Ngasi’n i siesielɛ

BIBLU’N seman kɛ aja’n nun tranlɛ’n ti like pɔpɔ. Ɲanmiɛn maan akoto Pɔlu Klɛli i kɛ be nga be o aja’n nun’n, “bé wún be nyinsu.” (1 Korɛntfuɛ Mun 7:28) Sanngɛ be nga b’a ja’n, be bɔbɔ be kwla bu sa wie’m be ɲrun naan ndɛ wie’m b’a tɔman be aja’n nun. Naan kusu’n, be wiengu kun’n, i klun w’a jɔ dan w’a tra laa’n. Maan amun fa amun ɲin sie sa nsiɛn mɔ be lo bian nin bla sunman be ngasi’n be su. Yɛ amun nian wafa nga Biblu’n nun mmla’m be kwla uka be sa sɔ’m be nun’n.

1

NGASI NDƐ:

“E yo ninnge mun ngunminngunmin.”

BIBLU’N NUN MMLA’N:

Maan ‘amun wun like nga be ti kpa’m be wlɛ.’—FILIPFUƐ MUN 1:10.

Ninnge nga be ti kpa’n, be nun kun yɛle aja’n. Ɔ fata kɛ amun aja’n i ndɛ’n yo amun cinnjin kpa. I sɔ’n ti’n, amun nian, sɛ ninnge nga amun fa amun blɛ’n yo’n, ɔ loman amun wiengu kun’n i ngasi o. Nán maan amun junman’n ti’n, amun nin amun yi’n annzɛ amun wun’n amun yo ninnge mun ngunminngunmin. I yo, amun junman’n annzɛ ndɛ nanndoliɛ kpa wie kwla yo naan kekle nun’n, amun nin amun wun’n annzɛ amun yi’n, amun afiɛn’n w’a ti nun kan. Sanngɛ, amun kwla nian amun wun naan ninnge wie’m b’a faman amun blɛ’n dan. Nán maan amun ɲin kpa ninnge sɔ’m be su kaan sa. Ɔ kwla yo kɛ amun ɲin su yiyilɛ’n sa, annzɛ amun janvuɛ’m be wun kɔlɛ’n sa.

Sanngɛ bian nin bla wie’m be liɛ’n, kɛ ɔ ko yo naan be nin be yi’n annzɛ be wun’n b’a tranman likawlɛ’n ti’n, be fa junman uflɛ be uka nga be bɔbɔ be di i laa’n su. Annzɛ kusu’n, be kunndɛ be ɲin su yiyilɛ like uflɛ wie ekun be uka laa liɛ’n su. Sran sɔ mun’n, nán kɛ ninnge ngbɛn yɛ be nin be yi’n annzɛ be wun’n be ‘yo i ngunminngunmin’ ɔn. Sanngɛ wanndilɛ bɔbɔ kpa sa yɛ be wanndi be awlobo ndɛ mun ɔn. Nanwlɛ, sɛ amun bɔbɔ annzɛ amun wun’n, annzɛ amun yi’n yo i sɔ wie’n, like trele kun ng’ɔ kpɛli i sɔ ndɛ liɛ’n i ba’n, maan amun sie i nzɔliɛ. Kpɛkun maan amun kunndɛ i siesiewlɛ. Maan amun si kɛ, sɛ amun nin amun yi’n annzɛ amun wun’n be yo ninnge mun likawlɛ’n yɛ amun afiɛn’n, ɔ́ mántan kpa yɛ amún kwlá ‘káci sran wunmuan’ ɔn.—Bo Bolɛ 2:24.

Wafa nga sran wie’m be fali afɔtuɛ sɔ’n su’n: Andrea nin i yi Tanji be fin nvle ng’ɔ suan Ɔstrali’n. Be jali w’a di afuɛ blu. Andre waan: “N wunnin i kɛ junman’n i ngboko dilɛ’n, annzɛ janvuɛ’m be wun kɔlɛ dan’n, ɔ kwla yo tɛ man sran kun i aja’n. I ti’n, e nin min yi’n e sieli blɛ kun. Blɛ sɔ nun’n, e koko yalɛ kpa, e kan e klun ndɛ e kle e wiengu.”

