Ijɔlɛ fɛfɛ’n maan be nin sran tran klanman
“Maan amun ijɔlɛ wafa’n yo sran’m be fɛ.”—KOL. 4:6.
1, 2. ?Kɛ mɔ aniaan bian kun i nuan nun ndɛ’n yoli fɛ’n, wafa sɛ yɛ sa ng’ɔ juli’n i bo’n guali ɔ?
ANIAAN kun waan: “Cɛn kun mɔ ḿ bó jasin fɛ’n, n toli bian kun i awlo lɔ. Ya mɔ bian’n fɛli i sa’n ti’n, i nuan bui’n usu sa yɛ i wunnɛn wunmuan’n usu sa tututu. N trali min awlɛn yɛ n fali Ɲanmiɛn Ndɛ’n naan ń yíyí nun ń klé i naan i ya’n kan ase. Sanngɛ laa li nn lomonun w’a luman. Ɔ nin i yi nin i mma’m be kwlaa be kputuli min. N wunnin kɛ ɔ fata kɛ n wɔ. Sanngɛ ka naan m’an wɔ’n, n seli be kɛ m’an baman utre su naan n kunndɛman kɛ ń kɔ́ utre su kusu. Ndɛ ng’ɔ o Galasifuɛ Mun 5:22 nin 23 nun m’ɔ kan Ɲanmiɛn nin sran klolɛ’n, yɛ wɛtɛɛ yolɛ’n ɔ nin be awlɛn tralɛ’n nin be wla mɔ gua ase’n be ndɛ’n, n kanngannin nun n kleli be. Yɛ n wɔli ɔ.
2 “I sin kɛ ḿ bóbó awlo nga be o akpɔ’n i bue kun lɔ’n be anuan’n, n wunnin kɛ bian sɔ’n nin i awlofuɛ’m be trannin be awlo’n i ɲrun lɛ. Be flɛli min ekun. N seli min wun kɛ: ‘?Be wan nzɛ ekun li?’ Nzue flɔlɔ buteli kun o bian’n i sa nun. Ɔ mannin min wie. Kpɛkun ɔ seli min kɛ i like ng’ɔ yoli’n w’a yoman kpa naan i ti’n n yaci. Ɔ yoli min mo nin min Ɲanmiɛn sulafilɛ tankaan’n. E nin be e titili nun klanman.”
3. ?Ngue ti yɛ sran’m be ti’n, ɔ fataman kɛ e fa ya ɔ?
3 Andɛ mɛn’n nun’n, sran’m b’a mian fii. Ɔ maan saan e nin sran wie mɔ b’a fa ya’n é yía. Jasin fɛ’n i bolɛ’n nun bɔbɔ’n, e nin be é yía wie. Kɛ ɔ yo sɔ’n, ɔ ti cinnjin kpa kɛ e “tɛ be su amanniɛn su.” (1 Piɛ. 3:15, 16) Sɛ ɔ ti kɛ ndɛ tɛtɛ nga bian kannin’n ti’n, aniaan nga e kɛnnin i ndɛ’n ɔ fali ya’n, nn bian’n i ya’n w’a kanman ase kɛ ngalɛ’n sa. Atrɛkpa’n nn ɔ fali ya kpa trali laa bɔbɔ. Sanngɛ kɛ mɔ aniaan’n trɛli i awlɛn m’ɔ kannin ndɛ’n wɛtɛɛ su’n, i bo’n guali kpa.
?Ngue yɛ maan e ijɔlɛ’n yo fɛ ɔ?
4. ?Ngue ti yɛ ɔ ti cinnjin kɛ e nuan nun ndɛ’n yo fɛ ɔ?
4 E nin be nga be suman Zoova’n, ɔ nin be nga be su i’n, ɔ nin e awlofuɛ mun e tranlɛ nun’n, ɔ ti cinnjin kɛ e nanti akoto Pɔlu i afɔtuɛ nga su. I waan: “Maan amun ijɔlɛ wafa’n yo sran’m be fɛ, maan amun nuan nun ndɛ’n yo fɛ kɛ njin sa.” (Kol. 4:6) Sɛ e waan e nin sran mun é trán alaje nun’n, ɔ fata kɛ e suɛn i sɔ ijɔlɛ wafa’n.
