Maan sa nga Zoova fa be sie e ɲrun’n be maan e klun jɔ
“Sa nga a fa be sie min nyrun’n, be ti min aja like.”—JUE. 119:111.
?AMÚN TƐ́ SU SƐ?
?Ngue ti yɛ sa nga Zoova fa be sie e ɲrun’n be ti’n, e klun kwla jɔ ɔ?
?Ngue yɛ e kwla yo naan y’a fa e wla y’a gua Zoova su kpa ekun ɔn?
?Ngue ti yɛ ɔ ti cinnjin kpa kɛ e di Ɲanmiɛn junman’n i titi ɔ?
1. (a) ?Kɛ be man sran wie’m be afɔtuɛ’n, wafa sɛ yɛ be sɔ nun ɔn? ?Ngue ti ɔ? (b) ?Kɛ be man tutrefuɛ’n i afɔtuɛ’n, ngue yɛ ɔ yo ɔ?
SRAN wie’m be o lɛ’n, be kloman kɛ be wiengu tukpɛ tu be fɔ, annzɛ sran ng’ɔ leman ɲrun’n ɔ kan ndɛ kle be. Sanngɛ wie’m be klo i sɔ’n kpa, kpɛkun be mian be ɲin be fa afɔtuɛ nga be man be’n su. I lɛ’n kle kɛ wafa nga sran’m be sɔ afɔtuɛ nun’n, ɔ ti fanunfanun. ?Ngue ti ɔ? Tutre’n o nun wie. Afin tutre difuɛ’n, ɔ se i wun kɛ nɛ́n i yɛ ɔ fata kɛ be mɛn i afɔtuɛ ɔ. Ɔ maan ɔ kpalo afɔtuɛ nga be mɛn i’n. I sɔ’n ti’n, ye ng’ɔ fata kɛ ɔ ɲɛn i afɔtuɛ sɔ nun’n, ɔ to fuɛn i.—Nya. 16:18.
2. ?Ngue ti yɛ Klistfuɛ kpa’m be klo fɔ tulɛ ng’ɔ fin Ɲanmiɛn Ndɛ nun’n niɔn?
2 E mɔ e ti Klistfuɛ kpa’n, e liɛ e klo kɛ be tu be fɔ. Kɛ fɔ tulɛ’n fin Ɲanmiɛn Ndɛ nun’n, yɛ e klo i kpa’n niɔn. Afin, sa nga Zoova fa be sie e ɲrun’n be tike e ɲin naan y’a tɔman ɲrɛnnɛn nun. Sa sɔ’m be nun wie yɛle kɛ nán e ɲin blo aɲanbeun kunndɛlɛ’n su, nán e kunndɛ bian nin bla, nán e nɔn drɔgi yɛ nán e nɔn nzan ngboko. (Nya. 20:1; 2 Kor. 7:1; 1 Tɛs. 4:3-5; 1 Tim. 6:6-11) Asa ekun’n, kɛ e fa Ɲanmiɛn i mmla’m be su’n, e ‘klun jɔ lele tratra su.’—Eza. 65:14.
3. ?Jue tofuɛ’n i ayeliɛ benin yɛ ɔ fata kɛ e nian su ɔ?
3 Sɛ e kunndɛman kɛ e nin Zoova e afiɛn saci’n, ɔ fata kɛ e nanti i mmla’m be su tititi. Jue tofuɛ’n kloli Zoova i mmla mun kpa, ɔ maan ɔ nantili be su. Maan e niɛn i ayeliɛ’n su. Ɔ seli kɛ: “Sa nga a fa be sie min nyrun’n, be ti min aja like, afin be maan min klun jɔ.” (Jue. 119:111) ?I sɔ wie yɛ e yo ɔ? ?Annzɛ kusu ɔ yo e kɛ Ɲanmiɛn i mmla’m be su falɛ’n yo ya? Sɛ Ɲanmiɛn i mmla’m be su falɛ ti kekle man e cɛn kunngun’n, nán e sa sin bubu e. Afin e kwla yo ninnge wie mun naan y’a lafi su kpa titi kɛ Ɲanmiɛn i mmla’m be su falɛ’n ti kpa man e blɛ kwlaa nun. Amun e nian ninnge sɔ’m be nun nsan.
