Wafa nga e ti kpɔlɛ tɛ’n de e’n
“Sran ng’ɔ lafi i Wa’n su’n, ɔ lɛ Anannganman nguan, sanngɛ sran nga i nyin yi-mɛn’n, ɔ nyan-man nguan le, sanngɛ i wun ya o Nyanmiɛn klun.”—ZAN 3:36.
1, 2. ?Ninnge nga ti yɛ be yili Le Phare de la Tour de Sion i klikli nun’n i kun yɛle benin?
“SƐ SRAN kun bo i ɲin ase suan Biblu’n nun like kpa’n, saan ɔ́ wún kɛ Klist i wie’n ti like cinnjin.” Ndɛ nga be klɛli i fluwa nga i nnan su nun afuɛ nga be flɛ i 1879, Ɔktɔblu anglo’n nun’n yɛ ɔ lɛ. Ndɛ sɔ’n nun’n be fali ndɛ cinnjin yɛ’n be guɛli i bo. Ndɛ sɔ’n yɛle kɛ: “Like kwlaa ng’ɔ kle kɛ Klist i wie’n timan like mɔ be fa cɛli e m’ɔ kpɔ e sa tɛ’n ti’n, maan e kpalo i.”—An kanngan 1 Zan 2:1, 2 nun.
2 Be yili fluwa nga be flɛ i Le Phare de la Tour de Sion afuɛ nga be flɛ i 1879 i Zuie anglo nun. Like nga ti yɛ be yili fluwa sɔ’n, i kun yɛle e ti kpɔlɛ tɛ’n i su like nga Biblu’n kle’n i ti kplilɛ. Sɛ é kwlá sé’n, ndɛ nga be klɛli i nun’n, ɔ yoli kɛ ‘aliɛ [m’ɔ bali] blɛ ng’ɔ ti i nuan su’n i su’ sa. Afin kɛ afuɛ nga be flɛ i 1900 wá jú’n, sran kpanngban mɔ be tɔn be wun suɛn kɛ be ti Klistfuɛ’n, b’a lafiman su kpa kun kɛ Zezi i wie’n kwla kpɔ e sa tɛ’m be ti. (Mat. 24:45) Blɛ sɔ’n nun’n, sran kpanngban be lafi akunndan nga be waan klɔ sran fin ndo’n su. I sɔ akunndan liɛ’n kusu nin kɛ fɔ nunman klɔ sran nun laa’n, be kɔman likawlɛ. Be nga be waan sran fin ndo’n, be waan klɔ sran bɔbɔ sa’n i ngunmin yo kpa kɔ i ɲrun. Ɔ maan ɔ nunman nun kɛ be kpɔ i ti. I sɔ’n ti’n, afɔtuɛ nga akoto Pɔlu mannin Timote’n, ɔ nin i fata klanman. I waan: “Fa sa nga be kan kleli wɔ’n su kpa. Ndɛ ngbɛn-ngbɛn b’ɔ nin Nyanmiɛn ndɛ’n ti-man kun’n, nin akplowa nga be bɔ be bu be wun kɛ be si sa’n be si’n, nán sie ɔ su be su. Sran wie’m be bu be wun kɛ be si sa, ɔ maan be lafi-man Nyanmiɛn su kpa kun.”—1 Tim. 6:20, 21.
3. ?Kosan benin yɛ é wá kókó be su yalɛ siɛn’n niɔn?
3 Ɔ ti weiin kɛ amun a ta nda kɛ amun su yoman like nga mɔ maan amun su kwlá ‘lafi-man Nyanmiɛn su kpa kun’n.’ I sɔ’n ti’n, ɔ ti kpa kɛ e bu kosan nga’m be akunndan. Yɛle kɛ: ?Ngue ti yɛ ɔ fata kɛ be yi tɛ be fa kpɔ min ti ɔ? ?Tɛ sɔ’n i yilɛ’n yoli sɛ mannin Zoova nin Zezi? ?Like ɲɛnmɛn sɔ mɔ maan Ɲanmiɛn i ya’n kwla to fuan min’n, wafa sɛ yɛ n kwla ɲan su ɔ?
