Maan e yo sa nga Ɲanmiɛn wawɛ’n kle e’n naan y’a ɲan nguan nin alaje
‘E fa-man sran’m be nzuɛn’n su kun, [...] e yo sa nga Nyanmiɛn Wawɛ’n kle ye kɛ e yo’n.’—RƆM. 8:4.
1, 2. (a) ?Ngue ti yɛ sɛ sran kun císan loto nun naan ɔ yo like uflɛ’n, ɔ ti tɛ ɔ? (b) ?Ngue ti yɛ sɛ sran kun sú Ɲanmiɛn naan i ɲin o like uflɛ su’n, ɔ ti tɛ ɔ?
AMLƐNKƐN’M be lɔ awa junman difuɛ kun waan sran nga bé císan loto nun’n nn bé yó like uflɛ’n, be uka su afuɛ kwlaa nun. Ninnge sɔ’n i wie yɛle loto mɔ bé císan nun nn bé íjɔ selilɛli’n nun. I sɔ mɔ be yo’n ti’n, be ɲin kwla kpa loto nun cisanlɛ’n su. Sran kpanngban be kannin kɛ ɔ ka kaan naan be nun wie w’a fa loto w’a si be. Wie’m be liɛ be waan sran sɔ’m be fali loto’n sili be bɔbɔ. Sran’m be kwla bu i kɛ blɛ nga bé císan loto nun’n, sɛ be yo like uflɛ’n, ɔ ti be blɛ’n i cɛcɛ yolɛ. Sanngɛ i bo’n kwla gua tɛ kpa.
2 E nin Ɲanmiɛn e nantilɛ’n nun’n, i sɔ sa kunngba’n wie kwla ɲan e. Yɛle kɛ sɛ sran kun sú Ɲanmiɛn naan i ɲin o ninnge nga be saci Ɲanmiɛn nin sran be afiɛn’n be su’n, ɔ kwla fa atin tɛ su. Sɛ blɛblɛblɛ e ɲin kpa Klistfuɛ nzuɛn’n i su falɛ nin ninnge nga e yo be Ɲanmiɛn sulɛ’n nun’n be su’n, e su lafiman Ɲanmiɛn su kpa kun, yɛ i agualiɛ su’n é yáci i su lafilɛ mlɔnmlɔn. (1 Tim. 1:18, 19) Fluwa nga Akoto Pɔlu klɛli ko mɛnnin i niaan Klistfuɛ nga be o Rɔmu lɔ’n i nun’n, ɔ kɛnnin i sɔ liɛ’n i ndɛ. I waan: “Be nga klɔ sran ninnge’n lo be’n, bé wú, sanngɛ be nga Nyanmiɛn Wawɛ’n i ninnge’n lo be’n, bé nyán nguan nin alaje.” (Rɔm. 8:6) ?Pɔlu i ndɛ sɔ’n i bo’n yɛle benin? ?É yó sɛ naan “Nyanmiɛn Wawɛ’n i ninnge’n” w’a lo e naan “klɔ sran ninnge’n” w’a loman e?
“Nyanmiɛn su bu-man be fɔ kun”
3, 4. (a) ?Wafa nga Pɔlu i wun fa yoli i’n i su ndɛ benin yɛ ɔ klɛli ɔ? (b) ?Ngue ti yɛ ɔ fata kɛ e fa e ɲin e sie i Pɔlu i su sa’n su ɔ?
3 Fluwa nga Pɔlu klɛli ko mannin Rɔmufuɛ mun’n i nun’n, ɔ kannin wafa nga i wun fa yo i’n i ndɛ. I waan i nzuɛn mɔ maan ɔ yo sa tɛ’n, ɔ nin akunndan nga mɔ maan ɔ klo kɛ ɔ́ yó sa kpa’n, be ti kɛ sran nɲɔn mɔ be si akplowa sa. (An kanngan Rɔmfuɛ Mun 7:21-23 nun.) Pɔlu kanman sɔ fa kplimɛn i ti. Ɔ nunman lɛ seman kɛ sa tɛ’n tin i su dan naan i ti’n ɔ kwlá yoman sa kpa. Afin e si kɛ Pɔlu i ɲin w’a ti Ɲanmiɛn sulɛ’n nun kpa. Kpɛkun ɔ o Klistfuɛ nga Ɲanmiɛn kpali be sieli be ngunmin’n be nun wie. Yɛ kusu Ɲanmiɛn ‘sunmɛnnin i be bɔ be ti-man Zuif’n be sin.’ (Rɔm. 1:1; 11:13) ?Yɛ nn ngue ti yɛ Pɔlu klɛli wafa nga i wun fa yoli i’n i su fluwa ɔ?