Dɛvu nin i yi Zani be tran Amlɛnkɛn’m be mɛn’n nun lɔ. Be jali w’a di afuɛ 22. Cɛn kwlaa kɛ nnɔsua ko ju cɛ’n, be fa miniti 30 be koko yalɛ kan. Be kan sa nga be juli be su’n be ndɛ. Ajalɛ sɔ mɔ be fali’n i su ndɛ nga Zani kan’n yɛ: “Blɛ kan sɔ’n ti cinnjin kpa. Ɔ maan, e mian e ɲin kpa naan kɛ dɔ sɔ’n ko ju’n, like uflɛ fi w’a tanndanman e ja nun.”

2

NGASI NDƐ:

“Like nga n sunnzunnin kɛ ń ɲɛ́n i aja’n nun’n, nɛ́n i yɛ n ɲɛn i ɔ.”

BIBLU’N NUN MMLA’N:

‘Nán maan sran fi bu i bɔbɔ wun akunndan, sanngɛ maan ɔ bu i wiengu akunndan.’—1 KORƐNTFUƐ MUN 10:24.

Sran ng’ɔ bu i bɔbɔ i ngunmin i wun akunndan mɔ like ng’ɔ ɲɛn i aja’n nun’n, yɛ ɔ lo i’n, ɔ su kwlá diman aklunjuɛ kpa sa le. Kannzɛ bɔbɔ maan ɔ ja bian annzɛ bla flan nun sɛ, i kwlaa sɔ’n yó ngbɛn. Kɛ aja’n nun’n, yasua nin bla’n be wiengu kun’n i ndɛ yɛ ɔ lo be’n, be aja’n yo fɛ. Zezi kleli sa nga ti yɛ ɔ ti sɔ’n. Ɔ seli kɛ: “Sɛ a cɛ sran like’n, ɔ ti kpa tra kɛ be cɛ wɔ like’n.”—Sa Nga Be Yoli’n 20:35.

Wafa nga sran wie’m be fali afɔtuɛ sɔ’n su’n: Maria nin Martɛn be tran Mɛksiki. Be jali w’a di afuɛ 39. Sanngɛ nán titi yɛ be dili aklunjuɛ be aja’n nun ɔn. Be nɲɔn’n, be wla kpɛn blɛ kun m’ɔ yoli kekle kpa mannin be’n i su. Maria waan: “Kɛ ya’n kunnin min kpa’n mɔ ń íjɔ’n, n kannin ndɛ tɛtɛ n kleli Martɛn. Ɔ fali ya kpa tratrali su. N yiyili nun n kleli i lelee kɛ, nɛ́n i sɔ ndɛ yɛ min waan ń kán ɔn. Naan fɔnlɛ yɛ min nuan’n fɔnnin ɔn. Sanngɛ i waan nán n se sɔ naan ɔ ti.” Ndɛ nga Martɛn kan’n yɛ: “Kɛ é íjɔíjɔ sɔ’n, m ma seli min wun kɛ aja sɔ’n su kwlá yoman ye kun. Naan ɔ fataman kɛ n kle min wun yalɛ n siesie e afiɛn ekun.”

Martɛn kunndɛ kɛ Maria i ɲin yi i. Maria kusu kunndɛ kɛ Martɛn tie ndɛ ng’ɔ kan kle i’n. Sanngɛ be nɲɔn’n, be ɲanman like nga be wla o su’n.

?Ngue yɛ ɔ ukali be ɔ? Martɛn waan: “N guali min ya’n i ase. Biblu’n man e afɔtuɛ kpa kun. I waan maan e ɲin yi e wiengu naan e yo e wiengu kpa. E nɲɔn’n e nuan sɛli su kɛ é fá afɔtuɛ sɔ’n su. Kɛ afuɛ’m bé sín bé kɔ́’n, e wa wunnin i kɛ kannzɛ bɔbɔ’n maan e afiɛn ndɛ’n yo sɛ yo sɛ, sanngɛ e kwla siesie be kwlaa sɔ’n. Naan like ng’ɔ́ úka e’n, yɛle Ɲanmiɛn i srɛlɛ’n ɔ nin afɔtuɛ nga Biblu’n man’n, i su falɛ’n.”—Ezai 48:17, 18; Efɛzfuɛ Mun 4:31, 32.

