Ɔ ka kan ɲrɛnnɛn wunlɛ’n wíe mlɔnmlɔn!
Cɛn kun’n, sran’m be su wunman be ɲrun kun. Afin sran fi su yoman wlɛ kun, be su kunman alɛ kun, sran fi su tɔman tukpacɛ kun. Ninnge kɛ nzue m’ɔ tɔ di lika’n sa’n, annzɛ seke m’ɔ tu saci lika’n, bé wíe. Kɛ á lá jáo’n, a su kokoman sika ti. A su kokoman kɛ sran wie wá yó wɔ tɛtɛ annzɛ ɔ́ yó wɔ finfin like mɔ a lɛmɛn i’n, annzɛ ɔ finwlɛ’n ti. ?A bu i kɛ ɔ kwla yo sɔ sakpa? A kwla bu i kɛ sran ng’ɔ kan sɔ’n, ɔ su cɛn laliɛ. Sɛ a bu i sɔ’n, ɔ ndɛ yo fɛ. Afin sran fi annzɛ anuannzɛ fi kwlá yomɛn i sɔ ninnge mun. Sanngɛ Ɲanmiɛn kpli liɛ’n, ɔ kwla yo. Afin ɔ seli kɛ ɔ́ wá yó naan sran’m b’a wunman ɲrɛnnɛn’n i wie fi kun. Kpɛkun ɔ́ yó maan ninnge nga ti yɛ sran’m be wun ɲrɛnnɛn mɔ e kannin be nun wie’m be ndɛ’n, bé wíe. Ninnge nga Ɲanmiɛn wá yó m’ɔ kannin be ndɛ i nuan ndɛ nun’n, be yɛ:
◼ FAMIƐN KPA KUN WÁ SÍE MƐN WUNMUAN’N
“Nyanmiɛn b’ɔ o nglo lɔ’n ɔ́ síe famiɛn diwlɛ kun b’ɔ su saciman le, yɛ mɛn uflɛ su siemɛn i le. Famiɛn diwlɛ sɔ’n ɔ́ núnnún famiɛn diwlɛ kun nga mun, kpɛkun i bɔbɔ ɔ́ ká lɛ tititi.”—Daniɛl 2:44.
Ɲanmiɛn i famiɛn diwlɛ’n wo ɲanmiɛn su lɔ. Ɔ fali famiɛn diwlɛ’n wlali Zezi Klist sa nun. Zezi wá núnnún famiɛn diwlɛ kun nga mun. Kpɛkun, ɔ́ yó maan sran’m bé yó Ɲanmiɛn klun sa’n asiɛ’n su wa kɛ be mɔ be o ɲanmiɛn su lɔ’n be yo’n sa. (Matie 6:9, 10) Famiɛn diwlɛ sɔ’n, mɛn uflɛ su siemɛn i le. Afin “e Min Jésus-Krist b’ɔ ti e Defuɛ’n,” ɔ́ yó famiɛn tititi. Ɔ maan sran’m be wun wá jɔ́ be kpa fɔuun tititi.—2 Piɛr 1:11.
◼ ƝANMIƐN SULƐ WAFA NGA BE TIMAN SU’N BE SU TRANMAN LƐ KUN
“Satan bɔbɔ kaci i wun kɛ anz b’ɔ kpaja’n sa. Ɔ maan i junman difuɛ mun be yo be wun kɛ be nga be junman yɛlɛ nanwlɛ’n i klelɛ’n be liɛ’n sa’n, wuun b’a fɛ-mɛn i ase. Be agualiɛ’n ɔ́ yó kɛ be junman’n sa.”—2 Korɛntfuɛ Mun 11:14, 15.