4 Pɔlu su di i wun nanwlɛ kɛ ɔ kwlá diman Ɲanmiɛn junman’n kɛ i bɔbɔ fa klo’n sa. ?Ngue ti yɛ ɔ kwlá yomɛn i sɔ ɔ? Ɔ seli kɛ: “Sran’m be kwlaa be yoli sa tɛ, ɔ maan anyrunnyan nga Nyanmiɛn waan ɔ́ mán be’n, ɔ to fuannin be.” (Rɔm. 3:23) Kɛ mɔ Pɔlu ti Adam i osu’n nun sran ti’n, fɔ m’ɔ o i nun’n kle i yalɛ. Yɛle kɛ sa tɛ yolɛ akunndan bɛ i ti nun. E kwla wun wafa nga i wun yoli i’n, i wlɛ. Afin fɔ o e kwlaa e nun wie, yɛ aliɛ ba kwlaa nun’n ɔ fata kɛ e kpli naan y’a yoman sa tɛ. Asa ekun’n, ninnge kpanngban be kwla yo naan e akunndan’n w’a tranman Ɲanmiɛn i sulɛ’n su kun. Naan kusu y’a sinman ‘atin kaan nga be sin nun-ɔn be nyan nguan’n’ i su kun. (Mat. 7:14) Sanngɛ Pɔlu ɲannin ukalɛ. E kusu e kwla ɲan ukalɛ wie.
5. ?Ninnge benin mun yɛ be ukali Pɔlu naan w’a ɲɛn i ti ɔ?
5 Pɔlu klɛli i kɛ: “?Wan yɛ ɔ́ tú min nzuɛn nga [...] su-ɔ? Nyanmiɛn kwla o! Afin i yɛ maan e Min Jésus-Krist deli ye-ɔ.” (Rɔm. 7:24, 25) I sin’n, ɔ kannin ndɛ kleli Klistfuɛ nga be kpali be sieli be ngunmin’n mɔ “be nin Krist-Jésus b’a kaci sran wunmuan’n.” (An kanngan Rɔmfuɛ Mun 8:1, 2 nun.) Zoova fɛ i wawɛ’n mannin be naan b’a kaci kɛ i klun ba sa. Ɔ kpali be naan ‘like ng’ɔ se kɛ ɔ́ fá mán Krist’n, b’a bo be dunman nun wie.’ (Rɔm. 8:14-17) Ɲanmiɛn wawɛ’n ukali be nga be kpali be sieli be ngunmin mɔ Pɔlu o be nun wie’n, yɛ be lafili e ti kpɔlɛ tɛ nga Klist yili’n su. I sɔ’n ukali be naan b’a kwla ɲan be ti fɔ ng’ɔ o sran nun mɔ Pɔlu kɛnnin i ndɛ’n i sa nun. Ɔ maan Ɲanmiɛn “bu-man be fɔ kun.” B’a ɲan be ti “sa tɛ’n nin wie’n” be sa nun.
6. ?Ngue ti yɛ ɔ fata kɛ Ɲanmiɛn i sufuɛ’m be ngba be wun Pɔlu i ndɛ’n i wlɛ ɔ?
6 Pɔlu kannin Ɲanmiɛn wawɛ’n nin e ti kpɔlɛ tɛ nga Klist yili’n be su ndɛ’n mannin Klistfuɛ nga be kpali be sieli be ngunmin’n. Sanngɛ Zoova i sufuɛ’m be ngba, i be nga bé kɔ́ ɲanmiɛn su o, i be nga bé ká asiɛ’n su wa o, be kwla ɲɛn i ndɛ sɔ’n su ye. Ɲanmiɛn yɛ maan Pɔlu kannin ndɛ sɔ’n niɔn. I ti’n, ɔ ti cinnjin kpa kɛ Zoova i sufuɛ’m be ngba be wun Pɔlu i ndɛ’n i wlɛ naan be fa su wie.
Wafa nga Ɲanmiɛn ‘kleli kɛ sa tɛ b’ɔ ti klɔ sran nzuɛn’n ti tɛ’n’
7, 8. (a) ?Ngue yɛ Moizi Mmla’n w’a kwlɛmɛn i yo ɔ? (b) ?Ngue yɛ Ɲanmiɛn fɛli i wawɛ’n nin e ti kpɔlɛ tɛ’n yoli ɔ?