5. ?Kɛ be se kɛ maan e ijɔlɛ’n yo fɛ’n i bo’n yɛle benin? An fa sunnzun ase be yiyi nun.
5 Nán kɛ mɔ be seli kɛ maan e ijɔlɛ’n yo fɛ’n ti yɛ ndɛ kwlaa ng’ɔ ba e ti nun’n, ɔ fata kɛ e kan ɔn. I li kɛ y’a fa ya’n yɛ ɔ fata kɛ e nian e wun kpa’n niɔn. Ɲanmiɛn Ndɛ’n kle kɛ sran ng’ɔ fa ya m’ɔ nianman ndɛ ng’ɔ kan’n su’n, ɔ siman ngwlɛlɛ. (An kanngan Nyanndra Mun 25:28; 29:11 nun.) Moizi ti sran kun m’ɔ “ti wun ase kanfuɛ dan” ɔn. Asiɛ’n su wa’n, sran fi tomɛn i. Sanngɛ cɛn kun’n, Izraɛlifuɛ’m be Ɲanmiɛn wun jasolɛ’n ti’n, Moizi w’a kwlá trɛmɛn i awlɛn. Ɔ maan, w’a yiman Ɲanmiɛn i ayɛ. Ndɛ ng’ɔ o Moizi i klun’n yɛ ɔ kannin ɔn. Sanngɛ i sɔ’n w’a yoman Zoova fɛ. Kannzɛ Moizi dunnin Izraɛli nvle’n i ɲrun mmua sɔ lele afuɛ 40, sanngɛ Zoova w’a mɛnmɛn i atin kɛ ɔ fa nvle’n wlu mɛn ng’ɔ tali nda kɛ ɔ́ fá mán be’n, i nun.—Kal. 12:3; 20:10, 12; Jue. 106:32.
6. ?Sran ng’ɔ ijɔman ngboko’n i ijɔlɛ wafa’n yo sran’m be sɛ?
6 Ɲanmiɛn Ndɛ’n se kɛ sran kpa ng’ɔ niɛn i wun su i ijɔlɛ’n nun’n, ɔ ijɔman ngboko. Kusu ɔ bu sa sin naan w’a ijɔ. Biblu’n waan: “Sran ng’ɔ ijɔ ngboko’n, ɔ yaci-man sa tɛ yolɛ le. Sran nga kusu b’ɔ ijɔ-man plapla’n, ɔ ti ngwlɛlɛfuɛ.” (Nya. 10:19; 17:27) Sran ng’ɔ ijɔman ngboko’n, i ijɔlɛ wafa’n “yo sran’m be fɛ.” Ndɛ ng’ɔ kan’n, ɔ yo sran ye.—An kanngan Nyanndra Mun 12:18; 18:21 nun.
“Ɔ lɛ blɛ kun bɔ be fa muan be nuan-an, yɛ ɔ lɛ blɛ kun bɔ be fa ijɔ-ɔ”
7. ?Ninnge benin yɛ ɔ fataman kɛ ɔ fin e nuan fite ɔ? ?Yɛ ngue ti ɔ?
7 Be nga e nin be di junman’n, ɔ nin be nga e to be jasin fɛ’n i bowlɛ’n nun lɔ’n, kɛ é kán ndɛ é klé be’n, ɔ fata kɛ e nian e nuan nun ndɛ’n su naan e ijɔlɛ wafa’n yo be fɛ. Asa kusu’n, asɔnun’n nun nin awlo lɔ’n, ɔ fata kɛ e yo sɔ wie. Ndɛ nga be kan ɔn, be bumɛn i sin’n, ɔ kwla saci e nin Ɲanmiɛn e afiɛn, ɔ kwla sanngan e akunndan yɛ ɔ kwla man e tukpacɛ. Sanngɛ kusu ɔ kwla yo e wiengu’m be sɔ wie. (Nya. 18:6, 7) Maan e tra e awlɛn naan fɔ m’ɔ e nun’n ti’n, y’a yiman aeliɛ tɛtɛ’m be nglo. Aeliɛ kɛ e wiengu’m be ndɛ tɛtɛ kanlɛ nin be mma tolɛ nin e wun sran dan yolɛ ɔ nin sran kpɔlɛ’n, i wie fi timan kpa. (Kol. 3:8; Zak 1:20) Aeliɛ tɛtɛ sɔ’m be ti’n, e nin e wiengu mun e afiɛn kwla saci. Kpɛkun e nin Zoova e afiɛn kwla saci wie. Zezi seli kɛ: “Sran kwlaa ng’ɔ fɛ i niaan wie wun ya, bé fɛ́ i kɔ́ jɔlɛ difuɛ’m be ja su. Yɛ sran ng’ɔ kpɛ i niaan wie nzowa’n, bé fɛ́ i kɔ́ jɔlɛ difuɛ dandan’m be ja su. Sran ng’ɔ se i niaan kɛ: ‘Sinnglinfuɛ’n,’ bé fɛ́ i kɔ́ nyrɛnnɛn lika’n i sin’n nun lɔ.”—Mat. 5:22.