3

NGASI NDƐ:

“Like ng’ɔ fata kɛ min wun’n (annzɛ min yi’n) yo’n, ɔ yoman.”

BIBLU’N NUN MMLA’N:

‘E kwlaa é wá kán sa nga e yoli be’n klé Nyanmiɛn.’—RƆMFUƐ MUN 14:12.

Ɔ le like nga ɔ fata kɛ bla’n nin yasua’n be tinuntinun be yo naan be aja’n w’a yo ye ɔ. Sɛ be nun kun diman i junman liɛ’n, be tranlɛ’n yó kekle. Sɛ kusu be nɲɔn’n yɛ be yoman like ng’ɔ fata kɛ be yo’n, naan be fa ndɛ’n be gua be wiengu su’n, i liɛ bɔbɔ’n, be aja’n nun sánngan kpa.

Sɛ like ng’ɔ fata kɛ amun wiengu kun’n yo’n, i su yɛ amun akunndan kwlaa’n wo’n, amun wla’n su kwlá guaman ase le. I li sɛ amun jrɛn i sɔ’n su naan amun yoman like ng’ɔ fata kɛ amun bɔbɔ be yo’n, yɛ ɔ́ yó kekle kpa ekun mán amun ɔn. Sanngɛ, sɛ amun mian amun ɲin naan like ng’ɔ fata kɛ awlobo bla kpa kun yo’n, annzɛ siɛ kpa kun yo’n yɛ amun yo’n, amun aja kwlá táka kpa. (1 Piɛr 3:1-3) Ng’ɔ ti cinnjin kpa bɔbɔ’n, yɛle kɛ amun aeliɛ’n kle Ɲanmiɛn kɛ amun klun jɔ aja’n m’ɔ kpɛli i ba’n i su. Yɛ i kwlaa sɔ’n maan i klun’n jɔ́ wie kpa.—1 Piɛr 2:19.

Wafa nga sran wie’m be fali afɔtuɛ sɔ’n su’n: Kimu nin i wun’n be tran Kore nvle’n nun lɔ. Be jali w’a di afuɛ 38. Kimu waan: “Ɔ ju wie’n, n wunman like ti’n, min wun’n fa min wun ya. Kpɛkun, ɔ nin min tannin nvlɛ. I sɔ’n ti’n, m ma buli i kɛ ɔ kloman min kun. Ɔ maan wie liɛ’n, akunndan nga m bu’n yɛ: ‘?Sran mɔ n kan min klun ndɛ n kle i’n, m’ɔ buman min wie’n, ngue ti yɛ sɛ ɔ kan ndɛ kle min’n, ń kó síe min su ɔ?’”

Sɛ Kimu klo’n, ɔ kwla fɛ i akunndan kwlaa’n sie ngasi nga i wun’n lo i’n, ɔ nin like nga bian’n yoman’n be su. Sanngɛ nɛ́n i sɔ yɛ ɔ yoli ɔ. Ndɛ nga i bɔbɔ’n kan’n yɛ: “M’an kaman ya falɛ’n su sa trilili. M ma wunnin i wlɛ kɛ ɔ ti kpa kɛ n dun mmua n fa e afiɛn siesielɛ’n i wun ajalɛ. Kɛ n yoli i sɔ’n, e wa kokoli yalɛ amanniɛn su yɛ e tili e wun aniɛn.”—Zak 3:18.

4

NGASI NDƐ:

“Min yi’n timan lofuɛ.”

BIBLU’N NUN MMLA’N:

“Krist yɛ ɔ sie yasua-a.”—1 KORƐNTFUƐ MUN 11:3.

