Maan e suan “ngwlɛlɛ nin ndɛ nanwlɛ cinnjin” nga be o Mmla’n nun’n
“[An si] ngwlɛlɛ nin ndɛ nanwlɛ cinnjin nga be o mmla’n nun’n.”—RƆM. 2:20, NW.
?AMÚN TƐ́ KOSAN NGA’M BE SU SƐ?
?Like benin i nzɔliɛ yɛle tɛ wafawafa nga Moizi Mmla’n waan Izraɛlifuɛ’m be yi’n?
?Tɛ nga laa Izraɛlifuɛ’m be yi’n, ɔ nin be wunsu nga e yi be andɛ’n, ɔ fata kɛ be yo sɛ naan Zoova w’a sɔ be nun?
?Wan’m be tɛ liɛ’n yɛ Zoova sɔ nun ɔn? ?Yɛ wan’m be liɛ’n yɛ ɔ sɔman nun ɔn?
1. ?Moizi Mmla’n i su ndɛ nga Pɔlu kannin’n, ngue ti yɛ ɔ ti cinnjin kɛ e wun i wlɛ ɔ?
NDƐ nga akoto Pɔlu klɛli i Biblu’n nun’n, ɔ uka e naan y’a wun Moizi Mmla’n i nun ninnge kaka wlɛ. Fluwa ng’ɔ klɛli ko mannin Ebre mun’n i nun’n, ɔ kleli kɛ Zezi ti ‘Nyanmiɛn nyrun jranfuɛ’m be su kpɛn’ naan ɔ yili e ti tɛ kpɛ kunngba cɛ. Naan kusu ɔ su yomɛn i sɔ kun. Be nga be lafi tɛ sɔ’n su’n, ɔ ‘de be mlɔnmlɔn.’ (Ebr. 2:17; 9:11, 12) Pɔlu kleli ekun kɛ Ɲanmiɛn i tannin sua’n ɔ ti “nyanmiɛn su lɔ liɛ kpa’n [...] i wawɛ.” Naan Zezi yoli aenguɛ kun i nun jranfuɛ. Yɛ i sɔ aenguɛ liɛ’n i kpa tra kun nga Moizi yoli i nun jranfuɛ’n. (Ebr. 7:22; 8:1-5) Wafa nga Pɔlu yiyili Moizi Mmla’n nun’n, ɔ ukali i blɛ su Klistfuɛ mun lelele. E kusu ɔ kwla uka e naan ninnge nga Ɲanmiɛn yoli mannin e’n, y’a si be su ye kpa y’a tra laa’n.
2. ?Ngue yɛ Klistfuɛ nga be ti Zuifu’n be si i mɔ be nga be timan Zuifu’n be simɛn i ɔ?
2 Fluwa nga Pɔlu klɛli ko mannin Rɔmu lɔ Klistfuɛ mun’n, i nun ndɛ wie’m be ti lɔ aniaan nga be ti Zuifu’n mɔ be kleli be Moizi Mmla’n be liɛ trele. Be liɛ’n, kɛ mɔ be kleli be Moizi i Mmla’n ti’n, be si Zoova nin like kpa nga ti yɛ ɔ kpɛ mmla mun’n. Yɛ be si “ngwlɛlɛ nin ndɛ nanwlɛ cinnjin” nga be o Mmla’n nun’n. Kɛ mɔ be wun Mmla’n i nun ndɛ cinnjin’m be wlɛ mɔ be klo be’n ti’n, be kwla yo kɛ be si nin be nannan mɔ b’a kpɔciman Zoova’n, be sa. Yɛle kɛ be kwla fa Zoova i su ndɛ cinnjin nga be o Mmla’n nun’n, be kle be nga be simɛn i’n.—An kanngan Rɔmfuɛ Mun 2:17-20 nun.
ZEZI I TƐ’N I NZƆLIƐ MUN
3. ?Wafa sɛ yɛ tɛ nga laa Zuifu’m be yi’n i su like suanlɛ’n uka e ɔ?
