Maan e ɲin tran su kɛ Zezi fa yoli’n sa
“Maan amun nyin tran su, yɛ amun srɛ Nyanmiɛn.”—MAT. 26:41.
?WAFA SƐ YƐ AMÚN TƐ́ SU Ɔ?
?Wafa sɛ yɛ Ɲanmiɛn srɛlɛ nun’n, e kwla kle kɛ e ɲin o su ɔ?
?Wafa sɛ yɛ jasin fɛ’n bolɛ nun’n, e kwla kle kɛ e ɲin o su ɔ?
?Kɛ kekle’n o e su’n, ngue ti yɛ ɔ ti cinnjin kɛ e ɲin tran su ɔ? ?Yɛ wafa sɛ yɛ e kwla yo sɔ ɔ?
1, 2. (a) ?Wafa nga Zezi i ɲin fa trannin su’n i su kosan benin yɛ e kwla fa usa e wun ɔn? (b) ?Sran mɔ fɔ wo i nun’n, ɔ kwla nian Zezi mɔ fɔ nunmɛn i nun’n i ajalɛ liɛ’n su? An fa sunnzun ase be yiyi nun.
AMUN a usa amun wun le kɛ: ‘?Sran kun i ɲin kwla tran su kɛ Zezi i ɲin fa trannin su’n sa? Afin Zezi liɛ’n fɔ w’a trɛnmɛn i nun. Asa ekun’n, sa nga afuɛ akpiakpi bɔbɔ sín naan b’a ju’n, ɔ si be nun wie mun weiin. ?Sɛ ɔ ti sɔ’n, ɔ fata kɛ i ɲin tran su?’ (Mat. 24:37-39; Ebr. 4:15) Maan e tɛ kosan sɔ’m be su i liɛ’n é kwlá wún like nga ti yɛ ɔ ti cinnjin kɛ e ɲin tran su naan nán e jrɛnjrɛn i sɔ yolɛ’n wun’n.
2 ?Sran mɔ fɔ wo i nun’n, ɔ kwla nian sran nga fɔ nunmɛn i nun’n i ajalɛ liɛ’n su? Ɛɛn, afin sran ng’ɔ siman like kun yo’n, ɔ kwla nian sran ng’ɔ si like sɔ’n i yo kpa’n i liɛ’n su lele ɔ si i yo. Maan e fa sran kun m’ɔ su suan ta tolɛ’n i su sunnzun ase e nian. Kɛ ɔ́ bó i suanlɛ bo’n, i sa sinman. Sanngɛ ɔ miɛn i ɲin suɛn i titi. Kɛ ɔ ko yo naan w’a si i to’n, ɔ bo i ɲin ase niɛn i like klefuɛ mɔ i sa sin kpa’n i liɛ’n su. Wafa nga i like klefuɛ’n fa jran’n, m’ɔ sie i sa’n, ɔ nin wafa ng’ɔ fa tra ta’n, ɔ fɛ i ɲin sie i kwlaa su. Wafa ng’ɔ fata kɛ ɔ cuɛn ta’n nun ju naan w’a yaci nun’n, ɔ nin wafa nga aunmuan’n kwla kpalo ta mma’n, ɔ sie i kwlaa sɔ’n i nzɔliɛ. Sɛ ɔ miɛn i ɲin nian i like klefuɛ’n i liɛ su titi’n, blɛblɛbɛ ɔ́ sí i tó kpa. I wafa kunngba’n, kɛ ɔ ko yo naan e Klistfuɛ nzuɛn’n i ɲin w’a fite kpa ekun’n, e mian e ɲin e nian ndɛ nga Zezi kannin’n ɔ nin i ajalɛ m’ɔ leman wunsu’n be su.
3. (a) ?Ngue ndɛ yɛ Zezi kannin m’ɔ kle kɛ ɔ fata kɛ i bɔbɔ i ɲin tran su wie ɔ? (b) ?Ngue ndɛ yɛ é wá kɛ́n i like suanlɛ nga nun ɔn?
