Like nga ti yɛ ɔ fata kɛ edɛni i su ndɛ’n yo amun cinnjin’n

BIBLU’N su like suanfuɛ wie’m be jran ndɛ wie’m be su be se kɛ Edɛni fie’n timan lika jrɛiin sa. Ndɛ sɔ’m be nun’n, nga be bo e nuan danfuɛ’n be nun kun yɛle kɛ Biblu’n i onga’n ɔ kanman lika sɔ’n i ndɛ. I wie yɛle ndɛ nga Ɲanmiɛn sulɛ wafa’m be su like klefuɛ mɔ be flɛ i Paul Morris klɛli’n. I waan: “Biblu’n i onga’n boman Edɛni ndɛ’n i su trele sa kun.” Be nga be se be wun kɛ be si i sɔ ndɛ’n su like kpa’n, be waan i ndɛ yo fɛ. Sanngɛ kɛ e nian Biblu’n nun’n, e wun kɛ be ndɛ sɔ’n timan su mlɔnmlɔn.

Nanwlɛ, Biblu’n kan Edɛni fie’n ɔ nin Adam nin Ɛvu ɔ nin wuo’n be ndɛ kpɛ sunman kpa.a Kannzɛ Biblu’n su like suanfuɛ’m be fɔnnin’n, sanngɛ be fɔnlɛ liɛ’n ɔ juman Ɲanmiɛn sulɛ wafa’m be su kpɛnngbɛn nin Biblu’n i kpɔfuɛ’m be liɛ’n nun kaan sa. Afin Ɲanmiɛn sulɛ wafa’m be su kpɛnngbɛn nin Biblu’n i kpɔfuɛ’m be ndɛ nga be kan’n, ɔ yo maan sran’m be lafiman Edɛni i su ndɛ ng’ɔ o Bo Bolɛ fluwa’n nun’n i su. Kɛ be yo sɔ’n, Biblu’n bɔbɔ ba’n yɛ be su yo naan sran’m b’a lafiman su ɔ. ?Ngue ti ɔ?

Ɔ ti cinnjin kɛ e wun sa ng’ɔ juli Edɛni fie’n nun lɔ’n i wlɛ naan y’a kwla wun Biblu’n i onga’n i wlɛ. I wie yɛle kɛ Ɲanmiɛn Ndɛ’n kwla uka e naan y’a wun kosan cinnjin kpa nga klɔ sran’m be fa usa be wun’n be wlɛ. Kusu’n, kɛ Biblu’n tɛ́ kosan sɔ’m be su’n, saan ɔ́ kán sa ng’ɔ juli Edɛni fie’n nun lɔ’n i ndɛ. Kosan sɔ’m be nun wie mun yɛ.

● ?Ngue ti yɛ e yo oke mɔ e wu ɔ? Sɛ ɔ ti kɛ Adam nin Ɛvu b’a kpɔciman Ɲanmiɛn le’n, nn be trannin nguan nun tititi. Saan ɲin kekle yolɛ’n yɛ maan bé wú ɔ. Kɛ ɔ fin cɛn mɔ be yoli ɲin kekle’n yɛ wie’n bali ɔ. (Bo Bolɛ 2:16, 17; 3:19) Fɔ’n wa wluli be nun. Ɔ maan saan sa tɛ yolɛ’n nin fɔ m’ɔ o be nun’n cɛ yɛ be kwla fa man be osu’n nunfuɛ mun ɔn. I ti’n, Biblu’n yiyi nun kɛ: “Sran kun ti yɛ sa tɛ yolɛ’n bali mɛn nun-ɔn, yɛ sa tɛ sɔ’n ti yɛ maan wie’n bali-ɔ. Yɛ i ti yɛ maan wie’n wo sran’m be kwlaa be su-ɔ, afin be kwlaa be yo sa tɛ.”—Rɔmfuɛ Mun 5:12.

● ?Ngue ti yɛ Ɲanmiɛn yaci sran’m be lɛ mɔ be yo klunwi ɔ? Edɛni fie’n nun lɔ’n, Satan waan Zoova ti ato buafuɛ naan ɔ kunndɛman kɛ be ng’ɔ yili be’n be ɲan like kpa. (Bo Bolɛ 3:3-5) Ɔ maan i waan Zoova siman sran sie. Adam nin Ɛvu be suli Satan su. I ti’n be kpaloli Zoova i sielɛ’n. Kɛ be yoli sɔ’n ɔ ti kɛ nn be waan klɔ sran bɔbɔ kwla kle like ng’ɔ ti kpa’n ɔ nin ng’ɔ ti tɛ’n. Kɛ mɔ Zoova i sa sɛsɛ yolɛ’n ɔ nin i ngwlɛlɛ’n be leman wunsu’n ti’n, ɔ si kɛ like kunngba yɛ ɔ kwla fa kpɛ ndɛ sɔ’n nun ɔn. Yɛle kɛ ɔ́ mán klɔ sran’m be blɛ naan be sie be bɔbɔ be wun kɛ nga be kunndɛli’n sa. Kɛ bé síe be wun bé kɔ́ kusu’n, klunwi nga be yo mɔ Satan i sa o nun’n, ɔ yi like kun i nglo weiin. Yɛle kɛ sɛ nán Ɲanmiɛn yɛ ɔ kwla sie klɔ sran’n, klɔ sran bɔbɔ kwlá siemɛn i wiengu.—Zeremi 10:23.

