Maan e mian e ɲin e gua wanndilɛ’n i bo

‘Maan e wanndi ɔ nin awlɛn tantrantan akplowa silɛ m’ɔ ti tikewa e ɲrun’n i nun.’​—EBR. 12:1, Anuãsɛ Fuflɛ.

1, 2. ?Akoto Pɔlu fali Klistfuɛ’m be mɛn dilɛ wafa’n sunnzunnin ngue?

AFUƐ kwlaa nun’n, be si wanndilɛ nun akplowa lika wie’m be nun. Be nga be wun kpɛ kpa’n, kɛ bé kɔ́ wanndilɛ’n sɔ’n, like nga be ɲin o i sin’n yɛle akatua’n. Sanngɛ wie’m be liɛ’n akatua’n i ɲanlɛ timan be cinnjin. Like ng’ɔ ti be cinnjin’n yɛle kɛ bé wánndi lele jú wanndilɛ’n i awieliɛ.

² Biblu’n fali Klistfuɛ’m be mɛn dilɛ wafa’n sunnzunnin wanndilɛ akplowa. Fluwa klikli nga akoto Pɔlu klɛli ko mannin i wiengu Klistfuɛ nga be o Korɛnti lɔ’n i nun’n, ɔ boli i sɔ liɛ’n su. Ɔ klɛli i kɛ: “?An si-man kɛ be nga be wanndi si akplowa’n be kwlaa be wanndi sanngɛ be nun kun yɛ ɔ nyɛn i-ɔ? Amun kusu, kɛ ɔ́ yó naan amu’an nyɛn i’n, an wanndi sɔ.”—1 Kor. 9:24.

3. Pɔlu seli kɛ be nga be wanndi’n be nun kun yɛ ɔ nyan akatua’n niɔn. ?Ngue ndɛ yɛ i waan ɔ́ kɛ́n i lɛ ɔ?

³ Pɔlu seli kɛ be kwlaa nga be wanndi’n be nun kun yɛ ɔ ɲan akatua’n niɔn. ?I ndɛ sɔ’n kle kɛ Klistfuɛ kunngba cɛ yɛ ɔ́ ɲán anannganman nguan naan be onga’m be afɛ’n yó ngbɛn? Cɛcɛ! Be nga be si wanndilɛ nun akplowa’n be wla be wun ase be siesie be wun kpa, afin be klo kɛ bé ɲán wanndilɛ’n i nun akatua’n. Pɔlu kunndɛli kɛ i wiengu Klistfuɛ’m be mian be ɲin kpa naan be nin Zoova be afiɛn sɛ titi naan be gua wanndilɛ’n i bo. Klistfuɛ kwlaa ng’ɔ yo sɔ’n ɔ kwla ɲan anannganman nguan.

4. ?Wanndilɛ nga Klistfuɛ’m be wanndi’n i su like benin yɛ ɔ fata kɛ e si i ɔ?

⁴ Ndɛ’n sɔ wla e fanngan, sanngɛ ɔ yo maan e bu e nantilɛ wafa’n i akunndan kpa wie. ?Ngue ti ɔ? Afin sɛ e nantilɛ wafa’n jɔ Zoova klun’n, e kwla ɲan anannganman nguan asiɛ’n su wa annzɛ ɲanmiɛn su lɔ. Nguan sɔ’n ɔ lemɛn i wunsu. Nanwlɛ, wanndilɛ atin’n wali, yɛ ninnge kpanngban be kwla tanndan e ja nun. Kusu sa yaya wie kwla ɲan e atin’n su. Ninnge kpanngban be kwla yo maan e kpɔnzɔ Zoova i sulɛ’n nun annzɛ e yaci i sulɛ bɔbɔ. (Mat. 7:13, 14) I sɔ sa’n wie w’a dun mmua w’a tɔ Zoova i sufuɛ wie’m be su. ?Ɔ maan kɛ é kpɛ́ anannganman nguan’n i sin atin’n, aya benin mun yɛ e kwla tɔ be nun ɔn? ?É yó sɛ naan y’a tɔman be nun? ?Ngue yɛ e kwla yo naan y’a gua e wanndilɛ’n i bo naan y’a ɲɛn i nuan like’n niɔn?