3 ?Ɔ nin i fata bɔbɔ kɛ Zezi i ɲin tran su? Ɛɛn. Ka naan b’a kun i’n, i kɔnguɛ kasiɛn nun’n, ɔ seli i sɔnnzɔnfuɛ’m be kɛ: ‘An tran be nyin su uka min.’ Kɛ mɔ Zezi seli kɛ be ‘ukɛ i’n,’ ɔ kle kɛ i bɔbɔ i ɲin trannin su wie. Kpɛkun ɔ kan guali su kɛ: “Maan amun nyin tran su, yɛ amun srɛ Nyanmiɛn naan Lakafuɛ’n w’a laka-man amun.” (Mat. 26:38, 41) Kɛ Zezi wo asiɛ’n su wa’n i ɲin trannin su trilili. Sanngɛ blɛ kekle sɔ nun m’ɔ ka kaan sa ɔ́ wú’n, wafa nga i ɲin kwla tran su tra titi liɛ’n, ɔ nin wafa ng’ɔ kwla fɛ i wun mɛntɛn i Si kpa ekun’n, yɛ ɔ kunndɛli ɔ. Yɛ ɔ si kɛ ɔ nin i fata kɛ i sɔnnzɔnfuɛ’m be ɲin tran su wie. Sanngɛ nán blɛ kan sɔ nun ngunmin ɔn. Ɔ fata kɛ be ɲin tran su tititi. Ɔ maan é wá kán like ti mɔ Zezi kunndɛ kɛ e ɲin tran su’n i ndɛ. I sin’n é wá nían wafa nga ninnge nsan nun’n e kwla niɛn i ajalɛ liɛ’n su’n.
SA NGA TI YƐ ZEZI KUNNDƐ KƐ E ƝIN TRAN SU’N
4. ?Ngue ti yɛ ɔ fata kɛ e ɲin tran su ɔ?
4 Sa nga e si be’n, ɔ nin nga e siman be’n, be ti yɛ Zezi kunndɛli kɛ e ɲin tran su ɔ. Kɛ Zezi o asiɛ’n su wa’n, ɔ siman e ɲrun lɔ sa’m be kwlaa. Aenvuɛ su, ɔ dili i nanwlɛ kɛ: “Cɛn sɔ’n nin i dɔ’n, sran fi si-mɛn i, saan min Si kunngba cɛ yɛ ɔ si i-ɔ. M bɔ n ti i Wa’n bɔbɔ n si-mɛn i, yɛ nyanmiɛn su lɔ anz’m be kusu be si-mɛn i.” (Mat. 24:36) Blɛ sɔ nun’n, Zezi m’ɔ ti Ɲanmiɛn “i Wa’n” ɔ siman blɛ trele nga mɛn tɛ nga i awieliɛ’n jú ɔ. ?Yɛ e li? ?E si sa nga bé wá jú e ɲrun lɔ’n be kwlaa? Cɛcɛ. E siman cɛn trele nga Zoova súnmɛn i Wa’n kɛ ɔ wa nunnun mɛn tɛ nga’n. ?Sɛ e si i’n, e bowɛ é sé kɛ e ɲin tran su? Zezi waan mɛn nga i nunnunlɛ blɛ’n fú sran’m be nun. Ɔ maan ɔ fata kɛ e ɲin tran su.—An kanngan Matie 24:43 nun.
5, 6. (a) ?Wafa sɛ yɛ Ɲanmiɛn Sielɛ’n i su like mɔ e si i’n, ɔ uka e naan e ɲin w’a tran su ɔ? (b) ?Ngue ti yɛ ɔ fata kɛ Satan i su like nga e si i’n, ɔ yo naan e fua kpa kɛ e ɲin trán su ɔ?
5 Zezi sili e ɲrun lɔ aklunjuɛ sa sunman. I sɔ ninnge liɛ mun’n i blɛ su sran kpanngban b’a siman be. Ninnge nga e si be’n be juman Zezi liɛ nun kaan sa. Sanngɛ ɔ kannin Ɲanmiɛn Sielɛ’n, ɔ nin ninnge nga Sielɛ sɔ’n wá yó’n i su ndɛ kpanngban kleli e. Maan ɔ yo e suklu lɔ o, annzɛ e junman su lɔ o, annzɛ kusu e jasin fɛ’n bolɛ lika’n nun o, sran sunman be siman ninnge ɲɛnmɛn sɔ mun. Like nga ti yɛ ɔ fata kɛ e ɲin tran su’n i kun ekun yɛ ɔ o lɛ ɔ. Kɛ Zezi sa’n, ɔ fata kɛ e ɲin tran su tititi naan blɛ kwlaa nga e ɲan Ɲanmiɛn Sielɛ’n i su ndɛ nga e si i’n i kanlɛ wun atin’n y’a kan. I sɔ blɛ liɛ’n, be ɲɛnmɛn i. Ɔ maan ɔ fataman kɛ e yaci i lɛ naan ɔ sin. Ɔ ti wie nin nguan ndɛ!—1 Tim. 4:16.
