Maan e di alaje Ɲanmiɛn i nvlefuɛ’m be afiɛn
“Ḿ mánmán wɔ anyia dan’n nun.”—JUE. 35:18.
1-3. (a) ?Ngue ti yɛ maan Klistfuɛ wie’m be nin Zoova be afiɛn kwla saci ɔ? (b) ?Nin yɛ Ɲanmiɛn sufuɛ’m be kwla fia ɔ?
JOE nin i yi be ɔli wunmiɛn lolɛ lika kun nun. Kɛ be ɔli nzue wuɛlɛ’n, be wunnin ninnge nglanmannglanman wie mun nin jue fanunfanun mun nzue’n nun. Be wuɛli nzue’n be ɔli be ɲrun kan naan b’a kwla wun ninnge nglanmannglanman nga be o nzue’n i bo lɔ’n. Kɛ be juli lika kun mɔ nzue’n i bo’n ti kploun lɛ’n, Joe i yi’n seli i kɛ: “?E su kɔman mmua yɛ ɔ o lɛ?” Joe tɛli i su kɛ: “Nán srɛ kun ɔ, n si like nga n su yo’n.” Joe waan w’a cɛman ɔ usɛli i wun kɛ: ‘?Naan jue’m be o nin?’ Ɔ wa wunnin like ti m’ɔ wunman jue’m be kun’n. Lableke kun fin nzue’n i bo lɔ, ɔ to i ti i wun lɛ trele. Joe kwlaman like fi yo. Kɛ lableke’n juli i wun koko lɛ’n, kpɛkun yɛ ɔ sɛli i sin ɔli ɔ.
2 Satan i mɛn’n nun ninnge kɛ be ɲin su yiyilɛ’n, nin junman dilɛ’n yɛ aɲanbeun ninnge mun sa’n, Klistfuɛ kun kwla klo be lele maan ɔ wunman kɛ ɔ su wa tɔ sa tɛ’n nun. Joe m’ɔ ti asɔnun kpɛnngbɛn’n waan: “Sa ng’ɔ juli min su’n ti’n, n wa buli be nga e nin be e san nun’n be akunndan. Ɔ ti kɛ nzue wuɛlɛ sa. E wuɛ nzue’n lika nga sa su ɲanman e lɛ’n. Yɛle kɛ lika nga e kwla di alaje lɛ’n, lɛ yɛ ɔ fata kɛ e wɔ ɔ. Lika sɔ’n yɛle asɔnun’n.” Ɔ fataman kɛ mɛn nun ninnge’m be ti’n, e nin asɔnun’n e titi nun. Sɛ amun wun kɛ amun nin asɔnun’n amun a ti nun’n, maan ndɛndɛ kpa amun sa amun sin. Ɔ timɛn i ti’n, amun nin Zoova amun afiɛn sáci mlɔnmlɔn.
3 Andɛ’n, mɛn’n timan kpa kaan sa manman Klistfuɛ mun. (2 Tim. 3:1-5) Satan si kɛ blɛ ng’ɔ le i’n w’a sɔnman kun. Ɔ maan, ɔ miɛn i ɲin naan w’a saci be nga be ɲin kanman ase’n. (1 Piɛ. 5:8; Ngl. 12:12, 17) Sanngɛ e nunman lɛ sa ngbɛn. Afin Zoova mannin e lika kun mɔ e kwla fia nun ɔn. Lika sɔ’n yɛle asɔnun’n.
4, 5. ?Kɛ sran sunman be bu be ɲrun lɔ sa’m be akunndan’n, be wun yo be sɛ? ?Yɛ ngue ti yɛ be wun yo be sɔ ɔ?
4 Like nga mɛn’n kwla yo naan y’a di alaje’n naan e klun w’a jɔ’n, ɔ junman lika fi. Sran sunman be waan sran kunlɛ, nzaje sa yolɛ, yalɛ dilɛ ɔ nin lika’n i fiɛn mɔ w’a yo’n ti’n, be kwlá diman alaje. Kpɛnngbɛn yolɛ’n nin tukpacɛ’n be kle e ngba e yalɛ. Be nga be di junman mɔ be le sua mɔ alaje’n wo be sa nun mɔ be wun kpinndin be kan’n, be usa be wun sɛ ninnge sɔ’m bé cɛ́ o.
