Kɛ Zezi sa’n, maan e fɔnvɔ be nga be o sɛ nun’n

LAZALI m’ɔ tran Betani’n, ɔ tɔli tukpacɛ kekle kpa. I niaan bla Marti nin Mali be sunmannin sran, be janvuɛ Zezi sin. Sanngɛ tukpacɛ’n kwlali Lazali. Kɛ be ko sieli i’n, Marti nin Mali be janvuɛ nin be tranfuɛ’m be bali “be yako yolɛ.” (Zan 11:19) I sin’n, Zezi wa bali Betani lɛ. Yɛ ɔ ɔli i janvuɛ kpa sɔ’m be osu nianlɛ ɔ. Sɛ e bu ndɛ nga Zezi kannin’n ɔ nin like ng’ɔ yoli’n be akunndan’n, e kwla si wafa nga e kwla fɔnvɔ be nga be awlɛn su sran wuli’n.

Be osu nianlɛ’n kle kɛ e bu be akunndan

Zezi nantili cɛn ba nɲɔn naan w’a ju Betani. Ɔ kpɛli Zurdɛn nzue ba’n yɛ ɔ sinnin ndroliɛ nun atin tɛ kun m’ɔ fɛ i Zeriko lele fa ju Betani’n nun. Marti ɔli Zezi i atin kpalɛ ndɛndɛ kpa klɔ’n i nuan lɔ. I sin’n, kɛ Mali tili i kɛ Zezi w’a ba’n, ɔ ɔli i wun lɔ wie. (Zan 10:40-42; 11:6, 17-20, 28, 29) Nanwlɛ, kɛ Zezi ɔli be osu nianlɛ’n, ɔ fɔnvɔli aniaan bla nɲɔn sɔ mɔ be wla’n w’a bo be wun’n.

Andɛ kusu’n, kɛ e ko nian be nga be awlɛn su sran wie sacili’n be osu’n, ɔ cici be wla wie. Skɔtu nin Lidia be wa yasua m’ɔ le afuɛ nsiɛn’n suan Teo. Ɔ wuli asidan kun nun. Be waan: “E kunndɛli kɛ e osufuɛ nin e janvuɛ’m be wa suan e bo. Kɔnguɛ afiɛn’n, be toli e dɔɔtrɔ lɔ trele.” ?Ndɛ benin yɛ be janvuɛ sɔ’m be kannin ɔn? Skɔtu nin Lidia be waan: “Dɔ ngalɛ’n su’n, y’a seman kɛ be kan ndɛ kle e. Balɛ nga be bali e wun lɛ’n, ɔ kle weiin kɛ e ndɛ lo be.”

Biblu’n waan kɛ Zezi wunnin be nga be su sun Lazali’n, “i wun yo i nyɛiin,” kpɛkun ɔ “sunnin.” (Zan 11:33-35, 38) Zezi w’a bumɛn i kɛ sɛ sran kun sun i wiengu’m be ɲrun’n, nn ɔ timan yasua. Wafa nga be wun fa yoli be’n ɔ wunnin i wlɛ. Ɔ maan i wun yoli i sɔ wie. ?Ngue yɛ i sɔ’n kle e ɔ? Ɔ kle e kɛ sɛ e kɔ be nga be sran wuli’n be osu nianlɛ naan be su sun’n, nán maan sunlɛ’n yo e ɲannzuɛn. (Rɔmfuɛ Mun 12:15) Asa kusu’n, nán maan e mian sɛnvuɛ’n kɛ ɔ sun kekle nun. Sran wie’m be kunndɛman kɛ bé sún nzra nun.

Maan aunnvuɛ su e sie e su be nuan bo

Atrɛkpa’n, Zezi le ndɛ wie mɔ i waan ɔ́ kán fá cící Marti nin Mali be wla ɔ. Sanngɛ ɔ yacili be nun maan be dun mmua kannin be klun ndɛ. (Zan 11:20, 21, 32) I sin kɛ ɔ́ kán ndɛ klé Marti’n, ɔ usali kosan kun, kpɛkun ɔ sieli i su i nuan bo.—Zan 11:25-27.

Kɛ sran kun kán ndɛ mɔ e sie e su’n, i sɔ’n kle kɛ i ndɛ lo e. Sɛ e waan é fɔ́nvɔ be nga be sran wuli’n, ɔ fata kɛ e sie e su kpa be nuan bo. Sɛ e usa be kosan ng’ɔ kwla yo naan b’a kan be klun ndɛ’n, yɛ é kwlá síe e su kpa ɔ. Sanngɛ maan e nian e wun i sɔ yolɛ’n nun. Yɛle kɛ sɛ ijɔlɛ yoman be fɛ’n, nán e mian be kɛ be ijɔ. Atrɛkpa’n b’a fɛ, ɔ maan ɔ fata kɛ be lo wunmiɛn.

