AMUN KLE AMUN MMA’M BE LIKE
?Ngue yɛ kodiawiefuɛ kun i su ndɛ’n kle e ɔ?
Kodiawiefuɛ nga e su kɛn i ndɛ’n, yɛle bian m’ɔ Zezi su kan ndɛ kle i foto’n su lɛ’n. Kodiawiefuɛ sɔ’n, i sa tɛ’m be yoli i nzisɔ. Ɔ maan ɔ seli Zezi kɛ: “Blɛ nga á wá dí ɔ famiɛn’n, bu min akunndan.” Kɛ nga a fa wun i foto’n su sa’n, Zezi su tɛ i su. ?A si ndɛ nga Zezi su kan kle i’n?—a Zezi seli i kɛ ‘ɔ nin i bé jú Ɲanmiɛn i lika klanman’n nun lɔ.’
?Ɲanmiɛn i lika klanman sɔ’n, a bu i kɛ i nun lɔ’n fá ngue?— Kɛ ɔ ko yo naan y’a kwla tɛ su klanman’n, maan e kan mɛn’n i bo bolɛ’n nun lika klanman nga Ɲanmiɛn fali Adam nin Ɛvu sieli nun’n i ndɛ kan. ?Nin yɛ lika klanman sɔ’n trannin ɔn? ?Ɲanmiɛn su lɔ yɛ, annzɛ asiɛ’n su wa ɔ?—
Sɛ a tɛ su kɛ asiɛ’n su wa yɛ ɔ trannin’n, ɔ ndɛ yo fɛ. Ɔ maan kɛ Ɲanmiɛn wá síesíe asiɛ’n su ye’n, asiɛ’n káci ‘lika klanman.’ I nun yɛ kodiawiefuɛ’n wá trán ɔn. ?Lika sɔ’n i nun lɔ’n yó wafa sɛ?— Maan e nian.
Biblu’n waan kɛ Ɲanmiɛn Zoova boli sran klikli Adam nin Ɛvu’n, ɔ fali be sieli i asiɛ’n i lika klanman kun nun. Be flɛli lika sɔ’n kɛ ‘Edɛni fie.’ Wafa nga ‘Edɛni fie’n’ i klanman fa ti’n, bu i akunndan nian. ?A kwla se kɛ ɔ ti sɛ?— Nanwlɛ, i klanman liɛ’n, lika nglanman nga be o lɛ andɛ’n be wie fi jumɛn i nun mlɔnmlɔn.
?Sanngɛ, kodiawiefuɛ mɔ i sa tɛ’m be yoli i nzisɔ’n, Zezi nin i bé trán asiɛ’n su wa?— Cɛcɛ. Afin Zezi wá yó famiɛn ɲanmiɛn su lɔ kpɛkun, ɔ́ síe asiɛ m’ɔ́ wá káci lika klanman’n. I blɛ sɔ nun’n, Zezi cɛ́n kodiawiefuɛ’n síe i asiɛ’n su. Kpɛkun, ɔ́ níɛn i lika. ?Yɛ ngue ti yɛ Zezi mán kodiawiefuɛ’n i atin kɛ ɔ tran lika klanman’n nun ɔn?— Ń wá yíyí nun kan ń klé wɔ.
Ɔ ti su kɛ kodiawiefuɛ’n yoli sa tɛtɛ sunman. I sɔ wie yɛ sran kpanngban nga b’a wu’n, be yoli ɔ. Sanngɛ i nun nga bé yó i sɔ sa mun’n, be nun sunman b’a siman Zoova naan se kɛ bé sí like nga Zoova kunndɛ kɛ be yo’n.
I sɔ sran liɛ mɔ i wie yɛle kodiawiefuɛ’n, Zezi cɛ́n be. Kpɛkun bé trán asiɛ m’ɔ́ wá káci lika klanman’n, i su. I blɛ sɔ nun’n, bé klé be Ɲanmiɛn i klun sa’n. I liɛ’n, sɛ bé kló Zoova’n, bé yí i nglo.
?Ngue yɛ bé yó naan b’a kle kɛ be klo Zoova ɔ?— Sɛ be yo Ɲanmiɛn klun sa’n, yɛ bé klé kɛ be klo i ɔ. Nanwlɛ, i blɛ sɔ nun’n, lika klanman’n i nun tranlɛ’n wá yó fɛ dan. Afin sran’m be kwlakwla bé kló Zoova nin sran!
Fa ɔ biblu’n naan kanngan
[Ja ngua lɛ ndɛ’n]
a Sɛ amun nin bakan kun yɛ amun su kanngan ndɛ nga nun’n, naan amun wun nzɔliɛ nga’n (—), amun jran kan naan amun wlɛ i fanngan naan ɔ kɛn i klun ndɛ.
[Foto, bue 28]
[Foto bue, 28]
[Foto, bue 29]
[Foto, bue 29]