3 Ndɛ cinnjin nga be o Moizi Mmla’n nun mɔ Pɔlu kannin be ndɛ’n be uka e naan y’a wun Zoova i klun sa’n i wlɛ. Laa’n, Zoova fɛli i Mmla’n kleli i sufuɛ’m be ninnge wie mun. Ninnge sɔ’m be te yo cinnjin andɛ. I sɔ’n ti’n, tɛ nga Moizi Mmla’n waan be yi’n, ɔ nin be klunklo like nga i waan be man’n, é wá fá e ɲin síe su. Ninnge sɔ’m be yolɛ’n fali Zuifu nga be ti wun ase kanfuɛ’n sieli i Klist i silɛ’n i atin’n su. Yɛ be ukali be naan b’a si like nga Ɲanmiɛn kunndɛ kɛ be yo’n. Ninnge cinnjin nga Zoova waan i sufuɛ’m be yo be laa’n, i kunngba’n yɛ i waan i sufuɛ’m be yo be andɛ ɔ. I ti’n, tɛ nin be klunklo like manlɛ’n i su mmla ng’ɔ mannin Izraɛlifuɛ mun laa’n, ɔ kwla uka e naan y’a bu wafa nga e su Ɲanmiɛn’n i su akunndan.—Mal. 3:6.
4, 5. (a) ?Ngue yɛ Moizi Mmla’n maan Zuifu’m be wunnin i wlɛ ɔ? (b) ?Like benin i wawɛ yɛle tɛ yilɛ’n i su mmla nga Ɲanmiɛn mannin’n?
4 Moizi Mmla’n i nun ndɛ sunman kpɛnnin Zuifu’m be wla kɛ be ti sa tɛ yofuɛ. I wie yɛle kɛ sran ng’ɔ kan fuɛn’n, ɔ fata kɛ ɔ yo i wun sanwun. I sɔ’n ti’n, ɔ fata kɛ ɔ fa nannin bla ɔkwlɛ kun mɔ lɛ fi nunmɛn i wun’n yi tɛ. Ɲanmiɛn ɲrun jranfuɛ’n ɔ kun nannin sɔ’n yɛ ɔ rɛ i nnɛn’n, kpɛkun be fɛ i nzuɛn’n be guɛ i “nzue bɔ be fa kplo be wun fiɛn’n i nun.” Cɛn ba nsan nin cɛn ba nso su’n, Ɲanmiɛn ɲrun jranfuɛ’n fa nzue sɔ’n be guɛguɛ i sran ng’ɔ kannin fuɛn’n i wun naan w’a yo sanwun. (Kal. 19:1-13) Asa ekun’n, Moizi Mmla’n kle kɛ sɛ bla kun wu ba’n, nn fiɛn w’a kɛn i. Kɛ blɛ’n ng’ɔ ko di naan i fiɛn’n w’a tu i wun’n ko sin’n, ɔ fata kɛ ɔ yi tɛ naan fiɛn sɔ’n w’a tu i wun. Mmla sɔ’n maan Zuifu’m be wun i kɛ be nin fɔ’n nin sa tɛ yolɛ’n fin be nin klun.—Sau. 12:1-8.
5 Sa uflɛ wie’m be ti’n, ɔ fata kɛ Zuifu’m be yi Ɲanmiɛn i kpatalɛ tɛ. Kannzɛ be si sɔ o annzɛ be siman sɔ o, tɛ nga be yili be Ɲanmiɛn i tannin sua nun’n, ɔ nin nga i sin be wa yili be Zoova sua’n nun’n, be ti kɛ tɛ nga Zezi yili’n mɔ leman wunsu’n i “wawɛ” sa.—Ebr. 10:1-10.
