Maan e fa e wun e mantan Ɲanmiɛn
Ɔ man e atin kɛ e fa e tiaun ajalɛ
Ɔ FATA kɛ siɛ nin niɛn’m be kle be mma’m be ajalɛ kpa. Sɛ be yo sɔ’n, be mma’m be kwla yi nzuɛn kpa’m be nglo. Kpɛkun be mɛn dilɛ’n nun’n, be kwla fa ajalɛ kpakpa. Sanngɛ siɛ nin niɛn sunman be kleman be mma’m be ajalɛ kpa. ?Ɔ maan i sɔ’n kle kɛ kannzɛ ɔ yo sɛ yo sɛ’n, ba sɔ’m be su yoman kpa le? Kosan sɔ’n i su tɛlɛ’n wo ndɛ nanwlɛ kun m’ɔ cici e wla’n i nun. Yɛle kɛ Ɲanmiɛn Zoova bu e sran ti’n, ɔ man e atin kɛ e fa e tiaun ajalɛ. Maan e nian Ezekiasi i ndɛ m’ɔ o 2 Famiɛn Mun 18:1-7 nun’n.
Zida famiɛn “Akaz i wa” yɛle Ezekiasi. (Ndɛ mma 1) Akazi suli i nvlefuɛ’m be bo maan be yacili Zoova i sulɛ kpafuɛ’n. Famiɛn klunwifuɛ sɔ’n sɔli Baali. Baali kusu’n, klɔ sran yɛ be fa sɔ i ɔ. Akazi kunnin Ezekiasi i niaan mun. Akazi totoli Ɲanmiɛn sua’n i anuan’m be nun. Kpɛkun “ɔ yoli amuɛn sɔwlɛ mun Zerizalɛm anngɔnda’m be kwlaa su.” Ɔ ‘fɔkɔli Anannganman i anwlɛn.’ (2 Be Nyoliɛ 28:3, 24, 25) I sɔ’n kle weiin kɛ Ezekiasi i si’n ti sran tɛ kpa. ?I sɔ’n ti’n, Ezekiasi yó kɛ i si sa wie?
Kɛ Ezekiasi sinnin Akazi ja nun famiɛn bia’n su’n, ɔ kleli kɛ ɔ su niɛnmɛn i si i ajalɛ tɛ’n su. Ezekiasi “nantili klanman Anannganman i atin’n su.” (Ndɛ mma 3) Ezekiasi fɛli i wla’n guali Zoova su, yɛ “famiɛn nga be dunnin mmua i nyrun mun o, be nga be bali i sin mun o, be wie fi nin i w’a sɛ-man.” (Ndɛ mma 5) Kɛ ɔ yoli famiɛn’n, i afuɛ klikli’n nun’n, ɔ fali Ɲanmiɛn sulɛ kpafuɛ’n i wun ajalɛ. Ɔ yoli maan be nunnunnin amuin sɔwlɛ nga be o kpɔlɛ’m be su’n. Ɔ tikeli Ɲanmiɛn sua’n i anuan yɛ Ɲanmiɛn sulɛ kpafuɛ’n w’a sinnin i osu’n nun. (Ndɛ mma 4; 2 Be Nyoliɛ 29:1-3, 27-31) Ezekiasi “mantannin Anannganman [...]. Anannganman kusu jrɛnnin i sin.”—Ndɛ mma 6, 7.
?Ngue yɛ ɔ ukali Ezekiasi m’ɔ maan w’a fɛmɛn i si i nzuɛn tɛ’n su ɔ? ?I nin Abiza mɔ Biblu’n w’a kɛnmɛn i su ndɛ kpanngban’n, yɛ ɔ ɲannin ta klanman i su ɔ? ?Annzɛ Ezai m’ɔ boli Ɲanmiɛn nuan ijɔfuɛ junman i dilɛ i bo ka naan b’a wu Ezekiasi’n, i ajalɛ’n yɛ ɔ ɲannin ta famiɛn’n i wa sɔ’n su ɔ?a Biblu’n w’a kanman sɔ. Sanngɛ like kun o lɛ mɔ e si i ɔ. Yɛle kɛ Ezekiasi tiaun ajalɛ ng’ɔ fali’n, ɔ nin i si liɛ’n be kɔman lika kun mlɔnmlɔn.
Be kwlaa nga be si nin be nin’m b’a kleman be ajalɛ kpa’n, Ezekiasi i ndɛ’n wla be fanngan. Sa ng’ɔ ko ju’n, nn w’a ju. Ɔ lemɛn i yowlɛ kun. E kwlá nunnunman ɲrɛnnɛn sa nga be tɔli e su laa’n. Sanngɛ i sɔ sa’m be kleman kɛ ajalɛ kwlaa nga e fa’n, be su yoman ye le. E kwla fa ajalɛ wie andɛ mɔ be kwla yo maan e di aklunjuɛ ainman ɔn. Kɛ Ezekiasi sa’n, e kwla fa ajalɛ kɛ é kló Ɲanmiɛn Kpli Zoova naan é sú i. Sran ng’ɔ fɛ i sɔ ajalɛ’n i mɛn dilɛ’n, ɔ yo kpa dɔ nga su. Kpɛkun ɔ kwla ɲan anannganman nguan Ɲanmiɛn i mɛn klanman’n nun. (2 Piɛr 3:13; Sa Nglo Yilɛ 21:3, 4) Ɲanmiɛn m’ɔ klo e’n, ɔ buli e sran ti’n, ɔ mannin e atin kɛ e fa e tiaun ajalɛ. I sɔ liɛ’n ti’n, nanwlɛ ɔ fata kɛ e lɛ i ase tititi!
[Ja ngua lɛ ndɛ’n]
a Ezai boli i Ɲanmiɛn nuan ijɔfuɛ junman’n i dilɛ bo afuɛ nga be flɛ i 778 nun ka naan b’a wu Zezi. Ɔ dili i lele fa juli afuɛ nga be flɛ i 732 nun tra su kan. Ezekiasi boli famiɛn dilɛ bo afuɛ nga be flɛ i 745 nun ka naan b’a wu Zezi. Kɛ ɔ́ yó sɔ’n nn ɔ le afuɛ 25.