6 Zezi sili like uflɛ ekun. Like sɔ’n ukɛli i naan i ɲin w’a tran su titi. Ɔ sili kɛ Satan fuali kpa kɛ ɔ́ sɛ́ i nían, yɛ ɔ́ klé i yalɛ kpɛkun ɔ́ yó naan ɔ yaci Ɲanmiɛn sulɛ. Zezi i kpɔfuɛ klunwifuɛ sɔ’n w’a yaciman “blɛ uflɛ” ng’ɔ kwla sɛ i ekun nian’n i kunndɛlɛ. (Lik 4:13) Zezi kusu i ɲin trannin su titi. Ɔ kunndɛli kɛ sa kwlaa nga Satan fá síe i ɲrun’n, maan ɔ yo i sa nianlɛ o, i ɲrun tanndanlɛ o, annzɛ i yalɛ klelɛ o, nán i wie fi sa fu i nun. Sa ng’ɔ tɔli Zezi su’n, i kunngba’n yɛ ɔ o e su andɛ ɔ. E si kɛ Satan te yo “kɛ asɔmɔli b’ɔ wlan-wlan ɔ kpan kunndɛ nnɛn’n sa.” I ti’n, Ɲanmiɛn Ndɛ’n wla Klistfuɛ’m be kwlaa be fanngan kɛ: “An sasa amun wun, an nian-nian!” (1 Piɛ. 5:8) ?Wafa sɛ yɛ e kwla yo i sɔ ɔ?
WAFA NGA ƝANMIƐN SRƐLƐ’N UKA E NAAN E ƝIN W’A TRAN SU’N
7, 8. ?Ɲanmiɛn srɛlɛ’n i su afɔtuɛ benin yɛ Zezi mannin ɔn? ?Yɛ ngue yɛ wafa ng’ɔ srɛli Ɲanmiɛn’n ɔ kle e ɔ?
7 Biblu’n kle e kɛ ɔ fata kɛ Ɲanmiɛn srɛlɛ’n yo e cinnjin kpa naan e ɲin w’a kwla tran su, naan kusu y’a manman like fi atin naan w’a saci e nin Ɲanmiɛn e afiɛn. (Kol. 4:2; 1 Piɛ. 4:7) Kɛ Zezi seli i sɔnnzɔnfuɛ’m be kɛ be nin i tran minndɛ’n, w’a cɛman yɛ ɔ seli be ekun kɛ: “Maan amun nyin tran su, yɛ amun srɛ Nyanmiɛn naan Lakafuɛ’n w’a laka-man amun.” (Mat. 26:41) ?Afɛ m’ɔ o be su blɛ sɔ’n nun’n i ngunmin ti yɛ ɔ seli be kɛ be srɛ Ɲanmiɛn ɔn? Cɛcɛ, ɔ fata kɛ be nian afɔtuɛ sɔ’n su cɛn kwlakwla be nanti.