AKUNNDAN NG’Ɔ FATA KƐ Ɔ TRAN SRAN NG’Ɔ́ YÍ TƐ’N I KLUN’N
6, 7. (a) ?Sɛ Izraɛlifuɛ’m be waan bé mán Zoova i like’n, ngue yɛ ɔ fata kɛ be bu i akunndan ɔn? ?Like benin i nzɔliɛ yɛle ninnge kpakpafuɛ mɔ be fa yi tɛ man Zoova’n? (b) ?Kosan benin yɛ e kwla fa usa e wun ɔn?
6 Zoova waan nnɛn nga Izraɛlifuɛ’m bé fá yí tɛ’n, nán maan lɛ fi trɛn i wun. Yɛle kɛ nán maan be fa nnɛn nga i ɲin ti siwa annzɛ nnɛn nga mɔ kanninkannin annzɛ tukpacɛ wie o i wun’n be yi tɛ. (Sau. 22:20-22) Kɛ Izraɛlifuɛ’m bé fá be fie su ninnge mun mán Zoova’n, “ninnge sɔ’m be klikli’n,” ɔ nin be nun “kpakpa” mun yɛ ɔ fata kɛ be fa mɛn i ɔ. (Kal. 18:12, 29) Sɛ be fa like ng’ɔ timan kpa’n be man Zoova’n, ɔ su sɔman nun. Kɛ Izraɛlifuɛ’m be fa be nnɛn’m be nun kpakpafuɛ’m be yi tɛ man Zoova’n, i sɔ’n kle kɛ tɛ nga Zezi wá yí’n lɛ fi su tranman nun. Yɛ ɔ kle kɛ Zoova i awlɛn su like kpafuɛ’n yɛ ɔ́ fá yí klɔ sran’m be ti tɛ ɔ.—1 Piɛ. 1:18, 19.
7 Sran nga i waan ɔ́ yí tɛ’n, sɛ ɔ si Zoova i aklunye’n i su ye sakpa’n, i ninnge’m be nun kpakpafuɛ’n yɛ ɔ́ fá yí tɛ sɔ’n niɔn. Yɛ ɔ́ yó i sɔ aklunjuɛ su. Like nga sran kun fá mán Zoova’n ɔ ti kɛ i bɔbɔ sa. Sanngɛ ɔ si kɛ sɛ like ng’ɔ timan kpa’n yɛ ɔ fa mɛn i’n, ɔ su kplinman su. Afin i sɔ’n klé kɛ Ɲanmiɛn i like manlɛ’n timan like cinnjin i ɲrun, naan bɔbɔ ɔ ti kɛ Zoova su kle i yalɛ ngboko sa. (An kanngan Malasi 1:6-8, 13 nun.) Ɔ fata kɛ i sɔ’n yo maan e bu wafa nga e fa su Ɲanmiɛn’n i akunndan. Maan e usa e wun kɛ: ‘?Ngue ti yɛ n su Zoova ɔ? ?Ɔ fata kɛ n kaci min sa wafa nga n fa su i’n nun? ?Like kpafuɛ nga n kwla yo mɛn i’n, yɛ n yo ɔ?’
8, 9. ?Kɛ Izraɛlifuɛ’m bé yí tɛ mán Zoova’n i sin akunndan nga be bu’n, ɔ kle e sɛ?
8 Izraɛlifuɛ kun bɔbɔ i klunklo su ɔ kwla yi tɛ man Zoova fa kle kɛ ɔ si i ye. Annzɛ ɔ kwla yi tɛ nga be rɛ i nnɛn kɔlikɔli’n naan Zoova i klun jɔ i wun. Kɛ m’ɔ ti i klunklo su tɛ’n, nnɛn ng’ɔ ti kpafuɛ’n yɛ ɔ́ fá ɔ. Ɔ su yoman kekle mɛnmɛn i. Ɔ́ yó i sɔ aklunjuɛ su. Andɛ’n, e faman nnɛn e yiman tɛ kɛ nga laa Moizi Mmla’n waan Ɲanmiɛn i sufuɛ’m be yo’n sa. Sanngɛ sɛ é kwlá sé’n, e yi tɛ wafa uflɛ. Yɛle kɛ e fa e blɛ’n nin e wunmiɛn’n, ɔ nin e sa nun ninnge mun e su Zoova. Kɛ e kan like nga e Klistfuɛ mun e wla o su’n i ndɛ e kle sran mun’n, i lɛ nun’n e “manman Nyanmiɛn.” Asa kusu’n, akoto Pɔlu seli kɛ “sa kpa nin sran ye yolɛ’n” be ti kɛ tɛ yilɛ sa naan i sɔ yolɛ’n jɔ Ɲanmiɛn klun. (Ebr. 13:15, 16) Zoova mannin e ninnge kpakpa. Sɛ e si i sɔ’n i su ye’n, é bú i sulɛ’n i like kpa. I sɔ’n ti’n, kɛ laa Izraɛlifuɛ’m be sa’n, ɔ fata kɛ e bu like nga ti yɛ e su Ɲanmiɛn’n i akunndan.