5 Sran kpanngban be wla guaman ase. Be nga be buli i kɛ nn aja’n nin ba wulɛ’n be kwla yo naan b’a di alaje’n, be wunnin kɛ kannzu be lafili klenzua kplɔwa su. Be nga be kunndɛli fɔnvɔlɛ asɔnun’m be nun kusu’n, be lakali be nun sunman lika. Ɔ maan afɔtuɛ nin atin nga be kle be lɔ’n, be bumɛn i like kpa kun. Be bu i sɔ afin be asɔnun kpɛnngbɛn’m be aeliɛ’n ti tɛtɛ, kpɛkun like nga be kle be asɔnun’m be nun’n, be takaman Biblu’n su. Ɔ maan sran sunman be bu i kɛ be lemɛn i yowlɛ, naan siansi ninnge nin klɔ sran’m be klun ufue’n su yɛ bé láfi ɔ. I ngba ngalɛ’n ti’n, e blɛ sufuɛ’m be sunman lika be wun jɔman be. Annzɛ kusu be kunndɛman kɛ bé bú sa nga ɔ́ bá be ɲrun lɔ’n i akunndan naan w’a man be ti ya.
6, 7. (a) ?Ngue ti yɛ ngbaciɛ o be nga be su Ɲanmiɛn’n nin be nga be sumɛn i’n, be afiɛn ɔn? (b) ?Ngue yɛ é wá fá e ɲin é síe su siɛn’n niɔn?
6 Ɔ ti weiin kɛ be nga be o Klistfuɛ asɔnun nun’n, ɔ nin be nga be nunman nun’n, ngbaciɛ dan o be afiɛn! E nga e ti Zoova sufuɛ’n, kannzɛ kekle kunngba ng’ɔ o e wiengu’m be su’n yɛ ɔ tɔ e su’n, sanngɛ wafa nga e fa jran sa’m be ɲrun’n, ɔ nin be liɛ’n timan kun. (An kanngan Ezai 65:13, 14 nin Malasi 3:18 nun.) ?Ngue ti yɛ ɔ ti sɔ ɔ? Ɔ ti sɔ afin e liɛ’n, sa ng’ɔ o klɔ sran’m be su andɛ’n Biblu’n yiyi nun klanman kle e. Kpɛkun Biblu’n uka e naan y’a jran sa sɔ’m be ɲrun. I ti’n, e klun titiman e ainman liɛ. Kɛ mɔ e ti Zoova i sufuɛ’n, i sɔ’n sasa e akunndan mɔ sran’m be bu m’ɔ takaman Biblu’n su’n i lika. Kpɛkun ɔ sasa e aeliɛ tɛtɛ nin i bo nzuɛn’n be lika wie. Ɔ maan alaje nga Klistfuɛ nga be o asɔnun nun’n be di’n, be nga’m be dimɛn i sɔ wie.—Eza. 48:17, 18; Fil. 4:6, 7.
7 É wá kán sran wie wie’m be ndɛ. Ndɛ sɔ’n kwla uka e naan y’a wun kɛ sakpasakpa be nga be su Zoova’n be di alaje naan be nga be sumɛn i’n, be siman like nga be flɛ i alaje’n. Asa ekun’n, sran’m be su ndɛ nga é kán’n, ɔ́ yó maan é bú nantilɛ nga e fa nanti’n i akunndan kpa wie. Ɔ́ úka e kusu naan e nian naan sɛ ɔ fata kɛ e nanti Ɲanmiɛn i mmla m’ɔ ti e sasalɛ like’n, be su kpa tra laa o.—Eza. 30:21.
“Ɔ ka kaan naan m’an tu ajalɛ tɛ”
8. ?Ngue yɛ Zoova i sufuɛ’m be yo i tititi ɔ?
8 Kɛ mɛn’n fa boli i bo lele andɛ’n, be nga be su Zoova’n, be mian be ɲin naan be nin be nga be suman Zoova’n b’a sanman nun ngboko. Zoova bɔbɔ kleli kɛ kpɔlɛ wá trɛ́n i sufuɛ nin Satan i sufuɛ liɛ’m be afiɛn. (Bob. 3:15) Kɛ mɔ Ɲanmiɛn i sufuɛ’m be mian be ɲin be nanti i mmla’m be su’n ti’n, be nin be nga’m be like yolɛ’n timan kun. (Zan 17:15, 16; 1 Zan 2:15-17) Sanngɛ nán cɛn kwlaa yɛ i sɔ yolɛ’n ti pɔpɔ ɔ. Afin blɛ wie nun’n, Zoova i sufuɛ wie’m be usali be wun sɛ be wun klɛnlɛ sɔ’n ti ngwlɛlɛ aeliɛ o.
