Siɛ nin niɛn nin ba mun, an koko yalɛ amanniɛn su

“Maan sran’m be kwlakwla be sie be su be tie ndɛ nga be kan’n kpa, nán maan sran fi kan ndɛ ndɛndɛ, yɛ nán maan ɔ fa ya ndɛndɛ.”​—ZAK 1:19.

?AMUN TƐ́ SU SƐ?

?Ngue ti yɛ ɔ ti cinnjin kɛ awlo kun nunfuɛ’m be kunndɛ blɛ naan be koko yalɛ ɔ?

?Wafa sɛ yɛ siɛ nin niɛn’m be kwla fa Zak 1:19 su ɔ?

?Wafa sɛ yɛ ba’m be kwla fa Zak 1:19 su ɔ?

1, 2. ?Titi’n, siɛ nin niɛn nin ba mun be afiɛn ti sɛ? ?Sanngɛ ngue yɛ wie liɛ’n, i yolɛ ti kekle man be ɔ?

AMLƐNKƐN’M be lɔ’n, fluwa klɛfuɛ wie’m be usali ba kanngan wie mun kɛ: “?Sɛ amun si’n, annzɛ amun nin’n, ɔ o wie bɛ su naan amun ti i kɛ aliɛ su cɛnmɛn i’n, ndɛ benin yɛ amun klo kpa kɛ amún kán klé i ɔ?” Be nun sunman be tɛli su kɛ be su kanman akunndan sannganlɛ ndɛ nin ndɛ ng’ɔ o be nin be si’n, annzɛ be nin’n be afiɛn’n, kleman be. Sanngɛ bé sé be si’n, annzɛ be nin’n i kɛ: “Yaci, nán cɛn ngba yɛ n yoli ba kpa ɔ.” Yɛ bé sé ekun kɛ: “N klo amun kpa.”

² Titi’n, ba’m be klo be si nin be nin mun, yɛ siɛ nin niɛn’m be kusu be klo be mma mun. Klistfuɛ’m be awlo’m be nun yɛ e wun i sɔ kpa’n niɔn. Sanngɛ wie liɛ’n, kɛ ɔ yo naan siɛ nin niɛn nin ba’m be koko yalɛ’n, ɔ ti kekle man be. ?Ngue ti ɔ? ?Ngue ti yɛ ninnge wie’m be ndɛ kanlɛ’n ti kekle man siɛ nin niɛn nin ba mun ɔn? ?Ngue yɛ be kwla yo naan yalɛ kokolɛ’n w’a yo pɔpɔ w’a man be ɔ?

MAAN AN KUNNDƐ BLƐ BE KOKO YALƐ

3. (a) ?Ngue ti yɛ awlobo kaka nun’n, siɛ nin niɛn’m be nin be mma mun be kwlá kokoman yalɛ kpa sa ɔ? (b) ?Izraɛlifuɛ’m be blɛ su’n, ngue ti yɛ awlo yalɛ kokolɛ’n timan kekle ɔ?

³ Awlobo kaka nun’n, siɛ nin niɛn’m be nin be mma’m be ɲanman be ti be kokoman yalɛ kpa sa. Izraɛlifuɛ’m be blɛ su’n, ɔ timan sɔ mlɔnmlɔn. Kɛ Moizi sé siɛ mun kɛ be fa Ɲanmiɛn i mmla’n kle be mma mun’n, ɔ seli kɛ: “Amun fa kle amun mma mun, sɛ amun ti amun awlo lɔ, amun kan, sɛ amun wo atin su amun su kɔ lika o, amun kan, sɛ amun wa la o, sɛ amun tinnge o, amun kan.” (Mml. 6:6, 7) Blɛ sɔ’n nun’n, ba’m be o be si annzɛ be nin’m be bo wun cɛn kwlaa. Sɛ be nin be si’n be nunman junman su’n, be nin be nin’n be o awlo lɔ. Ɔ maan be le blɛ kpanngban be koko yalɛ. Kɛ ɔ yo sɔ’n, be kwla si ninnge ng’ɔ mian be mma’m be sa’n, ɔ nin be akloliɛ nin be nzuɛn’n. Ba’m be kusu’n, be kwla si be si nin be nin mun kpa wie.

