Zoova ti aklunyefuɛ yɛ i like yolɛ yoman ya
“Anannganman ti kpa man sran’m be kwlakwla. Ɔ klo ninnge b’ɔ yili be’n be ngba.”—JUE. 145:9.
?WAFA SƐ YƐ AMÚN YÍYÍ NUN ƆN?
?Zoova i nzuɛn wafa mɔ be yo ɲɛnmɛn’n, benin yɛ like suanlɛ nga yiyili nun ɔn?
?Wafa sɛ yɛ e kwla yo aklunyefuɛ kɛ Zoova sa ɔ?
?Wafa sɛ yɛ e kwla kle kɛ e like yolɛ yoman ya kɛ Zoova sa ɔ?
1, 2. ?Kannzɛ e ɲan anannganman nguan bɔbɔ’n, ngue yɛ e su kwlá yomɛn i le ɔ?
BE FLƐ aniaan bla kun kɛ Monika. Kɛ ɔ nin i wun’n be jali’n, ɔ su wa di afuɛ 35. Ɔ seli kɛ: “E jali w’a di afuɛ kpanngban, yɛ n kwla se kɛ e si e wiengu. Sanngɛ e nin a wieman e wiengu si. Afin cɛn kwlaa, ɔ le nzuɛn uflɛ mɔ e nun kun yi i nglo ɔ.” Ndɛ nga aniaan bla’n kɛnnin i lɛ’n, be nga b’a ja bla nin bian’n ɔ nin be nga be le janvuɛ’n, be kwla se kɛ ɔ ti nanwlɛ.
2 Be nga be ti e awlɛn su sran’n, kɛ e nin be é sán nun mɔ e si be kpa’n, ɔ yo e fɛ. Janvuɛ i kpafuɛ kusu nga e le i’n, yɛle Zoova. Kɛ e nin i e san nun mɔ e si i’n, ɔ yo e fɛ wie. Sanngɛ Zoova i silɛ wieman. (Rɔm. 11:33) Kannzɛ e ɲan anannganman nguan bɔbɔ’n, e su siman Zoova lele guɛmɛn i ti nin i bo. Sanngɛ i kwlaa yoli o, kɛ é sí i é kɔ́’n, nn é kló i kpa trá laa’n.—Aku. 3:11.
3. ?Zoova i nzuɛn wafa nɲɔn benin yɛ é wá kán be ndɛ ɔ?
3 Like suanlɛ ng’ɔ sinnin’n kleli kɛ Zoova kpaman sran nun naan be kwla fa be wun mɛntɛn i. I sɔ’n tikeli e ɲin, ɔ maan e kloli i kpa ekun. Siɛn’n, é wá kán i nzuɛn wafa nɲɔn mɔ be yo ɲɛnmɛn wie’n, be ndɛ. Be yɛle Zoova i aklunye yolɛ’n, ɔ nin i like yolɛ m’ɔ yoman ya’n. Ɔ maan, é wún i wlɛ kpa kɛ “Anannganman ti kpa man sran’m be kwlakwla. Ɔ klo ninnge b’ɔ yili be’n be ngba.”—Jue. 145:9.
ZOOVA TI AKLUNYEFUƐ
4. ?Kɛ be se kɛ sran kun ti aklunyefuɛ’n, i bo yɛle benin?
4 ?Kɛ be se kɛ sran kun ti aklunyefuɛ’n, i bo yɛle benin? Ndɛ nga Zezi kannin m’ɔ o Sa Nga Be Yoli’n 20:35 nun’n, ɔ tɛ su weiin. Ɔ seli kɛ: “Sɛ a cɛ sran like’n, ɔ ti kpa tra kɛ be cɛ wɔ like’n.” Ɔ maan sran ng’ɔ ti aklunyefuɛ’n, ɔ cɛ sran like. Ɔ fɛ i blɛ nin i wunmiɛn’n ukɛ i wiengu, yɛ ɔ ti sran wun ɲanman nun. Sɛ like’n ti kaan annzɛ ɔ ti dan o, kɛ ɔ́ fá mán’n, ɔ mɛnmɛn i klunngbɔ su. Sanngɛ ɔ fa man klun ufue’n su. (An kanngan 2 Korɛntfuɛ Mun 9:7 nun.) I lɛ nun’n, e Ɲanmiɛn Zoova yɛ ɔ ti aklunyefuɛ dan’n niɔn.