8. ?Blɛ benin nun yɛ ɔ fata kɛ e kan e klun ndɛ ɔ? ?Yɛ wafa sɛ yɛ ɔ fata kɛ e kɛn i ɔ?
8 Ndɛ wie o lɛ’n, ɔ fata kɛ e kan. Sɛ aniaan kun kannin ndɛ wie annzɛ ɔ yoli sa wie m’ɔ loli e ngasi naan e kwlá yaci cɛman’n, nán maan ndɛ sɔ’n kaci klunngbɔ. (Nya. 19:11) Sɛ sran wie lo amun ngasi’n, ɔ fata kɛ amun tra amun awlɛn kpɛkun i sin’n, amun fa ajalɛ naan amun siesie ndɛ sɔ’n. Pɔlu klɛli i kɛ: “Nán an fa ya sɔ’n lele maan wia’n tɔ su.” Kɛ mɔ ndɛ’n te sanngan amun akunndan’n, amun kunndɛ blɛ ng’ɔ nin i fata’n naan amun nin sran ng’ɔ yoli amun like’n be kɛn i wɛtɛɛ su. (An kanngan Efɛzfuɛ Mun 4:26, 27, 31, 32 nun.) Amun di ndɛ’n i nanwlɛ kle amun niaan’n. Sanngɛ maan amun nuan nun ndɛ’n yo fɛ naan amun janvuɛ’n w’a tra ekun.—Sau. 19:17; Mat. 18:15.
9. ?Ngue ti yɛ sɛ e waan é síesíe e afiɛn’n, ɔ fata kɛ e ya’n kan ase kwlaa ka ɔ?
9 I yo, i sɔ’n nun’n, ɔ fata kɛ e nin e niaan’n e kan ndɛ sɔ’n blɛ ng’ɔ nin i fata’n su. Afin, “ɔ lɛ blɛ kun bɔ be fa muan be nuan-an, yɛ ɔ lɛ blɛ kun bɔ be fa ijɔ-ɔ.” (Aku. 3:1, 7) Asa kusu’n, “sran ng’ɔ ti sran kpa’n, ɔ bu sa sin naan w’a tɛ ndɛ su.” (Nya. 15:28) I sɔ’n kle kɛ, kɛ ndɛ tɔ’n maan e minndɛ kan ka naan y’a bo su. Afin, sɛ blɛ mɔ sran’n te fa ya’n i nun yɛ e waan é síesíe ndɛ’n, ɔ cɛman naan w’a yo ndɛ w’a tra laa’n. Kusu ɔ nunman nun kɛ e minndɛ ngboko.
Kɛ e yo sran’m be kpa’n e nuan sɛ
10. ?Wafa sɛ yɛ sɛ e yo sran’m be ye’n, ɔ kwla yo naan e nin be y’a koko yalɛ amanniɛn su ɔ?
10 Sɛ e nuan nun ndɛ’n yo fɛ naan e koko yalɛ kɛ ɔ nin i fata’n sa’n, i sɔ’n yó maan e nin e wiengu mun é trán klanman. Sɛ e yo like nga e kwla yo naan e nin e wiengu mun y’a tran klanman’n, i sɔ’n kwla yo naan e nin be y’a koko yalɛ kpa. Like nga e kwla yo naan e nin e wiengu mun y’a koko yalɛ klanman’n, i wie yɛle kɛ e tu e klun e uka be, e cɛ be like yɛ e yo be ye. Like kpa sɔ mɔ e yo be’n, be kwla yo kɛ y’a fa ‘sɛnmlɛn nyannyannyan y’a tiɛn i nuan’ sran kun ti su sa. Ɔ maan, i nzuɛn kpa’n kwla fite. Kpɛkun ɔ kwla yo sran mɔ e nin i kwla koko yalɛ amanniɛn su ɔ.—Rɔm. 12:20, 21.