MAAN E SRƐ ƝANMIƐN KPA TITI NAAN E WLA W’A TRƐN I SU
4. ?Aklunjuɛ blɛ nun o, blɛ kekle nun o, ngue yɛ Davidi w’a yacimɛn i yolɛ le ɔ?
4 Aklunjuɛ blɛ nun o, blɛ kekle nun o, Famiɛn Davidi w’a yaciman Ɲanmiɛn su lafilɛ le. Ɔ seli kɛ: “Anannganman, n kpɛ min nyin ɔ wun lɔ. Min Nyanmiɛn, n fa min wla’n n gua ɔ su.” (Jue. 25:1, 2) ?Ngue ti yɛ Davidi kwla fɛli i wla’n guali Zoova su dan sɔ ɔ?
5, 6. ?Wafa sɛ yɛ Davidi kleli kɛ ɔ klo Zoova naan ɔ nin i be afiɛn mantan kpa ɔ?
5 Sran wie’m be o lɛ’n, sɛ be sa mian sika wun annzɛ like uflɛ wun’n, yɛ be bisa be janvuɛ osu ɔ. ?Sɛ e lɛ i sɔ janvuɛ’n, é sé kɛ ɔ klo e sakpa? I sɔ yɛ sran wie’m be nin Ɲanmiɛn be nanti ɔ. Yɛle kɛ, kɛ be sa mian’n yɛ be srɛ Ɲanmiɛn ɔn. Davidi w’a yomɛn i sɔfuɛ. I liɛ’n, blɛ kpa nun o, blɛ kekle nun o, ɔ nin Zoova be kokoli yalɛ titi. Afin ɔ klo Zoova yɛ ɔ lafi i su.—Jue. 40:9.
6 Davidi manmannin Zoova yɛ ɔ yili i ayɛ. Ɔ seli kɛ: “Anannganman e Min, ɔ dunman’n ɔ yo nyɛnmɛn asiɛ wunmuan’n su! Ɔ nyrun bɔ a lɛ i’n i dan’n ɔ fu tra nyanmiɛn b’ɔ la nglo lɔ plaii’n su.” (Jue. 8:2) ?Wafa nga Davidi i ndɛ sɔ’n kle kɛ ɔ nin Ɲanmiɛn be afiɛn mantan kpa’n, amun sieli i nzɔliɛ? Nanwlɛ, Zoova i ɲrun m’ɔ le i’n, ɔ nin i dunman’n be yoli Davidi i ɲɛnmɛn dan. I sɔ’n ti’n, ɔ manmannin Zoova “titi.”—Jue. 35:28.
7. ?Sɛ e nin Zoova e koko yalɛ titi’n, i bo gúa sɛ?
7 Kɛ Davidi sa’n, ɔ fata kɛ e nin Zoova e koko yalɛ titi. I liɛ’n, é kwlá fá e wla’n gúɛ i su kpa. Biblu’n se kɛ: “An fa amun wun mantan Nyanmiɛn, yɛ i kusu fɛ́ i wun mántán amun-ɔn.” (Zak 4:8) Nanwlɛ, sɛ e nin Ɲanmiɛn e koko yalɛ’n, e nin i e afiɛn mántan kpa. Like cinnjin kpa ng’ɔ fata kɛ e yo naan Ɲanmiɛn w’a fɛ i wawɛ’n w’a man e’n, i kun yɛ ɔ o lɛ.—An kanngan 1 Zan 3:22 nun.
8. ?Kɛ é srɛ́ Ɲanmiɛn’n, ngue ti yɛ ɔ fataman kɛ e kan ndɛ kunngba’n e flan nun trilili ɔ?