Saan é trá e awlɛn naan y’a kwla ɲɛn i

5. ?Wanndilɛ’n i su ndɛ benin yɛ Pɔlu kɛnnin i Ebre Mun 12:1 nun ɔn?

⁵ Pɔlu klɛli lɛtri ko mannin Klistfuɛ nga be ti Ebre mɔ be o Zerizalɛmu nin Zide mɛn’n nun’n. Fluwa sɔ’n nun’n, ɔ kannin be nga be si wanndilɛ nun akplowa’n be ndɛ ekun. (An kanngan Ebre Mun 12:1 nun.a) Pɔlu fali Klistfuɛ’m be mɛn dilɛ wafa’n sunnzunnin wanndilɛ akplowa. Kpɛkun like nga ti yɛ ɔ fataman kɛ be yaci wanndilɛ sɔ’n, ɔ yiyili nun. Yɛ ɔ kleli like ng’ɔ fata kɛ be yo naan b’a guɛ i bo’n. Like ng’ɔ suli Pɔlu bo m’ɔ klɛli fluwa sɔ’n ko mannin Ebre mun’n, ɔ nin ajalɛ ng’ɔ kunndɛli kɛ be fa’n, é wá dun mmua kán be ndɛ. I sin, wafa nga ndɛ sɔ’m be kwla uka e’n é wá kán be ndɛ.

6. ?Zuifu’m be Ɲanmiɛn sulɛ wafa’m be su kpɛn’m be yoli Klistfuɛ’m be sɛ?

⁶ Be kleli Klistfuɛ klikli’m be yalɛ dan. I li be nga be tran Zerizalɛmu nin Zide mɛn’n nun’n yɛ be kleli be yalɛ kpa’n niɔn. Be blɛ liɛ’n su’n, Ɲanmiɛn sulɛ wafa’m be su kpɛn’m be kunndɛli kɛ bé mían sran mun naan be fa be mmla liɛ’m be su. Kɛ bé yó sɔ’n nn b’a tɔn Zezi Klist i suɛn yɛ b’a kun i kɛ kodiawiefuɛ wie sa w’a di afuɛ kɔe 30. Be tɔnnin i suɛn kɛ ɔ su yo naan nvlefuɛ’m be jaso famiɛn’n i wun. Sanngɛ nga be yoli i lɛ’n w’a juman be. Sa Nga Be Yoli’n fluwa’n nun’n, be kan wafa nga sran sɔ’m be kleli Klistfuɛ’m be ɲrɛnnɛn kpɛ sunman’n i ndɛ. Kɛ afuɛ 33 i Pantekɔtu’n sinnin cɛ’n yɛ be boli be yalɛ klelɛ sɔ’n i bo ɔ. I kwlaa sɔ’n ti’n, lika’n yoli kekle kpa Klistfuɛ kpa sɔ’m be su.—Yol. 4:1-3; 5:17, 18; 6:8-12; 7:59; 8:1, 3.

7. ?Ngue ti yɛ lika’n yoli kekle Klistfuɛ nga Pɔlu klɛli be fluwa’n be su ɔ?

⁷ Like nga ti yɛ lika’n yoli kekle Klistfuɛ sɔ’m be su kpa’n, i kun ekun yɛle kɛ be blɛ su nn Zerizalɛmu klɔ’n i nunnunlɛ’n w’a mantan koko. Zezi seli be kɛ Ɲanmiɛn wá núnnún Zuifu mɔ be lafiman Ɲanmiɛn su’n be klɔ sɔ’n. Ɔ kannin sa nga bé dún mmua bé jú ka naan Ɲanmiɛn w’a nunnun klɔ’n be ndɛ kleli be wie. Yɛ ɔ kleli be like ng’ɔ fata kɛ be yo naan b’a fin nun b’a fite’n. (An kanngan Lik 21:20-22 nun.) Zezi wlali be su nun seli kɛ: “An sasa amun wun, nán an yo aliɛ safuɛ mun nin nzanboɛfuɛ mun, nán an koko ninnge’m be ti, sɛ an yo sɔ’n, ɔ cɛ-man naan cɛn sɔ’n w’a fu amun nun.”—Lik 21:34.

