BIBLU’N I SU KOSAN’M BE SU TƐLƐ

Like nga ti yɛ sran’m be kunndɛ fɔundi be ɲɛnmɛn i’n

Biblu’n kle kɛ like cinnjin nɲɔn ti yɛ sran’m be kunndɛ fɔundi mɔ be ɲɛnmɛn i’n niɔn. I klikli’n yɛle kɛ, kannzɛ sran’m be yo sa kpakpa kpanngban sɛ’n, sanngɛ Ɲanmiɛn w’a boman be kɛ be tu be bɔbɔ be tiaun ajalɛ. I nɲɔn su’n yɛle kɛ, mmusu’m be si Satan m’ɔ ti “Klunwifuɛ’n sie mɛn wunmuan’n.” Ɔ maan kannzɛ sran’m be mian be ɲin sɛ’n, be kwlá ɲanman fɔundi mɛn’n nun.​—An kanngan Zeremi 10:23 nin 1 Zan 5:19 nun.

Sanngɛ like kun ekun o lɛ mɔ i ti yɛ sran’m be ɲanman fɔundi’n niɔn. Yɛle kɛ, be bu be bɔbɔ be wun akunndan yɛ be ti aɲinblɔɛfuɛ. Ɔ maan sɛ fɔundi trán asiɛ’n su’n, ɔ fata kɛ famiɛn diwlɛ kun sie mɛn wunmuan’n naan ɔ kle sran mun sa’n i nuan su yolɛ nin be wiengu klolɛ.​—An kanngan Ezai 32:17 nin 48:18, 22 nun.

?Wan yɛ ɔ́ yó mɔ fɔundi trán asiɛ wunmuan’n su ɔ?

Ɲanmiɛn mɔ like fi nunmɛn i sin’n, ɔ seli kɛ ɔ́ síe famiɛn diwlɛ kun mɛn mma’m be su. Famiɛn diwlɛ sɔ’n, ɔ́ wá tú famiɛn diwlɛ kun nga mun be bo. (Daniɛl 2:44) Ɲanmiɛn bɔbɔ i Wa Zezi m’ɔ ti aunjuɛ wlengbi’n, i yɛ ɔ́ dí famiɛn’n niɔn. Ɔ́ núnnún asiɛ wunmuan’n su sa tɛtɛ’n kwlaa. Kpɛkun, ɔ́ klé sran mun wafa nga be kwla ɲan fɔundi’n. Ɔ maan i yɛ ɔ́ yó naan fɔundi w’a tran asiɛ wunmuan’n su ɔ.​—An kanngan Ezai 9:5, 6 nin 11:4, 9 nun.

Dɔ nga su bɔbɔ Zezi fanngan nun’n, asiɛ wunmuan’n su sran kpanngban kpa be fa Biblu’n m’ɔ ti Ɲanmiɛn nuan Ndɛ’n be kle sran mun wafa nga be nin be wiengu be kwla tran fɔuun. Ɔ maan ɔ ka kan’n, fɔundi wá trán asiɛ wunmuan’n su.​—An kanngan Ezai 2:3, 4 nin Zeremi 33:6 nun.

Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 3 nun. Zoova i Lalofuɛ mun yɛ be yiyili ɔ.

[Foto, bue 32]

Famiɛn diwlɛ ng’ɔ kwla yo naan sran’m b’a kaci be awlɛn’n, i yɛ ɔ kwla man mɛn wunmuan’n i fɔundi ɔ.

[Foto cifuɛ, bue 32]

Fatmir Boshnjaku