Jɔlɛ nga Ɲanmiɛn dili be mun: ?Be kle kɛ ɔ siman aunnvuɛ?

KA NAAN y’a tɛ kosan sɔ’n su’n, maan e fa e ɲin e sie i Ɲanmiɛn i sran jɔlɛ dilɛ wafa nɲɔn mɔ Biblu’n kan be ndɛ’n be su kan e nian. Be yɛle Nowe i blɛ su nzue dan’n, ɔ nin Kanaanfuɛ’m be nunnunlɛ’n.

NOWE I BLƐ SU NZUE DAN’N

NDƐ NGA SRAN WIE’M BE KAN’N: “Ɲanmiɛn siman aunnvuɛ, afin ɔ fali nzue dan kun fa nunnunnin klɔ sran’m be kwlaa. Saan Nowe nin i awlobo’n yɛ be fiteli nun ɔn.”

NDƐ NGA BIBLU’N KAN’N: Ɲanmiɛn seli kɛ: “Like nga n kunndɛ’n, nɛ́n i yɛle kɛ klunwifuɛ’n ɔ wu, sanngɛ n kunndɛ kɛ ɔ kaci i nzuɛn’n naan ɔ fite nun.” (Ezekiɛl 33:11) Ɔ maan kɛ sran’m be wuli Nowe i blɛ su’n, i sɔ’n w’a jɔman Ɲanmiɛn klun. ?Yɛ nn ngue ti yɛ ɔ nunnunnin be ɔ?

Biblu’n tɛ su kɛ Ɲanmiɛn dili laa mɛn’n i nunfuɛ’m be jɔlɛ “fa kleli be nga be sro-mɛn i’n kɛ, kɛ be liɛ’n ɔ́ wá yó sɔ-ɔ.” (2 Piɛr 2:5, 6) ?I sɔ’n kle sɛ?

I klikli’n yɛle kɛ kannzɛ bɔbɔ Ɲanmiɛn kunndɛman kɛ sran’m be wu’n, sanngɛ klunwifuɛ mɔ be kle be wiengu’m be ɲrɛnnɛn’n, ɔ sie be nzɔliɛ. Kpɛkun ɔ bu be fɔ. Ɔ maan sɛ i blɛ ju’n, ɔ́ núnnún be nga be bu be wiengu lufle’n, ɔ nin be nga be kle be wiengu ɲrɛnnɛn’n.

I nɲɔn su’n yɛle kɛ laa’n ka naan Ɲanmiɛn w’a di sran’m be jɔlɛ’n, klolɛ su ɔ dun mmua bo su kle be. Nowe boli sa nga be yo ɔ ɔ ti su’n i ndolo, sanngɛ i blɛ sufuɛ’m b’a faman be su b’a sieman i nuan bo. Biblu’n se kɛ: “B’a bu-man like fi akunndan lele nzue dan’n ɔ wa fa be kwlaa ɔli.”​—Matie 24:39.

?Ɲanmiɛn niannin i like yolɛ wafa sɔ’n su titi? Ɛɛn. I wie yɛle kɛ ɔ seli Izraɛlifuɛ’m be kɛ sɛ be yo sa tɛ kɛ nga nvle nga be mantan be’n be nunfuɛ’m be yo’n sa’n, ɔ́ mán be kpɔfuɛ’m be atin naan be utu be nvle’n, naan be saci Zerizalɛmu klɔ’n yɛ be tra be lomuɛn wɔ mɛn uflɛ nun. Izraɛlifuɛ’m be fali sa tɛ yolɛ’n fa cicili be ti. I kpa bɔbɔ’n, be fa be mma mun yili tɛ. ?Zoova yoli ndɛ ng’ɔ kannin’n i nuan su sa? Ɛɛn, sanngɛ ɔ dun mmua sunmɛnnin i nuan ijɔfuɛ mun i nvle’n nunfuɛ’m be sin kpɛ sunman. I waan be se be kɛ sɛ b’a kaciman be nzuɛn’n, ɲrɛnnɛn sɔ’n tɔ́ be su. Ɔ seli be bɔbɔ kɛ: “Sa kwlaa nga Anannganman waan ɔ́ yó’n, saan ɔ́ dún mmua kán klé i sufuɛ nga be ijɔ i nuan’n.”​—Amɔs 3:7.

SA NGA TI YƐ NDƐ SƆ’N TI AMUN LIƐ WIE’N: Kɛ e wun wafa nga laa Zoova dili sran’m be jɔlɛ’n, i sɔ’n cici e wla. Ɔ maan e kwla lafi su kɛ Ɲanmiɛn wá dí be nga be kle be wiengu’m be ɲrɛnnɛn’n be jɔlɛ. Biblu’n se kɛ: “Be nga be yo sa tɛ’n, bé kán be bo. [...] Yalɛfuɛ mun [yɛle kɛ wun ase kanfuɛ mun] yɛ mɛn’n ɔ́ wá yó be liɛ ɔ. Be wun jɔ́ be kpa fɔuun!” (Jue. 37:9-11) ?Sɛ Ɲanmiɛn di sran’m be jɔlɛ naan ɔ nunnun ɲrɛnnɛn kwlaa ng’ɔ o mɛn’n nun’n, amún sé sɛ? ?Amún sé kɛ ɔ siman aunnvuɛ annzɛ ɔ ti klun ufuefuɛ?