Wie liɛ’n, be nga be sran wuli’n be wunman like kun nga bé yó ɔ. Kpɛkun be yo ninnge wie mun flan nun kpɛ sunman. Wie’m be yi wafa nga be wun fa yo be’n i nglo. Mali nin Marti be nɲɔn’n be seli Zezi kɛ: “Nannan, sɛ ɔ ti kɛ a o wa sa’n, wuun n niaan’n w’a wu-man.” (Zan 11:21, 32) ?Ngue yɛ Zezi yoli ɔ? Ɔ trɛli i awlɛn sieli i su be nuan bo aunnvuɛ su. W’a kleman be wafa nga ɔ fata kɛ be wun fa yo be’n. Ɔ wunnin i wlɛ kɛ ɲrɛnnɛn dan o be nga be sran wuli’n be su naan ɔ yo be ya kpa.

Sɛ amun wunman ndɛ kun nga amun kwla kan kle be nga be sran wuli’n, atrɛkpa’n, amun kwla usa be kɛ: “?A kunndɛ kɛ e koko su yalɛ?” Kpɛkun amun sie amun su ndɛ nga sran’n kan’n i bo kpa. Amun niɛn i naan amun bu wafa nga i wun fa yo i’n i akunndan. Yɛ amun kunndɛ like ti mɔ i wun fa yo i sɔ’n.

Kɛ sran kun i fuɛ kun wu’n, wafa nga i wun fa yo i’n i wlɛ wunlɛ’n ti kekle. Lidia waan: “Y’a kunndɛman kɛ e janvuɛ’m be tran e wun lɛ sa ngbɛn kun. Wie liɛ’n kɛ sran’m be ba e osu nianlɛ’n, sunlɛ yɛ e sun sa ɔ. E kunndɛli kɛ be cici e wla. E janvuɛ’m be miannin be ɲin kpa naan b’a wun wafa nga e wun fa yo e’n i wlɛ.”

Wafa nga Zezi yoli i sɔ liɛ’n, sran fi tomɛn i. Ɔ si kɛ be tinuntinun’n ‘sa kekle fanunfanun ju be su.’ (1 Famiɛn Mun 8:38) Nán ndɛ nga Zezi kan kleli Mali’n, i kunngba’n yɛ ɔ kan kleli Marti ɔ. Marti w’a yaciman ijɔlɛ, ɔ maan Zezi nin i kokoli yalɛ. Sanngɛ kɛ mɔ Mali su sun’n ti’n, Zezi w’a kanman ndɛ kpanngban w’a klemɛn i. (Zan 11:20-28, 32-35) ?Ngue yɛ i sɔ liɛ’n kle e ɔ? Yɛle kɛ ɔ flunman kɛ sran nga i sran wuli’n yɛ ɔ bo ijɔlɛ’n bo ɔ. Kɛ bé kán be klun ndɛ’n, e su nga e sie’n, ɔ kwla fɔnvɔ be kpa.

Ndɛ ng’ɔ kwla gua be awlɛn su nzue’n

Mali nin Marti be seli Zezi kɛ: ‘Sɛ ɔ ti kɛ a o wa sa’n.’ Be ndɛ sɔ’n w’a yomɛn i ya annzɛ w’a fa yoman ndɛ. Ɔ tɛli Marti su fa cicili i wla. Ɔ seli i kɛ: “Ɔ niaan’n ɔ́ wá cɛ́n.” (Zan 11:23) Zezi kannin ndɛ kpe kan sɔ’n, ɔ fa ukali Marti naan ɔ bu sa nga bé wá jú i ɲrun lɔ’n be akunndan. Kpɛkun klun ufue su ɔ kpɛnnin i wla kɛ Lazali liɛ nin a wieman mlɔnmlɔn.

Kɛ é kán ndɛ é klé be nga be sran wuli’n, nán maan e wla fi su kɛ ndɛ kpakpa nga e tu e klun e kan’n, kannzɛ w’a sɔnman’n, ɔ kwla yo sa ye kpa! E kwla kan fɔnvɔlɛ ndɛ’n i trele annzɛ e kwla klɛ. Fluwa nga e klɛ’n, be kwla kanngan nun kpɛ sunman. I ti’n, kannzɛ sran’n wuli i sin w’a la nun bɔbɔ’n, be te kwla te fɔnvɔ be nga e klɛ mannin be’n. Kɛ Kati i wun’n wuli m’ɔ dili anglo ngwlan’n, fluwa nga be klɛ mɛnnin i’n, ɔ kanngannin be nun ekun. I waan: “N wunnin kɛ be ukali min kpa blɛ sɔ’n nun tra laa’n bɔbɔ. Ɔ maan blɛ sɔ’n nun yɛ be fɔnvɔli min sakpa’n niɔn.”