Ɲanmiɛn i ya’n kwla to fuan e
4, 5. ?Ngue yɛ ɔ kle kɛ Ɲanmiɛn i ya’n o mɛn tɛ yɛ’n i su ɔ?
4 Biblu’n nin sa nga be juli klɔ sran’m be su’n, be kle kɛ, kɛ ɔ fɛ i blɛ nga Adam yoli sa tɛ lele andɛ’n, klɔ sran’m be “wun ya o” Ɲanmiɛn klun. (Zan 3:36) I sɔ liɛ’n i ɲin fite wulɛ mɔ sran’m be kwlaa be wu’n i nun. Satan i sielɛ liɛ’n w’a sasaman klɔ sran mun ɲrɛnnɛn nga be tɔ be su’n be lika kaan sa. Kusu klɔ sran’m be awa kun sa w’a kwlá faman ninnge nga be mian sran’m be sa’n, w’a manman be. (1 Zan 5:19) Ɔ maan andɛ nin andɛ’n, alɛ’n nin sa tɛtɛ’n yɛ yalɛ’n be te o klɔ sran’m be su.
5 I sɔ’n kle weiin kɛ Zoova i sa nunman mɛn tɛ nga e o nun andɛ yɛ’n su. Pɔlu seli kɛ: “Sran’m be nyin b’ɔ yi-man Nyanmiɛn’n nin sa tɛtɛ’n kwlaa bɔ be yo’n ti, Nyanmiɛn kle be kɛ i ya’n w’a jaso.” (Rɔm. 1:18-20) Ɔ maan, be nga be yo like nga Ɲanmiɛn klomɛn i mɔ be kaciman be sa’n, saan bé ísa be sa tɛ’n i bo nzuɛn’n. Andɛ’n, jasin fɛ’n nga e bo m’ɔ kan jɔlɛ nga Zoova wá dí Satan i mɛn’n, ɔ yi Ɲanmiɛn i ya’n i nglo. I sɔ’n, i ɲin fite e Biblu’n i akua sunman be nun.—Ngl. 16:1.
6, 7. ?Junman benin yɛ Klistfuɛ nga be kpali be sieli be ngunmin’n be dun e ɲrun mmua di i andɛ ɔ? ?Yɛ ngue yɛ be kwlaa nga be te o Satan i mɛn’n nun’n be kwla yo ɔ?
6 ?I sɔ’n kle kɛ be nga be waan bé fín Satan i sielɛ’n bo bé fíte naan Ɲanmiɛn klun jɔ be wun’n, be lemɛn i yowlɛ kun? Cɛcɛ, afin atin la nun. Yɛle kɛ be nin Zoova be bo kwla sɛ. Klistfuɛ nga be kpali be sieli be ngunmin’n mɔ be ti ‘Krist i ja nun jranfuɛ’n,’ be dun junman kun i ɲrun mmua. Junman sɔ’n maan be se asiɛ’n sufuɛ’m be kwlaa be kɛ: “Maan Nyanmiɛn siesie amun nin i bɔbɔ amun afiɛn.”—2 Kor. 5:20, 21.
7 Akoto Pɔlu seli kɛ Zezi ‘de e Nyanmiɛn i ya b’ɔ́ wá jáo’n nun.’ (1 Tɛs. 1:10) Zoova i ya’n i nglo yilɛ kasiɛn sɔ’n nun’n, ɔ́ núnnún sa tɛ yofuɛ nga be kaciman be nzuɛn’n mlɔnmlɔnmlɔn. (2 Tɛs. 1:6-9) ?Wan yɛ ɔ́ fín i sɔ nun fíte ɔ? Biblu’n waan: “Sran ng’ɔ lafi i Wa’n su’n, ɔ lɛ Anannganman nguan, sanngɛ sran nga i nyin yi-mɛn’n, ɔ nyan-man nguan le, sanngɛ i wun ya o Nyanmiɛn klun.” (Zan 3:36) Be kwlaa nga be ɲin o su mɔ be lafi Zezi nin e ti kpɔlɛ tɛ’n be su’n, kɛ mɛn nga wíe’n, Ɲanmiɛn su nunnunman be i ya’n i nglo yilɛ kasiɛn’n nun.