4. ?Andɛ’n, ngue ti yɛ kɛ ɔ yo naan siɛ nin niɛn nin ba’m be tran koko yalɛ’n, ɔ ti kekle man be ɔ?

⁴ Andɛ mɛn’n timan kɛ laa’n sa. Nvle wie’m be nun’n, be wla ba’m be suklu ndɛ kpa. Wie liɛ kɛ be ɲan afuɛ nɲɔn cɛ’n, nn b’a wla be suklu. Siɛ nin niɛn kpanngban kusu be kɔ junman lika mmua. Kɛ be nin ba’m be ti ko yia awlo lɔ kusu’n, be nin be kokoman yalɛ kpa sa naan b’a si be wiengu. Afin kɛ wie nían televiziɔn, nn wie dí ɔrdinatɛli su junman, nn wie kán ajulisu like kɛ selilɛli sa’n be nun ngowa.

5, 6. ?Ngue yɛ siɛ nin niɛn wie’m be yo naan b’a ‘nyan be ti’ naan be nin be mma’m b’a tran ɔn?

⁵ ?Ajalɛ benin yɛ amun kwla fa naan amun a ‘nyan amun ti’ naan amun nin amun awlobo nunfuɛ’m b’a koko yalɛ ɔ? (An kanngan Efɛzfuɛ Mun 5:15, 16 nun.) Awlo wie’m be nun’n, siɛ nin niɛn nin ba’m be ti be wun aniɛn naan b’a faman blɛ kpanngban b’a nianman televiziɔn, annzɛ b’a diman ɔrdinatɛli su junman. Wie’m be liɛ’n, be mian be ɲin naan cɛn kwlaa b’a yia aliɛ sin dɔ kun su. Wie’m be liɛ kusu’n, kɛ bé sú Ɲanmiɛn awlo lɔ’n yɛ be koko yalɛ be si be wiengu ɔ. Sanngɛ, nán blɛ sɔ’m be nun ngunmin yɛ ɔ fata kɛ be koko yalɛ ɔ. Wienun ɔn, ka naan ba’m b’a ɔ suklu’n, siɛ nin niɛn’m be kwla kan ndɛ wie wla be fanngan, annzɛ be nin be kwla nian fluwa Maan e nian Ɲanmiɛn Ndɛ’n nun cɛn kwlaa i nun. Annzɛ kusu be nin be kwla srɛ Ɲanmiɛn. I sɔ mɔ be yo’n, ɔ kwla uka ba mun kpa cɛn sɔ’n nun.

⁶ Siɛ nin niɛn wie’m be liɛ’n, be yaci ninnge wie’m be yolɛ naan b’a kwla ɲan be ti naan be nin be mma’m b’a tran kan. I sɔ yɛ niɛn kun m’ɔ suan Loraa m’ɔ le ba nɲɔn’n, ɔ yoli ɔ. Ɔ tuli i junman’n m’ɔ fɛ i blɛ kpanngban’n, i nun. I waan: “Kɛ aliɛ ko cɛn’n, e kwlaa e kpli e fite. E nun wie kɔ́ junman, nn wie kɔ́ suklu. Lele nin kɛ ń sá min sin awlo nnɔsua’n, nn talua ng’ɔ nian min mma’m be su’n w’a ko la be yɛ b’a lafi. Kɛ n yacili min junman’n, e sa nun sika w’a sɔnman kun. Sanngɛ siɛn’n, n si akunndan nga min mma’m be bu’n, ɔ nin sa ng’ɔ o be su’n. Kɛ bé srɛ́ Ɲanmiɛn’n, n sie min su n tie. Ɔ maan n kwla man be afɔtuɛ, n wla be fanngan yɛ n kle be like.”