8. ?Atrɛkpa’n, ngue yɛ ɔ yoli mɔ Klistfuɛ wie’m be kpɔnzɔli mɔ wie’m b’a suman Ɲanmiɛn kun ɔn?

⁸ Kɛ Zezi kannin ndɛ sɔ m’ɔ dili afuɛ kɔe 30, yɛ Pɔlu klɛli fluwa ko mannin Ebre mun ɔn. ?Afuɛ kɔe 30 sɔ nun’n, ngue yɛ Klistfuɛ sɔ’m be yoli ɔ? Ngokɔɛ’n ti’n, wie’m be yacili Ɲanmiɛn i su like suanlɛ. Ɔ maan be nin i be afiɛn’n w’a mantanman kpa kun. (Ebr. 5:11-14) Wie’m be liɛ’n, be buli i kɛ sɛ be yaci Klistfuɛ aeliɛ naan be yo kɛ Zuifu’m be nun sunman be sa wie’n, lika’n wá yó kpa mán be. Atrɛkpa’n be buli i kɛ i sɔ yolɛ timan tɛ. Afin Zuifu sɔ’m be te lafi Ɲanmiɛn su, yɛ be te fɛ i Mmla’m be nun sunman be su. Kusu asɔnun’n nun’n, sran wie’m be miannin be wiengu’m be kɛ be nian Moizi Mmla’n nin Zuifu’m be nzuɛn’n su be nanti. Kɛ ɔ yoli sɔ’n, Klistfuɛ wie’m be klunklo su be fali be ndɛ’n su, sanngɛ wie’m be liɛ’n srongble’n ti yɛ be yoli sɔ ɔ. ?Ngue ndɛ yɛ Pɔlu kwla kan fa ukɛ i niaan Klistfuɛ sɔ mun naan be nin Zoova b’a nanti titi naan b’a gua be wanndilɛ’n i bo ɔ?

9, 10. (a) ?Ebre Mun ndɛ tre 10 i awieliɛ lɔ’n, fanngan wlalɛ ndɛ benin yɛ Pɔlu kannin ɔn? (b) ?Ngue ti yɛ Pɔlu klɛli wafa nga laa Ɲanmiɛn i lalofuɛ’m be yili be Ɲanmiɛn sulafilɛ’n i nglo’n i su fluwa ɔ?

⁹ Zoova maan Pɔlu klɛli fluwa ko mannin Klistfuɛ nga be ti Ebre’n naan ɔ́ fá wlá be fanngan. Fluwa nga Pɔlu klɛli’n i ndɛ tre 10 nun’n, ɔ kleli kɛ Moizi Mmla’n “ti kɛ like kpakpa nga bé bá’n be wawɛ sa.” Kpɛkun ɔ kleli weiin kɛ saan tɛ mɔ Klist yili’n ti yɛ Ɲanmiɛn kwla yaci be sa tɛ mun cɛ be ɔ. Kɛ Ebre Mun ndɛ tre 10 wá wíe’n, ɔ seli be kɛ: “An tra amun anwlɛn naan amu’an yo Nyanmiɛn klun sa naan amu’an nyan like nga i waan ɔ́ fá mán amun’n. Afin be klɛli i kɛ: ‘Ɔ cɛ kan’n, ɔ ka bɔ kaan sa, sran nga be waan ɔ́ bá’n, ɔ su cɛ-man, ɔ́ bá.’”—Ebr. 10:1, 36, 37.