5. ?Wafa sɛ yɛ Zoova kle kɛ ɔ ti aklunyefuɛ ɔ?
5 ?Wafa sɛ yɛ Zoova kle kɛ ɔ ti aklunyefuɛ ɔ? Biblu’n se kɛ: ‘Anannganman ti kpa man sran’m be kwlakwla.’ Yɛle kɛ be nga be su i’n, ɔ nin be nga be sumɛn i bɔbɔ’n, ɔ man be like ng’ɔ ju be’n. Ɔ “bo wia’n man be bɔ be ti tɛ’n nin be bɔ be ti kpa’n, yɛ ɔ tɔ nzue’n man nanwlɛfuɛ nin be bɔ be ti-man nanwlɛfuɛ’n.” (Mat. 5:45) I sɔ’n ti’n, kɛ akoto Pɔlu kán ndɛ klé be nga be timan Klistfuɛ’n, ɔ seli be kɛ Zoova “w’a yaci-mɛn i wun nglo yilɛ sa kpakpa b’ɔ yo be’n be nun, ɔ maan nzue’n tɔ, yɛ amun fie’m be yo ye, ɔ man amun aliɛ kpanngban, yɛ ɔ maan amun klun jɔ.” (Yol. 14:17) Nanwlɛ, Zoova ti kpa man sran’m be kwlakwla sakpa.—Lik 6:35.
6, 7. (a) ?Wan mun yɛ Zoova yo be kpa dan ɔn? (b) An fa sa kun yiyi nun.
6 Be nga be ti Zoova i sufuɛ’n, yɛ ɔ yo be kpa dan ɔn. Famiɛn Davidi seli kɛ: “Kɛ ɔ fɛ i min bakan nun lele bɔ m’an fa yo oke yɛ’n, n nian wun-man kɛ Nyanmiɛn w’a yi i sran kpa’n i ase le. N nian wun-man kɛ i mma mun annzɛ i anunman’m be su srɛsrɛ aliɛ be sin le.” (Jue. 37:25) Ɲanmiɛn i sufuɛ nanwlɛfuɛ kwlaa be kwla se kɛ ndɛ sɔ’n ti nanwlɛ. Afin be bɔbɔ b’a sie i nzɔliɛ le. Amun e fa sa kun e nian.
7 Be flɛ aniaan bla kun kɛ Nansi, ɔ ti atin bofuɛ. Ɔ di junman otɛli kun nun. Yɛle kɛ, sran nga be ba like dilɛ’n, i yɛ ɔ fa aliɛ’n man be ɔ. Koko nun wa’n, i sa wa miannin kpa. Yɛle kɛ lele nin kɛ aliɛ’n fá cɛ́n’n, ɔ fata kɛ ɔ ɲan sika kotokun 33 naan w’a fa tua sua ng’ɔ la nun’n i ti kalɛ’n. Ɔ seli kɛ: “Kɛ n bu i akunndan sa’n, n wunman kan ń sín naan m’an ɲɛn i sɔ sika’n. N srɛli Ɲanmiɛn, n fa wlɛli i sa nun. Kpɛkun yɛ n ɔli min junman ɔn. N siman kɛ cɛn sɔ nun’n, sran kpanngban bé wá bá aliɛ dilɛ. Afin titi’n, sran kunngunngun yɛ be ba ɔ. Sanngɛ cɛn sɔ’n nun liɛ’n, sran’m be bali sa kpan. I sɔ’n boli min nuan. Be kwlaa sɔ’n, be wla min sa bo kan naan b’a wɔ. Kɛ n jrali nnɔsua mɔ n fɛli i sɔ sika’n ukali kalɛ nga be tuali min’n su’n, ɔ juli kotokun ablasan nin nsan sɛsɛsɛ.” Nanwlɛ, Nansi wunnin kɛ Zoova i wla w’a fimɛn i. Like nga i sa miɛnnin i wun’n, i bɔbɔ cɛ yɛ Zoova fa mɛnnin i ɔ.—Mat. 6:33.
8. ?Like nga Zoova yoli m’ɔ kle kɛ ɔ ti kpa man sran’m be kwlakwla’n, yɛle benin?