8 ?Kɛ é srɛ́ Ɲanmiɛn’n, ndɛ kunngba’n yɛ e kan flan nun cɛn kwlaa ɔ? Sɛ i sɔ yɛ e yo’n, maan e dun mmua bu ndɛ nga é fá wlá srɛlɛ nun’n i akunndan. Afin amun nian. Sɛ blɛ kwlaa nga amun nin amun janvuɛ bé kókó yalɛ’n, ndɛ kunngba’n yɛ amun kan kle i trilili’n, ɔ́ yó i sɛ? Ɔ su cɛman naan amun liɛ w’a flɛn i naan w’a nianman amun lɔ kun. E si kɛ Zoova su kpaloman i sufuɛ nanwlɛfuɛ’m be srɛlɛ’n le. Sanngɛ nán e niɛn i sɔ’n ti naan kɛ e nin i é kókó yalɛ’n, e kan ndɛ kunngba’n e flan nun trilili.
9, 10. (a) ?Ngue yɛ e kwla fa wla srɛlɛ’n nun ɔn? (b) ?Ngue yɛ ɔ kwla uka e naan y’a srɛman Zoova paloo sa ngbɛn ɔn?
9 Sɛ e waan e nin Ɲanmiɛn e afiɛn mantan kpa’n, kɛ e nin i kókó yalɛ’n, nán maan e ijɔ paloo e guɛ i lɛ. Sanngɛ maan e kan e klun ndɛ kle i. Sɛ e yo i sɔ kpa’n, yɛ e nin i e afiɛn mántan kpa ɔ. ?Ngue yɛ e kwla fa wla srɛlɛ’n nun ɔn? Ɲanmiɛn Ndɛ’n tɛ su man e. I waan: “Sa’n kwlaa nun nin like kwlaa ng’ɔ mian amun’n, an kan kle Nyanmiɛn, an srɛ i, an jran su kpa, yɛ an lɛ i ase.” (Fil. 4:6) Nanwlɛ, like kwlaa ng’ɔ mian e’n, annzɛ like kwlaa nga mɔ maan e nin Ɲanmiɛn e afiɛn kwla mantan kpa’n, e kwla kan kle Ɲanmiɛn e srɛlɛ’n nun.
10 Ɲanmiɛn yoli maan be klɛli i sufuɛ nanwlɛfuɛ bla nin yasua wie’m be srɛlɛ’n, sieli i Biblu’n nun. Sɛ e kanngan be’n, e kwla wun wafa nga e kusu e kwla srɛ Ɲanmiɛn’n. (1 Sam. 1:10, 11; Yol. 4:24-31) Jue fluwa nun’n, e kwla wun wafa nga sran wie’m be tuli be klun be srɛli Ɲanmiɛn, annzɛ be toli jue be mɛnnin i’n. Wafa nga sran kun i wla kwla bo i wun ju’n, ɔ nin aklunjuɛ ng’ɔ kwla di’n, srɛlɛ nin jue sɔ’m be yi i nglo. Sɛ e kanngan be nun naan e bu be su akunndan’n, bé úka e kpa. Yɛle kɛ e su srɛman Zoova paloo e guɛmɛn i lɛ.
MAAN E BU ƝANMIƐN I MMLA’M BE SU AKUNNDAN KPA
11. ?Ngue ti yɛ ɔ fata kɛ e bu Ɲanmiɛn mmla’m be su akunndan ɔn?