8 Zezi i ajalɛ’n kle kɛ Ɲanmiɛn srɛlɛ’n ti cinnjin kpa. Atrɛkpa’n, amun wla nin a fiman su kɛ cɛn kun’n, ɔ srɛli i Si kɔnguɛ lele aliɛ fa cɛnnin i. (An kanngan Lik 6:12, 13 nun.) Maan e bu i akunndan e nian: Zezi o klɔ nga be flɛ i Kapɛrnaɔmu’n i wun koko lɛ. Kɛ sɛnzɛ’n tɔli’n, ɔ fuli oka nga be mantan Galile jenvie’n be nun kun su. Ɔ mɛnnin i ɲin su niannin lika’n. Atrɛkpa’n, ɔ wunnin kannin mɔ b’a sɔsɔ be nuan Kapɛrnaɔmu nin klɔ kanngan nga be mantan lɛ’n be su lɔ’n. Sanngɛ kɛ Zezi boli Ɲanmiɛn srɛlɛ bo’n, w’a fɛmɛn i ɲin w’a sieman like uflɛ su kun. Ɔ o su lele nn lika’n kɔ́ i ɲrun. Kɛ kannin’m bé núannúan kunngunngun mɔ anglo ba’n kó tɔ́’n, ɔ nin kɛ blo nnɛn’m bé dídí’n, w’a fɛmɛn i ɲin w’a siemɛn i wie fi su. E kwla se kɛ ajalɛ cinnjin kpa kun m’ɔ́ wá fá’n i su Ɲanmiɛn yɛ ɔ srɛli ɔ. Ɔ su wa kpa sran 12 naan be yo i akoto. Nanwlɛ, e kwla wun wafa nga Zezi srɛli i Si tankaan kpa’n, ɔ nin wafa ng’ɔ kɛnnin i sɔnnzɔnfuɛ’m be tinuntinun be ndɛ weinwein kleli i’n, ɔ nin ngwlɛlɛ afɛ m’ɔ usɛli i’n.
9. ?Ngue yɛ srɛlɛ mɔ Zezi srɛli Ɲanmiɛn kɔnguɛ wunmuan kun’n, ɔ kle e ɔ?
9 ?Zezi i ajalɛ’n kle e kɛ ɔ fata kɛ e srɛ Ɲanmiɛn cɛ kpa lelele? Cɛcɛ. Afin ɔ kɛnnin i sɔnnzɔnfuɛ’m be ndɛ seli kɛ: “Amun anwlɛn’n wo su kɛ amún yó, sanngɛ an lɛ-mɛn i wun fanngan.” (Mat. 26:41) Kannzɛ ɔ ti sɔ’n, sanngɛ e yo kɛ Zezi sa ɔ, ɔ yo ye. I wie yɛle kɛ, ka naan y’a fa ajalɛ wie m’ɔ kan e nin e awlobofuɛ mun annzɛ e niaan Klistfuɛ mun e Ɲanmiɛn sulafilɛ nin e seiin nantilɛ’n, ɔ fata kɛ e usa e Si m’ɔ o ɲanmiɛn lɔ’n i ngwlɛlɛ afɛ. ?E srɛ e niaan Klistfuɛ’m be ti wie? ?E klun ndɛ yɛ e kan kle Ɲanmiɛn ɔn? ?Annzɛ Ɲanmiɛn srɛlɛ fluwa wie nun yɛ e nian e srɛ i ɔ? Maan amun sie i nzɔliɛ ekun kɛ, Zezi kloli kɛ i ngunmin trán naan ɔ́ kɛ́n i klun ndɛ klé i Si. Andɛ mɛn mɔ w’a kete e su yɛ mɔ e wunman e wun kpɔciwlɛ yɛ nun’n, ɔ cɛman naan e wla w’a fi ninnge nga be ti cinnjin’n, be yolɛ. Ɔ maan sɛ e fa blɛ lɔun e tran e ngunmin e srɛ Zoova tankaan kpa’n, e ɲin trán su kpa. (Mat. 6:6, 7) Asa ekun’n, e nin Zoova e afiɛn mántan kpa trá laa. Yɛ e su kloman kaan sa kɛ é yó like ng’ɔ kwla saci e nin i e afiɛn’n.—Jue. 25:14.
WAFA NGA E ƝIN KWLA TRAN SU JASIN FƐ’N I BOLƐ’N NUN’N
10. ?Wafa nga Zezi i ɲin trannin su naan w’a kwla bo jasin fɛ’n blɛ kwlaa nun’n, sa benin yɛ e kwla fa yiyi nun ɔn?
