Maan e suan Ɲanmiɛn Ndɛ’n nun like
?Ɲanmiɛn wá fá sran kun kɛ ɔ yo mɛn wunmuan’n i su famiɛn?
Ndɛ nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle amun bɔbɔ amun Biblu’n i lika nga amun kwla kanngan nun naan amun a wun be su tɛlɛ’n. Zoova i Lalofuɛ’m be klo kɛ be nin amun kókó ndɛ sɔ’m be su yalɛ.
1. ?Ngue ti yɛ ɔ ti cinnjin kɛ famiɛn kunngba yɛ ɔ sie mɛn wunmuan’n niɔn?
Blɛ sunman nun’n, sa ng’ɔ o mɛn’n i lika kun nun’n, i kunngba’n yɛ ɔ o mɛn’n i lika uflɛ nun ɔn. I wie yɛle kɛ mɛn’n i bue kpanngban nun’n, yalɛ’n di sran’m be sunman lika. Yɛ mianlɛ sa kplɔlɔlɔ yɛ sran’m be mianmian be ɔ. Sanngɛ mɛn’n i lika kpanngban uflɛ’m be nun’n, sran’m be sa nun yo fɛ lele tratra su. I lɛ’n kle kɛ sɛ famiɛn kunngba yɛ ɔ sie mɛn wunmuan’n, ɔ́ yó maan sran kun ɲán like kan fá tí i wun ɲanman nun.—An kanngan Akunndanfuɛ’n 4:1 ɔ nin 8:9 nun.
2. ?Wan yɛ ɔ kwla sie mɛn wunmuan’n i kpa ɔ?
Sran’m be sunman lika be kunndɛman kɛ famiɛn kunngba ɔ sie mɛn’n. Afin ɔ leman klɔ sran kun sa m’ɔ kwla sie asiɛ wunmuan’n i kpa ɔ. Asa’n, sɛ be se sran’m be kɛ be fa be nun kun naan ɔ sie mɛn wunmuan’n, be kwlaa be nuan su sɛman sran trele kun sa su. Asa ekun’n, sran kwlaa nga ɔ kaci famiɛn’n, kwlalɛ’n saci i. Ɔ maan srɛ kun sran’m be kɛ i sɔ sran sie be.—An kanngan Nyanndra Mun 29:2 ɔ nin Zeremi 10:23 nun.
Ɲanmiɛn Zoova tuli i Wa Zezi kɛ ɔ sie mɛn wunmuan’n. Zoova sieli i kɛ ɔ yo sɔ titi. (Lik 1:32, 33) Afin Zezi si mɛn’n nun wa ndɛ mun. Yɛle kɛ i nun nga ɔ te o wa’n, ɔ yoli tukpacifuɛ’m be juejue, ɔ kannin Ɲanmiɛn ndɛ’n kleli be nga be ti wɛtɛɛfuɛ’n yɛ ɔ fɛli i wun mantannin ba kanngan mun wie. (Mark 1:40-42; 6:34; 10:13-16) I kwlaa sɔ’n ti yɛ Zezi yɛ ɔ kwla si klɔ sran’m be sie’n niɔn.—An kanngan Zan 1:14 nun.
3. ?Famiɛn kunngba kwla sie klɔ sran mun sakpasakpa?
Ɲanmiɛn yɛ ɔ tuli i Wa’n kɛ ɔ sie klɔ sran mun ɔn. I waan ɔ tran ɲanmiɛn su lɔ yo i sɔ. (Daniɛl 7:13, 14) Klɔ kun su famiɛn’n, ɔ tranman nvle nga ɔ sie i’n i su klɔ’m be kwlaa be su. Ɔ tran lika kun. I kunngba’n, ɔ timan cinnjin kɛ Zezi tran asiɛ’n su wa naan klɔ sran’m be wun i ka naan w’a sie be.—An kanngan Matie 8:5-9, 13 nun.
?Sran ngba yɛ ɔ́ kplín su kɛ Zezi sie i ɔ? Cɛcɛ. Be nga be klo sa kpa yolɛ’n be ngunmin yɛ bé kplín su ɔ. I sɔ’n ti’n, be nga be kunndɛman kɛ sran m’ɔ klo sa nuan su sɛsɛsɛ yolɛ’n, mɔ Zoova sieli i Famiɛn bia’n su’n, ɔ sie be wie’n, Zoova wá núnnún be.—An kanngan Jue Mun 37:9-11 nun.
4. ?Ngue yɛ Famiɛn ng’ɔ́ síe mɛn wunmuan’n ɔ́ wá yó ɔ?
Bua tafuɛ’n, ɔ yiayia i bua mun klangla nun. I kunngba’n, Zezi su yiayia mɛn’n nun wɛtɛɛfuɛ mun. Kpɛkun ɔ kle be kɛ Ɲanmiɛn waan be klo be wiengu. (Zan 10:16; 13:34) Sran sɔ mun yɛ be tu be klun be suan Zezi nin i famiɛn dilɛ’n i bo ɔ. (Jue Mun 72:8; Matie 4:19, 20) Ɔ maan asiɛ wunmuan’n su’n, be bo i jɔ kɛ Zezi w’a yo Famiɛn.—An kanngan Matie 24:14 nun.
Ɔ ka kaan sa’n, Zezi m’ɔ lɛ tinmin’n, ɔ́ wá núnnún mɛn nun famiɛn diwlɛ mɔ b’a saci kain kpa’n be kwlaa naan sran’m be ɲan be ti. Ɔ fɛli i sɔnnzɔnfuɛ nanwlɛfuɛ wie mun kɛ be nin i ko di famiɛn ɲanmiɛn su lɔ naan be sie asiɛ’n. (Daniɛl 2:44; 7:27) Zezi i Famiɛn dilɛ’n ti’n, asiɛ’n sufuɛ’m be kwlaa bé sí Zoova lelele. Asa’n, lika klanman ng’ɔ fili klɔ sran’m be sa mɛn’n i bo bolɛ nun’n, Famiɛn Zezi nin i sran’m bé wá yó naan klɔ sran’m be tran lika kɛ ngalɛ’n sa nun ekun.—An kanngan Ezai 11:3, 9 ɔ nin Matie 19:28 nun.
Sɛ amun kunndɛ kɛ amún sí nun ekun’n, an nian fluwa ?Ngue like yɛ Biblu’n kle i sakpasakpa ɔ? i ndɛ tre 8 nun. Zoova i Lalofuɛ mun yɛ be yili ɔ.