Maan e suan Ɲanmiɛn Ndɛ’n nun like
?Ngue ti yɛ ɔ fata kɛ e suan Ɲanmiɛn Ndɛ’n nun like ɔ?
Ndɛ nga, ɔ tɛ kosan wie mun mɔ atrɛkpa’n, amun fa usali amun wun’n be su. Yɛ ɔ kle e Biblu’n i bue nga e kwla kanngan nun’n, naan y’a wun kosan sɔ’m be su tɛlɛ’n. Zoova i Lalofuɛ’m be klo kɛ bé yíyí ndɛ sɔ’m be nun klé amun.
1. ?Ngue ti yɛ ɔ fata kɛ e suan Ɲanmiɛn Ndɛ’n nun like ɔ?
Like nga Ɲanmiɛn wá yó mán klɔ sran mun’n, i su jasin fɛ kun o i nuan. Ɔ kɛn i ndɛ Biblu’n nun. Biblu’n ti kɛ lɛtri kun mɔ e Si kpa m’ɔ o ɲanmiɛn su lɔ’n, ɔ klɛli blɛli e’n sa.—An kanngan Zeremi 29:11 nun.
2. ?Jasin fɛ sɔ’n yɛle benin?
Klɔ sran’m be kunndɛ kɛ famiɛn kpa kun sie be. Be famiɛn’m be nun wie fi w’a kwlá nunnunman nzaje sa yolɛ’n nin ndɛ kwlɛ dilɛ’n, tukpacɛ’n annzɛ wie’n. Sanngɛ jasin fɛ kun o lɛ. Yɛle kɛ Ɲanmiɛn wá mán klɔ sran’m be famiɛn kpa kun. Famiɛn sɔ’n wá yó maan be su afɛ’n kwlaa wíe.—An kanngan Daniɛl 2:44 nun.
3. ?Ngue ti yɛ ɔ ti cinnjin kɛ e suan Ɲanmiɛn Ndɛ’n nun like ɔ?
Ɔ cɛ kaan, Ɲanmiɛn wá núnnún klunwifuɛ mun, be su wunman be asiɛ’n su kun. Sanngɛ ka naan w’a yo sɔ’n, Ɲanmiɛn su kle sran akpinngbin be like naan be mɛn dilɛ’n yo kpa, naan ɔ taka Ɲanmiɛn nin sran klolɛ’n su. Like nga sran’m be su suɛn i Ɲanmiɛn Ndɛ’n nun’n, ɔ uka be naan b’a kwla jran be su sa’m be ɲrun kekle, naan b’a di aklunjuɛ kpa, naan be wun w’a yo Ɲanmiɛn fɛ.—An kanngan Sofoni 2:3 nun.
4. ?Biblu’n fin wan?
Biblu’n nun fluwa kanngan’m be nuan’n ti 66. Sran kɔe 40 yɛ be klɛli be ɔ. Moizi klɛli i nun fluwa nnun klikli’n, i afuɛ kɔe 3.500 yɛ. Yɛ akoto Zan yɛ ɔ klɛli i fluwa kasiɛn’n niɔn. Ɔ yoli i sɔ w’a di afuɛ 1.900 tra su. Ɲanmiɛn i klun akunndan’n yɛ Biblu’n i klɛfuɛ’m be klɛli ɔ. B’a kpɛman be bɔbɔ be ti nun yɛ be klɛli ɔ. I sɔ’n ti yɛ Biblu’n fin Ɲanmiɛn’n niɔn.—An kanngan 2 Timote 3:16 nin 2 Piɛr 1:21 nun.
Asa ekun’n, kɛ Biblu’n kan e ɲrun lɔ sa’m be ngbɛsungbɛsu’m be ndɛ’n, ɔ ti su sa sɛsɛsɛ. Sanngɛ klɔ sran’m be nun wie fi kwlá yomɛn i sɔ. (Ezai 46:9, 10) Asa ekun’n, Biblu’n kle e Ɲanmiɛn i nzuɛn’n. Yɛ ɔ kwla uka sran mun naan be mɛn dilɛ’n w’a yo kpa. I kwlaa sɔ’n ti’n, sran akpinngbin kɔe wie be wa wunnin i wlɛ kɛ Biblu’n ti Ɲanmiɛn Ndɛ sakpasakpa.—An kanngan Zozie 23:14 nin 1 Tɛsalonikfuɛ Mun 2:13 nun.
5. ?Ngue yɛ ɔ kwla uka e naan y’a wun Biblu’n nun ndɛ’n i wlɛ ɔ?
Ɲanmiɛn Ndɛ’n mɔ Zezi kleli sran mun’n ti yɛ sran sunman lika be sili i ɔ. Sran nga ɔ kleli be like’n, be sunman lika be si Biblu’n nun ndɛ mun. Sanngɛ ɔ fatali kɛ ɔ uka be naan b’a wun ndɛ sɔ’m be wlɛ. Ɔ maan kɛ ɔ bo Biblu’n nun ndɛ kun su’n, i sin’n ɔ yiyi nun. I sɔ’n ti’n, sran’m “be wunnin Nyanmiɛn Ndɛ nga be klɛli’n i wlɛ.” Ndɛ akpasua ng’ɔ o yɛ’n, mɔ be flɛ i “Maan e suan Ɲanmiɛn Ndɛ’n nun like” i nun’n, ajalɛ kunngba’n yɛ bé nían su bé fá úka amun ɔn.—An kanngan Lik 24:27, 45 nun.
Kɛ e suan Ɲanmiɛn Ndɛ’n nun like mɔ e wun like nga ti yɛ e o mɛn nun’n i wlɛ’n, nanwlɛ ɔ yo fɛ dan. Sanngɛ kɛ sran wie’m bé wún kɛ amun su kanngan Biblu’n nun’n, ɔ su yoman be fɛ. Sɛ ɔ yo sɔ’n, nán amun sa sin bubu amun. Afin sɛ amun kunndɛ kɛ amún ɲán anannganman nguan’n, ɔ fata kɛ amun si Ɲanmiɛn.—An kanngan Matie 5:10-12 nin Zan 17:3 nun.
Sɛ amun kunndɛ kɛ amún sí nun ekun’n, amun kwla nian fluwa ?Ngue like yɛ Biblu’n kle i sakpasakpa ɔ? i ndɛ tre 2 nun wie. Zoova i Lalofuɛ mun yɛ be yili ɔ.