Nán like kun sa ti’n e nin Zoova e afiɛn ti nun
“Ndɛkɛn amun kle like nga amun klo kɛ amún sú i’n.”—ZOZ. 24:15.
?AMÚN TƐ́ SU SƐ?
?Ngue yɛ amun kwla yo naan amun junman’n w’a yoman naan amun nin Zoova amun afiɛn w’a ti nun ɔn?
?Ngue yɛ ɔ fata kɛ amun bu i akunndan naan wafa nga amún yíyí amun ɲin su’n, w’a yo amun wun sa ye ɔ?
?Sɛ amun osufuɛ kun kpɔci Zoova’n, ngue yɛ amun kwla yo naan awlabɔɛ’n w’a tinman amun su ɔ?
1-3. (a) ?Ajalɛ falɛ nun’n, ngue ti yɛ e kwla se kɛ Zozie kle e ajalɛ kpa ɔ? (b) ?Kɛ ajalɛ falɛ to e’n, ngue yɛ ɔ fataman kɛ e wla fi su ɔ?
AJALƐ falɛ’n timan ngowa kanlɛ like. Sran ng’ɔ kwla fa ajalɛ’n, ɔ kwla kle like ng’ɔ́ fɛ́ i nguan’n fá yó’n. Maan e se kɛ sran kun w’a fite anngɔnda kun su. ?Atin beninfuɛ’n yɛ ɔ́ fá ɔ? E kwla se kɛ atin ng’ɔ́ fɛ́ i kɔ́ lika ng’ɔ su kɔ’n yɛ ɔ́ fá ɔ. Ɔ su faman ng’ɔ́ fɛ́ i kɔ́ lika uflɛ’n.
2 Biblu’n kan sran kpanngban m’ɔ fatali kɛ be fa ajalɛ cinnjin wie mun’n, be ndɛ. Be nun kun yɛle Kaɛn. Kɛ ɔ fali ya’n sɛ ɔ klo’n, ɔ kwla gua i ya’n i ase annzɛ ɔ jran su yo sa. (Bob. 4:6, 7) Zozie kusu’n, sɛ ɔ́ sú Ɲanmiɛn Kpli o, annzɛ ɔ́ sɔ́ amuɛn o, ɔ fatali kɛ ɔ kle kun. (Zoz. 24:15) Zozie liɛ’n, ɔ kunndɛli kɛ ɔ nin Zoova be afiɛn mantan titi. I ti’n, ajalɛ ng’ɔ ko fa naan b’a kwla yo sɔ’n yɛ ɔ fali ɔ. Sanngɛ Kaɛn liɛ’n, ajalɛ ng’ɔ fali’n yoli maan ɔ nin Zoova be afiɛn tili nun.
3 E kusu, ɔ ju wie’n, e ninnge’m be yolɛ nun’n, sɛ é kwlá sé’n e fite anngɔnda wie su. Yɛle kɛ ɔ nin i fata kɛ e fa ajalɛ kun. Kɛ ɔ ko yo sɔ’n, nán e wla fi like nga e sunnzun kɛ é yó’n su. Yɛle kɛ sa kwlaa nun’n, e klo kɛ é yó naan Zoova ɲan ɲrun yɛ e kunndɛman kaan sa kɛ é yó like kun m’ɔ́ fá e kɔ́ i wun mmua’n. (An kanngan Ebre Mun 3:12 nun.) Like suanlɛ nga nin ng’ɔ́ bɛ́ i sin lɔ’n nun’n, é wá kán ninnge nso mɔ be nun’n, ɔ fataman kɛ e man like kun sa atin naan ɔ yo naan e nin Zoova e afiɛn ti nun’n be ndɛ.
JUNMAN DILƐ
4. ?Ngue ti yɛ ɔ ti cinnjin kɛ e di junman ɔn?