¹⁰ Ebre Mun ndɛ tre 11 nun’n, Pɔlu yiyili Ɲanmiɛn sulafilɛ kpafuɛ’n i nun klanman kpa. Kpɛkun ɔ kannin lalafuɛ sran wie mɔ be lafili Ɲanmiɛn su kpa’n be ndɛ. Ɔ yoli sɔ fa suɛnnin i ndɛ’n bo. ?Ndɛ ngbɛn yɛ ɔ kannin guɛli i lɛ ɔ? Cɛcɛ. Akoto Pɔlu si kɛ sɛ i wiengu Klistfuɛ’m be waan bé láfi Ɲanmiɛn su kpa’n, ɔ fata kɛ be yo yakpafuɛ naan be tra be awlɛn. Laa Zoova i sufuɛ kpa sɔ’m be awlɛn mɔ be trɛli i blɛ kekle nun’n, ɔ kwla wla Klistfuɛ sɔ mɔ be ti Ebre’n be fanngan naan be kusu b’a jran sa nga be tɔ be su’n be ɲrun kekle. I sɔ’n ti’n, kɛ Pɔlu boboli sa nga be yoli m’ɔ kle kɛ be lafi Ɲanmiɛn su kpa’n, i sin ɔ seli kɛ: ‘Afin e kusu e lɛ lalofuɛ kpanngban mɔ be sin yia e kɛ ɲanmiɛn ble sa, maan e gua trɔ kwlaa ɔ nin tɛ mɔ be tra e ndɛndɛ mun be blo, yɛ maan e wanndi ɔ nin awlɛn tantrantan akplowa silɛ m’ɔ ti tikewa e ɲrun’n i nun.’—Ebr. 12:1, Anuãsɛ Fuflɛ.

‘Lalofuɛ kpanngban mɔ be sin yia e kɛ ɲanmiɛn ble sa’n’

11. ?Ngue yɛ ‘lalofuɛ kpanngban mɔ be sin yia e kɛ ɲanmiɛn ble sa’n’ be ajalɛ’n kle e ɔ?

11 Pɔlu seli kɛ be nga suli Zoova ka naan Klistfuɛ klikli’m be blɛ’n w’a ju’n, be ti Ɲanmiɛn i ‘lalofuɛ kpanngban mɔ be sin yia e kɛ ɲanmiɛn ble sa’ ɔ. B’a kpɔciman Ɲanmiɛn lele be fa wuli. Be ajalɛ’n kle kɛ blɛ kekle kpa nun bɔbɔ’n, Klistfuɛ’m be kwla yo Zoova i klun sa titi. E kwla fa be sunnzun be nga b’a gua be wanndilɛ liɛ’n i bo’n. Be ajalɛ’n kwla wla sran uflɛ’m be fanngan naan b’a yaciman be wanndilɛ liɛ’n. Maan e se kɛ e su si wanndilɛ nun akplowa. Sɛ e si kɛ be nga si wanndi kpa’n be ɲin ta e’n naan be wla e fanngan kɛ nán e yaci wanndilɛ’n, i sɔ’n yó maan é kplín e ɲin é gúa wanndilɛ’n i bo. I kunngba’n, sɛ aniaan nga be ti Ebre’n be fa be ɲin sie i be nga be suli Zoova laa’n be su’n, i sɔ’n wlá be fanngan. Yɛ ɔ́ klé be ekun kɛ be kusu be kwla “wanndi ɔ nin awlɛn tantrantan” naan b’a gua be wanndilɛ liɛ’n i bo. E kusu e kwla yo i sɔ wie.

12. ?Ngue ti yɛ ɔ ti cinnjin kɛ e fa e ɲin e sie i sran nga Pɔlu kannin be ndɛ’n, be su ɔ?