?Ngue ndɛ yɛ e kwla kɛn i fluwa nga e klɛ i kɛ é fá yó sran yako’n i nun ɔn? E kwla klɛ sran ng’ɔ wuli’n i su ndɛ. Ɔ kwla yo like wie mɔ e nin sran sɔ’n e yoli’n, annzɛ i nzuɛn kpa wie i su ndɛ. Kati waan: “Ndɛ kpakpa nga be klɛli i Bɔbu i sran’n i wafa ng’ɔ ti’n i su’n, be yoli maan srilɛ nin sunlɛ kunnin min. I su aɲinsuɛ ndɛ nga be klɛli’n be yoli maan n srili, kpɛkun n wla kpɛnnin tranlɛ fɛfɛ nga e trannin’n su. Fluwa sɔ mɔ be ti min cinnjin kpa andɛ’n, Biblu’n nun ndɛ mma wie’m be o be nun sunman be nun.”

Maan e yo like trele kun e fa uka be

Like nga Zezi yoli fa ukali Lazali i awlofuɛ mun’n, e kwlá yoman wie. Yɛle kɛ ɔ yoli maan Lazali sɛli i sin nguan nun ekun. (Zan 11:43, 44) Sanngɛ like trele nga e sa ju su’n, e kwla yo e man be. I wie yɛle kɛ e kwla tɔn aliɛ e man be annzɛ e sike be nga be ba be yako yolɛ’n. Annzɛ kusu e kwla kpu be ninnge mun annzɛ e nian be mma’m be su. Asa ekun’n, e kwla ko kunndɛ ninnge ng’ɔ mian be sa’n e blɛ be annzɛ e fa be e kɔ kan be waan bé kɔ́’n. Ninnge kanngan sɔ mɔ be yi sran klolɛ kpafuɛ’n i nglo’n, be yo be nga be sran wuli’n be fɛ kpa.

E wun i wlɛ kɛ ɔ ju wie’n be nga be sran wuli’n be klo kɛ bé trán be ngunmin bé ló wunmiɛn kan. Sanngɛ e kwla fa ajalɛ naan e wla w’a fiman be su. Bla kun mɔ i wa’n wuli’n waan: “Ɔ leman blɛ kun sa mɔ bé sé kɛ ɔ sran ng’ɔ wuli’n i wie ndɛ’n yoman ɔ ya kun ɔn. Yɛ ɔ leman blɛ kun sa kusu mɔ á ká lɛ wún ɔ wun fɛ ɔ.” Sran wie’m be liɛ’n, afuɛ nuan kwlaa kɛ sran ng’ɔ wuli’n i aja cɛn’n annzɛ i wie cɛn’n ko ju’n, be wla kpɛn sran nga i sran wuli’n i su. Sɛ blɛ sɔ’n nun e bu sran sɔ’m be akunndan’n, é yó be janvuɛ kpa blɛ kekle nun.—Nyanndra Mun 17:17.

Like nga Zezi fa fɔnvɔli sran mun’n, i wie yɛle ndɛ yɛ m’ɔ cici sran wla m’ɔ kan kleli i sɔnnzɔnfuɛ mun’n. I waan: “E janvuɛ Lazar a lafi, sanngɛ ń kɔ́ i tinngelɛ.” (Zan 11:11) Zezi guɛli i sɔnnzɔnfuɛ’m be awlɛn su nzue kɛ bé cɛ́n be nga be wuli’n. Ɔ usali Marti kɛ: “?A lafi ndɛ sɔ’n su?” Yɛ ɔ tɛli su kɛ: “Ɛɛn.”—Zan 11:24-27.

?E lafi su kɛ Zezi cɛ́n be nga be wuli’n? Sɛ e lafi su sɔ’n, maan e kɛn i sɔ ndɛ’n e kle be nga be sran wuli’n. Maan e yo like trele kun e fa uka be. Ndɛ nga e kan’n ɔ nin like nga e yo e man be’n, ɔ́ fɔ́nvɔ be kan.—1 Zan 3:18.

[Lika’m be jajalɛ, bue 9]

(Voir la publication)

PERE

Zurdɛn nzue ba’n

Zeriko

Betani

Njin nzue jenvie’n

Zerizalɛmu

SAMARI