?Amun kwla lafi abonuan sa nga be kan be ndɛ Biblu’n nun’n be su?

?SƐ SRAN kun kan ndɛ wie m’ɔ ti abonuan’n kle amun’n, ngue su yɛ amún jrán naan amun a lafi su ɔ? ?Nán i sran wafa ng’ɔ ti’n, yɛle kɛ sɛ ɔ ti nanwlɛfuɛ o annzɛ ɔ timan nanwlɛfuɛ o, ɔ nin wafa ng’ɔ kannin ndɛ’n kleli amun’n yɛ amún nían ɔn? Sɛ ɔ dili amun nanwlɛ titi naan kusu’n i ɲinfu ɔ nin a buaman ato nin a kleman amun le’n, amún kwlá láfi ndɛ sɔ’n m’ɔ wa kannin’n su.

I kunngba’n yɛle abonuan sa nga be kan be ndɛ Biblu’n nun’n. Kɛ sa sɔ’m bé jú’n, e nun wie fi nunman lɛ. Sanngɛ sɛ ndɛ nga Biblu’n kan’n ɔ ti nanwlɛ annzɛ ɔ ti ato o, e bɔbɔ e kwla wun i wlɛ. ?Wafa sɛ? Maan e nian ninnge nga be kle kɛ abonuan sa nga Biblu’n kan be ndɛ’n be juli sakpa’n be nun wie mun.

Be yoli abonuan sa sunman sran mɔ b’a yia kukuku’n be ɲrun. Kpɛ sunman’n be yoli be sran kpanngban kpa be ɲrun. Wie liɛ’n be ju akpinngbin bɔbɔ. (Ezipt Lɔ Tulɛ 14:21-31; 19:16-19) B’a yoman sa sɔ’m be nvialiɛ nun.

Abonuan sa’m be yolɛ’n yoli sa blɛlɛlɛ. Be yolɛ’n nun’n, b’a siesieman ninnge wie mun lika’n nun yɛ b’a kpajakpajaman kannin wie mun piaapiaa. Kpalɛ sunman’n, abonuan sa nga be yoli be Biblu’n nun’n be ti kɛ flɛlɛ nin srolɛ yɛ be yiali nun sa ɔ, yɛ sran mun yɛ be srɛli kɛ be yo i sɔ fa uka be ɔ. (Mark 5:25-29; Lik 7:1-16) Ɔ maan sran ng’ɔ yo abonuan sa’n w’a siesieman ninnge mun ka.

Be nga be yoli abonuan sa mun’n, nán dunman annzɛ ɲrun annzɛ kusu aɲanbeun like ɲanlɛ ti yɛ be yoli be ɔ. Sanngɛ be yoli be naan Ɲanmiɛn ɲan ɲrun. (Zan 11:1-4, 15, 40) Biblu’n nun’n, be kwlaa nga be kunndɛli kɛ bé yó abonuan sa naan bé fá ɲán be wun’n, be buli be fɔ.​—2 Famiɛn Mun 5:15, 16, 20, 25-27; Sa Nga Be Yoli’n 8:18-23.

Abonuan sa nga be kan be ndɛ Biblu’n nun’n, be ti fanunfanun dan ti’n, e kwlá seman kɛ be fin klɔ sran. I wie yɛle kɛ jenvie’n jrannin diin yɛ aunmuan’n kannin ase, nzue kacili nzan, nzue’n jrannin yɛ ɔ tɔli, tukpacifuɛ’m be yoli juejue, yɛ aɲinsifuɛ’n be wunnin ase. Abonuan sa kwlaa sɔ mun nin uflɛ wie mun ekun be kle kɛ sran kun mɔ i tinmin liɛ’n tra klɔ sran liɛ’n lele’n, m’ɔ le kwlalɛ ninnge wafa kwlaa su’n yɛ maan be juli ɔ.​—1 Famiɛn Mun 17:1-7; 18:41-45; Matie 8:24-27; Lik 17:11-19; Zan 2:1-11; 9:1-7.