¹² Sran nga Pɔlu kannin be ndɛ’n be nun kaka be su sa’n nin e liɛ’n be fa be wun. Yɛle kɛ Nowe liɛ’n, kɛ laa mɛn liɛ’n i nunnunlɛ’n mantannin koko’n, nn ɔ o lɛ. E kusu kɛ nga e o yɛ’n, mɛn tɛ nga i nunnunlɛ w’a mantan koko. I wie ekun yɛle Abraamu nin Sara be liɛ’n. Zoova seli be kɛ be tu be tranwlɛ’n nun be ɔ lika uflɛ. Ɔ boli be kasiɛ kɛ be osu’n nunfuɛ’m bé yó nvle kun naan i nunfuɛ’m bé yó Zoova i sufuɛ. Abraamu nin Sara be minndɛli kɛ Zoova yo naan kasiɛ sɔ’n i nuan yia. E kusu Zoova se e kɛ e klɛn e wun e mɛn i naan i klun w’a jɔ e wun. Naan sɛ e yo i sɔ’n, ɔ́ rá e su dan. Moizi liɛ’n, i nun nga ɔ́ kɔ́ mɛn nga Zoova waan ɔ́ fá mán Izraɛlifuɛ mun i nun lɔ’n, ɔ sinnin aawlɛ flɛnnɛn sroesroe kun nun. E kusu ɔ ti kɛ e su kɔ mɛn uflɛ’n nun lɔ’n sa. Mɛn sroesroe nga nun yɛ e sin e kɔ ɔ. Ɔ ti cinnjin kɛ e fa e ɲin e sie i Ɲanmiɛn sufuɛ kpa sɔ’m be nantilɛ’n i su. Afin like nga be yoli naan Zoova i klun w’a jɔ be wun’n, e kwla nian su e yo wie, naan y’a yoman ninnge nga be kwla yo naan w’a fa e wun ya’n.—Rɔm. 15:4; 1 Kor. 10:11.

Like nga ti yɛ be kwla guali wanndilɛ’n i bo’n

13. ?Junman kekle benin yɛ ɔ fatali kɛ Nowe di ɔ? ?Ngue yɛ ɔ ukɛli i naan w’a kwla di junman sɔ mun ɔn?

¹³ Ngue yɛ ɔ ukali Zoova i sufuɛ sɔ mun naan b’a tra be awlɛn b’a gua wanndilɛ’n i bo ɔ? Maan e fa e ɲin sie i ndɛ nga Pɔlu kɛnnin i Nowe su’n i su. (An kanngan Ebre Mun 11:7 nun.) Nzue m’ɔ tɔ m’ɔ kun sran nin nnɛn mun’n, Nowe nin a ‘wunmɛn i sɔ wie le.’ (Bob. 6:17) Afin sa kɛ ngalɛ’n sa’n nin a yoman le. Sanngɛ Nowe w’a simɛn i akplowa kɛ ɔ su kwlá yoman le. Afin ɔ lafi su kɛ sɛ Zoova kan ndɛ kun’n, ɔ yo i nuan su sa. Asa ekun’n, Nowe w’a seman kɛ junman nga Zoova waan ɔ di’n, ɔ trɛ i kpɛn. Sanngɛ “ɔ niannin i kwlaa su yoli.” (Bob. 6:22) Junman nga be fa mannin Nowe kɛ ɔ di’n timan blɛblɛ. Yɛle kɛ ɔ fata kɛ ɔ kplan mmeli’n naan ɔ yiayia nnɛn’m be nuan. Yɛ ɔ kunndɛ i awlobofuɛ nin nnɛn’m be aliɛ sie, naan kusu ɔ bo i ndolo kɛ anannganman su nzue dan kun su wa tɔ. Asa ekun’n, ɔ fata kɛ ɔ ukɛ i awlobofuɛ mun naan be lafi Zoova su titi. Kɛ ɔ ko yo naan Nowe ‘w’a nian i kwlaa su w’a yo’n,’ w’a yoman blɛblɛ w’a mɛnmɛn i. Sanngɛ Nowe lafili Ɲanmiɛn su, kpɛkun ɔ trɛli i awlɛn yoli like nga be waan ɔ yo’n. I sɔ’n ti’n, Zoova deli Nowe nin i awlobofuɛ mun, kpɛkun ɔ rali be su kpa.

14. ?Sa benin nun yɛ ɔ fatali kɛ Abraamu nin Sara be kle kɛ be lafi Ɲanmiɛn su ɔ? ?Afɔtuɛ benin yɛ be nantilɛ’n man e ɔ?

