MAAN E FA E WUN E MANTAN ƝANMIƐN

Zoova “kpa-man sran nun”

Sran wie’m be o lɛ’n, kɛ mɔ be leman wie annzɛ be finwlɛ’n ti’n, be buman be sran. Annzɛ kusu’n, sɛ like wie o lɛ naan ɔ fata kɛ be yɛ be ɲɛn i’n, be fa manman be. ?B’a yo amun sɔ wie le? Sɛ ɔ ti sɔ’n, maan amun si kɛ nán amun ngunmin yɛ be yo amun sɔ ɔ. Sanngɛ amun gua amun wla ase. Afin Ɲanmiɛn yoman sran’m be sɔ. Akoto Piɛli lafili i sɔ’n su kpa. Ɔ seli kɛ “Nyanmiɛn liɛ’n, ɔ kpa-man sran nun.”​—An kanngan Sa Nga Be Yoli’n 10:34, 35 nun.

Kɛ Piɛli kán ndɛ sɔ’n, nn ɔ o bian kun mɔ be flɛ i Kɔrnɛyi’n, i awlo lɔ. Bian sɔ’n timan Zuifu. Piɛli blɛ su’n, Zuifu nin be nga be timan Zuifu’n, be diman.?Yɛ ngue yɛ Piɛli ɔli i kunndɛlɛ Kɔrnɛyi i awlo lɔ ɔ? Ɲanmiɛn Zoova yɛ ɔ yoli maan Piɛli ɔli lɔ ɔ. Yɛle kɛ le kun’n, Kɔrnɛyi wunnin Ɲanmiɛn i anzi kun aolia nun. Anzi sɔ’n seli Kɔrnɛyi kɛ ɔ sunman sran naan be ko flɛ Piɛli. Piɛli w’a siman nun. Kɛ i aliɛ cɛnnin’n, aolia nun Piɛli tili Ɲanmiɛn i nɛn’n. Ɔ seli i kɛ: “Like nga Nyanmiɛn bu i kɛ ɔ ti kpa’n, nán bu i kɛ ɔ ti kain.” (Sa Nga Be Yoli’n 10:1-15) Kɛ Piɛli wunnin kɛ Zoova yɛ ɔ su di junman sɔ’n, ɔ seli kɛ “Nyanmiɛn liɛ’n, ɔ kpa-man sran nun.”

Piɛli seli kɛ: “Nanwlɛ, m’an wun i wlɛ kɛ Nyanmiɛn liɛ’n, ɔ kpa-man sran nun.” (Sa Nga Be Yoli’n 10:34) Sanngɛ sran wie’m be kpa sran nun. Kɛ be se kɛ ‘be kpa sran nun’n,’ Glɛki nun i bo yɛle kɛ be “nian sran’n i ɲrun waka’n.” Fluwa sifuɛ dan kun seli kɛ: “Be fa kan jɔlɛ difuɛ m’ɔ kɛ ɔ́ dí jɔlɛ’n, ɔ nianman nun dimɛn i kpa’n i ndɛ. Sanngɛ, ɔ nian sran’n i ɲrun waka’n naan w’a di i jɔlɛ.” Ɲanmiɛn liɛ’n, ɔ nianman sran’n i ɲrun waka’n naan w’a yo i ye.

Kɛ Zoova o lɛ’n, ɔ nian lele ju sran’n i anwlɛn’n i bo lɔ. (1 Samiɛl 16:7; Nyanndra Mun 21:2) Piɛli seli kɛ: “Nvle kwlaa nun’n, sran ng’ɔ sro i b’ɔ yo i klun sa’n, i klun jɔ i wun.” (Sa Nga Be Yoli’n 10:35) Sran ng’ɔ sro Ɲanmiɛn’n, i ɲin yi i, ɔ lafi i su, yɛ ɔ yoman like nga Ɲanmiɛn i ɲin ci i’n. I sɔfuɛ’n, ɔ tu i klun yo sa ng’ɔ ti kpa Ɲanmiɛn ɲrun’n. Nanwlɛ, sran ng’ɔ yo sɔ’n, Zoova klun jɔ i wun.​—Mmla’n 10:12, 13.

Sɛ amun finwlɛ’n annzɛ like uflɛ ti’n b’a buman amun sran’n, maan Ɲanmiɛn i su ndɛ nga Piɛli kannin’n cici amun wla. Kɛ Zoova o lɛ’n, ɔ fa sran kwlaa nga be o asiɛ’n su ba i sin kɛ be w’a su i. (Zan 6:44; Sa Nga Be Yoli’n 17:26, 27) Kɛ i sufuɛ’m be srɛ i’n, sɛ be lɛ wie annzɛ be lɛman wie o, sɛ be fin sɛ be fin sɛ o, ɔ tie be kwlakwla be srɛlɛ. Kpɛkun, ɔ tɛ be su. (1 Famiɛn Mun 8:41-43) Kɛ Zoova o nglo lɔ’n, e si kɛ ɔ wun sran’m be kwlaa kɛ be osu’n ti kun. Ɔ wunman kɛ be finwlɛ’n ti ngunminngunmin. ?Kɛ mɔ Ɲanmiɛn kpaman sran nun’n, ɔ yoman amun kɛ amun si i kpa?

Biblu’n i bue ng’ɔ ti mɔ be kanngan nun zuɛn nun’n

Zan 17-21—Sa Nga Be Yoli’n 1-10.

[Ndɛ kwle, bue 30]

Kɛ Zoova o nglo lɔ’n, ɔ wun sran’m be kwlaa kɛ be osu’n ti kun. Ɔ wunman kɛ be finwlɛ’n ti ngunminngunmin.