7 Rɔmfuɛ Mun ndɛ tre 7 nun’n, Pɔlu dili i nanwlɛ kɛ sa tɛ yolɛ’n tin klɔ sran mɔ fɔ o be nun’n be su. I ndɛ tre 8 nun’n, ɔ kannin Ɲanmiɛn wawɛ’n i ndɛ. Wafa nga Ɲanmiɛn wawɛ’n kwla uka Klistfuɛ mun naan b’a ɲan be ti sa tɛ’n i sa nun naan b’a yo Zoova i klun sa naan i klun w’a jɔ be wun’n, ɔ yiyili nun. Pɔlu kleli kɛ like kun mɔ Moizi Mmla’n kwlɛmɛn i yo’n, Ɲanmiɛn fɛli i wawɛ’n, ɔ nin e ti kpɔlɛ tɛ m’ɔ fɛ i Wa’n yili’n, ɔ yoli.
8 Moizi Mmla’n bu be nga be yo sa tɛ’n be fɔ. Asa kusu be kwlaa nga be yoli Ɲanmiɛn ɲrun jranfuɛ’m be su kpɛn Izraɛli lɔ’n mɔ be dili i sɔ Mmla’n su’n, fɔ o be nun. Ɔ maan be kwlá yiman sa tɛ’n i ti tɛ ng’ɔ nin i fata’n. I ti’n, Moizi Mmla’n kwlá ukaman sran kun naan w’a yoman sa tɛ kun mlɔnmlɔn. Kɛ Ɲanmiɛn “yoli maan i bɔbɔ i Wa’n kacili kɛ klɔ sran b’ɔ yo sa tɛ sa’n, b’ɔ sunmɛnnin i kɛ ɔ yo tɛ nnɛn’n, ɔ kle kɛ sa tɛ b’ɔ ti klɔ sran nzuɛn’n ti tɛ, ɔ maan sɛ ɔ wie’n, ɔ ti i su.” I sɔ’n ti’n, e ti kpɔlɛ tɛ nga Zezi fɛ i wun yili’n, ɔ yoli “like nga Moiz mmla’n kwlɛ-mɛn i yo’n.” Ɔ maan, Ɲanmiɛn bu Klistfuɛ nga be kpali be sieli be ngunmin’n be sran kpa, afin be lafi e ti kpɔlɛ tɛ’n su. Pɔlu wlali be fanngan kɛ nán be ‘fa sran’m be nzuɛn’n su kun, [sanngɛ] be yo sa nga Nyanmiɛn Wawɛ’n kle be kɛ be yo’n.’ (An kanngan Rɔmfuɛ Mun 8:3, 4 nun.) Kɛ be te o asiɛ’n su wa’n, ɔ fata kɛ be yo sɔ lele be wie cɛn, naan b’a kwla ɲan like nga bé fá yó be mo’n. Like sɔ’n yɛle “nguan’n, ɔ ti kɛ famiɛn kle sa.”—Ngl. 2:10.
9, 10. (a) ?Ngue ndɛ yɛ Pɔlu kɛnnin i Rɔmfuɛ Mun 8:2 nun ɔn? (b) ?Sanngɛ ngue ti yɛ maan e kaci sa tɛ’n nin wie’n be kanga ɔ?
9 Pɔlu seli ekun kɛ: “Nyanmiɛn Wawɛ’n kle sa uflɛ bɔ maan be bɔ be nin Krist-Jésus b’a kaci sran wunmuan’n bé nyán nguan. Ɔ maan m’an nyan n ti sa tɛ’n nin wie’n be sa nun.” (Rɔm. 8:2) ?Sanngɛ ngue ti yɛ maan e kaci sa tɛ’n nin wie’n be kanga ɔ?