Sran kwlakwla bé wá wún i wlɛ kɛ Ɲanmiɛn sulɛ wafa nga be timan su’n, be yo Satan klun sa. Kpɛkun, bé wá núnnún be asiɛ’n su. Ɔ maan be nun wie fi su kaman lɛ naan w’a fa ndɛnngan w’a wla sran’m be afiɛn naan b’a kun be wun. Blɛ sɔ nun’n, be kwlaa nga be klo “Nyanmiɛn b’ɔ lafi-man’n b’ɔ ti nanwlɛfuɛ’n,” be ‘sulafilɛ wafa’n yó kun,’ yɛ bé kóto Ɲanmiɛn bo be mɛnmɛn i be “akunndan’n nun nanwlɛ nun.” Nanwlɛ, sran’m bé wá dí alajɛ yɛ bé bó wá yó kun kpa!—1 Tɛsalonikfuɛ Mun 1:9; Efɛzfuɛ Mun 4:5; Zan 4:23.
◼ FƆ’N SU TRANMAN SRAN NUN KUN
“Nyanmiɛn nin bé trán, bé yó i sran, yɛ i bɔbɔ yó be Nyanmiɛn. Ɔ́ núnnún be nyinmuɛn’n kwlaa, wie’n su tran-man lɛ kun. Be su yo-man sɛ kun, be su sun-man kun, be su wun-man nyrɛnnɛn kun, afin laa ninnge sɔ’m be su tran-man lɛ kun.”—Sa Nglo Yilɛ 21:3, 4.
Ɲanmiɛn Zoova fanngan nun’n, i Wa Zezi wá dí i sɔ junman’n. Afin Zezi yɛ ɔ fɛli i nguan’n mannin naan sran’m be fite nun ɔn. (Zan 3:16) Zezi wá yó maan fɔ’n su tranman sran nun kun. Yɛ ɲrɛnnɛn fi su tranman lɛ kun. Afin “Nyanmiɛn nin bé trán” yɛ ɔ́ núnnún sran’m be “nyinmuɛn’n kwlaa.” Ɔ maan ɔ ka kaan sa’n, fɔ m’ɔ o sran nun’n, ɔ nin ɲrɛnnɛn mɔ be wun i’n, bé káci laa sa. Kpɛkun, “mɛn’n ɔ́ yó sran kpa’m be liɛ. Bé trán nun tititi.”—Jue Mun 37:29.
◼ SATAN NIN MMUSU TƐTƐ’M BE LIƐ WÍE
“Dragɔn bɔ be flɛ i wuo lalaa’n, bɔ be flɛ i ekun kɛ mmusu’m be si Satan’n, Zezi trɛli i yɛ ɔ cili i, ɔ́ ká lɛ lele afuɛ akpi. Ɔ fɛ i yili kunman dan sɔ’n nun, ɔ toli nun yɛ ɔ tali su. Ɔ yoli i sɔ naan w’a laka-man nvle-nvlefuɛ mun kun.”—Sa Nglo Yilɛ 20:2, 3.
Zezi wá fá Satan nin mmusu mun yí be ‘kunman dan’n’ nun, yɛle kɛ ɔ́ yó naan be glɔ. Ɔ maan be su kwlá kleman sran’m be ɲrɛnnɛn kun. I blɛ sɔ nun’n, sran’m be wun wá jɔ́ be kpa fɔuun asiɛ wunmuan’n su!
◼ E SU TRANMAN ‘MƐN’N I BUE NUAN’ KUN
Like nga Zezi flɛ i “ɲrɛnnɛn dan’n” i nun yɛ mɛn’n m’ɔ su kɔ i bue nuan’n, ɔ́ wíe ɔ. Ɔ seli kɛ: “Blɛ sɔ’n nun’n, nyrɛnnɛn’n ɔ́ yó dan bɔ kɛ ɔ fin mɛn’n i bo bolɛ’n nun lele ndɛ, i wunsu nian yo-man le yɛ i wunsu su yo-man kun le.”—Matie 24:21.
Ɲrɛnnɛn’n yó dan’n afin sa nga bé wá jú’n, be nin a wunman be wunsu le. Sa sɔ’m be agualiɛ’n yɛle “Anannganman Nyanmiɛn b’ɔ kwla like kwlaa yo’n i cɛn dan’n.” I yɛ be flɛ i kɛ “Armagedɔn’n” niɔn.—Sa Nglo Yilɛ 16:14, 16.