9 ?Yɛ sɛ sa tɛ wie ti’n, ɔ fata kɛ Izraɛlifuɛ kun yi tɛ kɛ nga Moizi Mmla’n fa kan’n sa’n nin? ?Kɛ mɔ sran’n lemɛn i yowlɛ’n ti’n, i klun su jɔmɛn i yilɛ’n su? (Sau. 4:27, 28) Sɛ ɔ kunndɛ kɛ ɔ nin Zoova be afiɛn sɛ titi’n, i klun jɔ́ su.
10. ?Sɛ e yoli sa tɛ wie’n, ninnge benin mɔ be ti kɛ tɛ yilɛ sa’n yɛ ɔ fata kɛ e yo be ɔ?
10 Andɛ’n, e kwla kan ndɛ wie m’ɔ wɔ e niaan wie i safle ɔ. Wie liɛ y’a buman akunndan kpa ka naan y’a ijɔ annzɛ kusu e siman kɛ ndɛ sɔ’n wá yó i ya. Wie liɛ kusu’n, sa nga e yoli’n ti’n e klun titi e. Sɛ e kunndɛ kɛ Zoova i klun jɔ e wun sakpa’n, é yó like kwlaa nga e kwla yo’n, naan y’a siesie ndɛ sɔ’n. Ɔ kwla yo kɛ e ko to e niaan nga e fɔnnin i wun’n naan e kpɛtɛ i. Annzɛ kusu sɛ sa nga e yoli’n ti tɛ kpa’n, ɔ fata kɛ e ko wun asɔnun kpɛnngbɛn’m be wun naan be uka e. (Mat. 5:23, 24; Zak 5:14, 15) Ɔ maan sɛ e fɔnnin e niaan wie annzɛ Ɲanmiɛn wun naan e waan é síesíe e afiɛn’n, ɔ fata kɛ e mian e ɲin e fa ajalɛ. E afiɛn mɔ é síesíe’n, ɔ ti kɛ tɛ yɛ e su yi sa. I sɔ’n maan e nin Zoova yɛ e niaan’n e afiɛn sɛ́ kɛ laa sa. Kpɛkun e akunndan’n su buman e fɔ kun. Kɛ ɔ ko yo sɔ’n, e wun i wlɛ kɛ atin nga Zoova kle e’n yɛ ɔ ti atin kpafuɛ’n niɔn.
11, 12. (a) ?Ngue yɛle bo kun yolɛ tɛ’n? (b) ?Ngue yɛ bo kun yolɛ tɛ’n kle e ɔ?