9. Like nga sran ng’ɔ klɛli Jue Mun 73 w’a wunmɛn i wlɛ’n, an yiyi nun.
9 Zoova i sufuɛ kun mɔ usɛli i wun sɛ ajalɛ ng’ɔ fali’n ti kpa’n, yɛle sran ng’ɔ klɛli Jue Mun 73. Ɔ le yó Azafu i afinliɛ nunfuɛ’m be nun kun. Kpɛ sunman’n, ɔ yo kɛ klunwifuɛ’m be di aklunjuɛ yɛ be ɲan be wun sa. Sanngɛ nn be nga be mian be ɲin be su Ɲanmiɛn’n be liɛ’n ɲrɛnnɛn yɛ be wun i ɔ. Like nga ti yɛ ɔ ti sɔ’n jue tofuɛ’n fa usɛli i wun.—An kanngan Jue Mun 73:1-13 nun.
10. ?Ngue ti yɛ kosan nga jue tofuɛ’n mannin su’n, ɔ ti cinnjin man amun ɔn?
10 ?Kosan nga jue tofuɛ’n klɛli be lɛ’n, amun a fa wie b’a usa amun wun le? Sɛ ɔ ti sɔ’n, nán amun bu amun wun fɔ lele. Yɛ nán amun bu i kɛ amun lafiman Ɲanmiɛn su kpa ti ɔ. Nanwlɛ, Zoova i sufuɛ kpanngban be buli i sɔ akunndan’n wie. Be nga Zoova fali be klɛli Biblu’n bɔbɔ’n be o nun wie. (Zɔb 21:7-13; Jue. 37:1; Zer. 12:1; Aba. 1:1-4, 13) Ɔ fata kɛ be nga be klo kɛ bé sú Zoova’n, be bu kosan yɛ’n i akunndan kpa naan be lafi i su tɛlɛ’n su. Kosan sɔ’n yɛ: ?Ɲanmiɛn i sulɛ’n nin i mmla’m be su nantilɛ’n yɛ ɔ ti like kpafuɛ’n niɔn? Kosan sɔ’n nin akplowa nga Satan kpɛli i ba Edɛni fie’n nun lɔ’n, be kɔ likawlɛ. Ɔ wɔ atin nga Ɲanmiɛn le i sie nglo’n nin asiɛ’n. (Bob. 3:4, 5) Ɔ maan ɔ fata kɛ e kwlaa e bu jue tofuɛ’n i kosan sɔ’n i akunndan. ?Ɔ fata kɛ e ɲin blo be nga be yo sa tɛ mɔ sanngɛ be ninnge’m be yo kpa’n be wun? ?Ɔ fata kɛ ‘e tu ajalɛ tɛ’ naan e jaso Zoova wun naan e yo kɛ be sa? I sɔ bɔbɔ yɛ Satan kunndɛ kɛ e yo ɔ.
11, 12. (a) ?Ngue yɛ ɔ ukali jue tofuɛ’n naan w’a siemɛn i ɲin nɲɔnnɲɔn kun ɔn? ?Yɛ ngue yɛ i sɔ’n kle e ɔ? (b) ?Ngue yɛ ɔ ukali wɔ naan a bu jue tofuɛ’n i akunndan kunngba’n wie ɔ?