Sran kpa kwlaa kunndɛ kɛ mɛn tɛ nga wie ndɛndɛ. Ninnge kpakpa nga Ɲanmiɛn i Famiɛn Diwlɛ’n wá yó mán sran mun’n, amun e kan be nun wie ndɛ.
ƝANMIƐN WÁ YÓ SRAN’M BE YE DAN
Ɲanmiɛn dé “sran kpanngban kpa” mɔ sran fi kwlá kaman be’n naan be tran mɛn uflɛ’n nun fɔuun: Ɲanmiɛn Ndɛ’n se kɛ “sran kpanngban kpa” mɔ sran fi kwlá kaman be’n, bé ‘fín afɛ dan’n nun’ fíte. Kpɛkun, bé trán be nga be yo sa kpa’n be mɛn’n nun. (Sa Nglo Yilɛ 7:9, 10, 14; 2 Piɛr 3:13) Bé wún i wlɛ kɛ ‘Nyanmiɛn Bua Gbanflɛn’n bɔ fɛli i wun yili mɛn’n i ti tɛ’n,’ yɛ ɔ deli be ɔ.—Zan 1:29.
Like nga Ɲanmiɛn kle sran mun ti’n, be liɛ yó ye dan: Mɛn klanman nun’n, “asiɛ’n wunmuan’n su sran’m bé sí Anannganman lelele.” (Ezai 11:9) Ɲanmiɛn klé be wafa ng’ɔ fata kɛ be nin be wiengu mun be tran’n, ɔ nin wafa ng’ɔ fata kɛ be nian asiɛ’n i lika’n. Ɲanmiɛn bɔbɔ seli kɛ: “Min Anannganman bɔ n ti amun Nyanmiɛn’n, n kle amun like, amun bɔbɔ amun kpa yolɛ ti yɛ n kle amun-ɔn. Min yɛ n kle amun atin ng’ɔ fata kɛ amun sin nun nin-ɔn.”—Ezai 48:17.
Ɲanmiɛn cɛ́n e sran kpa mun: I nun mɔ Zezi o asiɛ’n su wa’n, ɔ cɛnnin i janvuɛ Lazali. (Zan 11:1, 5, 38-44) Like nga kɛ ɔ́ wá yó famiɛn ɔ́ yó’n, i nglo kan yɛ ɔ yili i lɛ ɔ.—Zan 5:28, 29.
Mɛn’n yó sran kpa’m be liɛ tititi yɛ be wun jɔ́ be fɔuun: Kɛ Klist wá síe mɛn’n, be su wunman sa tɛ yofuɛ mun kun. Afin, be nga be su kplinman su kɛ bé káci be nzuɛn’n, ɔ́ kán be bo. Zezi kwla yo sɔ sakpa. Afin ɔ si sran’m be akunndan’n nun. Ɔ maan, ɔ kwla si sran ng’ɔ ti kpa’n, ɔ nin sran ng’ɔ timan kpa’n.—Jue Mun 37:9, 10; Ezai 11:3, 4; 65:20; Matie 9:4.
Sa kpakpa nga Ɲanmiɛn se kɛ ɔ́ wá yó be mɔ Biblu’n kan be ndɛ’n, be nun wie yɛ y’a wun be lɛ ɔ. Kɛ Ɲanmiɛn famiɛn diwlɛ’n wá síe asiɛ wunmuan’n, sran’m be “wun jɔ́ be kpa fɔuun” tititi. (Jue Mun 37:11, 29) Ninnge kwlaa nga ti yɛ sran’m be wun ɲrun’n, be su tranman lɛ kun. E lafi su kpa kɛ Ɲanmiɛn wá yó sɔ sakpa. Afin ɔ seli kɛ: “Nian, m’an kaci like’n kwlaa uflɛ. [...] Min ndɛ’n ti nanwlɛ, be kwla fa su.”—Sa Nglo Yilɛ 21:5.
[Foto, bue 5]