10 Kɛ Zezi dí junman nga Zoova fa mɛnnin i’n, i ɲin trannin su. Junman wie o lɛ’n sɛ sran’n dí naan ɔ bu like uflɛ akunndan’n, ɔ timan kekle. Sanngɛ wie kusu o lɛ’n, kɛ sran’n dí’n, ɔ fataman kɛ i ɲin tran like uflɛ su kaan sa. I wie yɛle jasin fɛ’n bolɛ junman nga Klistfuɛ’m be di’n. Kɛ Zezi dí i junman’n i ɲin trannin su titi. Blɛ kwlaa nun’n, ɔ kunndɛli wafa ng’ɔ kwla bo jasin fɛ’n kle sran mun’n. Cɛn kun’n, kɛ Zezi nin i sɔnzɔnfuɛ’m be nantili nglɛmun lele mɔ be juli klɔ kun mɔ be flɛ i Sikar’n su’n, i sɔnnzɔnfuɛ’m be ɔli aliɛ tolɛ. Zezi kali klɔ’n i gbo’n su lɛ naan ɔ́ ló wunmiɛn. Sanngɛ i ɲin trannin su. Ɔ maan kɛ Samali bla kun bali nzue salɛ’n, ɔ wunnin kɛ w’a ɲan jasin fɛ’n bolɛ’n i wun atin. Zezi kwla se kɛ ɔ niɛnmɛn i lɔ naan ɔ́ ló i wunmiɛn. Ɔ kwla jran sa wie’m be su se kɛ ɔ nin bla’n be ijɔman. Sanngɛ w’a yoman sɔ. Ɔ fali ijɔlɛ mɛnnin i. Yɛ ɔ boli jasin fɛ’n i kpa liɛ su. I ndɛ’n ukali klɔ’n su sran kpanngban. (Zan 4:4-26, 39-42) E kwla mian e ɲin kpa ekun e nian Zezi i ajalɛ’n su. Yɛle kɛ aliɛ ba kwlaa nun’n, maan e ɲin tran su kpa ekun naan sɛ e ɲan jasin fɛ’n bolɛ’n i wun atin’n y’a kwla bo.
11, 12. (a) ?Ngue ndɛ yɛ Zezi kan kleli sran nga be waan bé yó naan i ɲin kpa i junman su’n mun ɔn? (b) ?Wafa sɛ yɛ Zezi kleli kɛ, kannzɛ i junman’n ti i cinnjin’n sanngɛ ɔ kwla yo like uflɛ ɔ?
11 Blɛ wie nun’n, sran mɔ be buman Zezi i wun akunndan tɛ’n be kunndɛli kɛ bé yó naan i ɲin kpa i junman’n su. Kapɛrnaɔmu lɔ’n, kɛ Zezi yoli sran’m be juejue’n, ɔ yoli lɔfuɛ’m be fɛ dan ti’n, be waan bé trɛ́ i ase. I yo, e wun i wlɛ. Sanngɛ like nga ti yɛ be sunmannin Zezi’n, yɛle kɛ ɔ bo jasin fɛ’n kle “Izraɛl osu’n nun bua’m bɔ b’a mlin’n,” be kwlaa. Nán klɔ kunngba sufuɛ’m be ngunmin ti yɛ ɔ bali ɔ. (Mat. 15:24) I ti’n, ɔ seli be kɛ: “Nyanmiɛn sielɛ’n i ndɛ kanlɛ klɔ uflɛ wie’m be su’n ɔ ti n cinnjin, i sɔ’n ti yɛ Nyanmiɛn sunmannin min-ɔn.” (Lik 4:40-44) Ɔ maan Zezi i ɲin trannin i junman’n su kpa. W’a kplinman su kɛ like kun sa yo naan i ɲin kpa su.
12 ?Zezi i ɲin trannin i junman’n su lele ti maan w’a kpɔcimɛn i wun kaan sa w’a yoman like uflɛ? ?I junman’n ti’n i ɲin kpali ninnge nga be mian sran mun’n, be su? Cɛcɛ. Zezi yoli ninnge mun sɛsɛ su. Ɔ yiyili i ɲin su, ɔ nin i janvuɛ’m be dili fɛ. Awlobo’m be ndɛ loli i kpa. Sa ng’ɔ o be su’n, ɔ wunnin be wlɛ, yɛ ɔ kloli ba kanngan mun.—An kanngan Mark 10:13-16 nun.
13. ?Jasin fɛ’n bolɛ nun’n, wafa sɛ yɛ e ɲin kwla tran su yɛ e yo ninnge mun sɛsɛ su kɛ Zezi sa ɔ?