Wafa nga e ti kpɔlɛ tɛ’n de e’n
8. (a) ?Like ɲɛnmɛn benin yɛ be fa sieli Adam nin Ɛvu be ɲrun ɔn? (b) ?Wafa sɛ yɛ Zoova kleli kɛ sa sɛsɛ yolɛ nun’n, ɔ leman wunsu ɔ?
8 Kɛ bé yí Adam nin Ɛvu’n, fɔ nunman be nun. Sɛ ɔ ti kɛ be ɲin yili Ɲanmiɛn’n, nn be mma’m be yili asiɛ’n i piɛ. Yɛ nn be kwlakwla be trannin aklunjuɛ nun mɛn klanman’n nun. Sanngɛ e si nin e nin klikli’m be ɲinfu b’a faman Ɲanmiɛn i mmla’n su. Ɔ maan be fali anannganman wie’n be boli be sannzan. Kpɛkun be fuannin be mɛn klanman nga i klikli nun’n ɔ o lɛ’n i nun. Kɛ ɔ fɛ i blɛ nga Adam nin Ɛvu be wuli ba’n, sa tɛ’n sali klɔ sran’m be kwlaa. Kpɛkun yasua nin bla klikli’m be yoli kpɛnngbɛn yɛ be wuli. I sɔ’n kle kɛ Zoova di nanwlɛ. Asa ekun’n, ɔ ti Ɲanmiɛn m’ɔ ti sɛsɛfuɛ ɔ. Afin Zoova wlali Adam su nun kɛ sɛ ɔ di waka mma nga i waan nán be di’n, ɔ́ wú. Kusu ɔ yoli sɔ sakpa.
9, 10. (a) ?Ngue ti yɛ Adam i osu’n nunfuɛ’m be wu ɔ? (b) ?Wafa sɛ yɛ e kwla fin anannganman wie’n i sa nun e fite ɔ?
9 E mɔ e ti Adam mma mun’n, fɔ’n sali e. Ɔ maan e yo sa tɛ kpɛkun i agualiɛ su’n e wu. Kɛ Adam yó sa tɛ’n nn sɛ é kwlá sé’n, e o i klun. Ɔ maan sannzan nga be fali wie’n be boli i’n, ɔ wɔ e wie. Sɛ ɔ ti kɛ Zoova waan ɔ yiman e ti kpɔlɛ tɛ naan ɔ́ núnnún kpɛnngbɛn yolɛ nin wie’n, nn w’a diman nanwlɛ. Pɔlu kannin e kwlaa e ndɛ seli kɛ: “E si kɛ mmla’n ti Nyanmiɛn Wawɛ’n i like, sanngɛ n liɛ’n, n ti klɔ sran, sɛ sa tɛ b’ɔ ti min nzuɛn’n ti sran’n, wuun ń sé kɛ b’a yo min atɛ i sa nun. Eee, n ti nyrɛnnɛnfuɛ dan! ?Wan yɛ ɔ́ tú min nzuɛn nga b’ɔ maan ń wú’n, i su-ɔ?”—Rɔm. 7:14, 24.
10 Saan Ɲanmiɛn Zoova yɛ ɔ kwla kpɛ mmla naan w’a jran su w’a yaci e sa tɛ mun w’a cɛ e naan y’a fin anannganman wie’n i nun y’a fite ɔ. Like ng’ɔ fa yoli i sɔ’n, yɛle i awlɛn su ba m’ɔ yoli naan be wu i asiɛ’n su wa kɛ klɔ sran mɔ fɔ nunmɛn i nun’n sa’n. I liɛ’n ɔ́ kwlá fɛ́ i nguan’n kpɔ́ e ti. Zezi w’a yoman kɛ Adam sa. Fɔ kaan sa w’a tranman i nantilɛ’n nun le. I liɛ’n, “w’a yo-man sa tɛ le.” (1 Piɛ. 2:22) Ɔ maan sɛ Zezi waan ɔ́ wú ba nga fɔ nunman be nun’n nn ɔ wuli be. Sanngɛ w’a yoman sɔ. Ɔ kplinnin su kɛ Ɲanmiɛn i kpɔfuɛ’m be kun i naan Ɲanmiɛn w’a sɔ Adam i osu’n nunfuɛ mɔ be ti sa tɛ yofuɛ’n be nun kɛ i mma mun sa. Naan be nga be lafi i su’n b’a kwla ɲan anannganman nguan. Ɲanmiɛn Ndɛ’n yiyi nun kɛ: “Nyanmiɛn’n ti kun, yɛ kpatafuɛ ng’ɔ jran sran’m be nuan kpata Nyanmiɛn’n ti kun kusu, yɛlɛ Krist-Jésus, ɔ ti sran. Ɔ fɛ i wun mannin kɛ ɔ́ kpɔ́ sran’m be kwlaa be ti.”—1 Tim. 2:5, 6.