¹⁴ Abraamu nin Sara be o ‘lalofuɛ kpanngban mɔ be sin yia e kɛ ɲanmiɛn ble sa’n,’ be nun wie. Ɲanmiɛn seli be kɛ be jaso be tranwlɛ nun Ir lɔ. Kɛ ɔ yoli sɔ’n, w’a yoman pɔpɔ w’a manman be. Kusu be siman sa ng’ɔ o be ɲrun lɔ’n. Blɛ kekle sɔ nun’n, be kleli kɛ be ɲin yi Zoova naan be lafi i su. Be flɛ Abraamu kɛ ‘be kwlaa nga be lafi Nyanmiɛn su’n be si,’ afin Zoova i sulɛ’n ti’n, ɔ klɛnnin i wun kpɛ sunman. (Rɔm. 4:11) Be nga Pɔlu su kan ndɛ kle be’n, be si Abraamu nin i awlobofuɛ’m be kpa. I ti yɛ w’a kanman be su ndɛ tɛkɛtɛkɛ kwlaa’n niɔn. Sanngɛ ndɛ ng’ɔ kannin’n kle kɛ be lafili Ɲanmiɛn su dan. Pɔlu kannin be ndɛ seli kɛ: “Be kwlaa be lafi Nyanmiɛn su lele be fa wuli, sanngɛ ɔ nin i sɔ’n ngba’n, b’a nyan-man ninnge nga i waan ɔ́ fá mán be’n. Be wunnin be mmua lɔ, ɔ maan be klun jɔli. Yɛ be dili be wun nanwlɛ kɛ be ti aofuɛ nin wlan-wlanfuɛ asiɛ’n su.” (Ebr. 11:13) Kɛ mɔ be lafili Ɲanmiɛn su mɔ be nin i be bo sɛli kpa’n ti’n, be kwla trali be awlɛn be wanndi juli i awieliɛ.

15. ?Ngue yɛ ɔ ukali Moizi naan w’a yo like ng’ɔ yoli’n niɔn?

¹⁵ Zoova i sufuɛ uflɛ ng’ɔ o ‘lalofuɛ kpanngban mɔ be sin yia e kɛ ɲanmiɛn ble sa’n’ be nun wie’n, yɛle Moizi. Aɲrunɲan nin aunɲan nga ɔ kwla ɲɛn i famiɛn’n i awlo’n lɔ’n, b’a yomɛn i cinnjin. Ɔ kloli “kɛ be kle i nin Nyanmiɛn sran’m be nyrɛnnɛn.” ?Ngue ti ɔ? Pɔlu tɛ su kɛ: “Like ng’ɔ́ wá nyɛ́n i cɛn wie’n, i nyin tɛ i mmua lɔ. [...] Ɔ trɛ i anwlɛn, ɔ ti kɛ w’a wun Nyanmiɛn bɔ be wun-mɛn i’n sa.” (An kanngan Ebre Mun 11:24-27 nun.) Moizi w’a kloman kɛ ɔ́ dí “mɛn’n b’ɔ ti le nnyɔn kun like’n.” Ɔ si kɛ Ɲanmiɛn o lɛ sakpasakpa naan ndɛ ng’ɔ kannin be’n, bé kpɛ́n su. I ti’n, ɔ yoli yakpafuɛ yɛ ɔ trɛli i awlɛn blɛ kekle nun. I sɔ’n yoli maan ɔ kwla fali Izraɛlifuɛ mun Ezipti lɔ lele juli lika nga Ɲanmiɛn tali nda kɛ ɔ́ fá mán be’n i nun lɔ.

16. Ɲanmiɛn seli Moizi kɛ ɔ su wluman mɛn ng’ɔ tali nda kɛ ɔ́ fá mán Izraɛlifuɛ mun’n i nun wie. ?Wafa sɛ yɛ e si kɛ Moizi w’a fɛmɛn i sɔ’n i su ya ɔ?