11 ?Ngue yɛ ɔ ukali jue tofuɛ’n naan w’a siemɛn i ɲin nɲɔnnɲɔn kun ɔn? Ɔ dili i nanwlɛ kɛ ɔ ka kaan sa naan w’a tu ajalɛ tɛ. Sanngɛ kɛ ɔ “wluli Nyanmiɛn i lika’n nun’n” yɛle kɛ, kɛ ɔ nin be nga Ɲanmiɛn sulɛ’n ti be cinnjin’n, be yiali Ɲanmiɛn i tannin sua’n annzɛ i sua’n nun m’ɔ buli like nga Ɲanmiɛn waan ɔ́ yó’n i akunndan’n, yɛ i akunndan’n kacili ɔ. Kɛ ɔ yoli sɔ’n, jue tofuɛ’n wunnin i wlɛ weiin kɛ ɔ kunndɛman kɛ sa ng’ɔ́ wá jú sa tɛ yofuɛ’m be su’n, ɔ ju i su wie. Ɔ wunnin i kɛ like nga be yo’n ɔ nin ajalɛ nga be fa be’n ti’n, be o “atin b’ɔ yo ndrɔn’n nun.” Jue tofuɛ’n wunnin i kɛ be kwlaa nga sa tɛ’n ti be jaso Zoova wun’n, ɔ́ cɛ́ ɔ, ɔ́ cɛ́ ngbɛn saan bé núnnún aliɛ ba kunngba nun weiin, “nyrɛnnɛn wie yɛ ɔ́ kún be-ɔ.” Sanngɛ be nga be su Zoova’n, be liɛ’n, ɔ́ jrán be sin tititi. (An kanngan Jue Mun 73:16-19, 27, 28 nun.) Atrɛkpa’n amun a wun le kɛ ndɛ sɔ’n ti nanwlɛ. Ɔ kwla yo sran sunman be kɛ be yo be klunklo ninnge naan be yaci Ɲanmiɛn i mmla’n su falɛ sa. Sanngɛ ɔ lemɛn i yowlɛ saan i sɔ’n i bo’n gúa tɛ.—Gal. 6:7-9.
12 ?Ngue yɛ jue tofuɛ’n i ndɛ sɔ’n kle e ekun ɔn? Jue tofuɛ’n dili alaje yɛ ɔ ɲannin ngwlɛlɛ Ɲanmiɛn i sufuɛ’m be afiɛn. Kɛ ɔ ɔli kan be su Zoova lɔ’n, ɔ buli akunndan yɛ ɔ wunnin ninnge’m be wlɛ. I kunngba’n andɛ e kwla ɲan afɔtuɛ manfuɛ kpakpa asɔnun aɲia’m be bo lɔ. Kpɛkun lɔ’n be jran Biblu’n su be kle e Ɲanmiɛn i su like m’ɔ kwla yo e ye’n. Ɔ maan nán ngbɛn ti yɛ Zoova wlɛ i sufuɛ’m be fanngan kɛ be wɔ aɲia’m be bo’n niɔn. Afin lɔ’n, bé ɲán wunmiɛn yɛ bé wlá be fanngan naan b’a kwla fa ajalɛ ngwlɛlɛ su.—Eza. 32:1, 2; Ebr. 10:24, 25.
An tra janvuɛ ngwlɛlɛ su
13-15. (a) ?Kekle benin yɛ ɔ tɔli Dina su ɔ? ?Yɛ i sɔ’n kle e sɛ? (b) ?Ngue ti yɛ sɛ e nin e wiengu Klistfuɛ mun e san nun’n, i sɔ’n sasa e ɔ?
13 Sran kun m’ɔ trali mɛn nunfuɛ’m be janvuɛ m’ɔ wunnin i ɲin su fiaan’n, yɛle Zakɔbu i wa Dina. Bo Bolɛ fluwa’n kɛn i kɛ ɔ nin Kanaan bla nga be mantan lika nga i awlofuɛ’m be o lɛ’n, be san nun titi. Zoova i mmla kpakpa nga i sufuɛ’m be nanti su’n, nɛ́n i su wie yɛ Kanaanfuɛ’m be nanti ɔ. Be nga be fufu asiɛ’n be kunndɛ laa ninnge mun’n, be wunnin ninnge wie mun. Ninnge sɔ’m be kle kɛ Kanaanfuɛ’m be mɛn dilɛ’n nun’n, amuɛn sɔlɛ nin sa sukusuku yolɛ yɛ bian nin bla nna nga be fa sɔ amuɛn’n yɛ nzaje sa yolɛ’n, yɛ ɔ ti be ajuin ɔn. (Tul. 23:23; Sau. 18:2-25; Mml. 18:9-12) Maan e sa e sin Dina i ndɛ’n su naan e wun wafa nga janvuɛ ng’ɔ trali’n i bo’n guali’n.