Yasua ng’ɔ se kɛ i yi’n timan lofuɛ’n, maan ɔ bu i klun lɔ nian, sɛ i bɔbɔ’n klo kɛ ɔ́ ló i wun mán Zezi Klist m’ɔ ti i kpɛn’n nin o. Yasua ng’ɔ fa Zezi i ajalɛ’n su’n, ɔ kle kɛ ɔ lo i wun.

Ndɛ nga akoto Pɔlu klɛli’n yɛ: “Yasua mun, kɛ Krist kloli Asɔnun’n, amun kusu an klo amun yi mun sɔ.” (Efɛzfuɛ Mun 5:25) Zezi w’a ‘mianmianman’ i sɔnnzɔnfuɛ mun. (Mark 10:42-44) Like ng’ɔ klo kɛ be yo’n, ɔ kle be trele. Kpɛkun sɛ be fa atin tɛ su’n, ɔ tinngɛ be. Sanngɛ w’a kanman ndɛ wunmiɛn su w’a kleman be le. Ɔ nin be ijɔli klolɛ su. W’a seman kɛ like nga be kwlɛmɛn i yo’n, be yo i kekle nun. (Matie 11:29, 30; Mark 6:30, 31; 14:37, 38) Ɔ dun mmua bu be akunndan titi, kwlaa naan w’a bu i bɔbɔ i wun akunndan.—Matie 20:25-28.

Ɔ fata kɛ yasua kun usɛ i wun kɛ: ‘?Wafa nga e nvle nunfuɛ’m be nin be yi’m be tran’n, i su yɛ n nian ɔn? ?Annzɛ afɔtuɛ nga Biblu’n man’n i su yɛ n nian ɔn?’ ?Sɛ akunndan nga yasua kun bu’n ɔ timan i yi’n i liɛ’n su’n, naan bla’n jran i ndɛ liɛ’n su kɛn i aɲinyiɛ su kle i wun’n, amún bú bla sɔ’n sɛ? Biblu’n waan Abraamu i yi Sara ti bla kun mɔ i ɲin yili i wun’n niɔn. (1 Piɛr 3:1, 6) Sanngɛ sɛ ɔ nin i fata’n, bla’n kwla man yasua’n i akunndan. I su ajalɛ kun yɛle kɛ blɛ kun nun’n, Abraamu w’a wunman kɛ ɔ kali kan’n, nn sa yaya tɔli be awlo’n nun. I yi Sara yɛ ɔ ko tikeli i ɲin naan w’a wun sa sɔ’n i wlɛ ɔ.—Bo Bolɛ 16:5; 21:9-12.

Nanwlɛ, Abraamu w’a yomɛn i ɲin wiwi Sara i wun, naan ijɔlɛ’n w’a kun i yi’n i srɛ. Ɔ timan sran kpokokpoko yofuɛ. Wafa kunngba’n, yasua ng’ɔ fa Biblu’n nun mmla’n su’n, ɔ su miɛnmiɛnmɛn i yi’n kɛ ɔ fa ndɛ kwlaa ng’ɔ kan’n su. Sanngɛ ɔ́ bú i yi’n i akunndan ɔ maan bla’n i ɲin yí i.

Wafa nga sran wie’m be fali afɔtuɛ sɔ’n su’n: Zaki tran Angle mɛn’n nun lɔ. Ɔ o aja’n nun w’a di afuɛ mɔcuɛ. Ndɛ ng’ɔ kan’n yɛ: “Ajalɛ cinnjin kwlaa nga ń fá’n, m mian min ɲin n dun mmua m bo su kle min yi’n ka. Kusu’n, n kplin min ɲin naan m’an buman min bɔbɔ min ngunmin min wun akunndan. N sunnzun kɛ ń dún mmua ḿ bú like ng’ɔ lo min yi’n i akunndan kwlaa naan m’an bu min liɛ’m be akunndan.”