11 Davidi seli kɛ: “Anannganman i like ng’ɔ kle’n be ti nanwlɛ. Be kle sran ng’ɔ siman sa’n i ngwlɛlɛ.” (Jue. 19:7) Sɛ e siman sa naan e fa Ɲanmiɛn mmla’m be su’n, é kwlá sí ngwlɛlɛ. Sanngɛ afɔtuɛ nin ndɛ wie’m be o lɛ’n, ɔ fata kɛ e bu be su akunndan kpa naan e nin Ɲanmiɛn y’a nanti klanman titi. I wie yɛle kɛ sɛ junman su lɔ annzɛ suklu lɔ be sa e nian’n, Biblu’n nun ndɛ wie’m be kwla uka e naan y’a fɔnman. Ndɛ wie’m be kle e kɛ e bu mmoja’n i like dan, annzɛ e wlawla e wun kpa annzɛ nán e yo mɛn’n nunfuɛ. Sɛ e bu Ɲanmiɛn mmla’m be su akunndan’n, é kwlá búabúa e wun síe naan sa fanunfanun sɔ’m be nun y’a yi e ja. Ɔ maan, e su wunman e ɲrun fiaan.—Nya. 15:28.
12. ?Kosan benin yɛ ɔ fata kɛ e akunndan tran be su titi ɔ?
12 ?Lele nin i kɛ kasiɛ nga Ɲanmiɛn boli be’n be kpɛn su’n, e kle kɛ Ɲanmiɛn klun sa yolɛ’n yɛ ɔ ti e cinnjin kpa ɔ? ?Yɛ e lafi su kɛ kasiɛ nga Ɲanmiɛn boli be’n bé kpɛ́n su? Kasiɛ sɔ’n kun yɛle Babilɔni klɔ dan m’ɔ́ wá sáci’n. ?E lafi su kpa kɛ sa sɔ’n w’a mantan koko kpa? Kɛ é bó Ɲanmiɛn Ndɛ’n i nun like suanlɛ bo’n, e lafili su kpa kɛ cɛn wie lele é ɲán anannganman nguan asiɛ m’ɔ́ wá káci lika klanman’n su. E lafili su ekun kɛ Ɲanmiɛn wá cɛ́n sran mun. ?Yɛ andɛ li? ?E tɛ lafi ndɛ sɔ’m be su kpa? ?Jasin fɛ bolɛ juejue su’n tɛ lo e, annzɛ kusu e bɔbɔ e ninnge liɛ’m be yolɛ’n yɛ ɔ lo e dan ɔn? ?Yɛ Zoova m’ɔ lɛ atin sie nglo nin asiɛ’n i sin jranlɛ’n, ɔ nin i dunman fɛ m’ɔ fata kɛ e bo’n nin? ?Be tɛ yo e cinnjin wie? Sɛ e akunndan tran kosan sɔ’m be su titi’n, é kán ndɛ nga jue tofuɛ’n kannin’n wie. Ɔ seli Ɲanmiɛn kɛ: “Sa nga a fa be sie min nyrun’n, be ti min aja like.”—Jue. 119:111.
13. ?Ngue ti yɛ Klistfuɛ klikli’m b’a wunman ndɛ wie’m be wlɛ be ja nun lɛ ɔ? An kan ndɛ sɔ wie’m be ndɛ.
13 Biblu’n nun ndɛ wie’m be o lɛ’n, e wunman be wlɛ kpa e ja nun lɛ. Kɛ i blɛ ju mɔ Zoova tu be ɲin’n, yɛ e wun be wlɛ ɔ. I wie yɛle ndɛ wie mɔ Zezi kan kleli i akoto mun’n. Ɔ seli be kpɛ sunman kɛ ɔ́ wá wún ɲrɛnnɛn naan bé kún i. (An kanngan Matie 12:40 nin 16:21 nun.) Sanngɛ, akoto’m b’a wunman ndɛ sɔ’n i wlɛ. Kɛ Zezi wuli mɔ Ɲanmiɛn cɛnnin i’n, m’ɔ fiteli i sɔnnzɔnfuɛ’m be ɲrun’n, yɛ “be wunnin Nyanmiɛn Ndɛ nga be klɛli’n i wlɛ-ɔ.” (Lik 24:44-46; Yol. 1:3) I sɔ kunngba’n, kɛ afuɛ 33 nun Pantekɔtu nun Ɲanmiɛn fɛli i wawɛ’n mannin Zezi i sɔnnzɔnfuɛ mun’n, yɛ be wunnin i wlɛ kɛ Ɲanmiɛn wá táka i Sielɛ’n ɲanmiɛn su lɔ ɔ.—Yol. 1:6-8.