● ?Wafa sɛ yɛ Ɲanmiɛn kunndɛ kɛ asiɛ wunmuan’n kaci ɔ? Zoova kunndɛli kɛ asiɛ wunmuan’n yo klanman kɛ nga ɔ fa siesieli Edɛni fie’n sa. Kɛ ɔ ko yo naan w’a yo sɔ’n, ɔ seli Adam nin Ɛvu be kɛ be wu ba naan be yi asiɛ’n naan be “sie i.” (Bo Bolɛ 1:28) Ɔ maan Ɲanmiɛn kunndɛli kɛ asiɛ’n kaci mɛn klanman naan Adam nin Ɛvu nin be osu’n nunfuɛ mɔ fɔ nunman be nun’n, be tran su. Biblu’n kan wafa nga Ɲanmiɛn wá yíɛ i sɔ liɛ’n i nuan’n i ndɛ kpɛ sunman.

● ?Ngue ti yɛ Zezi Klist bali asiɛ’n su wa ɔ? Ɲin kekle nga Adam nin Ɛvu be yoli i Edɛni fie’n nun lɔ’n ti’n, be osu’n nunfuɛ’m be kwlaa be wu wie. Sanngɛ klolɛ mɔ Ɲanmiɛn klo be’n ti’n ɔ siesieli sa kun naan ɔ́ fá cící be wla. Ɔ sunmɛnnin i Wa’n asiɛ’n su wa naan kɛ nga Biblu’n fa kan’n sa’n, ɔ fɛ i wun kpɔ sran’m be ti. (Matie 20:28) ?Ngue ti yɛ ɔ yoli sɔ ɔ? Yɛle kɛ Zezi ti “Adam kasiɛnfuɛ’n.” Sanngɛ like nga Adam w’a kwlá yoman’n, i liɛ’n ɔ kwla yoli. I ɲin yili Zoova tititi, ɔ maan fɔ w’a wlumɛn i nun. Kpɛkun i klunklo su ɔ fɛli i wun yili tɛ naan sran nga be nin Ɲanmiɛn be nanti klanman tititi’n, Ɲanmiɛn yaci be sa tɛ mun cɛ be. Naan i agualiɛ su’n, be mɛn dilɛ’n yo kɛ i nun mɔ Adam nin Ɛvu be o Edɛni fie’n nun lɔ mɔ be nin a yoman sa tɛ’n sa. (1 Korɛntfuɛ Mun 15:22, 45; Zan 3:16) Ɔ maan Zezi i like ng’ɔ yoli’n ti’n, e kwla lafi su kɛ Zoova i klun sa’n kpɛ́n su. Yɛle kɛ asiɛ’n káci mɛn klanman kɛ Edɛni fie’n sa.b

Like nga Ɲanmiɛn waan ɔ́ yó’n ɔ timan paloo sa. Kusu ɔ timan ndɛ ngbɛn. Ɔ ti like jrɛiin. Laa Edɛni fie’n ti lika jrɛiin yɛ i nun nnɛn’m be ti nnɛn jrɛiin, kpɛkun i nun sran’m be kusu be ti sran jrɛiin wie. I sɔ kunngba’n, like nga Ɲanmiɛn waan ɔ́ yó i asiɛ’n su wa’n, ɔ́ yó i sakpasakpa. Ɔ ka kaan sa ɔ́ yó i sɔ like’n. ?Amún ɲɛ́n i su ye’n wie? Sɛ amún ɲán wie annzɛ amun su ɲanman wie’n, i dan lika fin amun bɔbɔ. Ɲanmiɛn klo kɛ sran kpanngban be ɲɛn i sɔ ye’n. Be nga be nantilɛ’n w’a yoman klanman bɔbɔ’n, ɔ kunndɛ kɛ be ɲɛn i sɔ ye’n wie.—1 Timote 2:3, 4.

