Fluwa nun kannganfuɛ’m be usa kɛ...

?Ninfan yɛ Kaɛn ko fɛli i yi’n niɔn?

▪ “?Sɛ Kaɛn nin Abɛli yɛ be ti Adam nin Ɛvu be wa yasua nɲɔn’n, nn nin yɛ Kaɛn fɛli i yi’n niɔn?” Kpɛ sunman’n, be nga be lafiman Biblu’n su’n, be usɛ i sɔ kosan’n naan bé fá sá e nían. Sanngɛ Biblu’n i ndɛ wie m’ɔ kannin be’n ti’n, e kwla tɛ kosan’n sɔ’n su klanman.

Bo Bolɛ ndɛ tre 3 nin 4 be yiyi ndɛ yɛ’m be nun: (1) Ɛvu ti “sran’m be kwlaa be nin.” (2) Kɛ be wuli Kaɛn lele m’ɔ́ fá kún i niaan bian Abɛli’n, blɛ kpanngban sinnin. (3) Kɛ Ɲanmiɛn fuannin Kaɛn naan ɔ ‘yo finfinfuɛ, ɔ wlan-wlan sa daan lika’n nun cɛn’n kwlaa’n,’ srɛ kunnin i. Afin i waan “sran kwlaa” sé kɛ ɔ́ kún i. (4) Ɲanmiɛn fali nzɔliɛ kun sieli i Kaɛn wun, kɛ ɔ́ yó naan sran wie w’a kunmɛn i’n ti. I sɔ’n kle kɛ i niaan mun annzɛ i osufuɛ uflɛ’m be kwla kunndɛ kɛ bé kún i. (5) Kɛ Kaɛn ɔli ‘ko trannin Nɔd mɛn’n nun lɔ’n,’ ɔ nin i yi’n be wa sili sua.—Bo Bolɛ 3:20; 4:3, 12, 14-17.

Ndɛ nga e wunnin be lɛ’n, be kle kɛ Ɛvu i wa bla kun mɔ e simɛn i awuliɛ blɛ’n yɛ Kaɛn fɛ i yoli i yi ɔ. Bo Bolɛ 5:4 se kɛ afuɛ 930 nga Adam dili i asiɛ’n su’n be nun’n, ‘ɔ wuli ba yasua wie mun nin ba bla wie mun ekun.’ Ɔ ti su kɛ Biblu’n seman weiin kɛ Ɛvu i wa bla’n kun yɛ Kaɛn jɛli i ɔ. Kusu kɛ Ɲanmiɛn fuannin Kaɛn’n i sin yɛ be kɛnnin i yi’n i ndɛ ɔ. I sɔ’n kle kɛ blɛ kpanngban dun mmua sinnin. Ɔ maan Kaɛn i yi sɔ’n kwla yo Adam nin Ɛvu be anunman’m be nun kun. I sɔ’n ti’n, fluwa kun kpɛ i kpo se kɛ Kaɛn i yi’n ti “Adam i osu’n nunfuɛ kun.”—The Amplified Old Testament.

I afuɛ ko ju ya nɲɔn yɛ’n, Biblu’n i su like suanfuɛ kun mɔ be flɛ i Adam Clarke ɔ kannin srɛ m’ɔ kunnin Kaɛn mɔ i ti Ɲanmiɛn fali nzɔliɛ kun sieli i wun’n, i ndɛ. I waan like nga ti yɛ srɛ kunnin Kaɛn’n, yɛle kɛ Adam i osu’n w’a trɛ. Ɔ maan be kwla “taka klɔ kpanngban.”

Andɛ’n, sran wie’m be kwlá kplinman su kaan sa kɛ Kaɛn jɛli i niaan bla. Be kplinman su wie kɛ Adam i wa yasua nin i wa bla kun be klun ba liɛ’n, yɛ Kaɛn jɛli i ɔ. Kpɛ sunman’n, sɛ be bu i sɔ’n ɔ fin lika nga be tali be’n. Annzɛ kusu srɛ m’ɔ kun be’n ti ɔ. Yɛle kɛ be bu i kɛ sɛ yasua kun nin i osufuɛ nga be mantan kpa kɛ i niaan bla sa’n be ja’n, ba nga bé wú i’n, tukpacɛ wie kwla trɛn i wun. Sanngɛ Frank LaGard Smith kannin ndɛ yɛ’n. I waan: “Kannzɛ i sin ɔ wa yoli sran’m be kɛ ɔ nin i fataman kɛ yasua kun nin bla kun mɔ be ti niaan’n be ja’n, sanngɛ ɔ ti weiin kɛ Adam i mma yasua nin i mma bla klikli’m be jali be wun.” (The Narrated Bible in Chronological Order) Asa ekun’n, afuɛ nga be flɛ i 1513 nun’n, Ɲanmiɛn fɛli i mmla mun mannin Moizi kɛ ɔ fa man Izraɛli nvle’n. Ɔ fata kɛ e sie i nzɔliɛ kɛ blɛ sɔ’n nun yɛ Ɲanmiɛn w’a kplinman su kun kɛ sran kun nin i osufuɛ nga be mantan kpa’n, be si sua’n niɔn.—Saun Yolɛ 18:9, 17, 24.

Andɛ’n, e timan kɛ e si nin e nin klikli mɔ fɔ w’a tranman be nun’n be sa mlɔnmlɔn. Ɔ maan kɛ yasua kun nin i niaan bla kun be wu ba’n, tukpacɛ nga ba’n kwla fɛ i i nin klun lɔ ba’n, sɛ ɔ ti e si nin e nin klikli mun’n nn ɔ su yoman sɔ. Asa ekun’n, koko nun wa’n, be suannin be nga be ti ngawangawa’n be aja’n i su like. Be klɛli ndɛ nga be wunnin i’n fluwa kun nun. Be waan be nga be ti ngawangawa mɔ be ja’n, ba nga be wu be mɔ be ti tukpacifuɛ’n, b’a sɔnman. (Journal of Genetic Counseling) Adam blɛ su’n, i sɔ ndɛ liɛ’n timan ndɛ cinnjin. Lele mɔ Nowe blɛ liɛ’n fá jú bɔbɔ’n, ɔ timan ndɛ cinnjin sɔ liɛ wie. Ɔ maan e kwla se kɛ Kaɛn i osufuɛ bla kun yɛ ɔ jɛli i ɔ.