8 Like kun mɔ Zoova yoli m’ɔ kle kɛ ɔ ti kpa man sran’m be kwlakwla’n, yɛle tɛ mɔ i Wa’n fɛli i wun yili’n. Zezi seli kɛ: “Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlin-man, sanngɛ ɔ nyan anannganman nguan.” (Zan 3:16) “Mɛn’n” nga be kɛn i ndɛ wa’n, yɛle sran’m be kwlakwlakwla. I lɛ’n kle kɛ sran kwlaa ng’ɔ klo’n, ɔ kwla ɲan tɛ mɔ i wa’n yili’n i su mmlusuɛ. Yɛle kɛ sran kwlaa ng’ɔ lafi Zezi su’n, ɔ́ ɲán anannganman nguan. (Zan 10:10) I sɔ’n kle kɛ Zoova ti aklunyefuɛ dan. ?Nɛ́n i ɔ?
MAAN E YO AKLUNYEFUƐ KƐ ZOOVA SA
9. ?Wafa sɛ yɛ e kwla yo aklunyefuɛ kɛ Zoova sa ɔ?
9 ?Wafa sɛ yɛ e kwla yo aklunyefuɛ kɛ Zoova sa ɔ? Zoova ‘man e like kwlaa b’ɔ maan e klun jɔ’n.’ Ɔ fata kɛ e kusu e “cɛ sran like” naan be klun jɔ wie. (1 Tim. 6:17-19) I sɔ’n ti’n, e cɛ e sran kpa’m be like klun ufue su, yɛ e uka be nga be leman wie’n. (An kanngan Mmla’n 15:7 nun.) Aniaan wie’m be seli kɛ sɛ be cɛli be like’n, nán be yɛ bé yó awɛnfuɛ ɔ. Ɔ fata kɛ be kusu be cɛ sran like wie. Sɛ e bu i sɔ akunndan wie’n, saan é yó aklunyefuɛ. I sɔ yolɛ nun’n, be kwlá saciman Zoova i sufuɛ’m be wun. Afin be nun sunman be ti aklunyefuɛ.
10. ?Wafa kpa kun nga e kwla kle kɛ e ti aklunyefuɛ’n, yɛle benin?
10 Wafa kpa kun nga e kwla kle kɛ e ti aklunyefuɛ’n, yɛle kɛ maan e ɲan e ti e fɔnvɔ e wiengu. (Gal. 6:10) ?Y’a yo sɔ wie le? Maan e fa kosan nga e usa e wun: ‘?Kɛ sran wie kókó i yalɛ klé min’n, n sie min su i nuan bo kpa? ?Kɛ sran wie srɛ min kɛ n ukɛ i’n, annzɛ n ti i wun ɲanman nun’n, min wun blibli min kɛ n ukɛ i? ?N yoli min awlo lɔfuɛ wie, annzɛ aniaan wie i mo w’a di le nɲɛ? Nanwlɛ maan e “cɛ sran like.” I liɛ’n, e nin Zoova nin e janvuɛ mun e afiɛn mantan kpa trá laa’n.—Lik 6:38; Nya. 19:17.
11. ?E sa nun ninnge benin yɛ e kwla fa man Zoova ɔ?
11 Zoova kusu’n, e kwla cɛ i like wie. Biblu’n se kɛ: “Fa ɔ sa nun ninnge kpakpa’n wie la Anannganman i ase.” (Nya. 3:9) E sa nun “ninnge kpakpa’n” i wie yɛle e blɛ’n nin e wunmiɛn’n, ɔ nin sika mɔ e fa di Ɲanmiɛn i junman’n. Ba kanngan’m be kwla man Zoova i like wie. Be flɛ aniaan kun kɛ Jezɔn. Ɔ seli kɛ: “Sika nga min nin min yi’n, e se kɛ é fá gúa asɔnun lɔ sika guawlɛ nun’n, e fa man e wa kanngan nɲɔn’n, yɛ be fa ko gua nun ɔn. Kɛ be yo sɔ’n, ɔ yo be fɛ kpa. Afin b’a fa be sa nun like b’a man Zoova.” Ba nga be klo Zoova i like manlɛ be kaan nun’n, ɔ ka be nun be fa ɲin.—Nya. 22:6.
ZOOVA I LIKE YOLƐ YOMAN YA
12. ?Kɛ be se kɛ sran kun i like yolɛ yoman ya’n, i bo yɛle benin?