11 Tɛ nga Moizi Mmla’n waan Izraɛlifuɛ’m be yi’n, be nun kun yɛle bo kun yolɛ tɛ’n. Tɛ sɔ mɔ sran kun yi’n ɔ kle kɛ ɔ nin Zoova be afiɛn sɛ. Sran ng’ɔ kɔ tɛ’n i yilɛ’n ɔ nin i awlobofuɛ mun be di tɛ nnɛn’n wie. Atrɛkpa’n, Ɲanmiɛn sua’n i like diwlɛ kun nun yɛ be yo i sɔ ɔ. Be fa nnɛn’n wie man Ɲanmiɛn ɲrun jranfuɛ ng’ɔ yili tɛ’n ɔ nin Ɲanmiɛn ɲrun jranfuɛ onga nga be di junman Ɲanmiɛn i sua’n nun lɔ’n. (Sau. 3:1; 7:31-33) Ɔ ti kɛ nn sran ng’ɔ yili tɛ’n nin i awlobofuɛ’m be nin Ɲanmiɛn ɲrun jranfuɛ mun yɛ Zoova bɔbɔ be su di like likawlɛ aklunjuɛ nun sa. Like trele nga ti yɛ sran sɔ’n yi tɛ sɔ’n yɛle kɛ ɔ klo kɛ ɔ nin Ɲanmiɛn be afiɛn sɛ titi.
12 Ɔ maan sran ng’ɔ yi bo kun yolɛ tɛ’n ɔ ti kɛ w’a yia Zoova kɛ be w’a wlu awlo sa. Yɛ kɛ Zoova kplin su’n, nanwlɛ ɔ ti Izraɛlifuɛ ng’ɔ yiɛli i’n i aɲrunɲan like dan. San kɛ i ninnge’m be kpakpafuɛ’n yɛ ɔ́ kúnndɛ kɛ ɔ́ fá mán Ɲanmiɛn. Bo kun yolɛ tɛ’n i yilɛ’n ɔ o ndɛ nanwlɛ cinnjin nga be o Moizi Mmla’n nun’n be nun wie. Ɔ kle e kɛ sran kwlaa ng’ɔ kunndɛ kɛ ɔ nin i Yifuɛ’n be afiɛn sɛ’n, Zezi i tɛ’n ti’n i sɔ liɛ’n kwla yo ye. Andɛ’n, sɛ e klunklo su e fa e sa nun ninnge mun nin e wunmiɛn’n e su Zoova kɛ tɛ wie yɛ e su yi e mɛn i sa’n, e kwla yo i janvuɛ.
TƐ NGA ƝANMIƐN SƆMAN NUN’N
13, 14. ?Ngue ti yɛ tɛ nga Famiɛn Saili waan ɔ́ yí man Zoova’n, w’a yoman Zoova klun su ɔ?
13 Zoova sɔli tɛ wie’m be nun. Sran nga be yili tɛ sɔ mun’n be akunndan’n ti kpa. Kusu’n, Biblu’n kan tɛ wie mɔ Ɲanmiɛn w’a sɔman nun’n be ndɛ. ?Ngue ti yɛ w’a sɔman be nun ɔn? Maan e fa sa nɲɔn e yiyi nun.
14 Ɲanmiɛn nuan ijɔfuɛ Samiɛli seli Famiɛn Saili kɛ Amalɛkifuɛ’m be nunnunlɛ blɛ nga Zoova sieli’n w’a ju. Ɔ seli Saili kɛ ɔ kun Amalɛkifuɛ mun nin be bo nnɛn’m be kwlaa. Sanngɛ kɛ Saili kwlali be’n, Saili maan i sonja’m b’a kunman Agag m’ɔ ti Amalɛkifuɛ’m be famiɛn’n. Asa ekun’n, Saili fali be nnɛn’m be nun kpakpa mun naan ɔ́ fá yí tɛ mán Zoova. (1 Sam. 15:2, 3, 21) ?Wafa sɛ yɛ Zoova buli i sɔ liɛ’n niɔn? Kɛ mɔ Saili i ɲin w’a yimɛn i’n ti’n, w’a kloman kɛ ɔ yo nvle’n i su famiɛn kun. (An kanngan 1 Samiɛl 15:22, 23 nun.) ?Ndɛ sɔ’n kle e sɛ? Ɔ kle e kɛ sɛ sran kun waan Ɲanmiɛn sɔ i tɛ ng’ɔ yi’n nun’n, ɔ fata kɛ ɔ fa Ɲanmiɛn i mmla’m be su.