11. (a) ?Sunnzun ase benin yɛ e kwla fa yiyi e ti kpɔlɛ tɛ’n i ye ng’ɔ yo e’n i nun ɔn? (b) ?Wan mun yɛ be ɲan e ti kpɔlɛ tɛ’n i su ye ɔ?
11 Wafa nga e ti kpɔlɛ tɛ’n de e’n, e kwla fa sa nga e yiyi nun. Yɛle kɛ sran kun fɛli i sika’n ngba mannin bian kun kɛ ɔ fa sie. Kpɛkun bian sɔ’n w’a di sika sɔ’n. Ɔ maan sran sɔ’n w’a bo kalɛ. B’a tra bian sɔ’n b’a wlɛ i bisua. ?Sanngɛ sika’n i fuɛ’n i li? Bablu kun sa nunmɛn i sa nun kun. I sa w’a mian. Saan bian wie mɔ ti sikafuɛ nin klun ufuefuɛ’n yɛ ɔ kwla ukɛ i kpɛkun ɔ yi i sika’n kwlaa mɛn i ɔ. Kpɛkun ɔ tannin i kalɛ’n niɔn. I kunngba’n, Ɲanmiɛn Zoova nin i Wa m’ɔ klo i kpa’n, be toli Adam i osu’n nunfuɛ mun. Kpɛkun Zezi i mmoja m’ɔ guɛli i ase’n maan be nunnunnin sa tɛ m’ɔ ti kɛ kalɛ sa yɛ ɔ o be su’n. I sɔ’n ti yɛ Zan batɛmu yofuɛ’n kwla kannin Zezi i su ndɛ yɛ’n niɔn. I waan: “An nian Nyanmiɛn Bua Gbanflɛn’n b’ɔ́ wá fɛ́ i wun yí mɛn’n i ti tɛ’n yɛ.” (Zan 1:29) Kɛ be kan mɛn’n nga bé yí i ti tɛ’n i ndɛ’n, be nga be ɲin o su o, be nga be wuli o, be kwlaa be o nun.
Wafa nga e ti kpɔlɛ tɛ’n i yilɛ’n yoli Zoova nin Zezi’n
12, 13. ?Kɛ Abraamu síesíe i wun naan w’a fa Izaaki w’a yi tɛ’n, wafa nga i wun fa yoli i’n, ɔ kle e sɛ?
12 Wafa nga e ti kpɔlɛ tɛ’n i yilɛ’n yoli e Si m’ɔ o ɲanmiɛn su lɔ’n nin i Wa m’ɔ klo i’n, e kwlá wunmɛn i wlɛ kpa sa. Sanngɛ Biblu’n nun ndɛ wie’m be kwla uka e naan y’a bu i sɔ’n su akunndan. I wie yɛle Abraamu liɛ’n. Ɲanmiɛn seli i kɛ: “Ɔ wa Izaak b’ɔ ti ɔ wa kunngba’n bɔ a klo i kpa’n, fɛ i kɔ Moriza mɛn’n nun lɔ ko yi tɛ nga be yrɛ i nnɛn’n kɔlikɔli’n man min. Ń klé wɔ oka nga á yí tɛ sɔ’n su’n.” Kɛ Abraamu nánti lele cɛn ba nsan kɔ́ Moriza lɔ kɛ ɔ́ kɔ́ yó like nga Ɲanmiɛn waan ɔ yo’n, wafa nga i wun fa yoli i’n, maan e bu i akunndan.—Bob. 22:2-4.