12 Zoova i nzuɛn wafa m’ɔ yo ɲɛnmɛn ekun’n, yɛle kɛ i like yolɛ yoman ya. Kɛ be se kɛ sran kun i like yolɛ yoman ya’n, i bo’n sɔnnin. Ɲanmiɛn Ndɛ’n nun’n, wie liɛ be kaci i kɛ ɔ “yaci sa cɛ.” (Tit 3:1, 2) Ɔ maan sran nga i like yolɛ yoman ya m’ɔ yaci sa cɛ’n, ɔ ti wɛtɛfuɛ, ɔ ti ngwlɛlɛfuɛ, ɔ jrɛnmɛn i ndɛ liɛ’n su fii. Ɔ seman kɛ ndɛ ng’ɔ klɛwa mmla nun’n, blɛ kwlaa nun’n, sɛ be fa su ɔ yo ye annzɛ ɔ yoman ye’n, i su yɛ be fa ɔ. Ɔ bu i wiengu’m be akunndan. Sɛ ɔ se kɛ ɔ́ yó like wie naan be tu i aswre’n, sɛ ɔ nin i fata’n, ɔ kaci.
13, 14. (a) ?Wafa sɛ yɛ Zoova kle kɛ i like yolɛ yoman ya ɔ? (b) ?Wafa sɛ yɛ ɔ yili i nzuɛn sɔ’n i nglo Lɔtu i lika ɔ? ?Afɔtuɛ benin yɛ i sɔ’n man e ɔ?
13 ?Wafa sɛ yɛ Zoova kle kɛ i like yolɛ yoman ya ɔ? Yɛle kɛ, kɛ i sufuɛ’m be kan ndɛ kle i’n, ɔ bu be wie. Kpɛkun ɔ ju wie’n, ɔ yo like nga be srɛ i’n man be. Amun e fa wafa nga ɔ nin Lɔtu m’ɔ ti sran kpa’n be trannin’n, i su sunnzun ase e nian. Kɛ Zoova seli kɛ ɔ́ wá núnnún Sodɔm nin Gomɔru klɔ’n, ɔ seli Lɔtu weiin kɛ ɔ wanndi wɔ oka’m be su naan w’a fite nun. Sanngɛ sa wie ti’n, Lɔtu srɛli Zoova kɛ i liɛ’n, ɔ́ kó fía lika uflɛ. Amun bu i akunndan be nian. Lɔtu bɔbɔ klɔ sran sa’n, ɔ su srɛ Zoova kɛ ɔ kaci aniɛn.—An kanngan Bo Bolɛ 19:17-20 nun.
14 I yo, sran wie’m be kwla se kɛ Lɔtu i ɲin yiman Ɲanmiɛn annzɛ kusu ɔ lafimɛn i su. Afin kannzɛ ɔ yo sɛ o, Zoova dé i. Ɔ maan ɔ fataman kɛ ɔ koko lele. Sanngɛ, Lɔtu kokoli. Zoova kusu w’a buman Lɔtu fɔ. Lika nga Lɔtu seli kɛ ɔ́ wánndi kó fía lɔ’n, Zoova mɛnnin i atin kɛ ɔ wɔ. Kusu nn i klikli nun’n, Zoova sunnzunnin kɛ ɔ́ núnnún lika sɔ’n wie. (An kanngan Bo Bolɛ 19:21, 22 nun.) I lɛ nun’n, Zoova kleli kɛ ɔ jranman i ndɛ liɛ’n su fii. Nanwlɛ, i like yolɛ yoman ya sakpa.
15, 16. ?Wafa sɛ yɛ Mmla nga Zoova fa mannin Izraɛlifuɛ mun’n, ɔ kle kɛ i like yolɛ yoman ya ɔ? (An nian desɛn ng’ɔ o kan like suanlɛ’n bo i bo lɛ’n.)
15 Sa kun ekun m’ɔ kle kɛ Zoova i like yolɛ yoman ya’n, ɔ o mmla nga ɔ fa mannin Izraɛlifuɛ mun’n i nun. Yɛle kɛ sɛ Izraɛlifuɛ kun waan ɔ́ yí tɛ mán Zoova’n, ɔ fata kɛ wienun ɔn, ɔ fa bua annzɛ boli. Sanngɛ sɛ ɔ ti yalɛfuɛ’n, ɔ kwla fa okunmomo nɲɔn annzɛ ablioso nɲɔn fa yi tɛ’n. ?Yɛ sɛ ɔ ti yalɛfuɛ mlɔnmlɔn naan okunmomo nɲɔn annzɛ ablioso nɲɔn bɔbɔ’n, ɔ kwlá ɲɛnmɛn i’n nin? ?Ɔ́ yó i liɛ sɛ? I lɛ nun’n, Zoova man Izraɛlifuɛ sɔ’n i atin kɛ ɔ kunndɛ ble sanmlɛn fa mɛn i. Sanngɛ ɔ fata kɛ sanmlɛn sɔ’n, ɔ yo ‘mlɛnnɛnnɛn’ kpa kɛ nga be fa tɔn aliɛ fa sɔ aofuɛ kpa’m be nun sa. (Bob. 18:6) Sa sɔ’n kle kɛ Zoova i like yolɛ yoman ya. Nga ti yɛ e se sɔ’n, é wá yíyí nun.—An kanngan Saun Yolɛ 5:7, 11 nun.