14. ?E blɛ liɛ nun’n, like kpa benin yɛ Klistfuɛ’m be yoli mɔ e kwla nian su ɔ?
14 E blɛ liɛ’n nun’n, sa kunngba’n yɛ ɔ yoli ɔ. Yɛle kɛ, kɛ ‘mɛn kɔ́ i bue nuan’n,’ sa nga Klistfuɛ kpa’m be buli i kɛ bé wá jú’n, b’a juman. (2 Tim. 3:1) Be buli i kɛ afuɛ 1914 nun’n, bé wá kɔ́ ɲanmiɛn su. Kpɛkun w’a yoman sɔ. Kɛ ɔ yoli sɔ’n, bé wá boli be ɲin ase be suannin Ɲanmiɛn Ndɛ’n nun like kpa. Ɔ maan be wunnin i wlɛ kɛ junman dan kpa kun o lɛ m’ɔ fata kɛ be di ɔ. Yɛle kɛ, ɔ fata kɛ be bo jasin fɛ’n i mɛn wunmuan’n nun. (Mar. 13:10) Ɔ maan afuɛ nga be flɛ i 1922 nun’n, be yoli aɲia dan kun Amlɛnkɛn’m be lɔ lika nga be flɛ i Oaio i klɔ nga be flɛ i Cedar Point i su lɔ. Aɲia sɔ’n i bo lɔ’n, Joseph Rutherford m’ɔ fa jasin fɛ’n bolɛ’n i nun ta’n, ɔ ijɔli nzra nun. Ɔ seli kɛ: “Famiɛn’n su sie! Amun ti i ndolo bofuɛ. I sɔ’n ti’n, an bo Famiɛn’n nin i Sielɛ’n be jasin fɛ’n, an bo, an bo.” Kɛ ɔ fin i lɛ’n, ‘Nyanmiɛn sielɛ’n i jasin fɛ’ bolɛ’n yɛ be fa sie Zoova i sufuɛ’m be nzɔliɛ ɔ.—Mat. 4:23; 24:14.
15. ?Sɛ e bu wafa nga Zoova nin i sufuɛ’m be nantili laa’n nin e blɛ su’n i akunndan’n, i bo gúa sɛ?
15 Wafa nga Zoova nin i sufuɛ’m be nantili laa’n ɔ nin wafa ng’ɔ nin be nanti e blɛ su’n, ɔ yo ɲɛnmɛn. Sɛ e bu i su akunndan’n, é láfi su kpa kɛ Zoova kwla yo ninnge ng’ɔ seli kɛ ɔ́ yó be’n naan ɔ́ yó be sakpa. Kpɛkun e wun blíblí e kɛ ninnge sɔ’m be ju ndɛndɛ.
MAAN E SU ƝANMIƐN NAAN E FA E WLA GUƐ I SU
16. ?Kɛ e di Ɲanmiɛn junman’n i juejue su’n, i bo gua sɛ?
16 Ɲanmiɛn Zoova ti juejuefuɛ. Jue tofuɛ’n seli kɛ: “?Anannganman, wɔ bɔ a ti Nyanmiɛn bɔ a sie mɛn wunmuan’n, wan cɛ yɛ ɔ kwla kɛ wɔ sa-a?” Ɔ kannin ekun kɛ: “A lɛ wunmiɛn, a kwla, a man ɔ sa fama’n su nglo.” (Jue. 89:9, 14) Kɛ mɔ Zoova ti i sɔfuɛ’n ti’n, kɛ e su i juejue su’n, ɔ yo i fɛ yɛ ɔ yra e su. I kpɛnngbɛn o, i bakanngan o, i yasua nin bla o, ɔ yra be kwlaa be su. Afin ɔ wun kɛ be ‘kplin be nyin’ be su i. (Nya. 31:27) I sɔ yolɛ nun’n, Ɲanmiɛn bɔbɔ yɛ e nian i ajalɛ’n su ɔ. Kɛ e yo sɔ’n, e di aklunjuɛ. Kpɛkun Ɲanmiɛn klun jɔ wie.—An kanngan Jue Mun 62:12 nun.