Be nga be yoli abonuan sa mun’n be kpɔfuɛ nga be wunnin sa sɔ mun’n b’a siman be akplowa. Kɛ Zezi cɛnnin i janvuɛ Lazali’n, i ɲrun tanndanfuɛ’m b’a seman kɛ Lazali w’a wuman. ?Ɔ́ yó sɛ́ naan b’a kwla se sɔ bɔbɔ? Afin be sieli Lazali ɔ dili cɛn ba nnan ndia’n nun. (Zan 11:45-48; 12:9-11) Kɛ Zezi wuli m’ɔ dili afuɛ ya kpanngban bɔbɔ’n, Zuifu’m be Ɲanmiɛn sulɛ fluwa nga be flɛ i Talmudu’n i klɛfuɛ’m be kɛnnin i titi kɛ Zezi le tinmin m’ɔ fa yo abonuan sa mun ɔn. Like nga be sili i akplowa’n yɛle Zezi i tinmin’n i finwlɛ’n. I wafa kunngba’n, kɛ be fali Zezi i sɔnnzɔnfuɛ mun ɔli Zuifu’m be jɔlɛ difuɛ’m be ja su’n, b’a usaman be kɛ: “?Amun yoli abonuan sa sakpa?” Sanngɛ be usali be kɛ: “?Ɔ yo sɛ yɛ an kwla yo sa nga-a? ?Yɛ wan dunman nun yɛ an yoli-ɔ?”​—Sa Nga Be Yoli’n 4:1-13.

?Ɔ maan abonuan sa’m be su ndɛ nga Biblu’n kan kle e’n, amun kwla lafi su? Ndɛ nga e wunnin be lɛ’n be kle weiin kɛ abonuan sa nga be kannin be ndɛ Biblu’n nun’n, be juli sakpasakpa. Ninnge uflɛ wie’m be ti’n, e kwla lafi ndɛ sɔ’m be su. Be nun wie yɛle kɛ, blɛ sunman nun’n, kɛ Biblu’n kán sa kun ndɛ’n, ɔ kle blɛ nin lika nga sa sɔ’n juli’n yɛ ɔ bo sran’m be dunman wie. Biblu’n i wun sacifuɛ mun bɔbɔ’n, kɛ be wunnin kɛ laa sa’m be su ndɛ tɛkɛtɛkɛ kwlaa nga Biblu’n kan’n be ti nanwlɛ’n, be nuan boli be wun. Biblu’n nun kasiɛ ya kpanngban be kpɛnnin su. Kasiɛ sɔ’m be su ndɛ kanngan kwlaa kpɛnnin su bɔbɔ. Asa’n, wafa nga sran’m be nin be wiengu’m be kwla tran fɛfɛfɛ’n, Biblu’n man i su afɔtuɛ kpanngban. I sɔ afɔtuɛ’m be ukali sran wafawafa kpanngban. Kɛ ɔ fɛ i laa lele’n m’ɔ́ fá jú andɛ’n, afɔtuɛ nga Biblu’n mɛn i sran nin sran be tranlɛ’n su’n, afɔtuɛ uflɛ fi tomɛn i.

Atrɛkpa’n, amun nin a lafiman Biblu’n i nun ndɛ’m be su kpa. ?Sɛ ɔ ti sɔ niɔn, amun faman blɛ be boman be ɲin ase be suɛnmɛn i nun ndɛ’n kpa? Sɛ amun si i nun ndɛ’n i kpa ekun’n, amún láfi i su trá laa’n. (Zan 17:17) Amún wún kɛ amun kwla lafi abonuan sa nga be juli laa’n be su ndɛ m’ɔ kan’n su. Kɛ amun ko lafi ndɛ sɔ’m be su’n, amún wún kɛ amun kwla lafi su kɛ sa nga Biblu’n waan bé jú e ɲrun lɔ’n, bé jú sakpa.

[Foto, bue 5]

Zezi i ɲrun tanndanfuɛ’m b’a siman Lazali i wie’n i akplowa.