16 Maan ɔ yo amun kɛ amun ti Izraɛlifuɛ naan amun yɛ amun ti yalɛfuɛ’n niɔn. Kɛ amún wlú Zoova i tannin sua nun lɔ’n, amun wun kɛ sran wie’m be fa nnɛn yɛ be fa ba ɔ. Sanngɛ amun liɛ’n, amun sa nun ble sanmlɛn kan. I sɔ’n ti’n, ɲannzuɛn kwla kun amun. Afin, ɔ ti kɛ amun a manman Zoova i like fi sa. Sanngɛ nn amun si kɛ Zoova liɛ’n, sanmlɛn nga amun su fa mɛn i’n, i kpafuɛ’n wie ɔ. Afin ɔ ti mlɛnnɛnnɛn. I sɔ’n ti’n, amun wla gua ase. Ɔ ti kɛ Zoova w’a se amun kɛ: ‘Nán koko lele. N si kɛ like nga ɔ sa ju su’n, yɛ a su fa man min ɔn. I kpafuɛ’n kusu yɛ a fali ɔ.’ ?Amun wunman kɛ Zoova i like yolɛ yoman ya? Afin like nga i sufuɛ kun kwlá yoman’n, ɔ miɛnmɛn i kɛ ɔ yo.—Jue. 103:14.
17. ?Ngue yɛ kɛ e yo’n, Zoova klun jɔ su ɔ?
17 Y’a wun kɛ Zoova i like yolɛ yoman ya. I sɔ’n yo e fɛ dan. Afin e si kɛ, kɛ e tu e klun e su i’n, i klun jɔ su. (Kol. 3:23) Be flɛ aniaan bla kun kɛ Kɔnstans, ɔ fin Itali. Ɔ seli kɛ: “N like nga n klo i yolɛ kpa’n, yɛle Ɲanmiɛn ndɛ kanlɛ’n. I sɔ’n ti’n, m bo jasin fɛ’n titi yɛ n kle sran’m be Biblu’n nun like. Sanngɛ tukpaciɛ’n ti’n, nga min awlɛn o su kɛ ń yó’n, n kwlá yoman. Ɔ maan n sa sin bubu min cɛn kunngun. Kɛ ɔ yo sɔ’n, min wla kpɛn su kɛ Zoova bu min sran naan ɔ si afɛ ng’ɔ o min su’n, naan like nga m mian min ɲin yo’n, i klun jɔ su.”
MAAN E YO KƐ ZOOVA MƆ I LIKE YOLƐ YOMAN YA’N SA
18. ?Wafa sɛ yɛ siɛ nin niɛn’m be kwla kle kɛ be like yolɛ yoman ya kɛ Zoova sa ɔ?
18 ?Wafa sɛ yɛ e kwla kle kɛ e like yolɛ yoman ya kɛ Zoova sa ɔ? Maan e wla kpɛn wafa nga Zoova yoli Lɔtu’n i su. Lika nga ɔ fata kɛ Lɔtu ko fia lɛ’n, Zoova yɛ ɔ le atin kle i ɔ. Afin ɔ ti Ɲanmiɛn Kpli. Sanngɛ kɛ Lɔtu srɛli i kɛ ɔ́ kó fía lika uflɛ’n, w’a fa yoman ndɛ. Ɔ kplinnin Lɔtu su. ?Sɛ amun ti siɛ nin niɛn’n, afɔtuɛ benin yɛ Zoova i ayeliɛ sɔ’n man amun ɔn? ?Sɛ amun waan amún fá ajalɛ wie naan amun mma’m be kle be liɛ naan ɔ timan tɛ’n, amun kplin be liɛ’n su? Afuɛ 2007 nun Sasafuɛ Tranwlɛ’n, Sɛptamblu 1 nun se kɛ, kɛ siɛ nin niɛn’m be waan bé kpɛ́ awlo’n nun mmla’n, be kwla ti be mma’m be nuan ndɛ. I wie yɛle kɛ be kwla se ba mun kɛ sɛ be fite nnɔsua’n, ɔ fata kɛ be bla awlo dɔ trele kun su. Sɛ be se ba mun sɔ’n, fiɛn kaan nunman nun. Afin be yɛ be ti siɛ nin niɛn’n niɔn. Sanngɛ kwlaa naan b’a kle ba’m be dɔ trele kun’n, be kwla ti be nuan ndɛ. Sɛ be ba’m be kle be dɔ liɛ’n naan ɔ timan tɛ’n, siɛ nin niɛn’m be kwla kplin ba’m be liɛ’n su. Kɛ siɛ nin niɛn’m be yo sɔ’n, ba’m be wun like nga ti yɛ be si nin be nin be fali ajalɛ’n i wlɛ. Ɔ maan be mianman be naan b’a nanti su.