4 Klistfuɛ’m be lemɛn i yowlɛ, ɔ fata kɛ be di junman be fa nian be bɔbɔ nin be fuɛ’m be lika. Biblu’n kle kɛ sran nga i wan niɛnmɛn i fuɛ’m be lika’n, i tɛ liɛ’n tra sran ng’ɔ lafiman Ɲanmiɛn su’n. (2 Tɛs. 3:10; 1 Tim. 5:8) Ɔ maan ɔ ti cinnjin kɛ e di junman. Sanngɛ sɛ y’a nianman e wun’n, junman dilɛ’n i wun ajalɛ nga é fá’n ɔ kwla yo maan e nin Zoova e afiɛn ti nun. ?Wafa sɛ?
5. ?Ngue yɛ ɔ fata kɛ amun dun mmua bu i akunndan kwlaa naan amun a sɔ junman kun nun ɔn?
5 Maan e se kɛ amun su kunndɛ junman. Sɛ kan amun tran lɛ’n junman ɲanlɛ’n ti kekle’n, ɔ kwla yo amun kɛ amun di junman kwlaa nga amun fite su’n. ?Sanngɛ sɛ junman sɔ’n nin Biblu’n nun mmla wie’m be kɔman likawlɛ’n nin? ?Amún yó i sɛ? ?Yɛ sɛ junman dilɛ blɛ’n ɔ nin i wun ajalɛ nga amún tú’n bé yó maan ninnge ng’ɔ fata kɛ Klistfuɛ kun yo’n, ɔ́ yó kekle mán amun nin? ?Annzɛ kusu bé yó maan amun nin amun awlofuɛ’m be su kwlá tran cɛman nin? ?Amún sé kɛ junman tɛ dilɛ flunman tra kɛ be tran lɛ sa ngbɛn ti’n, amún dí i sɔ junman’n? Nán amun wla fi su, sɛ amun fa atin tɛ su’n, amun nin Zoova amun afiɛn tí nun. (Ebr. 2:1) ?Sɛ amun su kunndɛ junman annzɛ amun su nian sɛ ɔ fata kɛ amun kaci junman nga amun di’n, wafa sɛ yɛ amun kwla yo ninnge mun ngwlɛlɛ su ɔ?
6, 7. (a) ?Like nɲɔn benin ti yɛ sran kun kwla kplin su kɛ ɔ́ dí junman ɔn? (b) ?Ninnge sɔ’m be nun onin yɛ sɛ ɔ yo’n, ɔ nin Zoova be afiɛn mántan titi ɔ? ?Ngue ti ɔ?
6 Kɛ nga e dun mmua fa kannin’n sa’n, nán amun wla fi like nga amun sunnzun kɛ amún yó’n su. Amun usa amun kɛ: ‘?Nin yɛ n kunndɛ kɛ junman nga ń dí’n, ɔ fa min wɔ ɔ?’ Sɛ amun bu junman i kɛ ɔ ti like kun m’ɔ́ yó naan amun a kwla nian amun nin amun fuɛ’m be lika naan amun a su Zoova titi’n, Zoova yrá amun su. (Mat. 6:33) Sɛ amun junman’n ka lɛ fi amun sa’n, annzɛ sika ndɛ yo kekle kan amun tran lɛ’n, maan amun si kɛ Zoova kwla uka amun. (Eza. 59:1) Ɔ “kwla de be nga be sro i bɔ sa tɔ be su’n.”—2 Piɛ. 2:9.
7 ?Yɛ sɛ aɲanbeun’n yɛ ɔ ti amun cinnjin’n nin? Atrɛkpa’n amún ɲán amun wun. Sanngɛ maan amun si kɛ ɔ́ fá trɔ kun mɔ amun su kwlɛmɛn i bo suan’n ɔ́ táka amun ti su. (An kanngan 1 Timote 6:9, 10 nun.) Sɛ amun junman’n nin sika yɛ be ti amun cinnjin’n, amun nin Zoova amun afiɛn tí nun.
8, 9. ?Junman nga siɛ nin niɛn’m be di’n i su kosan benin yɛ ɔ fata kɛ be fa usa be wun ɔn? ?Ngue ti ɔ?