13 Abraamu juli lika nga Ɲanmiɛn kleli i’n nun. Kɛ ɔ́ cící Izaaki i sa nin i ja mun m’ɔ́ lɛ́ i tɛ yiwlɛ’n nga Abraamu bɔbɔ kplannin’n su’n, wafa nga Abraamu i awlɛn’n kpɔtɔli i klun’n maan e bu i akunndan. Kɛ ɔ mannin laliɛ ng’ɔ́ wá fá kún i wa’n su’n, nanwlɛ e kwla se kɛ i wla boli dan! Izaaki kusu kɛ ɔ lali tɛ yiwlɛ’n su m’ɔ́ mínndɛ kɛ laliɛ piembie’n wɔ i naan ɔ wu’n, wafa nga i wun fa yoli i’n maan e bu i akunndan wie. Zoova i anzi’n jrannin Abraamu ka naan w’a kun ba’n. Blɛ sɔ’n nun’n, like nga Abraamu nin Izaaki be yoli’n, ɔ uka e maan kɛ Zoova mannin Satan nin i minniɛn’m be atin kɛ be kun i Wa’n, wafa nga i wun fa yoli i’n e wun i wlɛ. Izaaki i wun m’ɔ loli mannin Abraamu’n, ɔ yi wafa nga Zezi kplinnin su kɛ ɔ́ wún ɲrɛnnɛn naan ɔ́ wú e ti’n i nglo.—Ebr. 11:17-19.
14. ?Sa benin yɛ ɔ juli Zakɔbu su m’ɔ uka e naan y’a wun wafa nga e ti kpɔlɛ tɛ’n i yilɛ’n yoli Zoova nin Zezi’n i wlɛ ɔ?
14 Wafa nga e ti kpɔlɛ tɛ’n i yilɛ’n yoli Zoova nin Zezi’n, e kwla fa sa kun m’ɔ juli Zakɔbu su’n e yiyi nun. Zakɔbu i mma’m be nun’n, sran ng’ɔ kloli i dan’n yɛle Zozɛfu. Sanngɛ Zozɛfu i niaan’m be kusu be ɲin bloli i wun yɛ be kpɔli i. Ɔ nin i sɔ ngba’n, Zozɛfu kplinnin su kɛ i si sunmɛn i naan ɔ ko niɛn i niaan’m be osu. Blɛ sɔ’n nun’n, nn b’a ɔ Zakɔbu i bua’m be kankanlɛ be tranwlɛ’n i nglo lɔ lika’n nun Ebrɔn lɔ. Be tranwlɛ’n nin lika sɔ’m be ti nun kilo ko ju 100. Kɛ Zakɔbu i mma’m be fali Zozɛfu i tralɛ mɔ mmoja o nun’n be ko mɛnnin i’n, wafa nga i wun fa yoli i’n, maan e bu i akunndan! Ɔ kpan seli kɛ: “Uuu! Min wa’n i tralɛ nin-ɔn. Nnɛn wlɛfuɛ wie cɛ yɛ ɔ́ dí i-ɔ. Kɛlɛ ɔ titili Zozɛf nun.” I kwlaa sɔ’n boli Zakɔbu i wla kpa. Ɔ maan ɔ yoli Zozɛfu i sɛ cɛli kpa. (Bob. 37:33, 34) Kɛ sa’m be ju’n, Zoova yoman kɛ sran mɔ fɔ o be nun’n be yo’n sa. Sanngɛ kɛ bé klé Ɲanmiɛn i Wa m’ɔ klo i’n i ɲrɛnnɛn lele bé kún i abɔlɛ su asiɛ’n su wa’n, Zakɔbu i su ndɛ’n i akunndan bulɛ’n kwla uka e naan wafa Ɲanmiɛn i wun fa yoli i’n, y’a wun i wlɛ.