11. ?Ajalɛ benin yɛ Zakɔbu fali naan w’a siesie i nin Ezau be afiɛn ɔn? ?Kɛ ɔ yoli sɔ, i bo’n guali sɛ?
11 Laa sran Zakɔbu wunnin i sɔ liɛ’n i wlɛ. I niaan bian Ezau m’ɔ nin i be ti nda’n, ɔ fɛli i ɲin cili i. Ɔ maan, kɛ ɔ ko yo naan Ezau w’a kunman Zakɔbu’n, Zakɔbu wanndili. Kpɛkun kɛ ɔ dili afuɛ kpanngban kpa’n, Zakɔbu sɛli i sin. Ezau kusu wɔli i atin kpalɛ nin i sa nun sran 400. Zakɔbu srɛli Zoova kɛ ɔ ukɛ i. I sin’n, ɔ fali nnɛn kpanngban fa sunmannin sran naan be dun mmua fa ko man Ezau. Cɛlɛ like sɔ’n i bo guali klanman. Afin, kɛ ɔ nin Ezau bé yía’n, Ezau i aeliɛ’n w’a kaci. Ɔ maan Ezau wanndili ko tɔli Zakɔbu nun.—Bob. 27:41-44; 32:7, 12, 14-16; 33:4, 10.
Maan e ijɔlɛ klanman’n wla e wiengu’m be fanngan
12. ?Ngue ti yɛ ɔ fata kɛ e kan ndɛ fɛ e kle e niaan mun ɔn?
12 Ɲanmiɛn yɛ Klistfuɛ’m be su i ɔ. Be suman klɔ sran. Sanngɛ e kunndɛ kɛ e wiengu’m be klun jɔ e wun. E nuan nun ndɛ fɛ’n kwla gua be wla ase. Sanngɛ e niaan’m be wun ndɛ tɛ kanlɛ’n kwla yo maan be su sa’m be tin be su. Yɛ ɔ kwla yo maan be usa be wun sɛ Zoova klun te jɔ be wun o. I ti’n maan e tu e klun e kan ndɛ fɛ e wla e niaan’m be fanngan. E “kan ndɛ ng’ɔ ti kpa bɔ sran ti-ɔ ɔ yo sran’n, naan ɔ yo be kwlaa nga be ti’n be fɛ.”—Efɛ. 4:29.
13. (a) ?Kɛ asɔnun kpɛnngbɛn’m bé mán afɔtuɛ’n, ngue yɛ ɔ fataman kɛ be wla fi su ɔ? (b) ?Kɛ asɔnun kpɛnngbɛn’m bé klɛ́ fluwa’n, ngue yɛ ɔ fata kɛ be fa sie be klun ɔn?
13 Asɔnun kpɛnngbɛn mun bɔbɔ yɛ ɔ fata kɛ be yo “wɛtɛɛfuɛ” naan be yo Ɲanmiɛn i bua fa’n i cɛcɛ ɔ. (1 Tɛs. 2:7, 8) Sɛ ɔ o nun kɛ asɔnun kpɛnngbɛn’m be man sran kun i afɔtuɛ’n, ɔ fata kɛ be yo i sɔ “amanniɛn su.” Kannzɛ bɔbɔ be su kan ndɛ kle sran ng’ɔ ‘kpalo be nuan’n,’ ɔ fata kɛ be yo sɔ. (2 Tim. 2:24, 25) Sɛ ɔ o nun kusu kɛ asɔnun kpɛnngbɛn’m be klɛ fluwa ko man asɔnun kpɛnngbɛn uflɛ mun annzɛ be klɛ Betɛli’n i fluwa’n, ɔ fata kɛ ndɛ nga bé wá klɛ́’n, ɔ kle kɛ be klo be wiengu. Kɛ nga Matie 7:12 fa kan’n sa’n, ɔ fata kɛ ndɛ nga bé klɛ́’n, ɔ kle kɛ be bu be wiengu sran.
Awlobo’n nun’n maan e ijɔlɛ’n yo fɛ
14. ?Afɔtuɛ benin yɛ Pɔlu fa mannin be nga be le bla mun ɔn? ?Yɛ ngue ti ɔ?