14 Nvle sɔ nun gbanflɛn kun suan Sisɛmu. Be waan “i si i awlo’n nun’n, i yɛ ɔ lɛ nyrun tra be ngba-a.” Gbanflɛn sɔ’n wunnin Dina “ɔ trɛli i, ɔ nin i be lali kekle nun.” (Bob. 34:1, 2, 19) Nanwlɛ ɔ ti ɲrɛnnɛn o! ?Kɛ amun niɛn i sa’n, Dina buli i kaan sa kɛ i sɔ sa liɛ’n jú i su? Atrɛkpa’n, janvuɛ ngbɛn yɛ i waan ɔ nin lɔ gbanflɛn’m bé trá ɔ. W’a bumɛn i kɛ bé kwlá yó i like. Sanngɛ Dina wa wunnin i kɛ kannzu lakalɛ yɛ be lɛkɛli i ɔ.
15 ?Ngue yɛ sa sɔ’n kle e ɔ? Ɔ kle e kɛ e nin be nga be suman Ɲanmiɛn’n, e kwlá traman janvuɛ sa kpɛkun ɔ́ yó kpa lele gúɛ i ti nin i bo. Ɲanmiɛn Ndɛ’n se kɛ “sɛ sran kpa nin sran tɛ be san nun’n, i nzuɛn tɛ’n sɛ i.” (1 Kor. 15:33) Sanngɛ sɛ be nga be lafi Zoova su, mɔ be nanti i mmla’n su mɔ be klo i kɛ e sa’n yɛ be ti e janvuɛ’n, i sɔ’n sásá e. Sɛ e nin sran kɛ ngalɛ sa mun yɛ e san nun’n, é yó ninnge mun ngwlɛlɛ su.—Nya. 13:20.
“E Nyanmiɛn a wunnzin amun”
16. ?Ngue ndɛ yɛ akoto Pɔlu kɛnnin i Korɛnti lɔ asɔnun nunfuɛ wie’m be su ɔ?
16 Klistfuɛ’m be asɔnun’n ukali sran sunman naan b’a yaci be aeliɛ tɛtɛ’n nin ninnge fiɛnfiɛn’m be yolɛ. Fluwa klikli nga akoto Pɔlu klɛli ko mannin asɔnun ng’ɔ o Korɛnti lɔ’n nun’n, wafa nga Klistfuɛ nga be o lɔ’n be kacili be sa naan b’a nanti Ɲanmiɛn i mmla’m be su’n, ɔ kɛnnin i ndɛ. Laa’n, be nun wie’m be kunndɛ bian nin bla sukusuku, be sɔ amuɛn, be kunndɛ bla be yi bo annzɛ bian be wun bo. Be kunndɛ be wiengu yasua annzɛ be wiengu bla, be wua, be nɔn nzan bo, yɛ be yo i wunsu ninnge wie mun ekun. Sanngɛ Pɔlu seli be kɛ: “E Nyanmiɛn a wunnzin amun.”—An kanngan 1 Korɛntfuɛ Mun 6:9-11 nun.
17. ?Wafa sɛ yɛ Biblu’n nun mmla’m be su nantilɛ’n, ɔ kacili sran sunman be mɛn dilɛ’n niɔn?
17 Be nga be lafiman like fi su’n, be leman like m’ɔ kle be atin ɔn. Be bɔbɔ be fa be tiaun ajalɛ, annzɛ be fa be wun be wlɛ i sa sukusuku nga sran’m be yo’n nun wie. Like nga laa Korɛntifuɛ wie’m be yoli ka naan b’a kaci Klistfuɛ’n, i wie yɛ be yo ɔ. (Efɛ. 4:14) Sanngɛ be nga be fa Ɲanmiɛn mmla’n su mɔ be nian su be nanti’n, Ɲanmiɛn Ndɛ’n nin i klun sa’n i silɛ kpa’n ɔ kwla kaci be. (Kol. 3:5-10; Ebr. 4:12) Sran kpanngban mɔ andɛ be o Klistfuɛ asɔnun’n nun’n, be kwla se amun kɛ kwlaa naan b’a suan Zoova i mmla’n kpa naan b’a nanti su’n, be ti sa sukusuku yofuɛ. Sanngɛ b’a wunman be wun fɛ. Saan kɛ be wa fali be wun mantannin Ɲanmiɛn i nvlefuɛ mun mɔ be nantili Biblu’n nun mmla’m be su’n, yɛ be sili alaje ɔ.