Wafa nga e ɲan e ti kpɔlɛ tɛ’n i su ye’n
15, 16. (a) ?Wafa sɛ yɛ Zoova kleli kɛ ɔ sɔli e ti kpɔlɛ tɛ’n nun ɔn? (b) ?Wafa sɛ yɛ amun ɲannin e ti kpɔlɛ tɛ’n i su ye ɔ?
15 Zoova cɛnnin i Wa m’ɔ nantili seiin’n. Ɔ maan ɔ kacili aolia nun sran m’ɔ le ɲrun ɔn. (1 Kor. 15:20, 44) Kɛ be cɛnnin Zezi sɔ’n, ɔ yili i wun nglo kleli i sɔnnzɔnfuɛ mun cɛn ba 40. Ɔ wlali be fanngan naan be lafi Ɲanmiɛn su kpa. Kpɛkun ɔ kleli be like ng’ɔ fata kɛ be yo naan b’a kwla di jasin fɛ bolɛ junman’n. I sin’n ɔ ɔli ɲanmiɛn su. Ɔ ko fɛli i mmoja m’ɔ guɛli i ase’n i gua’n kleli Ɲanmiɛn naan ɔ fa yo i sɔnnzɔnfuɛ kpa mɔ be lafi e ti kpɔlɛ tɛ ng’ɔ yili’n su’n, be ye. Ɲanmiɛn Zoova kleli kɛ ɔ sɔli e ti kpɔlɛ tɛ nga Klist yili’n nun. Yɛle kɛ ɔ seli Zezi kɛ ɔ fa Ɲanmiɛn wawɛ’n mɛn i sɔnnzɔnfuɛ nga afuɛ nga be flɛ i 33 i Pantekɔtu nun’n, be yiali Zerizalɛmu lɛ’n.—Yol. 2:33.
16 Klist i sɔnnzɔnfuɛ sɔ mɔ Ɲanmiɛn wawɛ’n o be su’n, be kali lɛ be boli be wiengu’m be fanngan wlalɛ bo. Be seli be kɛ be yo naan be yo be batɛmu Zezi Klist dunman nun naan Ɲanmiɛn yaci be sa tɛ mun cɛ be naan i ya’n w’a to w’a fuan be. (An kanngan Sa Nga Be Yoli’n 2:38-40 nun.) Kɛ ɔ fɛ i cɛn sɔ’n nun lele andɛ’n, e ti kpɔlɛ tɛ nga Zezi yili ti’n, sran akpinngbin kpanngban mɔ be fin nvlenvle fanunfanun nun’n, be nin Ɲanmiɛn be nanti. (Zan 6:44) Siɛn’n, ɔ fata kɛ e fa e ɲin e sie i kosan nɲɔn ekun be su. Yɛle kɛ: ?Sa kpa mɔ e yo’n i ti yɛ be fali anannganman nguan ɲanlɛ’n be sieli i e ɲrun ɔn? ?Like ɲɛnmɛn sɔ mɔ e wla o su’n, ɔ kwla fi e sa?
17. ?Suralɛ like dan kɛ Ɲanmiɛn i janvuɛ yolɛ sa’n, ɔ fata kɛ e bu i sɛ?
17 Nán kɛ e yoli like kpa kun sa ti yɛ be yili e ti kpɔlɛ tɛ’n niɔn. Sanngɛ i su mɔ sran miliɔn kpanngban be lafi’n ti’n, b’a kaci Ɲanmiɛn i janvuɛ. Ɔ maan be wla o su kɛ bé trán asiɛ m’ɔ́ káci mɛn klanman’n, i su tititi. Kusu nán kɛ sran kun ti Zoova i janvuɛ andɛ’n, i ti yɛ ɔ́ ká sɔ tititi ɔ. Sɛ e kunndɛ kɛ Ɲanmiɛn i ya cɛn ng’ɔ su ba’n to fuan e’n, ɔ fata kɛ e si “Krist-Jésus i delɛ b’ɔ deli” e’n i su ye tititi.—Rɔm. 3:24; an kanngan Filipfuɛ Mun 2:12 nun.