KANAANFUƐ’M BE NUNNUNLƐ’N

NDƐ NGA SRAN WIE’M BE KAN’N: “Izraɛlifuɛ’m be kunnin Kanaanfuɛ mun abɔlɛ kunlɛ kɛ nga e blɛ liɛ nga nun’n, sran’m be kun sran kpanngban abɔlɛ su’n sa.”

NDƐ NGA BIBLU’N KAN’N: “Nyanmiɛn i atin’m be ti seiin. Ɔ ti Nyanmiɛn kun b’ɔ kaci-man, ɔ di-man ndɛ kwlɛ.” (Mmla’n 32:4) E kwlá faman Ɲanmiɛn i sran jɔlɛ dilɛ’n e sunnzunman klɔ sran’m be alɛ mɔ be kun’n. ?Ngue ti ɔ? Afin Ɲanmiɛn timan kɛ klɔ sran’m be sa. I liɛ’n, ɔ si klɔ sran’m be klun akunndan’n.

Kɛ Ɲanmiɛn buli Sodɔmu nin Gomɔru klɔ’m be nunfuɛ’m be fɔ m’ɔ fali ajalɛ kɛ ɔ́ núnnún be’n, Abraamu m’ɔ ti i sufuɛ kpa’n ɔ usɛli i wun sɛ i sɔ liɛ’n ti su o. Ɔ si kɛ i Ɲanmiɛn m’ɔ ti sɛsɛfuɛ’n, ɔ kwlá ‘kanman sran kpa mun nin sran tɛ mun boman nun naan w’a nunnun be ngba.’ Blɛblɛblɛ, Ɲanmiɛn yoli maan i wla guali ase. Ɔ seli bɔbɔ kɛ sɛ Sodɔmu lɔ sran blu cɛ yɛ be ti kpa’n, be dunman nun ti’n, ɔ su nunnunman klɔ sɔ’n. (Bo Bolɛ 18:20-33) Kɛ Ɲanmiɛn niannin klɔ sɔ’n i nunfuɛ’m be klun akunndan’n, ɔ wunnin wafa nga be klunwi’n fa ti ju’n.​—1 Be Nyoliɛ 28:9.

I kunngba’n, Ɲanmiɛn buli Kanaanfuɛ’m be fɔ, yɛ ɔ seli kɛ be nunnun be. Sran kwlaa si kɛ Kanaanfuɛ’m be klun yo wi kpa. I wie yɛle kɛ be yra be mma mun be fa yi tɛ.a (2 Famiɛn Mun 16:3) Kanaanfuɛ’m be si kɛ Ɲanmiɛn seli Izraɛlifuɛ mun kɛ be fa be mɛn’n. Be nga be waan bé ká lɛ naan bé kún i ti alɛ’n, ɔ ti kɛ be su fa be ɲin wlawla Izraɛlifuɛ mun sa. Nán Izraɛli nvle’n ngunmin yɛ be su fa be ɲin wlɛwlɛ i ɔ. Sanngɛ Zoova mɔ nvle’n ti i liɛ’n, mɔ w’a dun mmua kle kɛ ɔ o nvle sɔ’n i sin’n yɛ be fa be ɲin wlɛwlɛ i wie ɔ.

Asa ekun’n, Kanaanfuɛ nga be yacili sa tɛ yolɛ mɔ be nantili Zoova i mmla’m be su’n, ɔ sili be aunnvuɛ. I wie yɛle tekle bla Raabu m’ɔ ti Kanaanfuɛ’n i liɛ’n. Ɲanmiɛn yoli maan ɔ nin i awlobofuɛ’m be fiteli nun. I kunngba’n, Kanaan klɔ nga be flɛ i Gabaɔn’n i nunfuɛ’m be kunndɛli kɛ Izraɛlifuɛ’m be si be aunnvuɛ. Ɔ maan be nin be mma’m be kwlaa be kali nguan nun.​—Zozie 6:25; 9:3, 24-26.

SA NGA TI YƐ NDƐ SƆ’N TI AMUN LIƐ WIE’N: Jɔlɛ nga Ɲanmiɛn dili Kanaanfuɛ mun’n, ɔ kle e like cinnjin kpa kun. “Cɛn nga bé bú sran nga be sro-man Nyanmiɛn’n be fɔ mɔ bé sáci be’n” mɔ Biblu’n kɛnnin i ndɛ’n, w’a mantan koko kpa. (2 Piɛr 3:7) Ɔ maan sɛ e klo Zoova naan e yo i klun sa’n, kɛ ɔ́ wá núnnún be nga be kpalo i sielɛ’n naan klɔ sran’m be su ɲrɛnnɛn’n kwlaa w’a wie’n, é ɲán e ti.

Klolɛ su Zoova kpɛn e wla kɛ ajalɛ nga siɛ nin niɛn’m be fa’n, ɔ kan be mma mun wie. Ɲanmiɛn Ndɛ’n se kɛ: ‘Amun nin amun osu nunfuɛ mun, amun fa nguan’n naan amun tran nguan nun. Amun klo Anannganman amun Nyanmiɛn’n, amun fɛ i nuan ndɛ’n su, amun fa amun wun mɛntɛn i.’ (Mmla’n 30:19, 20) ?Sɛ Ɲanmiɛn siman aunnvuɛ’n, ɔ kwla kan ndɛ kɛ ngalɛ’n sa? ?Annzɛ kusu ndɛ sɔ’n kle kɛ ɔ klo sran mun naan ɔ kunndɛ kɛ be fa ajalɛ kpa?

[Ja ngua lɛ ndɛ’n]