?Ngue ti yɛ srɛlɛ’n i tiefuɛ’n yaci sran mun lɛ mɔ be wun ɲrɛnnɛn ɔn?
KANNZƐ bɔbɔ sran wie’m be srɛ Ɲanmiɛn’n, sanngɛ be lafiman su kpa kɛ ɔ o lɛ. ?Ngue ti ɔ? Atrɛkpa’n ɲrɛnnɛn m’ɔ o mɛn’n nun ngboko’n i ti ɔ. ?Amun a usa amun wun le kɛ ngue ti yɛ Ɲanmiɛn yaci sran’m be lɛ maan be wun ɲrɛnnɛn ɔn?
Fɔ o sran’m be nun yɛ be wun ɲrɛnnɛn. ?Ɲanmiɛn yɛ ɔ yili be sɔ ɔ? Sɛ Ɲanmiɛn yɛ ɔ kunndɛli kɛ sran’m be fɛ’n, ɔ́ yó kekle mán sran’m be kɛ be ɲin yi i. Maan e nian: ?Sɛ amun wun loto uflɛuflɛ kun’n, naan amun wun kɛ i bue kun ti wodowa’n, amún sé kɛ loto’n i yifuɛ’n yɛ ɔ yili i sɔ ɔ? Amun su seman sɔ mlɔnmlɔn! Amun kwla se kɛ loto’n i yifuɛ’n yili i kpa naan sran uflɛ annzɛ like uflɛ yɛ ɔ sacili i ɔ.
?I kunngba’n, kɛ e nian asiɛ’n su ninnge mun mɔ be yo ɲɛnmɛn’n mɔ be ti siesiewa sɛsɛsɛ’n, mɔ e wun wafa nga klɔ sran’m b’a saci’n, é sé kɛ Ɲanmiɛn yɛ ɔ yili be sɔ ɔ? Biblu’n se kɛ, kɛ Ɲanmiɛn yí Adam nin Ɛvu’n fɔ nunman be nun, naan be bɔbɔ yɛ be yoli maan be wa sacili ɔ. (Mmla’n 32:4, 5) Jasin fɛ’n yɛle kɛ Ɲanmiɛn seli kɛ ɔ́ wá síesíe ninnge’m be ye. Yɛle kɛ ɔ́ yó naan fɔ’n tu klɔ sran aɲinyiɛfuɛ’m be nun. ?Sanngɛ ngue ti yɛ w’a minndɛ lele sɔ ɔ?
?Ngue ti yɛ w’a minndɛ lele sɔ ɔ?
Sran ng’ɔ fata kɛ ɔ sie klɔ sran mun’n i su akplowa ng’ɔ tɔli’n ti ɔ. Zoova w’a sunnzunman le kɛ klɔ sran’m be bɔbɔ be sie be wun. I yɛ ɔ ti m’ɔ yo be Siefuɛ ɔ. Biblu’n bɔbɔ se kɛ: “Sran’n i nguan’n nun-mɛn i sa nun. Ajalɛ ng’ɔ tu’n ɔ fin-mɛn i.” (Zeremi 10:23) Ng’ɔ ti tɛ’n yɛle kɛ sran klikli’m b’a kunndɛman kɛ Ɲanmiɛn sie be. Ɲanmiɛn i mmla mɔ be tɔnnin’n ti’n be kacili sa tɛ yofuɛ. (1 Zan 3:4) I sɔ’n ti’n, fɔ wa trannin be nun, yɛ be yoli be bɔbɔ nin be mma’m be tɛ.
Zoova mannin sran’m be atin kɛ be sie be wun i afuɛ akpi kpanngban yɛ e o nun yɛ. Sanngɛ laa lele nin andɛ’n ninnge nga e wun be’n be kle kɛ klɔ sran’m be kwlá sieman be bɔbɔ be wun. Awa’m be kwlaa be fa afɛ yi i sran’m be su. Be wie fi w’a kwlá nunnunman alɛ’n, annzɛ sa tɛtɛ yolɛ’n, annzɛ sran lufle bulɛ’n annzɛ kusu tukpacɛ’n.
?Wafa sɛ yɛ Ɲanmiɛn síesíe lika’n i ye ɔ?
Biblu’n waan ɔ ka kaan sa’n Ɲanmiɛn wá mán e mɛn uflɛ kpa kun. (2 Piɛr 3:13) Saan be nga be klunklo su’n be fa ajalɛ kɛ bé kló Ɲanmiɛn nin sran’n, be yɛ ɔ́ mán be atin kɛ be tran lɔ ɔ.—Mmla’n 30:15, 16, 19, 20.
Biblu’n se ekun kɛ “cɛn nga bé bú sran nga be sro-man Nyanmiɛn’n be fɔ” mɔ w’a wie ju yɛ’n nun’n, Ɲanmiɛn núnnún ɲrɛnnɛn’n ɔ nin be nga be kpɛ i ba’n. (2 Piɛr 3:7) I sin’n, Zezi Klist mɔ i yɛ Ɲanmiɛn kpɛli i kɛ ɔ yo Siefuɛ’n, ɔ́ síe klɔ sran aɲinyiɛfuɛ mun. (Daniɛl 7:13, 14) ?Zezi i sran sielɛ blɛ nun’n, ngue yɛ ɔ́ yó ɔ? Biblu’n waan: “Yalɛfuɛ mun [yɛle kɛ wun ase kanfuɛ mun] yɛ mɛn’n ɔ́ wá yó be liɛ ɔ. Be wun jɔ́ be kpa fɔuun!”—Jue Mun 37:11.
Zezi m’ɔ ti Famiɛn ɲanmiɛn su lɔ’n, ɔ́ wá núnnún ninnge tɛtɛ kwlaa. Be nun wie yɛle tukpacɛ’n nin kpɛnngbɛn yolɛ’n ɔ nin wie’n. Kɛ sran’m be yoli ɲin kekle Zoova mɔ i wun lɔ yɛ “nguan’n i bo’n” ɔ fin’n i su’n, yɛ sa sɔ’m be tɔli klɔ sran’m be su ɔ. (Jue Mun 36:10) Zezi wá yó be kwlaa nga be kplin su kɛ ɔ sie be’n be juejue. I sielɛ’n i bo’n, Biblu’n nun ndɛ nga’m be kpɛn su. Yɛle kɛ:
◼ “[Sran] wie fi su se-man kɛ: ‘N kpinndinman.’”—Ezai 33:24.
◼ “[Nyanmiɛn] núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.”—Sa Nglo Yilɛ 21:4.
?Kɛ e si kɛ ɔ ka kaan sa Ɲanmiɛn wá yó naan ɲrɛnnɛn kwlaa wie’n, i sɔ’n fɔnvɔman e dan? Kannzɛ ka naan blɛ sɔ’n w’a ju’n ɔ yaci sran’m be lɛ maan be fɛ’n, ɔ fataman kɛ i sɔ’n ti’n e se kɛ ɔ tieman e srɛlɛ’n.
Ɲanmiɛn o lɛ sakpa. Ɔ kwla tie amun srɛlɛ’n ɔ nin fɛfɛlɛ bɔbɔ nga amun fɛfɛ’n. Yɛ ɔ klo kpa kɛ ɔ́ yó naan blɛ nga amún láfi su kpa kɛ ɔ o lɛ naan ɔ tie amun srɛlɛ’n, mɔ kusu afɛ su tranman amun su kun’n, ɔ ju.