?Amún láfi Ɲanmiɛn su?

MAAN ɔ yo amun kɛ amun le janvuɛ kun mɔ amun ɲin yi i kpa ɔ. Kpɛkun amun janvuɛ sɔ’n yo like wie mɔ amun wunmɛn i wlɛ ɔ. Sran wie’m be bu i fɔ, be waan i klun yo wi. ?Amun liɛ’n, amún sé kɛ be ndɛ yo fɛ annzɛ amún dún mmua tíe amun janvuɛ’n i nuan ndɛ ka naan amun a bua nun? Sɛ ɔ nunman lɛ naan w’a yiyi sa ng’ɔ juli’n nun w’a kle amun’n, amún mínndɛ i yɛ amun su kpliman be dimɛn i jɔlɛ. ?Nɛ́n i ɔ?

Ka naan amun a amun a bua nun’n, atrɛkpa’n kosan nga amún fá úsa amun wun’n be nun wie mun yɛ: ‘?N si min janvuɛ sɔ’n i kpa, yɛ like kpa kun sa ti yɛ min ɲin yi i dan ɔn?’ Nanwlɛ sɛ amun usa amun wun sɔ’n ɔ ti su. Sanngɛ amun nian. ?Kɛ sran wie’m be se kɛ Ɲanmiɛn i klun yo wi’n, e kwlá usaman e wun kosan kunngba nga e usɛli i e janvuɛ’n i lika’n naan y’a wun ndɛ’n i ɲrun nin i sin?

Atrɛkpa’n ninnge nga Ɲanmiɛn yoli be’n, be nun wie’m be wlɛ wunlɛ ti kekle man amun. Annzɛ kɛ ɔ yaci sa wie’m be lɛ mɔ be ju’n, ɔ kwla bo amun nuan. Sran kpanngban bé sé amun kɛ Ɲanmiɛn i klun yo wi. Yɛ bé wláwlá amun kɛ amun bu i fɔ kɛ be sa. ?Sanngɛ amún kplí bé dí i jɔlɛ? ?Amun su minndɛman naan amun a si ndɛ’n nun kpa ka? Ajalɛ nga amún fá’n ɔ fin wafa nga amun fa si Ɲanmiɛn ju’n. Amun usa amun wun kɛ: ‘?Janvuɛ’n i wafa benin yɛ Ɲanmiɛn ti ɔ?’

Sɛ sa kekle kpanngban tɔli amun su’n, amun kwla se kɛ Ɲanmiɛn w’a yoman amun janvuɛ le. Sanngɛ amun bu akunndan kan be nian. ?Amun mɛn dilɛ’n nun’n sa nga be tɔli amun su’n be nun oninfuɛ mun yɛ be fin Ɲanmiɛn ɔn? ?Sa kpakpa mun annzɛ ɲrɛnnɛn sa mun ɔn? Kɛ nga e fa wunnin i’n sa’n, Satan yɛ ɔ ‘sie mɛn nga’ ɔ, nán Zoova ɔ. (Zan 12:31) Ɔ maan ɲrɛnnɛn nin ndɛ kwlɛ dilɛ nga e wun be mɛn nun’n, be fin Satan. Kpɛkun fɔ m’ɔ o e nun’n, ɔ nin sanvuɛsa mɔ be ɲan e’n, be yo maan afɛ’n o e su dan. ?Amun wunmɛn i sɔ?

Like nga Ɲanmiɛn yoli i sakpa’n Biblu’n kɛn i ndɛ. I waan Ɲanmiɛn yɛ ɔ “yili nglo lɔ nin asiɛ’n” niɔn. Kpɛkun ɔ kpɛn e wla kɛ Ɲanmiɛn yili e wunnɛn’n i “klanman” kpa. Ɔ se bɔbɔ kɛ e ‘nguan nyanman’n wo Nyanmiɛn sa nun.’ (Jue Mun 124:8; 139:14; Daniɛl 5:23) ?I kwlaa sɔ’n i bo yɛle benin?

I bo’n yɛle kɛ sɛ e o nguan nun’n, ɔ fin e Ɲanmiɛn. (Sa Nga Be Yoli’n 17:28) E nguan’n, ɔ nin lika nglanman nga e wun be’n, ɔ nin sran klolɛ nin janvuɛ tralɛ’n, yɛ e nuan nun m’ɔ yo e fɛ’n nin ninnge mɔ kɛ e kan be’n e wun be wlɛ’n, yɛ sa tilɛ’n ɔ nin nvan mɔ e ti’n, i kwlaa sɔ’n Ɲanmiɛn yɛ ɔ fa be cɛli e ɔ. (Zak 1:17) ?Kɛ amun niɛn i sa’n, i sɔ ninnge kpakpa m’ɔ fa be mannin e’n be kleman kɛ ɔ ti janvuɛ kpa kun mɔ e kwla lafi i su yɛ e ɲin yi i ɔ?

I yo, Ɲanmiɛn i su lafilɛ’n kwla yo kekle man amun. Atrɛkpa’n ɔ kwla yo amun kɛ, kɛ mɔ amun nin a simɛn i kpa ti’n amun kwlá lafimɛn i su. E wun i sɔ’n i wlɛ. Ndɛ nga’m be nun’n, like nga ti yɛ sran wie’m be waan Ɲanmiɛn i klun yo wi’n, e kwlá kɛnmɛn i ngba sa tɛɛn e guɛmɛn i lɔ. Sanngɛ sɛ amun tra amun awlɛn be suan Ɲanmiɛn i silɛ kpa’n, i sɔ’n yó amun ye.a E lafi su kɛ i sɔ’n yó maan amún sí Ɲanmiɛn i su ndɛ nanwlɛ’n. Yɛle kɛ Ɲanmiɛn i klun yoman wi sanngɛ i “yɛ ɔ ti sran klofuɛ nin-ɔn.”​—1 Zan 4:8.

[Ja ngua lɛ ndɛ’n]