17, 18. ?Kɛ e lafi Zoova su mɔ e yo i klun sa’n, i bo gua sɛ? An fa sa kun yiyi nun.
17 Maan e yo sa m’ɔ kle kɛ e lafi Ɲanmiɛn su sakpa’n. Sɛ e yo sɔ’n, é fá e wla’n é gúɛ i su kpa ekun. Kɛ Izraɛlifuɛ’m be juli mɛn nga Ɲanmiɛn seli kɛ ɔ́ fá mán be’n i tiwa’n, maan e fa sa kun m’ɔ juli’n i sunnzun ase e nian. Zoova kleli like ng’ɔ fata kɛ i ɲrun jranfuɛ nga be suɛ i alaka’n be yo’n. Ɔ seli be kɛ be nin alaka’n be jra Zurdɛn nzue’n nun. Kɛ Izraɛlifuɛ’m be juli Zurdɛn’n i nuan lɛ’n, be wunnin kɛ nzue’n w’a yi lele w’a tratra su, yɛ ɔ sonjiman aɔwi. Afin nzue tɔli. ?Ngue yɛ Izraɛlifuɛ’m bé yó ɔ? ?Bé sé kɛ bé kpɛ́ ngblaliɛ Zurdɛn nzue’n i nuan lɛ naan sɛ ɔ di le mɔcuɛ annzɛ anglo naan nzue’n kan ase’n nn b’a kpɛ? B’a seman sɔ. Afin be fali be wla’n kwlaa guali Zoova su, kpɛkun be yoli like nga i waan be yo’n. ?Kɛ be yoli sɔ’n, i bo guali sɛ? Ɲanmiɛn Ndɛ’n waan: “Kɛ Nyanmiɛn nyrun jranfuɛ’m be juli Zurdɛn nuan bɔ be ja’n kpɛnnin nzue nun cɛ’n, nzue’n i bue ng’ɔ fin nglo lɔ’n, ɔ jrannin [...] naan Izraɛlfuɛ’m b’a kpɛ i be ja nun Zeriko ndɛnman lɛ. Kɛ nzrafuɛ’m bé sín’n, wuun Nyanmiɛn nyrun jranfuɛ nga be sua Nyanmiɛn i alaka’n be jin Zurdɛn’n i afiɛn aunnyan siɛ’n su, b’a keje-man be wun lele saan sran’m be kwlaa be sinnin.” (Zoz. 3:12-17) Kɛ Izraɛlifuɛ’m be wunnin kɛ nzue m’ɔ sonji kpuu’n ɔ ka lɛ jrannin’n, ɔ yoli be fɛ dan. Nanwlɛ, kɛ Izraɛlifuɛ’m be fali ndɛ nga Zoova kan kleli be’n su’n, be wa lafili i su kpa trali laa’n.