10 Akoto Pɔlu klɛli i kɛ: “Sran kun ti yɛ sa tɛ yolɛ’n bali mɛn nun-ɔn, yɛ sa tɛ sɔ’n ti yɛ maan wie’n bali-ɔ. Yɛ i ti yɛ maan wie’n wo sran’m be kwlaa be su-ɔ, afin be kwlaa be yo sa tɛ.” (Rɔm. 5:12) Kɛ mɔ e ti Adam i osu’n nunfuɛ ti’n, e kwlaa e yo sa tɛ yɛ wie’n o e ngba e su. Fɔ m’ɔ o e nun’n ti’n, e konvi sɔ ninnge nga Ɲanmiɛn kloman be’n. Ninnge sɔ’m be kusu be agualiɛ yɛle wie’n. Fluwa nga Pɔlu klɛli ko mannin Galasifuɛ mun’n i nun’n, ɔ flɛli i sɔ aeliɛ tɛtɛ’m be ‘klɔ sran i nzuɛn.’ Kpɛkun ɔ seli ekun kɛ: ‘Be nga be yo i sɔ sa’n, be su tran-man be nga Nyanmiɛn síe be’n be nun mlɔnmlɔn.’ (Gal. 5:19-21) I sɔ sran mun’n like nga be konvi’n su be bo kɛ be yo’n, yɛ be yo ɔ. (Rɔm. 8:4) Be konvi’n yɛ ɔ sie be ɔ. ?Sanngɛ yoo, saan be nga be kunndɛ bla nin bian sukusuku annzɛ be sɔ amuɛn annzɛ be di bae, annzɛ kusu be yo sa tɛtɛ kpa wie mun’n, be ngunmin cɛ yɛ be fa klɔ sran nzuɛn’n su ɔ? Cɛcɛ. Afin klɔ sran nzuɛn’n i wie yɛle aeliɛ wie mɔ sran kun kwla bu i kɛ be timan tɛ sɔ liɛ’n. Be nun wie yɛle be ɲin m’ɔ ci be wiengu’n nin ya falɛ’n, ɔ nin ndɛnngan kanlɛ’n ɔ nin konvi’n. ?I sɔ’n ti’n niɔn, wan yɛ ɔ kwla se kɛ i liɛ’n ɔ faman klɔ sran nzuɛn’n su mlɔnmlɔn kun ɔn?
11, 12. ?Ajalɛ benin yɛ Zoova fali naan y’a kwla ɲan e ti sa tɛ nin wie’n be sa nun ɔn? ?Ngue yɛ é yó naan Ɲanmiɛn i klun w’a jɔ e wun ɔn?
11 Ajalɛ mɔ Zoova fali naan y’a kwla ɲan e ti sa tɛ nin wie’n be sa nun’n, nanwlɛ ɔ yo e fɛ dan! Zezi seli kɛ: “Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlin-man, sanngɛ ɔ nyan anannganman nguan.” Wie’n m’ɔ ti sa tɛ mɔ e nin i fin e nin klun’n i agualiɛ’n, e kwla ɲan e ti i sa nun. Sɛ e nantilɛ wafa’n kle kɛ e klo Ɲanmiɛn naan e lafi e ti kpɔlɛ tɛ mɔ Zezi Klist fɛ i wun yili’n su’n, yɛ é ɲán e ti ɔ. (Zan 3:16-18) Ɔ maan kɛ Pɔlu sa’n, aklunjuɛ su é kpán sé kɛ: “Nyanmiɛn kwla o! Afin i yɛ maan e Min Jésus-Krist deli ye-ɔ.”
12 Sa ng’ɔ o e su’n ti’n, e ti kɛ sran kun mɔ tukpacɛ kekle kpa o i su mɔ be su yo i are’n sa. Sɛ e waan tukpacɛ sɔ’n wie mlɔnmlɔnmlɔn’n, ɔ fata kɛ e yo like nga dɔɔtrɔ’n kle e’n. I yo, sɛ e lafi e ti kpɔlɛ tɛ’n su’n, e kwla ɲan e ti sa tɛ nin wie’n be sa nun. Sanngɛ e nin a yoman juejue kpa. Afin fɔ te wo e nun yɛ e te yo sa tɛ. I ti’n, ɔ fata kɛ e yo like uflɛ kun ekun naan e nin Ɲanmiɛn e afiɛn w’a mantan kpa titi naan i klun w’a jɔ e wun. Pɔlu se e kɛ sɛ e waan é yó juejue mlɔnmlɔnmlɔn’n yɛle kɛ sɛ e waan é ɲán e ti fɔ m’ɔ o e nun’n i sa nun’n, ɔ fata kɛ e yo sa nga Ɲanmiɛn wawɛ’n kle e kɛ e yo’n.
Wafa nga sran kun klé kɛ ɔ yo like nga Ɲanmiɛn Wawɛ’n kle e kɛ e yo’n
13. ?Kɛ be se kɛ be yo like nga Ɲanmiɛn wawɛ’n kle be’n, i bo’n yɛle benin?