AN “SIE BE SU BE TIE NDƐ NGA BE KAN’N KPA”

7. ?Ndɛ benin yɛ titi’n, siɛ nin niɛn nin ba’m be kɛn i be wiengu su ɔ?

⁷ Fluwa klɛfuɛ nga ndɛ kpɔlɛ klikli’n nun e kannin be ndɛ’n, be usali gbanflɛn nin talua kaka wafa nga be nin be si nin be nin’m be tran’n, i su kosan. Ba sɔ’m be seli kɛ like ng’ɔ lo be ngasi kpafuɛ’n yɛle kɛ, be si nin be nin’m be faman be su be sieman be nuan bo. Siɛ nin niɛn’m be kusu be kan sɔ be mma’m be lika wie. I sɔ’n kle kɛ sɛ siɛ nin niɛn nin ba’m be kunndɛ kɛ bé kókó yalɛ kpa titi’n, ɔ fata kɛ be sie be su kpa be tie be wiengu nuan ndɛ.​—An kanngan Zak 1:19 nun.

8. ?Wafa sɛ yɛ siɛ nin niɛn’m be kwla kle kɛ be sie be su be tie ndɛ nga ba’m be kan’n i kpa ɔ?

⁸ ?Siɛ nin niɛn mun, kɛ amun mma’m bé kán be klun ndɛ klé amun’n, amun sie amun su? I yo, kɛ amun a fɛ’n, annzɛ ɔ yo amun kɛ ndɛ’n timan cinnjin’n, i tielɛ su yoman pɔpɔ. Sanngɛ maan amun si kɛ ba’m be liɛ’n, ndɛ ng’ɔ timan amun cinnjin’n yɛ ɔ kwla yo be cinnjin kpa ɔ. Kɛ be se kɛ amun “sie be su be tie ndɛ nga [ba’m] be kan’n” i kpa’n, i bo yɛle kɛ an fa amun ɲin sie wafa nga be kan ndɛ’n i su wie. Afin kɛ ba’n íjɔ’n, wafa ng’ɔ yo i nɛn’n, nin i ɲrun’n, ɔ nin wafa ng’ɔ siesie i sa’n, ɔ kwla uka amun naan amun a si wafa nga ndɛ’n yo i’n. Ɔ ti cinnjin ekun kɛ amun usɛ i kosan amanniɛn su naan w’a kɛn i klun ndɛ w’a kle amun. Ɲanmiɛn Ndɛ’n waan: “Sran klun akunndan’n ɔ ti kɛ nzue m’ɔ wo asiɛ’n i bo’n sa. Sran nga m’ɔ si ngwlɛlɛ’n yɛ ɔ kwla si akunndan sɔ’n niɔn.” (Nya. 20:5, NW) Kɛ amun nin amun mma’m bé kókó yalɛ’n, ɔ ti cinnjin kɛ amun yo ngwlɛlɛfuɛ naan amun a wun wafa nga be wun fa yo be’n. Sɛ amun su koko sa kun mɔ i ndɛ kanlɛ’n ti kekle man be’n i su yalɛ’n, yɛ ɔ fata kɛ amun yo ngwlɛlɛfuɛ kpa’n niɔn.

9. ?Ngue ti yɛ ɔ fata kɛ ba’m be sie be su be si nin be nin’m be nuan bo ɔ?