8 Sɛ amun le ba’n, wafa nga ajalɛ nga amun fa’n ɔ́ yó be’n, maan amun bu i akunndan. ?Ngue yɛ be sie i nzɔliɛ kɛ ɔ ti amun cinnjin tra like kwlaa ɔ? ?Amun junman’n yɛ, annzɛ Zoova i sulɛ’n yɛ? ?Sɛ be wun kɛ sran dan yolɛ’n annzɛ sika kaka ɲanlɛ’n yɛ ɔ ti amun nnana’n, kɛ bé wá ɲín’n, nán atin tɛ sɔ’n i su wie yɛ bé fá ɔ? ?Be ɲin yí amun ekun kɛ ng’ɔ fata kɛ sran kun ɲin fa yi i si nin i nin’n sa? Aniaan bla talua kaan kun seli kɛ: “Kɛ m boli sa wlɛ wunlɛ bo lele m’ɔ́ fá ju yɛ’n, n sieli i nzɔliɛ kɛ min si i junman’n yɛ ɔ ti i cinnjin tra like kwlaa ɔ. I klikli nun’n, a kwla bu i kɛ i waan ɔ́ dí junman sɔ naan e ɲan ninnge’m be nun kpakpafuɛ mun. I yo, ɔ kunndɛli kɛ e ɲan like kwlaa nga e kwla miɛn i wun’n. Sanngɛ afuɛ nga be sinnin koko nun wa’n, lika’n wa yoli tɛ kpa siɛn’n. Yɛle kɛ junman’n yɛ ɔ di i sa trilili ɔ. Kpɛkun ninnge nga be le gua kpa’n yɛ ɔ to be ba awlo ɔ. Kusu nn y’a mianman be wun. I kwlaa sɔ’n ti’n, kɛ sran’m be wun e awlofuɛ mun siɛn’n be waan e ti sikafuɛ. Be seman kɛ e ti sran mɔ be wla be wiengu’m be fanngan kɛ be su Ɲanmiɛn ɔn. Sɛ min si di junman kekle naan e awlofuɛ’m be nin Zoova be afiɛn w’a mantan’n, ɔ́ yó min fɛ trá kɛ ɔ man e sika’n.”
9 Siɛ nin niɛn mun, nán amun junman’n yo amun cinnjin lele maan amun nin Zoova amun afiɛn ti nun. Maan amun aeliɛ’n kle amun mma’m be kɛ amun lafi su kpa kɛ nán sika annzɛ ninngeninnge’m be ɲanlɛ’n yɛ ɔ ti aɲanbeun’n i kpafuɛ’n niɔn. Naan aɲanbeun’n i kpafuɛ’n yɛle janvuɛ kpa mɔ sran kun nin Zoova be tra’n.—Mat. 5:3.
10. ?Kɛ gbanflɛn annzɛ talua kun kúnndɛ junman’n, ngue yɛ ɔ fata kɛ ɔ dun mmua bu i akunndan ɔn?
10 ?Sɛ amun ti gbanflɛn annzɛ talua naan amun su kunndɛ junman’n, amún yó sɛ naan amun a fa atin kpa su? Kɛ nga e dun mmua fa kannin’n sa’n, ɔ fata kɛ amun si like nga amun sunnzun kɛ amún yó’n. ?Junman nga amun waan amún súan’n ɔ́ úka amun naan amun a fa Ɲanmiɛn Sielɛ’n i junman’n b’a sie like kwlaa ɲrun annzɛ ɔ́ yó maan amun nin Zoova amun afiɛn ɔ́ tí nun? (2 Tim. 4:10) ?Be nga mɔ kɛ be le sika kpanngban’n yɛ be di aklunjuɛ’n, be ajalɛ liɛ’n su yɛ amun kunndɛ kɛ amún fá ɔ? ?Annzɛ amún fá amun wla gúa Zoova su kɛ Davidi sa? Ɔ seli kɛ: “Kɛ ɔ fɛ i min bakan nun lele bɔ m’an fa yo oke yɛ’n, n nian wun-man kɛ Nyanmiɛn w’a yi i sran kpa’n i ase le. N nian wun-man kɛ i mma mun annzɛ i anunman’m be su srɛsrɛ aliɛ be sin le.” (Jue. 37:25) Maan ɔ ka amun klun titi kɛ atin’n ti nɲɔn. Kun liɛ’n sɛ e fa su’n, é kɔ́ Zoova i wun mmua, kun kusu sɛ e fa su’n, mɛn dilɛ ng’ɔ leman wunsu’n yɛ é dí ɔ. (An kanngan Nyanndra Mun 10:22 nin Malasi 3:10 nun.) ?Beninfuɛ’n su yɛ amún fá ɔ?a
BE ƝIN SU YIYILƐ
11. ?E ɲin su yiyilɛ’n i su ndɛ benin yɛ Biblu’n kan ɔn? ?Ngue ti yɛ ɔ fata kɛ e si e wun su nian ɔn?