Kɛ Zezi wá wú’n, ɔ kannin ndɛ kun kleli bian kun mɔ i nantilɛ’n w’a yoman klanman’n. Bian sɔ’n ti sa tɛ yofuɛ. Ɔ si kɛ sɛ be kun i’n ɔ ti su. Sanngɛ ɔ kunndɛli kɛ Zezi fɔnvɔ i naan ɔ cici i wla. ?Zezi seli i sɛ? Ɔ seli kɛ: “Min nin wɔ é jú Nyanmiɛn i lika klanman’n nun lɔ.” (Lik 23:43) ?Sɛ Zezi kunndɛli kɛ laa sa tɛ yofuɛ sɔ’n, ɔ cɛn naan ɔ ɲan suralɛ naan ɔ kwla tran mɛn klanman m’ɔ ti kɛ Edɛni fie’n sa’n i nun tititi’n, yɛ nn amun li? ?Ɔ su kunndɛman kɛ amun ɲan suralɛ kunngba sɔ’n wie? Ɔ kunndɛ sɔ! I Si kusu kunndɛ sɔ wie! Sɛ amun kunndɛ kɛ amún trɛ́n i sɔ lika liɛ’n nun’n, amun yo like kwlaa nga amun kwla yo’n naan amun suan Ɲanmiɛn m’ɔ dili Edɛni fie’n i su like.

[Ja ngua lɛ ndɛ mun]

[Kuku/Foto mun, bue 10]

KASIƐ KUN MƆ BIBLU’N I WUNMUAN’N TAKA SU’N

“Ń fá kpɔlɛ ń wlá a nin bla’n be afiɛn, ń fá wlá ɔ osu’n nin bla’n i osu liɛ’n be afiɛn. Bla’n i osufuɛ’m bé kpɔ́tɔ ɔ ti’n, yɛ ɔ kusu á ká be ja sin.”—Bo Bolɛ 3:15.

Biblu’n nun kasiɛ klikli’n yɛ ɔ o lɛ ɔ. Ɲanmiɛn boli kasiɛ sɔ’n Edɛni fie’n nun lɔ. Ɔ kan sran nnan be ndɛ. Be yɛle bla’n, ɔ nin bla’n i osu’n, ɔ nin wuo’n, yɛ wuo’n i osu’n. ?Be ti ngue nzɔliɛ? ?Wafa sɛ yɛ “kpɔlɛ” o be afiɛn ɔn?

WUO’N

Mmusu’m be si Satan.—Sa Nglo Yilɛ 12:9.

BLA’N

Zoova i sufuɛ nga be o ɲanmiɛn su lɔ’n. (Galasifuɛ Mun 4:26, 27) Ezai kannin “bla’n” i ndɛ. Ɔ seli kɛ ɔ́ wá wú Ɲanmiɛn i nvle kun.—Ezai 54:1; 66:8.

WUO’N I OSU’N

Be nga be klunklo be yo Satan i klun sa’n.—Zan 8:44.

BLA’N I OSU’N

Zezi Klist yɛ ɔ ti bla’n i osu’n nunfuɛ’m be nun cinnjin’n niɔn. Ɔ fin Zoova i anuannzɛ’n i bue ng’ɔ o ɲanmiɛn su lɔ’n nun. “Bla’n i osu’n” nunfuɛ wie mun yɛle Klist i niaan ng’ɔ nin be di famiɛn’n. Be kpali be sieli be ngunmin yɛ be ti Ɲanmiɛn i nvle’n mɔ be flɛ i “Izraɛlfuɛ nga be ti i liɛ sakpa’n.”—Galasifuɛ Mun 3:16, 29; 6:16; Bo Bolɛ 22:18.

I JASIN KALƐ

Be boli Mɛsi’n i kannin yaya, sanngɛ ɔ su kaman lɛ titi. Satan kwla yoli maan be kunnin Zezi asiɛ’n su wa. Ɲanmiɛn cɛnnin Zezi.

I FƐ BOLƐ’N

Satan i fɛ bolɛ’n ti i kunlɛ. Zezi wá núnnún Satan. Sanngɛ ɔ́ dún mmua síesíe sa tɛ nga Satan boli i yolɛ bo Edɛni fie’n nun lɔ’n i sin sa’m be ye ka.—1 Zan 3:8; Sa Nglo Yilɛ 20:10.

Sɛ an klo kɛ án sí Biblu’n i nun ndɛ cinnjin’n i su like kpa’n, amun nian fluwa La Bible — Quel est son message ? nun. Zoova i Lalofuɛ mun yɛ be yili ɔ.

[Foto, bue 11]

Adam nin Ɛvu be isali sa tɛ yolɛ’n i bo nzuɛn’n.