13 Sran ng’ɔ yo like nga Ɲanmiɛn wawɛ’n kle i kɛ ɔ yo’n, ɔ miɛn i ɲin naan titi ɔ nin Zoova be afiɛn w’a mantan kpa w’a tra laa’n. Sanngɛ i sɔ’n kleman kɛ ɔ yoman sa tɛ mlɔnmlɔn kun. (1 Tim. 4:15) Aliɛ ba kwlaa nun’n, ɔ fata kɛ e yo like kwlaa nga e kwlɛ i yo naan e nanti kɛ Ɲanmiɛn wawɛ’n kle e kɛ e nanti’n sa. Sɛ e “yo sa nga Nyanmiɛn Wawɛ’n kle” e’n, Ɲanmiɛn i klun jɔ́ e wun.—Gal. 5:16.
14. ?Be nga “klɔ sran nzuɛn’n tɛ yo be fɛ’n” wafa sɛ yɛ be nanti ɔ?
14 Fluwa nga Pɔlu klɛli ko mannin Rɔmufuɛ mun’n i nun’n, ɔ kannin sran wafa nɲɔn mɔ be akunndan’m be sansan be wun’n, be ndɛ wie. (An kanngan Rɔmfuɛ Mun 8:5 nun.) Biblu’n nun’n ndɛ mma nga be kacili i kɛ “klɔ sran nzuɛn’n,” wie liɛ’n be fa kan fɔ ng’ɔ o klɔ sran nun’n i ndɛ. Akplowa nga Pɔlu kɛnnin i ndɛ’n, ɔ fin fɔ m’ɔ o e nun’n. Pɔlu w’a yacimɛn i klɔ sran nzuɛn’n nun naan ɔ sie i. Sanngɛ andɛ sran sunman be yoman kɛ bé jrán be klɔ sran nzuɛn’n i ɲrun kekle kaan sa bɔbɔ. ‘Klɔ sran nzuɛn’n tɛ yo be fɛ.’ Be buman like nga Ɲanmiɛn waan be yo’n i akunndan, yɛ be srɛmɛn i kɛ ɔ uka be naan klɔ sran nzuɛn’n w’a sieman be. “Klɔ sran ninnge’n yɛ ɔ lo be-ɔ.” Yɛ ninnge nga be konvi o su’n yɛ be yo ɔ. Sanngɛ be nga Ɲanmiɛn wawɛ’n “i ninnge’n yɛ ɔ lo” be’n, be yaci Zoova nun naan ɔ kle be atin.
15, 16. (a) ?Sɛ like kun yolɛ’n lo sran kun’n, wafa sɛ yɛ i akunndan bulɛ wafa’n kaci ɔ? (b) ?Andɛ’n, ninnge benin mun yɛ be lo sran sunman ɔn?
15 An kanngan Rɔmfuɛ Mun 8:6 nun. Like kwlaa nga sran kun waan ɔ́ yó’n, maan ɔ yo like kpa o annzɛ like tɛ o, ɔ fata kɛ i yolɛ’n ɔ dun mmua lo i. Be nga klɔ sran ninnge’n yɛ ɔ lo be’n, like ng’ɔ́ yó be cinnjin’n yɛle ninnge tɛtɛ nga klɔ sran nzuɛn maan sran’m be yo’n. Kɛ be o sa’n, ninnge tɛtɛ sɔ’m be su yɛ be akunndan’n nin be awlɛn’n kɔ sa trilili ɔ.