14 E kwla bu i kɛ ndɛ nga e kan’n, ɔ nin wafa nga e fa yo e ɲrun’n, ɔ nin like nga e yo’n, ɔ yoman e wiengu’m be like fi. I wie yɛle kɛ yasua wie’m be buman wafa nga be nuan nun ndɛ’n kwla yo be yi mun’n, i akunndan kaan sa. Aniaan bla kun waan: “Kɛ min wun fa ya m’ɔ mɛn i nɛn’n su kan ndɛ’n, ɔ kun min srɛ.” Ndɛ yaya nga be kan’n, ɔ le ta bla’m be su tra yasua mun. Yɛ bla’m be wla fiman su sa. (Lik 2:19) I li kɛ bla’n klo sran kun yɛ i ɲin yi i mɔ sran’n yo i sɔ’n, yɛ ndɛ’n wluwlu i wun dan’n niɔn. Pɔlu mannin be nga be le bla’m be afɔtuɛ kɛ: “An klo amun yi mun, nán an yo amun nyrun wiwi be wun.”—Kol. 3:19.
15. An fa sa kun be kle wafa nga ɔ fata kɛ yasua’n yo i yi’n.
15 I sɔ’n nun’n, aniaan bian kun m’ɔ nin i yi be o nun w’a cɛ’n, ɔ fali sunnzun ase kun kleli kɛ, kɛ mɔ ‘yasua’m be si kɛ be yi’m be wunmiɛn’n ju-man be liɛ nun’n,’ ɔ fata kɛ be yo be cɛcɛ. Afin bla’m be ti kɛ like wie m’ɔ sɔman’n sa. I waan: “Sɛ like wie m’ɔ sɔman o ɔ sa nun’n, a trɛmɛn i kekle ngboko. Ɔ timɛn i ti ɔ, ɔ́ bú ɔ sa nun. Kannzɛ bɔbɔ a siesie i ye’n, sanngɛ be si kɛ ɔ buli yɛ be siesieli i ye ɔ. Sɛ yasua’n kan ndɛ yaya kle i yi’n, ɔ kwla yo bla’n i ya kpa. Yɛ kannzɛ ɔ yo sɛ’n, ndɛ sɔ’n i osu’n kwlá nunnunman le.”—An kanngan 1 Piɛr 3:7 nun.
16. ?Ngue yɛ bla kun kwla yo fa ukɛ i awlofuɛ mun ɔn?
16 Ndɛ nga be kan kle yasua’m be kusu’n, ɔ kwla bo be wla annzɛ ɔ kwla wla be fanngan. Sɛ be yi yɛ ɔ kan ndɛ sɔ’n kle be’n, ɔ kwla yo be sɔ wie. “Bla ngwlɛlɛfuɛ’n,” nga i wun ‘fɛ i wla’n guɛ i su’n,’ wafa nga ndɛ ng’ɔ kan’n kwla yo i wun’n, ɔ bu i akunndan. Ɔ yo sɔ afin ɔ klo kɛ bian’n yo i kunngba’n i lika. (Nya. 19:14; 31:11) Nanwlɛ, bla’n kwla kle i awlofuɛ’m be ajalɛ. Ɔ kwla yo ajalɛ tɛ annzɛ kusu yo ajalɛ kpa. Biblu’n waan: “Bla ng’ɔ ti ngwlɛlɛfuɛ’n, ɔ siesie i awlo’n. Bla ng’ɔ ti sinnglinfuɛ kusu’n ɔ saci i awlo liɛ’n.”—Nya. 14:1.
17. (a) ?Wafa sɛ yɛ ɔ fata kɛ ba’m be kan ndɛ kle be si nin be nin ɔn? (b) ?Wafa sɛ yɛ ɔ fata kɛ be nga be ti kpɛnngbɛn’n be kan ndɛ kle ba mun ɔn? ?Yɛ ngue ti ɔ?