13 ?Kɛ é mían e ɲin naan e ɲin w’a tran su kɛ Zezi sa’n, wafa sɛ yɛ e kwla yo ninnge mun sɛsɛ su kɛ i sa ɔ? E su yaciman mɛn nun sran’m be nun naan be yo naan e ɲin kpa e junman’n su. E osufuɛ annzɛ e janvuɛ wie mɔ be sunnzunman e nin like tɛ’n, be kwla se e kɛ e go e junman’n nun. Annzɛ e yo ninnge nga be bɔbɔ be bu i kɛ be ti kpa’n. Sanngɛ sɛ e fa Zezi i ajalɛ’n su’n, Ɲanmiɛn junman’n yó e ɲrun kɛ aliɛ sa. (Zan 4:34) Jasin fɛ’n bolɛ’n man e aklunjuɛ yɛ ɔ yo maan e nin Zoova e afiɛn mantan. Sanngɛ, e su seman kɛ i su yɛ é ká sa trilili ɔ. E kunndɛman kɛ é yó sɔ fá klé kɛ e ngunmin yɛ e ti sran kpa ɔ. Kɛ Zezi sa’n, e kunndɛ kɛ é dí aklunjuɛ naan ngwlɛlɛ su é sú Ɲanmiɛn m’ɔ ‘di aklunjuɛ’n.’—Jue. 104:31.
WAFA NGA BLƐ KEKLE NUN’N E ƝIN KWLA TRAN SU’N
14. ?Kɛ kekle’n o e su’n, ngue yɛ ɔ fataman kɛ e yo ɔ? ?Ngue ti ɔ?
14 I nun mɔ kekle o Zezi i su’n yɛ ɔ mɛnnin i sɔnnzɔnfuɛ’m be afɔtuɛ m’ɔ fataman kɛ be jranjran i su falɛ’n wun’n be nun wie mun ɔn. (An kanngan Mark 14:37 nun.) Kekle blɛ nun bɔbɔ yɛ ɔ fata kɛ e ɲin kpɛn wafa nga Zezi nantili’n su kpa’n niɔn. Sran wie mun’n, kɛ kekle’n o be su’n, be wla fi ndɛ nanwlɛ cinnjin kpa kun su. Ndɛ sɔ’n i cinnjin dan m’ɔ ti ti’n Nyanndra fluwa’n kɛnnin kpɛ nɲɔn. I waan: “Atin wie o lɛ, a wun i-ɔ ɔ waan ɔ ti kpa, sanngɛ i agualiɛ’n yɛlɛ wie.” (Nya. 14:12; 16:25) Sɛ e bɔbɔ e akunndan’n su yɛ e lafi’n, i li sɛ blɛ nga kekle’n o e su’n i nun yɛ e yo sɔ’n, ɔ cɛman naan y’a yo e bɔbɔ nin be nga e klo be’n be tɛ.
15. ?Siɛ kun mɔ i awlobofuɛ’m be lika nianlɛ’n ti kekle mɛn i’n, aya benin nun yɛ ɔ kwla tɔ ɔ?
15 Wie liɛ’n, kɛ ɔ ko yo naan awlobo kpɛn kun w’a niɛn “i fuɛ’m” be lika’n, ɔ kwla yo kekle mɛn i. (1 Tim. 5:8) I ti’n, junman wie m’ɔ kwlá mɛnmɛn i atin naan w’a ɔ asɔnun aɲia’m be bo titi’n, annzɛ w’a bo jasin fɛ’n, annzɛ kusu ɔ nin i awlobofuɛ’m b’a su Ɲanmiɛn awlo lɔ’n, ɔ kwla yo i kɛ ɔ di sa. Sɛ ɔ bu klɔ sran akunndan’n, ɔ kwla se kɛ sɛ ɔ di i sɔ junman’n ɔ timan tɛ. Sanngɛ sɛ ɔ yo i sɔ’n, Zoova i sulɛ nun’n ɔ kwla kpɔnzɔ annzɛ ɔ kaci i sin si i mlɔnmlɔn. Ɔ maan like ng’ɔ nin i fata kɛ ɔ yo’n yɛle ndɛ nga Salomɔn kɛnnin i Nyanndra Mun 3:5, 6 nun’n i su falɛ’n. Ɔ seli kɛ: “Nán lafi ɔ bɔbɔ wɔ akunndan liɛ’n su. Anannganman i su yɛ lafi-ɔ. Sɛ á fín ase o á jáo o, Anannganman i dunman, yɛ bo-ɔ. Sɛ a bo i dunman’n, ɔ́ bó ɔ nyrun atin’n.”