Zɔzu o aja’n nun’n w’a di afuɛ 59, yɛ ɔ tran Amlɛnkɛn’m be mɛn’n nun lɔ. I waan: “M mian min ɲin naan e nin min yi’n y’a tranman kɛ e nin mantuan kan wie sa. M bu i sran ngwlɛlɛfuɛ mɔ be kwla lafi i su be fa ajalɛ ɔ.”—Nyanndra Mun 31:10.

5

NGASI NDƐ:

“Min wun’n faman ninnge’m be nun ta.”

BIBLU’N NUN MMLA’N:

“Bla ng’ɔ ti ngwlɛlɛfuɛ’n, ɔ siesie i awlo’n. Bla ng’ɔ ti sinnglinfuɛ kusu’n ɔ saci i awlo liɛ’n.”—NYANNDRA MUN 14:1.

Sɛ amun wun’n faman ninnge’m be nun ta’n, annzɛ ɔ sisi i bo amun awlobo nun ndɛ’m be siesielɛ nun’n, ajalɛ nga amun kwla fa’n, be nun nsan yɛ: (1) Amun kwla kɛn i nzuɛn tɛ’n i ndɛ titi, annzɛ (2) amun bɔbɔ amun kwla de awlobo kpɛn junman dilɛ’n i sa nun, annzɛ kusu’n (3) ninnge kwlaa ng’ɔ kplin i ɲin’n yo’n, amun kwla fa amun ɲin sie su be yi i ayɛ. Sɛ amun fa ajalɛ nɲɔn klikli’m be nun kun’n, nn amun su wa saci amun awlo’n. Sanngɛ sɛ amun fa ajalɛ i nsan sufuɛ’n, amún kwlá síesíe amun aja’n.

Yasua kaka be bu aɲinyiɛ’n i like dan tra klolɛ’n. Ɔ maan, sɛ amun wun’n wun i kɛ amun ɲin yi i’n, yɛle kɛ sɛ amun kle i kɛ i ɲin ng’ɔ mian di awlobo kpɛn junman’n, ɔ yo sa ye’n, naan ɔ yo amun fɛ’n, ɔ́ kwlá kplín i ɲin kpa ekun. I yo, wie liɛ’n, ndɛ wie su’n amun nɲɔn’n, amun akunndan’n kwla yo ngunminngunmin. Sanngɛ ɔ fata kɛ amun tran ase be koko i su yalɛ. (Nyanndra Mun 18:13) I lɛ nun kusu’n, ndɛ ng’ɔ́ fín amun nuan’n fíte, ɔ nin wafa nga amún síesíe amun nɛn’n, yɛ maan amun aja’n sáci annzɛ ɔ́ táka kpa ɔ. (Nyanndra Mun 21:9; 27:15) Ɔ maan kɛ amun kan ndɛ kle amun wun’n, amun kɛn i aɲinyiɛ su. I liɛ’n amun wun’n kwlá yó amun klun sa. Yɛle kɛ, ɔ́ káci yasua kun m’ɔ fa ninnge’m be nun ta ɔ.

Wafa nga sran wie’m be fali afɔtuɛ sɔ’n su’n: Misɛli nin i wun be jali w’a di afuɛ 30. Be tran Amlɛnkɛn’m be mɛn’n nun lɔ. I waan: “Min nin’n i ngunmin yɛ ɔ tali min nin min niaan bla mun ɔn. Ɔ ti bla wisiwisi kpa. I ngunmin yɛ ɔ yo i ninnge mun ɔn. N kunndɛ kɛ ń sɔ́nnzɔn i. Ɔ maan, titi ɔ fata kɛ n suan wafa nga n ko kan min wun ase kɛ ɔ nin i fata’n sa’n. I wie yɛle kɛ, m ma wunnin i wlɛ kɛ sɛ ń fá ajalɛ’n, ɔ fata kɛ n dun mmua m bo su n kle min wun’n.”