Maan e lafi e ti kpɔlɛ tɛ’n su titi
18. ?Sɛ sran kun lafi e ti kpɔlɛ tɛ’n su’n, ninnge benin wie mun yɛ ɔ fata kɛ ɔ yo ɔ?
18 Zan 3:36 mɔ like suanlɛ nga taka su’n, ɔ kle kɛ e Min Zezi Klist i su lafilɛ’n, i wie yɛle e ɲin m’ɔ yi i’n. Kɛ mɔ e si e ti kpɔlɛ tɛ’n i su ye’n ti’n, ɔ fata kɛ e nian ninnge nga Zezi kleli’n mɔ i wie kan e nzuɛn’n be su e nanti. (Mar. 7:21-23) “Nyanmiɛn i ya’n ɔ́ wá jáo” be kwlaa nga be yo sa tɛ mɔ be kaciman be sa’n be su. Sa tɛ sɔ’n i wie yɛle bla nin bian kunndɛlɛ sukusuku nin be nuan nun aɔwi tɛtɛ dilɛ, ɔ nin “sa tɛtɛ yolɛ” wafa kwlaa, ɔ nin bian nin bla nna nga be fa fite nzra nun’n mɔ be nian ɔn be yaciman’n.—Efɛ. 5:3-6.
19. ?Ninnge kpa benin’m be nun yɛ e kwla yi i nglo kɛ e lafi e ti kpɔlɛ tɛ’n su ɔ?
19 Kɛ mɔ e si e ti kpɔlɛ tɛ’n i su ye’n ti’n, ɔ fata kɛ ‘e fa e wun mantan Nyanmiɛn [e di Ɲanmiɛn i junman’n]’ kpa. (2 Piɛ. 3:11) Maan e sie blɛ naan e fa srɛ Ɲanmiɛn kpa titi. Kusu e sie blɛ naan e bɔbɔ e fa suan Biblu’n nun like, naan e fa ɔ aɲia’m be bo. Yɛ e sie wie e fa su Ɲanmiɛn e awlo lɔ. Kpɛkun e fa blɛ e fa di Ɲanmiɛn Sielɛ’n i jasin fɛ’n i bolɛ junman’n. Kusu nán e “yaci sa kpa nin sran ye yolɛ’n, afin i sɔ like’n yɛ be yo-ɔ ɔ jɔ Nyanmiɛn klun-ɔn.”—Ebr. 13:15, 16.
20. ?Be nga be lafi e ti kpɔlɛ tɛ’n su’n, suralɛ benin yɛ be kwla lafi su kɛ bé ɲɛ́n i ɔ?
20 Kɛ Zoova i ya’n ko jaso mɛn tɛ nga su’n, e nga e lafili e ti kpɔlɛ tɛ’n su mɔ e sili su ye titi’n, é dí aklunjuɛ dan! Kpɛkun mɛn uflɛ nga Ɲanmiɛn waan ɔ́ fá mán e’n nun’n, é sí like ɲɛnmɛn sɔ mɔ maan Ɲanmiɛn i ya’n to fuannin e’n i su ye tititi.—An kanngan Zan 3:16 nin Sa Nglo Yilɛ 7:9, 10, 13, 14 nun.
?Amún tɛ́ su sɛ?
• ?Wafa sɛ yɛ Ɲanmiɛn kle kɛ i ya’n w’a jaso dɔ nga su ɔ?
• ?Ngue ti yɛ e ti kpɔlɛ tɛ’n i yilɛ’n w’a yoman pɔpɔ w’a manman Zoova nin Zezi ɔ?
• ?E ti kpɔlɛ tɛ’n i su ye benin yɛ e ɲɛn i ɔ?
• ?Wafa sɛ yɛ e kle kɛ e lafi e ti kpɔlɛ tɛ mɔ Zezi yili’n su ɔ?
[Foto, bue 19]
Sran’m be nin Zoova be afiɛn kwla sɛ ekun.
[Foto, bue 21]
Sa ng’ɔ juli Abraamu nin Izaaki yɛ Zakɔbu be su’n, i su akunndan bulɛ’n kwla uka e naan y’a wun wafa nga e ti kpɔlɛ tɛ’n i yilɛ’n yoli Zoova nin Zezi’n.