i wla bolɛ’n su’n i su. ?Yɛ sɛ e fɔnnin tɛtɛ kpa’n nin? Sɛ e aeliɛ’n yoli e nsisɔ naan asɔnun kpɛnngbɛn’m be ukali e’n, e kwla se kɛ Ɲanmiɛn yacili e sa tɛ’n cɛli e. Kpɛkun e nzuɛn kacilɛ sɔ’n kle kɛ y’a fɔnman Ɲanmiɛn wawɛ’n i wun. Ɲanmiɛn kwla uka e naan y’a boman Ɲanmiɛn wawɛ’n i wla sa fi nun.

19, 20. (a) ?Ninnge benin wie mun yɛ ɔ fataman kɛ e yo be ɔ? (b) ?Ngue yɛ ɔ fata kɛ e ta nda kɛ é yó ɔ?

¹⁹ Ɲanmiɛn fɛ i wawɛ’n yo maan i nvlefuɛ’m be klo be wun, be di aklunjuɛ yɛ be bo ti kun. (Jue. 133:1-3) I sɔ ti’n, nán maan e saci aniaan’m be wun. Annzɛ kusu e kan ndɛ wie naan aniaan’m be ɲin w’a yiman be nga Ɲanmiɛn wawɛ’n sieli be kɛ be nian asɔnun’n su’n, be kun. I sɔ yolɛ’n kwla bo Ɲanmiɛn wawɛ’n i wla. (Yol. 20:28; Zid 8) Sanngɛ maan e yo naan e bo yo kun naan aɲinyiɛ’n tran asɔnun’n nun. Ɔ fataman kɛ e yo naan e bubu e wun nun. Yɛle kɛ nán maan e nin Ɲanmiɛn i nvle’n i nunfuɛ wie mun e san nun naan e yaci wie’m be lɛ. Pɔlu klɛli i kɛ: “Aniaan mun, e Min Jésus-Krist ti ń srɛ́ amun, maan amun nuan sɛ, nán an bubu amun wun nun, sanngɛ maan amun akunndan’n nin amun nɛn’n ɔ yo kun.”—1 Kor. 1:10.

²⁰ Zoova klo kɛ ɔ́ úka e naan y’a bomɛn i wawɛ’n i wla. Kusu ɔ kwla uka e naan y’a yoman sɔ. Maan e srɛ Ɲanmiɛn naan ɔ fɛ i wawɛ’n man e yɛ e ta nda kɛ e su bomɛn i wawɛ’n i wla. Maan e “lua like nga Nyanmiɛn Wawɛ’n klo i’n” titi. Yɛ e kunndɛ kɛ ɔ sie e tititi.

?Amún tɛ́ su sɛ?

• ?Kɛ be se kɛ be bo Ɲanmiɛn wawɛ’n i wla’n, i bo’n yɛle benin?

• ?Ɔ yo sɛ ti yɛ sran kun m’ɔ fɛli i wun mannin Zoova’n, ɔ kwla bo i wawɛ’n i wla yɛ?

• ?Ngue yɛ e kwla yo naan y’a boman Zoova i wawɛ’n i wla ɔ?

[Foto, bue 30]

An siesie amun afiɛn ndɛndɛ.

[Foto, bue 31]

?Amun ijɔlɛ wafa’n ti kɛ ngue sa?