11 Biblu’n w’a seman kɛ nán e yiyi e ɲin su mlɔnmlɔn annzɛ kusu be ɲin su yiyilɛ ti blɛ sacilɛ. Pɔlu klɛli Timote i fluwa seli i kɛ “be wun kpinngbinlɛ’n ɔ ti kpa.” (1 Tim. 4:8) Biblu’n se bɔbɔ kɛ ɔ lɛ “blɛ kun bɔ be fa sri-ɔ” yɛ ɔ lɛ “blɛ kun bɔ be fa si able-ɔ.” Kpɛkun ɔ wla e fanngan kɛ e lo wunmiɛn kpa. (Aku. 3:4; Mar. 4:38) Sanngɛ sɛ y’a siman e wun su nian’n, e ɲin su yiyilɛ’n kwla yo maan e nin Zoova e afiɛn ti nun. ?Wafa sɛ? Yɛle kɛ e kwla fa like tɛ annzɛ blɛ kpanngban e yiyi e ɲin su.
12. ?Sɛ amun waan amún fá like wie yíyí amun ɲin su’n, ngue yɛ ɔ fata kɛ amun bu i akunndan ɔn?
12 Maan e dun mmua e kan like nga e fa yiyi e ɲin su’n i ndɛ. E kwla ɲan like kpa e yiyi e ɲin su. Sanngɛ nanwlɛ, be ɲin su yiyilɛ ninnge kpanngban nun’n, be yo ninnge nga Ɲanmiɛn kpɔ be’n. Ninnge sɔ’m be nun wie yɛle nzaje sa yolɛ’n, bae dilɛ’n yɛ bian nin bla nna sukusuku’n. I sɔ’n ti’n, ɔ fata kɛ amun nian like kun kpa ka naan sɛ amún fá yíyí amun ɲin su’n amun a fa. ?Kɛ amún wá fá yíyí amun ɲin su’n, wafa sɛ yɛ amun wun wá yó amun ɔn? ?Like nga amun fa yiyi amun ɲin su’n, ɔ su amun bo kɛ amun yo nzaje sa mun, annzɛ amun kan ngowa kekleekle mun, annzɛ kusu amun fa amun nvle’n i klolɛ cici amun ti? (Nya. 3:31) ?Ɔ wiewie amun bo sika’n? ?Ɔ kwla sanngan sran wie akunndan? (Rɔm. 14:21) ?Sran benin mun yɛ ɔ yo maan amun fa amun wun mantan be ɔ? (Nya. 13:20) ?Ɔ yo maan amun konvi sɔ sa tɛ yolɛ?—Zak 1:14, 15.
13, 14. ?Ngue ti yɛ ɔ fata kɛ amun si blɛ nga amún fá yíyí amun ɲin su’n, i nuan ɔn?
13 Maan e kan blɛ nga e fa yiyi e ɲin su’n i ndɛ wie. Amun usa amun wun kɛ: ‘?Min ɲin su yiyilɛ’n ti’n, n ɲanman min ti naan m’an yo Ɲanmiɛn i ninnge mun?’ Sɛ amun fa blɛ kpanngban tratra su yiyi amun ɲin su’n, ɔ su yoman amun ye kɛ nga amun fa sunnzunnin’n sa. Be nga be yiyiman be ɲin su tratraman su’n, be ɲin su yiyilɛ liɛ’n man be aklunjuɛ dan. ?Ngue ti ɔ? Afin kɛ mɔ be si kɛ be dun mmua yoli ninnge cinnjin mun kwlaa naan b’a ko yiyi be ɲin su’n ti’n, be akunndan’n buman be fɔ.—An kanngan Filipfuɛ Mun 1:10, 11 nun.