⁹ ?Ba mun, amun ɲin yi amun si nin amun nin mun? Ɲanmiɛn Ndɛ’n se kɛ: “Min wa, ndɛ nga ɔ si kan kle wɔ’n, sie ɔ su tie. Fɔ nga ɔ nin tu wɔ’n, nán se kɛ a ti-man.” (Nya. 1:8) Maan ɔ tran amun klun titi kɛ be klo amun naan be bu amun wun akunndan kpa. I sɔ’n ti’n, ɔ ti kpa kɛ amun tie be nuan ndɛ naan amun yo like nga be se amun kɛ amun yo’n. (Efɛ. 6:1) Sɛ amun nin be koko yalɛ klanman’n, naan amun wla fiman su kɛ be klo amun’n, like nga be se amun kɛ amun yo’n, i yolɛ su yoman amun sa nun kekle. I sɔ’n ti’n, wafa nga sa kun yo amun’n, amun kan kle be. I liɛ’n, bé sí amun klun ndɛ. Amun kusu’n, ɔ fata kɛ amun wun sa nga ti yɛ be fa ajalɛ wie mun’n be wlɛ.

10. ?Afɔtuɛ benin yɛ Rɔbɔamu i su ndɛ’n man ɔn?

¹⁰ ?Gbanflɛn nin talua mun, ɔ ju wie’n, amun fa afɔtuɛ nga amun wiengu’m be man amun’n be su? Sɛ ɔ ti sɔ’n, amun nian amun wun kpa. Afin wie liɛ’n, ndɛ ng’ɔ́ yó amun fɛ’n, yɛ bé kán klé amun ɔn. Sanngɛ ɔ kwla fa amun yi sa nun. Amun wiengu’m be ngwlɛlɛ silɛ nin be sa silɛ’n, be juman kpɛnngbɛn’m be liɛ’n nun. Be dan lika be siman ajalɛ nga be fa be’n, be agualiɛ’n. Maan amun wla kpɛn Famiɛn Salomɔn i wa Rɔbɔamu su. Kɛ ɔ yoli Izraɛli famiɛn’n, sɛ ɔ ti kɛ ɔ fali afɔtuɛ nga kpɛnngbɛn’m be mɛnnin i’n su’n, nn i liɛ yoli ye. Sanngɛ sinnzin ndɛ nga i manngu mun be kan kleli i’n, i su yɛ ɔ fali ɔ. I agualiɛ su’n, i nvle nun sran’m be sunman lika be wa jaoli i wun. (1 Fam. 12:1-17) Nán amun di sinnzin kɛ Rɔbɔamu sa. Amun tra amun awlɛn kan amun klun ndɛ, nin wafa nga sa’m be yo amun’n i ndɛ kle amun si nin amun nin mun. Kpɛkun, afɔtuɛ nga be man amun’n, amun fa su.​—Nya. 13:20

11. ?Sɛ ba’m be kwlá faman be wun mantanman be si nin nin’n, i bo kwla gúa sɛ?

¹¹ Siɛ nin niɛn mun, sɛ amun kunndɛman kɛ amun mma’m be yaci amun lɛ be ko usa ngwlɛlɛ afɛ be wiengu’m be sa nun’n, nán amun like yolɛ yo ya. Sanngɛ, maan amun yo sran mɔ be kwla fa be wun mɛntɛn i’n. Aniaan talua kaan kun seli kɛ: “Kɛ n ko bo gbanflɛn kun i dunman cɛ’n, nn min si nin min nin b’a tri. Kɛ ɔ yo sɔ’n, min sa sin bubu min kpɛkun n ijɔman kun.” Aniaan bla talua kun ekun seli kɛ: “Gbanflɛn nin talua kpanngban be kunndɛ kɛ be si nin be nin mun yɛ be man be afɔtuɛ ɔ. Sanngɛ sɛ be si nin be nin’m be buman be wie’n, bé kɔ́ sran ng’ɔ bu be wie mɔ wie liɛ bɔbɔ, ɔ siman like fi’n, i sin.” Kɛ amun mma’m bé kán ndɛ bé klé amun’n, kannzɛ ndɛ’n ti sɛ’n, amun sie be su diin be nuan bo. Sɛ amun yo sɔ’n, bé kán be klun ndɛ klé amun blɛ kwlaa nun. Kpɛkun afɔtuɛ nga amun man be’n, bé tú be klun fá su.