16 ?Andɛ’n, ninnge benin mun yɛ be lo sran sunman ɔn? Akoto Zan klɛli i kɛ: “Like nga be yo be mɛn’n nun’n i kwlaa’n: be nyin b’ɔ blo ninnge’m be su’n, nin akunndan nga be bu fa gua ninnge nga be wun be’n be su’n, ɔ nin be wun tulɛ’n, i kwlaa sɔ’n i wie fi fin-man e Si’n, sanngɛ be ti mɛn’n nun nzuɛn.” (1 Zan 2:16) Ninnge nga be ɲin blo su sɔ’n be nun wie yɛle bian annzɛ bla kaka kunndɛlɛ’n, ɔ nin dunman kunndɛlɛ’n yɛ ninnge kpanngban ɲanlɛ’n. Fluwa nin zronali nin aladio nin televiziɔn nun’n yɛ ɛntɛnɛti su’n be wlawla sran’m be titi kɛ be kunndɛ i sɔ ninnge mun. Like ti yɛ be yo sɔ’n, yɛle kɛ i sɔ ninnge mun yɛ be lo sran’m be nun sunman ɔn. Sanngɛ “be nga klɔ sran ninnge’n lo be’n, bé wú.” Sɛ i sɔ ninnge’m be lo e wie’n, e nin Ɲanmiɛn e afiɛn sáci yɛ e ɲrun lɔ’n e nguan bɔbɔ ba’n ɔ́ fí e sa. ?Ngue ti ɔ? “Afin be nga klɔ sran ninnge’n lo be’n, be kpɔ Nyanmiɛn, be klo-man kɛ be fa Nyanmiɛn mmla’n su, yɛ kusu be kwlá fa-man su bɔbɔ. Yɛ be nga be nzuɛn’n ti klɔ sran liɛ’n, Nyanmiɛn klun jɔ-man be wun.”—Rɔm. 8:7, 8.
17, 18. ?Ngue yɛ ɔ fata kɛ e yo naan Ɲanmiɛn wawɛ’n i ninnge’n w’a lo e titi ɔ? ?Yɛ sɛ e yo sɔ’n, i bo’n gúa sɛ?
17 “Be nga Nyanmiɛn Wawɛ’n i ninnge’n lo be’n, bé nyán nguan nin alaje.” Yɛle kɛ be ɲrun lɔ’n bé ɲán anannganman nguan. Sanngɛ dɔ nga su’n be di alaje yɛ be nin Ɲanmiɛn be afiɛn’n sɛ. ?Ngue yɛ ɔ fata kɛ e yo naan “Nyanmiɛn Wawɛ’n i ninnge’n” w’a lo e titi ɔ? Sɛ e fa atin nga Ɲanmiɛn nin i wawɛ’n be kle e’n su’n, e akunndan bulɛ wafa’n nin Ɲanmiɛn liɛ’n bé yó kun. E kunndɛ kɛ é fá “Nyanmiɛn mmla’n su.” I liɛ’n sɛ like tɛ wie klɔklɔ e konvi’n, é wún like ng’ɔ fata kɛ e yo’n i weiin. Ajalɛ ng’ɔ ti kpa mɔ Ɲanmiɛn wawɛ’n kle e’n yɛ é kúnndɛ é fá ɔ.
18 I ti’n, ɔ ti cinnjin kpa kɛ Ɲanmiɛn wawɛ’n i ninnge’n lo e. Sɛ e waan ɔ yo sɔ’n, maan e ɲin tran ninnge ng’ɔ fata kɛ Klistfuɛ kun yo’n be su titi. Be nun wie yɛle Ɲanmiɛn srɛlɛ titi’n, ɔ nin Biblu’n nun kannganlɛ ɔ nin i nun like suanlɛ’n, yɛ aɲia’m be bo kɔlɛ’n nin jasin fɛ’n i bolɛ’n. (1 Piɛ. 1:13) Nán maan e man e klɔ sran nzuɛn’n i atin naan ɔ fa e ɲin sie i like uflɛ su. Sanngɛ maan Ɲanmiɛn wawɛ’n i ninnge’n lo e. Sɛ e yo sɔ’n, é yó like nga Ɲanmiɛn wawɛ’n kle e’n titi. Yɛ i sɔ maan é ɲán suralɛ kpanngban, afin be nga Ɲanmiɛn wawɛ’n i ninnge’n lo be’n, bé ɲán nguan nin alaje.—Gal. 6:7, 8.
?Amun kwla yiyi nun?
• ?Like nga “Moiz mmla’n [w’a] kwlɛ-mɛn i yo’n” yɛle benin? ?Yɛ ajalɛ benin yɛ Ɲanmiɛn fali naan w’a yo i sɔ like’n niɔn?
• ?Wafa sɛ yɛ e kwla ɲan e ti sa tɛ nin wie’n be sa nun ɔn?
• ?Ngue yɛ ɔ fata kɛ e yo naan “Nyanmiɛn Wawɛ’n i ninnge’n” w’a lo e titi ɔ?
[Foto, bue 16, 17]
?Klɔ sran nzuɛn’n su yɛ amun fa ɔ? ?Annzɛ sa nga Ɲanmiɛn wawɛ’n kle amun’n yɛ amun yo ɔ?