14 Kannzɛ ɔ kwla yo e kɛ sɛ e fa blɛ kpanngban e yiyi e ɲin su’n, é dí aklunjuɛ’n, sanngɛ aeliɛ’n sɔ’n kwla fa e kɔ Zoova wun mmua. Aniaan bla Kim m’ɔ le afuɛ 20 ɔ wunnin i sɔ. Ɔ seli kɛ: “Laa lika kwlaa nga fɛ o lɛ’n, n wo lɛ. Kɛ ɔ fɛ i Ya cɛn m’ɔ́ fá jú Mɔnnɛn’n e wo ngowa kanlɛ’n su. Sanngɛ siɛn’n, n le ninnge cinnjin kpanngban n yo. I kun yɛle kɛ atin bofuɛ mɔ n ti’n ti’n, ɔ fata kɛ n jao nglɛmun nun dɔ 6 su n ko bo jasin fɛ’n. Ɔ maan n kwlá kanman ngowa ń cɛ́man lele kɔnguɛ dɔ kun annzɛ dɔ nɲɔn su. N si kɛ nán ngowa kwlaa nga be nin be wiengu’m be kan’n i kwlaa yɛ ɔ ti tɛ ɔ. Sanngɛ ninnge sɔ’m be kwla fa min blɛ ngba’n. I yo, like kwlaa nga sran kun yó’n, ɔ fataman kɛ ɔ yo tratra su.”
15. ?Ngue yɛ siɛ nin niɛn’m be kwla yo naan be mma’m b’a fa like kpa b’a yiyi be ɲin su ɔ?
15 Ninnge kɛ aliɛ nin tralɛ sa ɔ nin be wunsu ninnge uflɛ wie mun’n, ɔ nin ninnge nga be yo maan sran nin Ɲanmiɛn be afiɛn mantan’n, annzɛ be yo maan sran wun kpɛjɛ i’n, m’ɔ fata kɛ ba mun annzɛ siɛ nin niɛn’m be ɲan be’n, be kunndɛlɛ’n ti siɛ nin niɛn’m be junman. Be ɲin su yiyilɛ’n o ninnge sɔ’m be nun wie. Siɛ nin niɛn mun, nán amun yo sran m’ɔ kunndɛman kɛ sran yiyi i ɲin su, mɔ i liɛ’n, be ɲin su yiyilɛ kwlaa ti tɛ i ɲrun’n. I yo, be ɲin su yiyilɛ wafa wie ti tɛ. (1 Kor. 5:6) Sanngɛ sɛ amun bo amun ɲin ase kpa’n, saan amún wún like ng’ɔ ti kpa mɔ amun awlobofuɛ’m be kwla fa yiyi be ɲin su naan be wun w’a fa be feke’n.b Sɛ amun yo i sɔ’n, atin ng’ɔ́ yó maan amun nin Zoova be afiɛn mántan’n i su yɛ amún nánti ɔ.
WAFA NGA E NIN E AWLOFUƐ MUN E TRAN’N
16, 17. ?Awlabɔɛ sa benin yɛ ɔ tɔli siɛ nin niɛn kaka be su ɔ? ?Ngue yɛ maan e si kɛ Zoova wun afɛ ng’ɔ o be su’n i wlɛ ɔ?
16 Klolɛ ng’ɔ o siɛ nin niɛn nin be mma’m be afiɛn’n ti dan lele maan Zoova fa kan wafa ng’ɔ klo i sran mun’n i ndɛ. (Eza. 49:15) Ɔ maan sɛ e osufuɛ kun mɔ e klo i kpa’n ɔ kpɔci Zoova naan i sɔ’n ti’n, e wla bo e wun dan’n, i su ɔ. Aniaan bla kun mɔ be tuli i wa bla’n anuannzɛ’n nun’n seli kɛ: “Ndɛ sɔ’n yoli min ya lele kpeli nun. N usali min wun kɛ: ‘?Ngue ti yɛ i waan ɔ suman Zoova kun ɔn?’ N fali ndɛ’n n guali min su. Min akunndan’n buli wun fɔ.”