“NÁN MAAN SRAN FI KAN NDƐ NDƐNDƐ”

12. ?Ngue yɛ siɛ nin niɛn wie’m be yo mɔ i ti’n, be mma’m be kanman be klun ndɛ kleman be ɔ?

¹² Kɛ ba’m bé kán ndɛ’n, wie liɛ be si’n annzɛ be nin’n kpankpan be su. Kɛ ɔ yo sɔ’n, ba’m be kunndɛman kɛ bé kán ndɛ klé be ekun. E si kɛ siɛ nin niɛn nga be ti Klistfuɛ’n, be kunndɛ kɛ bé sásá be mma mun. Afin dɔ nga su mɔ e o mɛn i bue nuan’n, ba’m be kwla tɔ sa kaka nun. (2 Tim. 3:1-5) Sanngɛ wie liɛ’n, ba’m be bu i kɛ be si nin be nin’m be mianmian be ngboko naan be wunman be wun fɛ mlɔnmlɔn. Kusu nn ukalɛ yɛ be waan bé úka be ɔ.

13. ?Ngue ti yɛ ɔ fataman kɛ siɛ nin niɛn’m be kpli be kan ndɛ ndɛndɛ ɔ?

¹³ Siɛ nin niɛn mun, kɛ amun mma’m bé kán ndɛ bé klé amun’n, an tra amun awlɛn naan amun a kanman amun ndɛ liɛ’n i ndɛndɛ. I sɔ yolɛ’n timan pɔpɔ. Afin ɔ ju wie’n, ndɛ’n kpɛ awlɛn. Sanngɛ i kwlaa yoli o, ɔ ti cinnjin kɛ amun sie amun su diin naan amun a bua ndɛ’n nun. Famiɛn Salomɔn m’ɔ ti ngwlɛlɛfuɛ’n seli kɛ: “Sran ng’ɔ sie-mɛn i su ti-man ndɛ naan w’a sɔ su’n, ɔ yi i sinnzin’n nglo, kpɛkuun ɔ guɛ i bɔbɔ nyin ase.” (Nya. 18:13) Ɔ maan, amun yaci ba’m be nun naan be kan be klun ndɛ’n kwlaa. Sɛ amun yo sɔ’n, amún wún like nga ti yɛ kɛ ‘bé kán ndɛ’n be tɔtɔ nun’n.’ (Zɔb 6:1-3) Asa ekun’n, amún wún ndɛ nga be kan’n i ɲrun nin i sin’n. Ɔ maan, amún kwlá kán ndɛ ng’ɔ́ yó be ye’n.

14. ?Ngue ti yɛ ɔ fata kɛ ba’m be sie be su kpa be tie ndɛ nga be si nin be nin’m be kan’n niɔn?

¹⁴ Ba mun, kɛ amun si nin amun nin’m bé kán ndɛ klé amun’n, nán amun kpalo be nuan. Sanngɛ amun sie amun su kpa be tie. Afin Ɲanmiɛn yɛ ɔ seli be kɛ be kle amun atin ɔn. (Nya. 22:6) Asa ekun’n, i nun nga be ti kaan kɛ amun sa’n, atrɛkpa sa ng’ɔ o amun su’n tɔli be su wie. Ɔ juli wie’n, b’a faman ajalɛ kpa. Ɔ maan lele nin andɛ’n, ɔ tɛ yo be nsisɔ. Be kunndɛ kɛ bé úka amun naan amun a faman atin tɛ wie. I sɔ’n ti’n, nán amun bu i kɛ be kpɔ amun. Sanngɛ, amun fa be yo amun janvuɛ. Afin be klo kɛ bé úka amun. (An kanngan Nyanndra Mun 1:5 nun.) Amun “bu [amun] si nin [amun] nin be sran,” yɛ amun klo be kpa kɛ be kusu be fa klo amun sa. Sɛ amun yo sɔ’n, amun ukalɛ’n su yoman kekle be sa nun. Kpɛkun ‘bé tá amun kpa e Min’n liɛ’n su, yɛ bé tú amun fɔ, bé klé amun ngwlɛlɛ.’​—Efɛ. 6:2, 4.