16. (a) ?Ngue like yɛ Zoova i ngwlɛlɛ’n mɔ Zezi lafili su’n, ɔ kle e ɔ? (b) ?Wafa sɛ yɛ blɛ kekle nun’n, awlobo kpɛn kpanngban be lafi Zoova su kɛ Zezi fa yoli’n sa ɔ?
16 Kɛ kekle tɔli Zezi su’n, w’a seman kɛ ɔ́ láfi i bɔbɔ i akunndan liɛ’n su. Amun bɔbɔ amun nian! Sran mɔ i ngwlɛlɛ liɛ’n tra sran’m be kwlaa nga be trannin asiɛ nga su’n be liɛ’n, w’a seman kɛ ɔ́ láfi i bɔbɔ i akunndan liɛ’n su. I wie yɛle kɛ, kɛ Satan suali Zezi i aya’n, mɔ Zezi tɛ́ i su’n ɔ seli i titi kɛ: “Be klɛli i kɛ.” (Mat. 4:4, 7, 10) I Si i ngwlɛlɛ liɛ’n yɛ ɔ fa kplili i ti ɔ. I lɛ nun’n, like kun mɔ Satan kwlɛmɛn i yo’n m’ɔ kpɔ i kpa bɔbɔ’n, yɛ Zezi yoli ɔ. Like sɔ’n yɛle Zezi i wun ase m’ɔ kannin’n. ?E yo kɛ Zezi sa? Awlobo kpɛn nga i ɲin tran su kɛ Zezi sa’n, ɔ yaci Ɲanmiɛn Ndɛ’n nun naan ɔ bo i ɲrun atin. I li kɛ kekle o i su’n yɛ ɔ yo i sɔ kpa’n niɔn. Mɛn wunmuan’n nun’n, i sɔ yɛ awlobo kpɛn kpanngban kpa be yo ɔ. Ɲanmiɛn Sielɛ’n ɔ nin Ɲanmiɛn sulɛ’n yɛ be fa sie like kwlaa ɲrun ɔn. Be fa sie i be sa ti like kunndɛlɛ’n ɲrun bɔbɔ. Be awlobofuɛ’m be lika nianlɛ’n i kpafuɛ’n yɛle ngalɛ’n. Be ɲin nga be mian naan b’a nian be awlobofuɛ’m be lika’n, Zoova yra su kɛ nga i Ndɛ’n fa kan’n sa.—Mat. 6:33.
17. ?Ngue ti yɛ amun kunndɛ kɛ amun ɲin trán su kɛ Zezi sa ɔ?
17 Nanwlɛ, wafa nga Zezi i ɲin trannin su’n ɔ leman wunsu. I ajalɛ’n kwla uka amun yɛ ɔ kwla de amun nguan bɔbɔ. Nán amun wla fi su kɛ Satan kunndɛ kɛ Ɲanmiɛn i sulɛ nun’n an lafi. I waan ɔ́ yó naan amun Ɲanmiɛn sulafilɛ’n ɔ kan ase naan an yaci Zoova i sulɛ. (1 Tɛs. 5:6) Nán an mɛn i atin! Maan amun ɲin tran su kɛ Zezi sa. Maan amun fa blɛ tu amun klun srɛ Ɲanmiɛn. Maan amun ɲin tran su jasin fɛ’n i bolɛ’n nun. Yɛ kɛ kekle o amun su’n, maan amun fa amun wla gua Zoova su. Sɛ amun yo sɔ’n, mɛn tɛ nga i awieliɛ blɛ nga nun bɔbɔ’n, amún ɲán ye yɛ amún dí aklunjuɛ. Sɛ amun ɲin tran su’n, kɛ Zezi bá mɛn nga i nunnunlɛ’n, ɔ́ wún kɛ amun sa o junman’n su, naan amun yo i Si klun sa’n. Nanwlɛ, Zoova fá amun seiin mɔ amun nantili’n i nuan like mán amun aklunjuɛ su!—Ngl. 16:15.
[Foto, bue 16]
Zezi boli jasin fɛ’n kleli bla’n gbo’n su lɛ. ?Amun kunndɛ jasin fɛ’n bolɛ’n i wun atin cɛn kwlaa?
[Foto, bue 17]
Kɛ amun uka amun awlobofuɛ mun naan be nin Ɲanmiɛn be afiɛn w’a sɛ kpa ekun’n, ɔ kle kɛ amun ɲin o su.