Ajalɛ 1

Maan e klo sran, nán e klo sika nin aɲanbeun ninnge mun

?NGUE LIKE YƐ BIBLU’N KLE Ɔ? “Sika klolɛ’n yɛ ɔ ti sa tɛtɛ’n kwlaa i bo nin-ɔn.”—1 Timote 6:10.

?NGUE TI YƐ I YOLƐ’N TI KEKLE Ɔ? Be nga be bo aata dilɛ ninnge’m be ndolo’n, be wlawla e naan e klun w’a jɔman ninnge nga e le be’n be su. Be kunndɛ kɛ e di junman blɛ kwlaa nun naan e ɲan sika naan e fa to ninnge uflɛuflɛ mun, ɔ nin ninnge kpakpa mun yɛ ninnge dandan mun. Sika’n laka sran. Yɛ sɛ y’a nianman e wun’n e kwla klo i sa blɛlɛlɛ. Sanngɛ Biblu’n wla e su nun kɛ sran ng’ɔ klo sika’n, sika’n su jumɛn i le. Famiɛn Salomɔn klɛli i kɛ: “Sran ng’ɔ klo sika dan’n, i nyin yi-man ng’ɔ lɛ i’n, sran ng’ɔ klo anyanbeun’n, ɔ nyɛn-mɛn i nun mmlusuɛ’n wie.”—Akunndanfuɛ’n 5:9.

?NGUE YƐ E KWLA YO Ɔ? Maan e nian Zezi i ajalɛ’n su. Maan e klo sran tra aɲanbeun ninnge mun. Sran’m be klolɛ’n ti’n, Zezi kplinnin su kɛ ɔ́ fá like kwlaa ng’ɔ le i’n mán. I nguan’n bɔbɔ’n, ɔ kplinnin su kɛ ɔ́ fá mán. (Zan 15:13) Ɔ seli kɛ: “Sɛ a cɛ sran like’n, ɔ ti kpa tra kɛ be cɛ wɔ like’n.” (Sa Nga Be Yoli’n 20:35) Sɛ e fa e blɛ’n ɔ nin e sa nun ninnge mun e man sran mun’n, be kusu bé yó e sɔ wie. Zezi seli kɛ: “An cɛ sran like, yɛ be kusu bé cɛ́ amun wie ɔ.” (Lik 6:38, NW) Be nga be fa sika kunndɛlɛ’n nin ninnge kpanngban ɲanlɛ’n be cici be ti’n, afɛ’n ɔ nin ɲrɛnnɛn’n be tɔ be su. (1 Timote 6:9, 10) Sanngɛ be nga be klo sran mɔ sran’m be klo be wie’n, be di aklunjuɛ kpafuɛ’n.

Wafa nga e kwla yo naan e mɛn dilɛ’n w’a yo sɛsɛ’n, maan e bu i akunndan e nian. ?Ninnge nga e le be’n ɔ nin nga e kunndɛ kɛ é tó’n, e kwla kpɛ su? Sɛ e yo sɔ’n, atrɛkpa’n, é wún kɛ é ɲán blɛ nin wunmiɛn kan ekun naan y’a fa yo ninnge cinnjin kpafuɛ mun. Yɛlɛ kɛ é kwlá úka sran mun yɛ é sú Ɲanmiɛn m’ɔ mannin e like kwlaa nga e le i’n.—Matie 6:24; Sa Nga Be Yoli’n 17:28.

[Foto, bue 4]

“An cɛ sran like, yɛ be kusu bé cɛ́ amun wie ɔ.”