“NÁN MAAN SRAN FI FA YA NDƐNDƐ”

15. ?Ngue yɛ ɔ́ úka e naan y’a tra e awlɛn e sran kpa’m be wun ɔn?

¹⁵ Kannzɛ e klo sran kun’n, nán cɛn kwlaa yɛ e tra e awlɛn i wun ɔn. I sɔ’n ti’n, kɛ akoto Pɔlu klɛ́ i niaan Klistfuɛ nga be o Kolɔsu lɔ’n be fluwa’n, ɔ seli be kɛ: “Yasua mun, an klo amun yi mun, nán an yo amun nyrun wiwi be wun. Nja mun, nán an yo sa ng’ɔ kun amun mma’m be ya’n maan be sa sin búbú be’n.” (Kol. 1:1, 2; 3:19, 21) Asa ekun’n, ɔ seli Efɛzifuɛ mun kɛ: “An wla klunwi’n, nin anwlɛn fufu’n, nin ya falɛ’n, nin ndɛnngan’n, nin sran wun sacilɛ’n, ɔ nin sran kpɔlɛ’n be kwlaa be ase.” (Efɛ. 4:31) I sɔ’n ti’n, maan e mian e ɲin e yo sa nga Ɲanmiɛn wawɛ’n maan sran yo’n i kpa tra laa’n. I wie yɛle kɛ, maan e tra e anwlɛn e wiengu’m be wun, yɛ e yo wɛtɛɛfuɛ. Sɛ e yo sɔ’n, kannzɛ lika’n jran sɛ’n, e su faman ya ndɛndɛ.​—Gal. 5:22, 23.

16. ?Wafa sɛ yɛ Zezi tuli i sɔnnzɔnfuɛ’m be fɔ ɔ? ?Ngue ti yɛ i sɔ’n, ɔ yo ɲɛnmɛn ɔn?

¹⁶ Siɛ nin niɛn mun, amun nian Zezi i ajalɛ’n su. Kɔnguɛ kasiɛn ng’ɔ nin i akoto’m be yiali aliɛ sin’n, i ɲin bloli kpa. Ɔ si kɛ ɔ ka kaan’n, ɔ́ wún i ɲrun lele naan bé kún i abɔlɛ kunlɛ. Sanngɛ, ɔ fata kɛ ɔ nanti seiin guɛ i ti nin i bo naan sran’m b’a yaci i Si’n i dunman’n i sacilɛ naan kusu w’a kwla kpɔ sran’m be kwlaa be ti. Blɛ kekle sɔ’n nun’n, “akplowa kun kusu tɔli [i akoto’m] be afiɛn kɛ bé wún be nun sran nga be bu i sran tra be kwlaa’n.” Ɔ nin i sɔ ngba’n, Zezi w’a man be. Sanngɛ ɔ tuli be fɔ amanniɛn su. Ɔ kpɛnnin be wla kɛ blɛ kekle nun’n, be suɛnnin i bo. Kpɛkun, ɔ kleli be kɛ kannzɛ Satan wá klé bé nun kpa’n, ɔ lafi su kɛ be su kpɔciman Ɲanmiɛn. I kpa bɔbɔ’n, ɔ boli be kasiɛ kɛ ɔ nin bé dí famiɛn ɲanmiɛn su lɔ.​—Lik 22:24-32.

17. ?Sɛ ba’m be waan be awlɛn’n yo wɛtɛɛ’n, wafa sɛ yɛ ɔ fata kɛ be nin be si nin be nin’m be tran ɔn?