17 Ɔ fata kɛ siɛ nin niɛn nin ba’m be nuan nun ndɛ’n, ɔ yo be wiengu’m be fɛ. (Mat. 15:4) Kɛ siɛ nin niɛn’m bé kán ndɛ klé be mma mun’n, maan be kɛn i ngwlɛlɛ su. I liɛ’n be su ‘yoman sa ng’ɔ kun be mma’m be ya’n.’ (Kol. 3:21; Efɛ. 6:4) Kannzɛ ɔ fata kɛ be nin asɔnun kpɛnngbɛn’m be tu ba’m be fɔ’n, sanngɛ ɔ fata kɛ be yo i aɲinyiɛ su. Sɛ be nga be ti kpɛnngbɛn’n be yo sɔ’n, ɔ́ yó pɔpɔ mán gbanflɛn nin talua mun naan b’a kaci be sa naan be nin Ɲanmiɛn be afiɛn w’a sɛ titi. I sɔ’n ti kpa tra kɛ e kle be kɛ be liɛ’n, ɔ leman yowlɛ. Sɛ ɔ yo sɔ’n, ba’m be kusu be kwla bu i sɔ wie. Atrɛkpa’n, gbanflɛn nin talua’m be wla su kpɛnman afɔtuɛ wunmuan nga be mannin be’n su. Sanngɛ bé wlá kpɛ́n wafa nga be kannin ndɛ kleli be’n i su.
Maan ndɛ nga e tu e klun e kan’n yo fɛ
18. ?Wafa sɛ yɛ e kwla yo naan klunngbɔ w’a tranman e klun ɔn?
18 Kɛ be se kɛ be tra be ya’n, nɛ́n i yɛle kɛ be yo be ɲrun’n kɛ like fi nunman lɛ sa. Like nga e kunndɛ’n nɛ́n i ngunmin yɛle kɛ e ya’n mɔ e yimɛn i nglo’n. Afin, sɛ kɛ be nian e’n, e ti bliin sanngɛ e klun lɔ’n e tu kɛ nzue rɛ wie sa’n, i sɔ’n kwla yo maan e akunndan’n sanngan. Ɔ ti kɛ e waan é císan loto nun kpɛkun blɛ kunngba’n nun’n y’a ci flɛn sa. Kɛ ɔ yo sɔ’n loto lo kpa liɛ su. I sɔ’n kwla saci loto’n bɔbɔ. I ti’n, nán e fa sa ng’ɔ yo e ya’n e sie e klun naan i sin’n ɔ kaci klunngbɔ. Kɛ ɔ ko yo naan klunngbɔ w’a tranman e klun’n, ɔ fata kɛ e srɛ Zoova naan ɔ uka e. Maan e yaci Zoova i wawɛ’n nun naan ɔ sie e akunndan’n naan y’a yo i klun sa.—An kanngan Rɔmfuɛ Mun 12:2; Efɛzfuɛ Mun 4:23, 24 nun.
19. ?Ngue yɛ e kwla yo naan y’a ci e ya’n naan i bo’n w’a gua klanman ɔn?
19 Maan e fa ajalɛ naan y’a kwla tra e ya’n. Sɛ amun o lika kun naan be su yo like kun m’ɔ kun amun ya kpa’n, ɔ ti ngwlɛlɛ aeliɛ kɛ amun jaso lɛ. Afin, i sɔ’n maan amun wla’n gúa ase. (Nya. 17:14) Sɛ e nin sran e su koko yalɛ naan ɔ su fa ya’n, maan e mian e ɲin e kan ndɛ’n amanniɛn su. Nán e wla fi su kɛ: “Sɛ sran fa ya kan ndɛ tɛ kle wɔ naan a tɛ i su amanniɛn su’n, i ya’n ɔ jɔ. Jɔlɛ tɛ’n ɔ klɔklɔ ya.” (Nya. 15:1) Sɛ kusu ndɛ nga e kan’n, e kɛn i amanniɛn su mɔ sanngɛ ndɛ’n nin i fataman’n, ɔ ti kɛ y’a wla sin nun yie sa. Sin’n su nuanman le. (Nya. 26:21) Ɔ maan, sɛ ndɛ tɔ naan ɔ yo e kɛ e kwlaman e awlɛn tra’n, ‘nán maan e kan ndɛ ndɛndɛ, yɛ nán maan e fa ya ndɛndɛ.’ Maan e srɛ Zoova naan ɔ uka e naan ndɛ tɛ sa w’a finman e nuan w’a fiteman. Yɛ e srɛ i naan ɔ uka e naan y’a kan ndɛ kpakpa.—Zak 1:19.