15. ?Ezai blɛ su Izraɛlifuɛ nga bé yí tɛ nn bé yó sa tɛ’n, be aeliɛ’n kle sɛ?
15 Ndɛ sɔ’n i wunsu kun o Ezai fluwa’n nun. Ezai blɛ su’n, kɛ mɔ Mmla’n kan tɛ yilɛ’n ndɛ’n i ti Izraɛlifuɛ’m be yi tɛ be man Zoova ɔ. Kɛ bé yó i sɔ’n nn bé yó sa tɛtɛ mun. I sɔ’n kle kɛ nán akunndan kpa yɛ be fa yi tɛ sɔ mun ɔn. I sɔ’n ti’n, Zoova sɔman tɛ nga be yi be’n nun. Ɔ maan Zoova usali kɛ: “?Amun tɛ kpanngban bɔ amun yi’n, ɔ yo nzu ye yɛ ɔ man min-ɔn? Bua nene nga amun fa yi tɛ bɔ be yra be nnɛn’n kɔlikɔli’n, yɛ nannin nga b’a kpɛ cro bɔ amun fa yi bo kun yolɛ i su tɛ’n be lui’n, i kwlaa sɔ’n w’a flan min. Nannin tola mun, nin bua nga b’a kpɛ cro’n mun, ɔ nin boli kpakpuɛ mun, bɔ amun fa yi afiɛn siesielɛ tɛ’n be mmoja’n, n kunndɛ-mɛn i kun. [...] Amun yaci sraka ninnge ngbɛn’m be fa balɛ. Ansans bɔ amun yra be man min’n, ɔ yo min tɛ.” ?Ngue ti yɛ Ɲanmiɛn i klun w’a jɔman tɛ sɔ’m be su ɔ? Ɔ seli kɛ: “Sɛ amun srɛ min bɔ lele’n, ɔ ti ngbɛn. N su sie-man min su. Afin sran’m be mmoja ase gualɛ’n yɛ ɔ ti amun junman-an. Amun wunnzin, amun yo amun wun saun. Amun yi amun sa tɛtɛ bɔ amun yo be’n min nyrun lɛ. Amun yaci sa tɛ’n i yolɛ.”—Eza. 1:11-16.
16. ?Wan’m be tɛ liɛ’n yɛ Ɲanmiɛn sɔ nun ɔn?
16 Be nga be yoli sa tɛ mɔ b’a kaciman be sa’n, Zoova w’a sɔman ninnge nga be fa mɛnnin i’n nun. Sanngɛ be nga be miannin be ɲin be nantili i mmla’m be su’n, ɔ tɛli be srɛlɛ’n su yɛ ɔ sɔli ninnge nga be fa mɛnnin i’n be nun. Moizi Mmla’n i nun ndɛ cinnjin’m be kleli sran sɔ’m be kɛ be ti sa tɛ yofuɛ naan ɔ ti cinnjin man be kɛ Zoova yaci be wun sa mun cɛ be. (Gal. 3:19) Kɛ sran sɔ’m be ko wun i sɔ liɛ’n i wlɛ’n kpɛkun sa nga be yoli’n w’a yo be nsisɔ. Ɔ maan be kunndɛ kɛ Zoova yaci sa sɔ mun cɛ be. I kunngba’n, andɛ’n ɔ fata kɛ e wun i wlɛ kɛ Klist i tɛ’n ti cinnjin man e naan i yɛ maan Zoova kwla yaci e sa tɛ mun cɛ e ɔ. Sɛ e wun i wlɛ kɛ Klist i tɛ’n ti cinnjin kpa naan e si su ye sakpa’n, like kwlaa nga é yó man Zoova’n ɔ́ “sɔ́ nun” klanman.—An kanngan Jue Mun 51:19, 21 nun.
