Ajalɛ 4

Maan e kunndɛ janvuɛ ngwlɛlɛ su

?NGUE LIKE YƐ BIBLU’N KLE Ɔ? “Sran ng’ɔ fɛ i wun mantan ngwlɛlɛfuɛ’n, ɔ kaci ngwlɛlɛfuɛ.”—Nyanndra Mun 13:20.

?NGUE TI YƐ I YOLƐ’N TI KEKLE Ɔ? E janvuɛ’m be kwla yo maan e di ninnge nga e le be’n be su aklunjuɛ annzɛ kusu be kwla yo naan y’a diman be su aklunjuɛ. Be aeliɛ’n ɔ nin ndɛ nga be kan’n be kwla ɲan ta mɛn dilɛ’n i su akunndan nga e bu’n su.—1 Korɛntfuɛ Mun 15:33.

Maan e nian sran 12 nga be sunmannin be Kanaan’n be su ndɛ nga Biblu’n kan’n. Be nun sunman “be kannin mɛn sɔ’n i wun ndɛ tɛtɛ be kleli Izraɛlfuɛ mun.” Ɔ nin i sɔ ngba’n, be nun sran nɲɔn be kannin Kanaan i wun ndɛ kpa. Be seli kɛ mɛn sɔ’n “ti kpa dan.” Sanngɛ be wiengu blu’n be akunndan’n tɛ’n ɔ sali nvlefuɛ mun. Biblu’n waan ‘sran’m be kwlakwla be mannin be nɛn’n su be sunnin. Izraɛlfuɛ’m be kwlaa be ijɔli tɛtɛ.’—Kalɛ 13:30–14:9.

I kunngba’n, andɛ sran sunman “be ijɔ be konviabo, be fa sa’n kwlaa gua sran wie’m be su.” (Zid 16) Sɛ sran kun nin i sɔ sran liɛ mɔ be ɲin yiman like nga be le i’n be san nun’n, ninnge ng’ɔ le be’n be su jumɛn i.

?NGUE YƐ E KWLA YO Ɔ? Maan e bu yalɛ nga e nin e janvuɛ mun e koko’n i akunndan. ?E janvuɛ’m be fa ninnge nga be le be’n be di be nuan? ?Annzɛ kusu ninnge nga be leman be’n ti’n, blɛ kwlaa nun be ijɔ be konviabo? ?Yɛ janvuɛ’n i wafa benin yɛ e ti ɔ? ?E yo maan e janvuɛ’m be ɲin blo e wun? ?Annzɛ e wla be fanngan kɛ like kan nga be le i’n be fɛ i sɔ?

Ajalɛ nga Davidi m’ɔ́ wá káci famiɛn’n ɔ nin famiɛn Saili i wa Zonatan be kleli’n, maan e bu i akunndan e nian. Davidi wanndili ko fiali aawlɛ flɛnnɛn’n nun lɔ. Famiɛn Saili buli i kɛ Davidi su wa de famiɛn bia’n i sa nun. Ɔ maan ɔ kunndɛli kɛ Davidi wu. Sɛ Saili nunman lɛ’n, Zonatan yɛ ɔ fata kɛ ɔ di famiɛn’n niɔn. Sanngɛ ɔ nin i sɔ ngba’n, ɔ kacili Davidi i janvuɛ kpa kun. Zonatan wunnin i wlɛ kɛ famiɛn uflɛ nga Ɲanmiɛn síe’n yɛle Davidi. Ɔ maan ɔ suɛnnin i janvuɛ’n i bo aklunjuɛ su.—1 Samiɛl 19:1, 2; 20:30-33; 23:14-18.

Janvuɛ kɛ ngalɛ sa’n yɛ ɔ fata kɛ e tra ɔ. Janvuɛ ng’ɔ miɛn i ɲin naan i klun w’a jɔ ninnge ng’ɔ le be’n be su’n, mɔ like ng’ɔ ti kpa man e’n yɛ ɔ kunndɛ’n, yɛ ɔ fata kɛ e tra ɔ. (Nyanndra Mun 17:17) Ɔ ti weiin kusu kɛ sɛ e waan e nin sran kɛ ngalɛ sa’n é trá janvuɛ’n, ɔ fata kɛ e bɔbɔ e yi nzuɛn kunngba sɔ’m be nglo wie.—Filipfuɛ Mun 2:3, 4.

[Foto, bue 7]

?E janvuɛ’m be yo maan e klun jɔ ninnge nga e le be’n be su, annzɛ i asabesin’n yɛ be yo ɔ?