17 Zoova wun sa ng’ɔ o amun su’n i wlɛ. I bɔbɔ, kɛ sran klikli ng’ɔ yili be’n, yɛ i sin, be nga be trannin asiɛ’n su kwlaa naan anannganman su nzue dan’n w’a tɔ’n, be kacili be sin sili i’n, i sɔ’n yoli “i ya dan.” (Bob. 6:5, 6) Sɛ i sɔ ɲrɛnnɛn nin a tɔman sran kun su’n, ɔ kwlá wunman wafa nga i sɔ’n fa yo ya ju’n i wlɛ. Kannzɛ ɔ ti sɔ’n, sɛ amun man amun awlofuɛ kun i aeliɛ tɛ’n i atin naan ɔ yo naan amun nin Zoova amun afiɛn ti nun’n, i sɔ’n timan ngwlɛlɛ aeliɛ. ?Ɔ maan, sɛ e osufuɛ kun mɔ e klo i kpa’n yaci Zoova’n, wafa sɛ yɛ e kwla jran e awlabɔɛ’n i ɲrun kekle ɔ?
18. ?Sɛ ba kun yaci Zoova sulɛ’n, ngue ti yɛ ɔ fataman kɛ i si nin i nin be bu be wun fɔ ɔ?
18 Nán amun se kɛ amun ti yɛ amun sran’n w’a yaci Zoova ɔ. Zoova mannin e kwlaa e atin kɛ e fa e klunklo ajalɛ. Ɔ maan, awlo kun nun sa’n, sran ng’ɔ fɛli i wun mannin Zoova mɔ be yoli i batɛmu’n i bɔbɔ yɛ ɔ́ “súɛ i trɔ nin-ɔn.” (Gal. 6:5) I lɛ’n kle kɛ sran’n ng’ɔ yoli sa tɛ’n, i bɔbɔ yɛ Zoova úsɛ i sa ɔ. Nán amun ɔn. (Eze. 18:20) Asa kusu’n, nán amun kan ndɛ’n gua sran uflɛ su. Wafa nga Zoova siesieli kɛ be tu i sran’m be fɔ’n, maan e klun jɔ su. Mmusu’m be si Satan yɛ ɔ ti mɔ amun nin i be ɲɛn i ɔ. Nán asɔnun kpɛnngbɛn mɔ be sasa asɔnun’n be yɛ ɔ fata kɛ amun nin be kun ɔn.—1 Piɛ. 5:8, 9.
19, 20. (a) ?Ngue yɛ siɛ nin niɛn nga b’a tu be wa wie anuannzɛ’n nun’n be kwla yo naan b’a jran be awlabɔɛ’n i ɲrun kekle ɔ? (b) ?Sa benin yɛ be kwla sunnzun kɛ ɔ ju ɔ?
19 Sanngɛ sɛ amun fa Zoova i wun ya’n, amun nin Zoova amun afiɛn tí nun. Nanwlɛ, like ng’ɔ fata kɛ amun osufuɛ sɔ mɔ amun klo i kpa’n ɔ wun i amun lika’n, yɛle kɛ amun a fua kɛ amún fá Zoova klolɛ’n síe i like kwlaa ɲrun, naan amun klo i tra amun awlofuɛ mun bɔbɔ. I sɔ’n ti’n, kɛ ɔ ko yo naan awlabɔɛ’n w’a tinman amun su’n, amun wla amun wun ase be yo like kwlaa nga amun kwla yo naan amun nin Zoova amun afiɛn w’a sɛ kpa titi’n. Maan amun fa amun wun mantan amun niaan Klistfuɛ mɔ be su Zoova nanwlɛ su’n. Nán amun sin amun ngunmin. (Nya. 18:1) Maan amun kan amun klun ndɛ kle Zoova. (Jue. 62:8, 9) Nán amun fa gblɛ naan amun nin amun osufuɛ nga be tuli i asɔnun’n nun’n be san nun. I wie yɛle kɛ nán amun klɛ i fluwa ɛntɛnɛti su. (1 Kor. 5:11) Maan amun fa amun wun wla Zoova i junman’n i nun kpa titi. (1 Kor. 15:58) Aniaan bla nga e kɛnnin i ndɛ’n seli kɛ: “N si kɛ ɔ fata kɛ n sa tran Zoova i junman’n i dilɛ nun titi naan n jran cinnjin kpa i sulɛ nun titi naan kɛ min wa bla’n wá sɛ́ i sin Zoova sin’n, m’an kwlɛ i uka.”