MAAN E KLE KƐ E LAFI TƐ NGA ZEZI YILI’N SU
17-19. (a) ?Wafa sɛ yɛ e kwla kle Zoova kɛ e si e ti kpɔlɛ tɛ nga Zezi yili’n i su ye ɔ? (b) ?Like suanlɛ ng’ɔ́ bá lɛ’n nun’n, ngue yɛ é wá wún i ɔ?
17 Ninnge nga Ɲanmiɛn waan ɔ́ yó be’n be “wawɛ” ngunmin cɛ yɛ Izraɛlifuɛ’m be wunnin be ɔ. Sanngɛ e liɛ’n, y’a si ninnge sɔ’m be kpa. (Ebr. 10:1) Tɛ yilɛ’n i su mmla’m be kleli Izraɛlifuɛ mun like ng’ɔ fata kɛ be yo naan be nin Ɲanmiɛn be afiɛn w’a sɛ’n. Ɔ fata kɛ be kle kɛ be si i ye, yɛ be kle kɛ be kunndɛ kɛ bé fá be ninnge kpakpa mun mɛ́n i. Yɛ ɔ fata kɛ be wun i wlɛ kɛ be ti sa tɛ yofuɛ naan ɔ ti cinnjin kɛ Ɲanmiɛn yaci be sa tɛ mun cɛ be. Andɛ’n, Biblu’n i bue nga laa be klɛli i Glɛki aniɛn nun’n ti’n, e wun i wlɛ kɛ e ti kpɔlɛ tɛ nga Zezi yili’n i dunman nun’n, Zoova wá núnnún sa tɛ’n nin wie’n mlɔnmlɔnmlɔn. Tɛ sɔ’n ti’n, ɔ kwla yaci e sa tɛ mun cɛ e naan dɔ nga su bɔbɔ’n e akunndan’n w’a buman e fɔ kun. Nanwlɛ, e ti kpɔlɛ tɛ’n ti like nanndoliɛ kun mɔ Zoova yoli mannin e ɔ!—Gal. 3:13; Ebr. 9:9, 14.
18 Ɔ fata kɛ e si e ti kpɔlɛ tɛ’n i bo naan y’a kwla ɲan su ye. Sanngɛ nán i sɔ’n su yɛ ɔ fata kɛ e ka ɔ. Pɔlu klɛli i kɛ: ‘Mmla’n ti kɛ sran kun b’ɔ kleli ye atin nga e fa su’n, lele Krist bali naan Nyanmiɛn a bu ye sran kpa i su bɔ e lafi’n ti.’ (Gal. 3:24) Ɔ fata kɛ be wun e Ɲanmiɛn sulafilɛ’n e nzuɛn’n nun. (Zak 2:26) I ti’n, Klistfuɛ klikli’m be blɛ su’n, Klistfuɛ nga be ti Zuifu’n mɔ be si Moizi Mmla’n i nun ndɛ cinnjin mun’n, Pɔlu wlali be fanngan kɛ be nian like nga be si i’n su be nanti. I liɛ’n, be aeliɛ’n ɔ nin Ɲanmiɛn i mmla nga be fa kle sran mun’n bé kɔ́ likawlɛ.—An kanngan Rɔmfuɛ Mun 2:21-23 nun.
19 Kannzɛ bɔbɔ andɛ Klistfuɛ’m be diman Moizi Mmla’n su’n, sanngɛ sɛ é kwlá sé’n tɛ nga bé yí mán Zoova’n, ɔ fata kɛ ɔ yo i klun su. É wá wún wafa nga e kwla yo sɔ’n like suanlɛ ng’ɔ́ bá lɛ’n nun.
[Ndɛ kwle, bue 19]
Ninnge cinnjin nga Zoova kunndɛ kɛ i sufuɛ’m be yo’n be kaciman.
[Foto, bue 20]
?Sɛ ɔ ti amun’n nn nnɛn beninfuɛ’n yɛ amun fa mannin Zoova ɔ?
[Foto, bue 21]
Sɛ e yi tɛ ng’ɔ ti Zoova i klun su’n, i klun jɔ́ e wun.