19. ?Wafa sɛ yɛ asɔnun kpɛnngbɛn’m be kwla kle kɛ be like yoman ya kɛ Zoova sa ɔ?
19 Asɔnun kpɛnngbɛn mun kusu’n, ɔ fataman kɛ be mian be niaan mun kɛ be yo like nga be kwlɛmɛn i yo’n. I liɛ’n, bé klé kɛ be like yolɛ yoman ya kɛ Zoova sa. Maan be wla kpɛn su kɛ Izraɛlifuɛ yalɛfuɛ’m be like liɛ bɔbɔ nga be man’n, Zoova sɔ nun. Aniaan wie mun’n, tukpaciɛ annzɛ kpɛnngbɛn ti’n, wafa nga be kunndɛ kɛ bé bó jasin fɛ’n, be kwlá bomɛn i sɔ. I sɔ’n ti’n wie liɛ’n, be wla bo be wun. ?I lɛ nun’n, ngue yɛ ɔ fata kɛ asɔnun kpɛnngbɛn’m be yo ɔ? Ɔ fata kɛ asɔnun kpɛnngbɛn’m be fɔnvɔ be kɛ Zoova klo be, afin nga be kwlɛ i yo’n yɛ be yo ɔ.—Mar. 12:41-44.
20. ?Wafa sɛ yɛ e kwla kle kɛ e ti ngwlɛlɛfuɛ Ɲanmiɛn i sulɛ nun?
20 Kannzɛ be su mianman e kɛ e yo like’n, nɛ́n i sɔ’n ti yɛ é yó nvɛɛfuɛ Ɲanmiɛn junman’n i dilɛ’n nun ɔn. (Mat. 16:22) Like nga e kwlɛ i yo’n, ɔ fata kɛ e mian e ɲin e yo. I sɔ yɛ Zezi kannin ɔn. Ɔ seli kɛ: “An mian amun nyin.” (Lik 13:24) Sanngɛ nɛ́n i sɔ’n ti yɛ like nga e kwlɛmɛn i yo’n, é sé kɛ saan fii é yó ɔ. Ɔ fata kɛ e yo ngwlɛlɛfuɛ. Afin like nga e kwlɛmɛn i yo’n, Zoova su seman e le kɛ e yo. Sanngɛ like nga e kwlɛ i yo’n, sɛ e yo i sakpa’n, Zoova i klun jɔ́ su. Kɛ mɔ e si kɛ Ɲanmiɛn i like yolɛ yoman ya’n, i sulɛ’n yo e fɛ dan. ?Nɛ́n i ɔ? Like suanlɛ ng’ɔ́ bá lɛ nun’n, é wá kán Zoova i nzuɛn wafa nɲɔn ekun mɔ be yo ɲɛnmɛn’n, be ndɛ.—Jue. 73:28.
[Foto, bue 13]
[Foto, bue 14]
Zoova kunndɛli kɛ Izraɛlifuɛ’m be yo aklunyefuɛ kɛ i sa. (An nian ndɛ kpɔlɛ 9 nun.)
[Foto, bue 15]
“Fa ɔ sa nun ninnge kpakpa’n wie la Anannganman i ase.”—Nya. 3:9. (An nian ndɛ kpɔlɛ 11 nun.)
“Like kwlaa nga amún yó’n, an tu amun klun yo.”—Kol. 3:23. (An nian ndɛ kpɔlɛ 17 nun.)