Maan e yaci sa cɛ sakpa
20, 21. ?Ngue yɛ ɔ kwla uka e naan y’a yaci e wiengu’m be wun sa’n y’a cɛ be ɔ? ?Yɛ ngue ti yɛ ɔ fata kɛ e yo sɔ ɔ?
20 Ɔ leman sran kun sa m’ɔ kwla se kɛ ɔ si i nuan sie ɔ. (Zak 3:2) E awlofuɛ nin e niaan nga e nin be o asɔnun’n nun’n, kannzɛ ɔ yo sɛ’n, saan cɛn kun bé ló e ngasi. Sɛ ɔ ti sɔ’n, nán maan e fa be wun ya. Sanngɛ like nga ti yɛ be kannin ndɛ ng’ɔ loli e ngasi’n annzɛ sa nga ti yɛ be yoli sɔ’n, maan e bu i akunndan. (An kanngan Akunndanfuɛ’n 7:8, 9 nun.) Atrɛkpa’n, be akunndan w’a sanngan, annzɛ srɛ kun be. Annzɛ kusu, be wun sanndiman be. Kusu ɔ kwla yo ndɛ wie mɔ be su kunndɛ i trawlɛ ɔ.
21 Kannzɛ kekle’n o be su’n, sanngɛ nɛ́n i sɔ’n ti yɛ bé yí be ya’n i nglo ɔ. Sanngɛ sɛ e si kɛ sa kɛ nga e boli be su icra lɛ’n, be o lɛ’n, ɔ kwla uka e. Yɛle kɛ be dunman nun ti’n, e kwla wun like nga ti yɛ be kannin ndɛ wie annzɛ be yoli sa wie m’ɔ nin i fataman’n i wlɛ. Ɔ maan e kwla yaci be wun sa cɛ be. E kwlaa y’a kan ndɛ annzɛ y’a yo sa wie m’ɔ loli e wiengu ngasi ɔ. Kɛ ɔ yo sɔ’n, e lafi su kɛ bé yáci e wun sa’n cɛ́ e. (Aku. 7:21, 22) Zezi seli kɛ sɛ e klo kɛ Ɲanmiɛn yaci e wun sa’n cɛ e’n, ɔ fata kɛ e yaci e wiengu’m be liɛ’n cɛ be. (Mat. 6:14, 15; 18:21, 22, 35) Ɔ maan, nán e sisi e bo yaci selɛ nin sran i wun sa yaci cɛlɛ nun. I sɔ’n yo maan klolɛ tran awlo nunfuɛ nin asɔnunfuɛ’m be afiɛn. Afin klolɛ ‘maan i kwlaa sɔ’n kwla yo ye.’—Kol. 3:14.
22. ?Ngue ti yɛ e ɲin nga e mian naan e nuan nun ndɛ’n w’a yo fɛ’n, ɔ timan ngbɛn ɔn?
22 Kɛ mɛn ng’ɔ o yɛ mɔ ya falɛ’n ti sran’m be nzuɛn’n, ɔ́ kɔ́ i bue nuan’n, nn aklunjuɛ dilɛ nin bo kun yolɛ’n bé yó kekle kɔ́ i ɲrun. Sɛ e nanti Ɲanmiɛn Ndɛ’n su’n, i sɔ’n úka e naan y’a fa e nuan nun ndɛ’n y’a yo sa kpa naan y’a fa yoman sa tɛ. Sɛ e yo sɔ’n, é dí alaje kpa asɔnun’n nin awlo’n nun. Yɛ e nzuɛn’n klé e wiengu’m be kɛ Zoova ti Ɲanmiɛn m’ɔ “di [...] aklunjuɛ” ɔ.—Jue. 104:31.
?Amun kwla yiyi nun?
• ?Ngue ti yɛ ɔ ti cinnjin kɛ e kan sa ng’ɔ tɔ’n i ndɛ blɛ ng’ɔ nin i fata su ɔ?
• ?Ngue ti yɛ ɔ fata kɛ awlofuɛ’m be ‘ijɔlɛ wafa’n yo be wiengu’m be fɛ’ ɔ?
• ?Wafa sɛ yɛ e kwla yo naan y’a yoman like ng’ɔ kwla lo e wiengu ngasi ɔ?
• ?Ngue yɛ ɔ kwla uka e naan y’a yaci e wiengu i wun sa y’a cɛ i ɔ?