?Ngue yɛ sran wie’m be flɛ i mɛn’n i awieliɛ’n niɔn?

“[Zezi] ko trannin ase Olivie Oka’n su. Yɛ i sɔnnzɔnfuɛ’m be bɛli i wun lɛ naan b’a usɛ i blɛlɛ kɛ: ‘?Blɛ onin yɛ sa sɔ’m bé yó-ɔ, yɛ nguɛ yɛ ɔ ti ɔ balɛ’n nin mɛn’n i awieliɛ’n i nzɔliɛ nin-ɔn? Kle ye.’”​—MATIE 24:3.

?KƐ BE kan “mɛn’n i awieliɛ’n” i ndɛ’n, ngue yɛ amun bu i akunndan ɔn? Atrɛkpa’n, sa sroesroe wie m’ɔ juli’n i akunndan yɛ amun ka lɛ bu ɔ. Sran wie’m be bu i kɛ i sɔ sa’n wafa wie m’ɔ́ wá jú’n, yɛ Biblu’n flɛ i “Armagedɔn’n” niɔn. (Sa Nglo Yilɛ 16:16) Kannzɛ bɔbɔ ndɛ mma “Armagedɔn’n” wo Biblu’n nun kpɛ kunngba cɛ’n, sanngɛ ninnge kɛ televiziɔn nin zronali sa’m be nun’n, be kɛn i ndɛ kpɛ sunman. Ɲanmiɛn sulɛ wafa’m be su kpɛnngbɛn’m be kɛn i ndɛ kpɛ sunman wie.

?Mɛn’n i awieliɛ’n annzɛ Armagedɔn i su ndɛ nga sran sunman kan’n ɔ nin nga Biblu’n kan’n, be ti kun? Kosan sɔ’n ti cinnjin kpa. Afin sɛ amun si mɛn’n i awieliɛ’n i su nanwlɛ’n, srɛ su kunman amun ngbɛnngbɛn. Kpɛkun amun su sroman e ɲrun lɔ sa mun. Yɛ wafa nga amun fa bu Ɲanmiɛn’n ɔ́ káci.

Maan e fa e ɲin e sie i kosan nsan nga’m be su e nian. Yɛ maan e fa Armagedɔn i su akunndan nga sran’m be nun sunman be bu’n e sunnzun ndɛ nga Biblu’n kɛn i sakpasakpa’n.

1. ?ARMAGEDƆN TI ƝRƐNNƐN SA SROESROE KUN M’Ɔ FIN SRAN MUN ƆN?

Kpɛ sunman’n, zronali klɛfuɛ nin be nga be kunndɛ sa’m be su like’n, be flɛ sa sroesroe nga be fin klɔ sran mun’n kɛ “Armagedɔn.” I wie yɛle kɛ be flɛli mɛn wunmuan’n nun alɛ dan klikli’n nin nɲɔn su’n kɛ Armagedɔn. Kɛ alɛ sɔ’m be sinnin’n, sran’m be buli i kɛ Amlɛnkɛn mun nin nvle nga laa be flɛ i Union soviétique bé wá fá be bɔmbu sroesroe mun tó be wiengu wun. Ɔ maan srɛ kunnin sran mun kpa. Zronali nin televiziɔn’m be nun’n, be flɛli i sɔ liɛ’n kɛ “Armagedɔn m’ɔ ti bɔmbu nun alɛ kunlɛ’n.” Andɛ’n, be nga be kunndɛ sa’m be su like’n be nun wie’m be wunnin i kɛ asiɛ’n i fiɛn mɔ sran’m be yo’n ti’n wawa blɛ’n nin munngun blɛ’n be kacikaci. I sɔ’n ti’n be se sran’m be kɛ sɛ b’a nianman be wun’n, ɔ su cɛman naan “Armagedɔn m’ɔ fin lika mɔ be saci i’n” w’a tɔ be su.

Like nga be ndɛ sɔ’n kle’n: Sɛ sran’m be waan nán sa kun ju asiɛ’n su’n, ɔ su juman. Ɔ maan sɛ mɛn’n i siefuɛ’m b’a simɛn i yo’n, asiɛ’n sáci mlɔnmlɔnmlɔn.

Ndɛ nga Biblu’n kan’n: Ɲanmiɛn su manman klɔ sran’m be atin naan be saci asiɛ’n. Biblu’n se e kɛ Zoovaa w’a yiman asiɛ’n “i ngbɛn.” Sanngɛ ɔ yili i kɛ “be tran su.” (Ezai 45:18) Ɔ maan ɔ su manman be atin kaan sa kɛ be nunnun i. I kpa’n, ɔ́ “núnnún be nga be saci asiɛ’n.”​—Sa Nglo Yilɛ 11:18.