20 Biblu’n waan sran ng’ɔ klo sran’n “ɔ sunnzun sa kwlaa.” (1 Kor. 13:4, 7, NW) Sɛ amun sunnzun kɛ cɛn wie lele’n amun awlɛn su sran nga be tuli i asɔnun’n nun’n, ɔ́ sɛ́ i sin bá ekun’n, i sɔ’n timan tɛ. Afuɛ kwlaa nun’n, sran kaka be yaci be nzuɛn tɛ’n kpɛkun be sa be sin Zoova i anuannzɛ’n nun ekun. Kɛ be ko sa be sin ko ba’n, Zoova faman be wun ndɛ sieman i klun. I li bɔbɔ’n, i klunklo su ɔ “yaci sran wun sa cɛ i.”—Jue. 86:5.
MAAN AJALƐ NGA É FÁ’N YO KPA
21, 22. ?Ajalɛ wafa benin yɛ amun a fua kɛ amún fá ɔ?
21 Zoova yoli maan sran kwlaa kwla fɛ i klunklo ajalɛ. (An kanngan Mmla’n 30:19, 20 nun.) Sanngɛ i sɔ’n fa trɔ dan kun taka e ti su. Ɔ maan ɔ fata kɛ Klistfuɛ kwlaa usɛ i wun kɛ: ‘?Atin benin su yɛ n wo ɔ? ?M’an man junman annzɛ be ɲin su yiyilɛ annzɛ kusu wafa nga e nin min awlofuɛ mun e tran’n i atin maan w’a yo maan e nin Zoova e afiɛn w’a ti nun?’
22 Wafa nga Zoova klo i sran mun’n, ɔ kanman ase le. Like kunngba cɛ ng’ɔ kwla yo maan e nin Zoova e kpaci’n, yɛle ajalɛ tɛ nga e fa’n. (Rɔm. 8:38, 39) Sanngɛ sɛ e waan nɛ́n i sɔ sa’n ju’n, ɔ su junman le! Maan amun fua kɛ amun su manman like fi atin naan ɔ yo naan amun nin Zoova amun afiɛn ti nun. Like suanlɛ ng’ɔ́ bá lɛ’n nun’n, é wá kán like nnan mɔ be nun’n, e kwla yo sɔ wie’n be ndɛ.
[Ja ngua lɛ ndɛ mun]
a Sɛ amun kunndɛ kɛ amún sí junman kpa dilɛ’n i su ndɛ ekun’n, amun nian Sasafuɛ Tranwlɛ’n afuɛ 2007, Mɛ 1 i bue 31 § 14-16, ɔ nin fluwa Les jeunes s’interrogent — Réponses pratiques, volume 2 i ndɛ tre 38 be nun.
b Amun kwla nian Sasafuɛ Tranwlɛ’n afuɛ 2011, Ɔktɔblu 1 i bue 10-14, ɔ nin afuɛ 2011, Novamblu anglo’n i Réveillez-vous ! be nun.
[Foto, bue 12]
[Foto, bue 14]
Kɛ e fa like kpa e yiyi e ɲin su mɔ e yomɛn i sɔ tratraman su’n, e wun e wun fɛ.
[Foto, bue 16]
Sɛ amun sunnzun kɛ cɛn wie lele’n amun awlɛn su sran kun sɛ́ i sin Zoova wun’n, i sɔ’n timan tɛ.