18. ?Sa benin yɛ ɔ tɔli talua kun su ɔ? ?I sɔ’n kle sɛ?
18 Be nga laa be yacili Klistfuɛ asɔnun mɔ lɔ yɛ alaje’n o mɔ be fali be klunklo ajalɛ’n, dɔ nga su’n ɔ yo be nsisɔ. I nun mɔ aniaan bla kun m’ɔ suan Tania’n ti bakan’n, ɔ suannin Biblu’n nun like yɛ ɔ ɔli aɲia’m be bo bɔbɔ. Sanngɛ kɛ ɔ ɲannin afuɛ 16, ɔ tuli asɔnun’n nun. I ɲin “bloli mɛn’n nun ninnge’m be su.” Ɲrɛnnɛn nga be tɔli i su’n, be nun wie yɛle wunnzɛlɛ nin kuɛ tulɛ. Siɛn’n i waan: “Kɛ n jasoli asɔnun’n nun’n, afuɛ nsan nga n dili’n i sin’n w’a yoli wi kpa. Lele nin andɛ’n n te fɛ. Like kun mɔ n wla kwlá fiman su’n, yɛle kɛ n kunnin min wa’n. [...] N klo kɛ ń sé gbanflɛn nin talua nga be waan ‘bé kó dí’ mɛn kan’n be kɛ: ‘Nán amun yo sɔ!’ I klikli nun’n ɔ kwla yo fɛ, sanngɛ i sin’n yo wi kpa liɛ su. Mɛn’n leman like kpa kun sa manman e. N si sɔ afin m bɔbɔ n wunnin i. Amun ka Zoova i anuannzɛ’n nun! Mɛn dilɛ wafa sɔ’n i kunngba cɛ yɛ ɔ man aklunjuɛ ɔ.”
19, 20. ?Wafa sɛ yɛ Klistfuɛ asɔnun’n sasa e ɔ?
19 Sɛ amun yaci Klistfuɛ asɔnun m’ɔ sasa amun’n i lɛ be kɔ’n, like ng’ɔ́ yó amun’n, amun bu i sin kan be nian. Sran kpanngban be kunndɛman kɛ bé bú sa ngbɛnngbɛn nga be yoli be kwlaa naan b’a sɔ nanwlɛ ndɛ’n nun’n, i akunndan kaan sa. (Zan 6:68, 69) Sɛ amun fa amun wun mantan amun niaan Klistfuɛ mun’n, ɲrɛnnɛn nin awlabɔɛ ng’ɔ o Satan i mɛn tɛ yɛ’n nun’n, be su tɔman amun su. Sɛ amun fa amun wun mantan be naan amun kɔ aɲia’m be bo titi’n, i sɔ’n kpɛ́n amun wla kɛ Zoova i mmla’m be ti kpa. Yɛ i sɔ’n wlá amun fanngan naan amun a nanti be su titi. Amún kwlá ‘mánmán [Zoova] anyia dan’n nun’ kɛ nga jue tofuɛ’n fa yoli’n sa.—Jue. 35:18.
20 Ɔ ti su kɛ sa kekle sunman mɔ be tɔ Klistfuɛ’m be kwlaa be su’n ti’n, seiin nantilɛ’n kwla yo kekle man be. Wie liɛ’n ɔ fata kɛ sran kun kle be like ng’ɔ fata kɛ be yo’n. ?Ngue yɛ amun nin asɔnun’n nunfuɛ onga’m be kwla yo naan amun a uka amun wiengu Klistfuɛ nga kekle o be su’n niɔn? Like suanlɛ ng’ɔ́ bá lɛ’n, ɔ́ wá klé amun wafa nga amun kwla ‘cici amun wiengu wla maan ɔ yo sran’n.’—1 Tɛs. 5:11.
?Amún tɛ́ su sɛ?
• ?Ngue yɛ sran ng’ɔ klɛli Jue Mun 73 i su sa’n kle e ɔ?
• ?Ngue yɛ Dina i su sa’n kle e ɔ?
• ?Ngue ti yɛ e kwla ɲan alaje asɔnun’n nun ɔn?
[Foto mun, bue 9]
E wuɛ nzue’n lika nga sa su ɲanman e lɛ’n, e ka asɔnun’n nun!