¹⁶ Abraamu nin Moizi be wuli ka naan nda nga Ɲanmiɛn tali be’n b’a kpɛn su. Kɛ Izraɛlifuɛ’m be juli mɛn nga Ɲanmiɛn tali nda kɛ ɔ́ fá mán be’n i nuan lɛ’n, Ɲanmiɛn seli Moizi kɛ: “Ɔ nyinma’n ɔ́ gúa mɛn sɔ’n i wun, sanngɛ ɔ ja su tia-man mɛn sɔ bɔ ń fá mán Izraɛlfuɛ mun’n i nun lɔ.” Like nga ti yɛ Ɲanmiɛn seli sɔ’n, yɛle kɛ blɛ kun nun’n, nvlefuɛ’m be fitali Moizi nin Aarɔn be awlɛn lele maan be ‘yoli nyin kekle Nyanmiɛn su Izraɛlifuɛ’m be nyrun Mɛriba nzue’n wun lɛ.’ (Mml. 32:51, 52) ?Kɛ mɔ Ɲanmiɛn seli Moizi kɛ ɔ su wluman mɛn sɔ’n nun lɔ’n ti’n, ɔ fali ya? Cɛcɛ. Ɔ rali nvlefuɛ’m be nguan. I ndɛ’n i atabo’n nun’n, ɔ seli kɛ: “Izraɛlfuɛ mun amun liɛ su ti ye. ?Wan yɛ ɔ nin amun sɛ-ɔ? Amun ngunmin yɛ Anannganman deli amun-ɔn. Ɔ ti kɛ amun nyrɛn sa. Ɔ ti kɛ amun tokofi sa bɔ maan amun nyan kwlalɛ-ɔ.”—Mml. 33:29.

Like nga be aeliɛ’n kle e’n

17, 18. (a) ?Ngue yɛ ‘lalofuɛ kpanngban mɔ be sin yia e kɛ ɲanmiɛn ble sa’n’ be su ndɛ’n kle e ɔ? (b) ?Ngue yɛ é wá wún i like suanlɛ ng’ɔ́ bá lɛ’n nun ɔn?

¹⁷ ‘Lalofuɛ kpanngban mɔ be sin yia e kɛ ɲanmiɛn ble sa’n’ be nun wie’m be su ndɛ nga e wunnin be’n, be kle weiin kɛ e kwla gua wanndilɛ’n i bo. Sanngɛ sɛ e waan é gúɛ i bo’n, ɔ fata kɛ e lafi Ɲanmiɛn su. Yɛ e lafi su kɛ nda ng’ɔ tali be’n bé kpɛ́n su. (Ebr. 11:6) Kusu maan e Ɲanmiɛn sulafilɛ sɔ’n i ɲin fite ajalɛ kwlaa nga e fa be’n be nun. E mɔ e ti Zoova i sufuɛ’n, e timan kɛ be nga be lafiman Ɲanmiɛn su’n be sa. E liɛ’n, e kwla wun e ɲrun lɔ sa’m be wlɛ. E kwla wun Ɲanmiɛn mɔ be ‘wun-mɛn i’n.’ Yɛle kɛ e wun i wlɛ kɛ Ɲanmiɛn o lɛ sakpa. Ɔ maan e kwla tra e awlɛn e gua wanndilɛ’n i bo.—2 Kor. 5:7.

¹⁸ Wanndilɛ akplowa nga Klistfuɛ’m be o nun’n, nán like pɔpɔ ɔ. Ɔ nin i sɔ ngba’n, e kwla gua wanndilɛ’n i bo. Like suanlɛ ng’ɔ́ bá lɛ’n nun’n, é wá wún ninnge uflɛ wie mɔ be kwla uka e naan y’a gua wanndilɛ’n i bo’n.

[Ja ngua lɛ ndɛ’n]

?Amun kwla yiyi nun?

• ?Ngue ti yɛ Pɔlu klɛli wafa nga laa Ɲanmiɛn i lalofuɛ’m be yili be Ɲanmiɛn sulafilɛ’n i nglo’n i su fluwa ɔ?

• ?Wafa sɛ yɛ ‘lalofuɛ kpanngban mɔ be sin yia e kɛ ɲanmiɛn ble sa’n’ be ajalɛ’n uka e naan y’a tra e awlɛn y’a gua e wanndilɛ liɛ’n i bo ɔ?

• ?Ngue yɛ Nowe nin Abraamu nin Sara yɛ Moizi be aeliɛ’n kleli amun ɔn?

[Foto, bue 22]

Abraamu nin Sara be klunklo su be kpɔcili ninnge kpakpa nga be le be Ir lɔ’n.