Rasɛli tran Ɔstrali. Wafa nga be tɛli i, ɔ kleli i yalɛ wie. Ɔ nin i wun’n Marki be o aja nun’n w’a di afuɛ 21. Ndɛ nga i wla kpɛn su m’ɔ kan’n yɛ: “Min nin’n w’a lomɛn i wun w’a manman min si’n le. Kpankpanlɛ’n nin ɲin su kekle’n yɛ ɔ kloli i ɔ. Kɛ n jali bian’n, afuɛ klikli nga be sinnin nun’n, n yoli kɛ min nin’n sa. Sanngɛ kɛ afuɛ’m bé sín bé kɔ́’n, m ma wunnin sa nga ti yɛ ɔ ti cinnjin kpa kɛ n nanti Biblu’n nun mmla ng’ɔ kle kɛ ɔ fata kɛ n yo aɲinyiɛfuɛ’n i su. Siɛn’n, aklunjuɛ nga e nin Marki e di i aja’n nun’n ti dan.”

6

NGASI NDƐ:

“N kwlá suanman min wun’n annzɛ min yi’n i nzuɛn tɛ’n i bo kun.”

BIBLU’N NUN MMLA’N:

‘Sa nga amun wiengu yo bɔ an wun i’n, maan ɔ sɔn amun nun, sɛ sran kun yo i wiengu sa’n, maan ɔ yaci cɛ i. .’—KOLƆSFUƐ MUN 3:13.

Kɛ i klikli nun mɔ amun nin amun wun’n annzɛ amun yi’n amún súan amun wun silɛ’n, atrɛkpa’n i aeliɛ kpakpa mɔ amun ɲin o be su’n ti’n, amun a faman amun ɲin b’a sieman i aeliɛ nga be kle i yalɛ’n be su. ?Amun te kwla te yo i sɔ? Nanwlɛ, ɔ ti su kɛ amun wun’n annzɛ amun yi’n kwla lo amun ngasi. Sanngɛ, maan amun fa kosan nga usa amun wun: ‘?Min wun’n annzɛ min yi’n i nzuɛn benin yɛ ń fá min ɲin’n ń síe su ɔ? ?Tɛfuɛ’n annzɛ kpafuɛ’n niɔn?’

Zezi fali sunnzun ase kpa kun fa kleli sa nga ti yɛ ɔ fataman kɛ e fa e ɲin e sie fɔ ng’ɔ o e wiengu nun’n, i su’n. Kosan ng’ɔ usali’n yɛ: “?Ɔ yo sɛ yɛ a wun wla’n b’ɔ o ɔ niaan i nyin su’n, sanngɛ a wun-man janvlɛ’n b’ɔ o ɔ bɔbɔ nyinma su nin-ɔn?” (Matie 7:3) Wla’n ti ijre mma kaan. Sanngɛ janvlɛ’n i liɛ’n ɔ kwla yo sua’n i kofiaja annzɛ i kuatrɛn. Ɔ cɛnnin tra wla’n. ?Ngue ndɛ trele yɛ i waan ɔ́ kán ɔn? “Yi janvlɛ’n b’ɔ o ɔ nyin su’n ka, naan w’a wun ase a yi ɔ niaan’n i nyin su wla’n.”—Matie 7:5.

Kwlaa naan Zezi w’a fa sunnzun ase sɔ’n, ɔ dun mmua wlali sran’m be su nun kpa kɛ: “Nán an bu sran fɔ maan Nyanmiɛn bu amun fɔ, afin fɔ kunngba nga an fa bu sran’n, yɛ Nyanmiɛn wá fá bú amun-ɔn.” (Matie 7:1, 2) Fɔ ng’ɔ o amun nun’n, mɔ e kwla fa sunnzun janvlɛ’n, sɛ amun kloman kɛ Ɲanmiɛn fɛ i ɲin sie su’n, ɔ fataman kɛ amun kusu amun fa fɔ ng’ɔ o amun yi’n annzɛ amun wun’n i nun’n, be yo ndɛ.—Matie 6:14, 15.