¹⁷ Ba mun, ɔ fata kɛ amun kusu an yo wɛtɛɛfuɛ. Sɛ amun ti gbanflɛn annzɛ talua kan’n, atrɛkpa’n amun kloman kɛ amun si nin amun nin’n kle amun like ng’ɔ fata kɛ amun yo’n. Amun kwla bu i kɛ i sɔ’n kle kɛ be lafiman amun su. Maan amun wun i wlɛ kɛ klolɛ mɔ be klo amun’n, i ti yɛ be kle amun like ɔ. Sɛ amun lo amun wun be yo like nga be waan amun yo’n, bé bú amun sran kpɛkun bé fá be wla gúa amun su. Ɔ maan cɛn wie’n, bé mán amun atin naan amun fa amun klunklo ajalɛ. Biblu’n kle kɛ sɛ amun awlɛn timan fufu naan amun tran diin, amun ti ngwlɛlɛfuɛ. Afin i waan: “Sɛ sinnglinfuɛ fa ya-a, ɔ yi i nglo. Sanngɛ ngwlɛlɛfuɛ’n i liɛ’n, be wun-mɛn i.”​—Nya. 29:11.

18. ?Kɛ awlo kun nunfuɛ’m bé kókó yalɛ’n, sɛ be klo be wiengu’n, wafa sɛ yɛ i bo gúa ɔ?

¹⁸ Siɛ nin niɛn nin ba mun, sɛ awlo lɔ amun kwlá kokoman amun afiɛn yalɛ kɛ amun kunndɛ’n sa’n, nán i sɔ’n bubu amun sa sin. Amun yo like kwlaa nga amun kwla yo naan i sɔ liɛ’n w’a ye’n. Amun fa Ɲanmiɛn Ndɛ’n i nun afɔtuɛ’m be su titi. (3 Zan 4) Mɛn uflɛ’n nun lɔ’n, fɔ su tranman e nun kun. Ɔ maan e afiɛn yalɛ kokolɛ’n yó pɔpɔ, yɛ é tí e wun aniɛn ndɛ kwlaa su. Sanngɛ dɔ nga su’n, e ngba e yo ninnge wie mɔ kasiɛn su’n, be yo e nsisɔ ɔ. I lɛ’n ti’n, sɛ amun lo amun wiengu ngasi’n, amun se i yaci ndɛndɛ kpa. Asa kusu’n, maan amun yaci amun wiengu i wun sa cɛ i klun ufue su. Maan “klolɛ bɔ an klo amun wun’n ti amun bo yo kun.” (Kol. 2:2) Sran klolɛ’n yo sa kaka ye. Afin ‘sran b’ɔ klo sran’n, ɔ trɛ i anwlɛn sran wun, ɔ yo aklunye, yɛ i nyin blo-man sran like su, ɔ di-man tutre, ɔ tu-mɛn i wun, ɔ fa-man ya finfin, ɔ fa-man sa sie-mɛn i klun. Sran b’ɔ klo sran’n, sa’n kwlaa sɔn i nun, sa’n kwlaa nun ɔ lafi Nyanmiɛn su, i wla’n wo i su, ɔ trɛ i anwlɛn sa’n kwlaa nun, yɛ ɔ si-man afɛ.’ (1 Kor. 13:4-7) Sɛ amun suan amun wiengu klolɛ kpa titi’n, amun nin amun fuɛ mun bé kókó yalɛ klanman. I sɔ’n mán amun kwlaa amun aklunjuɛ, yɛ Zoova ɲán ɲrun.

[Ja ngua lɛ ndɛ’n]

[Foto, bue 22]

[Foto, bue 23]

?Amun ɲin su yiyilɛ annzɛ amun ngunmin ninnge yolɛ ti’n, amun nin amun awlofuɛ’m be kokoman yalɛ?

[Foto, bue 26]

?Amun sie amun su kpa amun mma’m be nuan bo?