2. ?ƝRƐNNƐN SA KƐ ASIƐ’N M’Ɔ KEJE’N SA’N YƐ BE FLƐ I ARMAGEDƆN’N NIƆN?

Ɲrɛnnɛn sa kɛ asiɛ’n m’ɔ keje’n sa’n, blɛ sunman’n be nga be bo ndɛ’m be jɔ zronali nin televiziɔn’m be nun’n, be flɛ be “Armagedɔn.” Afuɛ nga be flɛ i 2010 nun’n, asiɛ’n kejeli kekle kpa Aiti lɔ. Zronali klɛfuɛ kun flɛli sa sɔ’n kɛ “Aiti lɔ ‘Armagedɔn.’” Fluwa ng’ɔ klɛli’n nun’n, ɔ kannin ɲrɛnnɛn mɔ sran’m be wunnin i’n ɔ nin sran kaka kpa mɔ be wuli’n yɛ ninnge kpanngban mɔ be sacili’n be ndɛ. Be nga be bo ndɛ’m be jɔ zronali nin televiziɔn’m be nun’n ɔ nin flimu yofuɛ’m be flɛ sa wie mɔ b’a dun mmua b’a ju’n Armagedɔn. Sanngɛ be flɛ sa nga be bu i kɛ bé wá jú mɔ i ti srɛ kun be’n be sɔ wie. I wie yɛle kɛ be kpɛ be ti nun be se kɛ yɔbuɛ dan kpa kun kwla fin Ɲanmiɛn su lɔ tɔ asiɛ’n su wa. Sɛ ɔ yo sɔ’n i sin sa ng’ɔ́ jú’n, be flɛ i “Armagedɔn.”

Like nga be ndɛ sɔ’n kle’n: Armagedɔn ti sa sroesroe kun m’ɔ́ kún sran ɔn, ɔ kpaman nun ɔn. I sran kpa o i sran tɛ o, ɔ kun be ngba. Sɛ i sɔ sa’n waan ɔ́ jú’n, ɔ leman like kun sa mɔ sran kun kwla yo fa sɛsɛ i wun ɔn.

Ndɛ nga be Biblu’n kan’n: Armagedɔn timan sa sroesroe kun m’ɔ́ kún sran ɔn, ɔ kpaman nun ɔn. Armagedɔn blɛ’n nun’n saan klunwifuɛ mun yɛ bé wú ɔ. Biblu’n waan ɔ ka kaan sa’n, “be su wun-man klunwifuɛ’n kun. Sɛ a nian kan ɔ tran lɛ’n, a su wun-man sran.”​—Jue Mun 37:10.

3. ?ARMAGEDƆN BLƐ’N NUN’N, ƝANMIƐN NÚNNÚN ASIƐ’N BƆBƆ BA’N?

Ɲanmiɛn sufuɛ kpanngban be bu i kɛ blɛ kun wá jú mɔ sa tɛ nin sa kpa’n bé kún ɔn. Naan i agualiɛ su’n, asiɛ’n su tranman lɛ kun. Amlɛnkɛn’m be mɛn’n nun lɔ’n, fluwa sifuɛ wie’m be usausali kpɛnngbɛn wie’m be kosan. Sran nga be usali be sa’n, sɛ be fa be nun sran 100, be nun 40 waan sran’m bé kún alɛ kun mɔ be flɛ i “Armagedɔn alɛ.” Alɛ sɔ’n yɛ ɔ́ núnnún mɛn’n niɔn.

Like nga be ndɛ sɔ’n kle’n: B’a yiman sran’m be kɛ be tran asiɛ’n su anannganman. Asa kusu’n, b’a yiman asiɛ’n kɛ ɔ ka lɛ tititi. Kɛ Ɲanmiɛn yí sran mun’n, ɔ sunnzunnin kɛ cɛn kun’n, be kwlaa be wu.

Ndɛ nga be Biblu’n kan’n: Biblu’n kɛn i weiin kɛ Ɲanmiɛn “wlali asiɛ’n i bo ase kekleke kpa! Kɛ ɔ o lɛ’n yɛ ɔ wo-ɔ.” (Jue Mun 104:5) Biblu’n kan be nga be o asiɛ’n su’n be ndɛ se kɛ: “Mɛn’n ɔ́ yó sran kpa’m be liɛ. Bé trán nun tititi.”​—Jue Mun 37:29.

E wun i weiin kɛ Armagedɔn i su ndɛ nga sran’m be kan’n, ɔ nin nga Biblu’n kan’n be sansan be wun. ?Ɔ maan benin yɛ ɔ ti nanwlɛ’n niɔn?

[Ja ngua lɛ ndɛ’n]