Wafa nga sran wie’m be fali afɔtuɛ sɔ’n su’n: Jenni nin i wun Simɔn be tran Angle mɛn’n nun lɔ. Be jali i afuɛ ngwlan yɛ. I waan: “Like nga ti yɛ n ta min wun’n i wun ya fa’n, yɛle kɛ ɔ dunman mmua buman sa’m be ɲrun naan b’a ju. Kasiɛn’n su yɛ ɔ kpli fa ajalɛ ɔ. I sɔ’n bo min nuan. Afin i nun nga é súan e wun silɛ’n, ɔ timan sɔ. Sanngɛ n wunnin i wlɛ kɛ fɔ’n o m bɔbɔ ba’n min nun wie. Yɛle kɛ n timan lofuɛ. E nin Simɔn e wa wunnin i kɛ ɔ fataman kɛ e ɲin tran fɔnlɛ kanngan nga e wiengu’n fɔn’n i su.”

Misɛli mɔ e dun mmua e kɛnnin i ndɛ nglo lɔ’n, i wun’n suan Kurti. Bian’n waan: “Amun wun’n annzɛ amun yi’n, i nzuɛn ng’ɔ yo amun kɛnsrɛn’n, sɛ amun fa amun ɲin sie su’n, ɔ́ yó amun kɛ i nzuɛn sɔ’n su tra ndin kpa i nun sa. Ɔ maan n liɛ’n, n wunnin i kɛ Misɛli i aeliɛ kpakpa nga i ti yɛ n kloli i’n, ɔ ti kpa kɛ n fa min ɲin n sie be su.”

Like nga mɔ maan ɔ yo ye’n

Sunnzun ase kan nga e fali be yɛ’n, be kle kɛ ɔ leman aja kun mɔ ndɛ tɔman nun ɔn. Sanngɛ kusu ndɛ kwlaa ng’ɔ tɔ’n, be kwla fɛ i wun ajalɛ naan w’a kpɛ. ?Yɛ ngue yɛ maan i sɔ’n yo ye ɔ? Maan amun klo Ɲanmiɛn kpa, yɛ maan amun tu amun klun fa afɔtuɛ nga Biblu’n m’ɔ ti Ɲanmiɛn Ndɛ’n, ɔ man’n i su.

Alɛksi nin i yi Itoan be tran Nizeria yɛ be jali w’a di afuɛ 20 tra su. Be fali afɔtuɛ’n sɔ’n su. Alɛksi waan: “Sɛ ń kwlá sé’n, ndɛ kwlaa ng’ɔ tɔ sran kun nin i yi’n be afiɛn’n, sɛ be fa Biblu’n nun mmla’m be su’n, be kwla siesie i kwlaa’n.” Yɛ i yi’n waan: “E wunnin i wlɛ kɛ ɔ ti cinnjin kɛ e nɲɔn’n, e srɛ Ɲanmiɛn likawlɛ titi. Naan kusu’n, Biblu’n nun mmla ng’ɔ se kɛ e klo e wun kpa sakpa’n naan e tra e awlɛn e wiengu wun’n, maan e fa su wie. Siɛn’n e afiɛn ndɛ w’a sɔnman kɛ i nun nga e jali klikli’n sa.”

?Wafa nga Biblu’n i nun mmla’m be kwla yo amun awlobo’n i ye’n, amun klo kɛ amun si i kan ekun? Sɛ ɔ ti sɔ’n, amun se Zoova i Lalofuɛ’m be kɛ be nin amun koko fluwa ?Ngue like yɛ Biblu’n kle i sakpasakpa ɔ?b i ndɛ tre 14, i su yalɛ.

[Ja ngua lɛ ndɛ mun]

[Foto, bue 4]

?E le blɛ e man e wiengu kun’n?

[Foto, bue 5]

?N tu n klun n uka be?

[Foto, bue 6]

?Kɛ ndɛ tɔ’n, n dun mmua fa i siesielɛ i wun ajalɛ?

[Foto, bue 7]

?Sɛ min waan ń yó like wie’n, n dun mmua m bo su n kle min yi’n ka?

[Foto, bue 9]

?Min wun’n (annzɛ min yi’n) i aeliɛ kpakpa’m be su yɛ n fa min ɲin n sie ɔ?