18 E si kɛ andɛ Zoova su yoman abonuan sa kɛ nga e fa wunnin i lɛ’n sa. Sanngɛ kɛ e lafi i su mɔ e yo i klun sa’n, ɔ yra e su. Yɛle kɛ ɔ fɛ i wawɛ’n man e naan y’a kwla bo i Sielɛ’n i jasin fɛ’n mɛn wunmuan’n nun. Asa ekun’n, Zezi Klist m’ɔ yoli Zoova i jasin bofuɛ dan’n, ɔ seli kɛ ɔ́ súan i sɔnnzɔnfuɛ’m be bo. Ɔ seli be kɛ: “I sɔ’n ti, an wɔ ko kle nvle-nvle’n kwlaa be like maan be kaci n sɔnnzɔnfuɛ [...]. An nian, min nin amun e o cɛn kwlaa lele mɛn’n fá wíe.” (Mat. 28:19, 20) Jasin bofuɛ wie mɔ laa be sa ɲan annzɛ be taman ijɔ’n, be wun i wlɛ kɛ Ɲanmiɛn wawɛ’n suan be bo. Afin siɛn’n, be bo jasin fɛ’n ɲannzuɛn kunman be.—An kanngan Jue Mun 119:46 nin 2 Korɛntfuɛ Mun 4:7 nun.
19. ?Kannzɛ afɛ o e su’n, ngue ti yɛ e wla kwla gua ase ɔ?
19 Tukpaciɛ nin kpɛnngbɛn yolɛ’n kle aniaan wie’m be yalɛ. Ɔ maan be kwlá diman Ɲanmiɛn junman’n kɛ nga be kunndɛ kɛ bé dí’n sa. Sanngɛ be wla kwla gua ase. Afin “e Si, ɔ si aunnvuɛ, ɔ ti Nyanmiɛn kun b’ɔ jran e sin sa’n kwlaa nun.” Ɔ maan, Ɲanmiɛn wun afɛ ng’ɔ o be su’n. (2 Kor. 1:3) I lɛ’n kle kɛ junman kwlaa nga e di man Ɲanmiɛn’n, ɔ bu i like. Yɛ maan ɔ tran e kwlaa e klun kɛ tɛ nga Klist fɛli i wun yili mɔ e lafi su’n, yɛ ɔ ti like cinnjin nga ti yɛ cɛn wie lele é fíte nun’n niɔn.—Ebr. 10:39.
20, 21. ?Wafa nga e kwla kle kɛ e lafi Zoova su’n, i wie yɛle benin?
20 Kɛ e wunmiɛn ju lɛ’n, ɔ nin kɛ e sa nun yo fɛ ju lɛ’n yɛ e su Ɲanmiɛn ɔn. E kunndɛ kɛ ‘jasin fɛ i kanlɛ b’ɔ ti e junman’n,’ é tú e klun é kán. (2 Tim. 4:5) Kɛ e di junman sɔ mɔ sran’m ‘be wun sa ng’ɔ ti nanwlɛ’n i wlɛ’n,’ ɔ yo e fɛ dan. (1 Tim. 2:4) Nanwlɛ, kɛ e manman Zoova mɔ e yi i ayɛ’n, e nin i e afiɛn mantan kpa. (Nya. 10:22) Asa ekun’n, i sɔ’n uka e maan kannzɛ lika’n yo sɛ yo sɛ’n, e lafi Ɲanmiɛn su kpa tra laa’n.—Rɔm. 8:35-39.
21 Y’a wun kɛ kɛ ɔ ko yo naan y’a kwla lafi Zoova su’n, ɔ fata kɛ e wla e wun ase e yo ninnge wie mun. I sɔ’n ti’n, maan e tu e klun e srɛ Ɲanmiɛn titi. Wafa nga Zoova yoli mɔ i klun sa’n kpɛnnin su laa’n, ɔ nin wafa nga ɔ́ wá yó naan w’a kpɛn su e ɲrun lɔ’n, maan e bu be su akunndan. Yɛ like ng’ɔ se e kɛ e yo’n, maan e yo i titi naan e lafi i su. Sa nga Zoova fa be sie e ɲrun’n bé ká lɛ tititi. Sɛ e nian be su e nanti’n, é ɲán anannganman nguan.
[Foto, bue 12]
[Foto, bue 15]
?É fá e wla gúa Zoova su kɛ Zozie blɛ su Izraɛlifuɛ’m be liɛ’n sa? (An nian ndɛ kpɔlɛ 17 nin 18 nun.)