?Amun a kaci mlɔnmlɔn?
“Maan Nyanmiɛn kaci amun akunndan’n naan an kaci mlɔnmlɔn.”—RƆM. 12:2.
?AMÚN TƐ́ SU SƐ?
?Ngue ti yɛ ɔ ti cinnjin kɛ Klistfuɛ kwlaa kaci ɔ?
?Ngue yɛ ɔ fata kɛ Klistfuɛ kwlaa kaci i ɔ?
?Ngue yɛ é yó naan y’a kwla kaci ɔ?
1, 2. ?Ngue yɛ klɔ sran kwlaa nian su ɔ?
KLƆ sran kwlaa i like m’ɔ o i wun’n yɛle kɛ, ɔ nian sran nga be tɛli i’n, ɔ nin i osufuɛ mun nin lika ng’ɔ tran lɛ’n i nunfuɛ’m be ninnge yolɛ wafa’n su. I ti yɛ ɔ le sran kun nin i wun wlawlalɛ wafa’n, ɔ nin i aliɛ m’ɔ klo i’n niɔn.
2 Like kun ekun mɔ sran nian su’n yɛle ngwlɛlɛ nga be kle i’n. Yɛle kɛ be kle i kɛ sa wie yolɛ ti kpa naan wie timan kpa. I lifuɛ’n ti cinnjin tra like nga e di’n, ɔ nin e wun wlawlalɛ wafa’n. Ɔ le sran kun i like m’ɔ bu i like kpa annzɛ like tɛ ɔ. Sanngɛ, nán like nga be kleli e’n i ngunmin su yɛ e nian e fa ajalɛ mun ɔn. E bɔbɔ e klun akunndan’n i su wie yɛ e nian ɔn. Biblu’n se kɛ blɛ sunman “be bɔ be ti-man Zuif’n [yɛle kɛ be timan Ɲanmiɛn sufuɛ’n] bɔ be si-man mmla’n be yo sa nga be klɛli mmla’n nun kɛ sran yo’n.” (Rɔm. 2:14) ?Ɔ maan, sɛ Ɲanmiɛn w’a manman sa kun i su mmla trele’n, ngue yɛ é yó ɔ? ?Like nga be kleli e’n annzɛ lika nga e tran lɛ’n i nunfuɛ’m be ninnge yolɛ’n, be su yɛ é nían é fá ajalɛ ɔ?
3. An kle like nɲɔn mɔ be ti’n, Klistfuɛ’m be nianman mɛn nunfuɛ’m be ninnge yolɛ wafa’n su’n.
3 Klistfuɛ’m be nianman wafa nga be tali be’n, ɔ nin wafa nga lika nga be tranlɛ’n i nunfuɛ’m be yo be ninnge mun’n, be su. Sa nga ti yɛ be yoman sɔ’n, e kwla kan be nun cinnjin nɲɔn ndɛ. I klikli yɛle kɛ Biblu’n waan: “Atin wie o lɛ’n a wun i-ɔ, ɔ waan ɔ ti kpa sanngɛ i agualiɛ’n yɛlɛ wie.” (Nya. 16:25) Fɔ m’ɔ o e nun ti’n, nán ajalɛ nga e fa’n be ngba yɛ be bo gua kpa ɔ. (Nya. 28:26; Zer. 10:23) I nɲɔn su’n yɛle kɛ Satan yɛ ɔ ti “mɛn nga i min’n” niɔn. Ɔ maan, wafa nga mɛn nunfuɛ’m be yo ninnge mun’n, ɔ nin like nga be bu i kɛ ɔ ti kpa annzɛ ɔ ti tɛ’n, ɔ nin ninnge nga be yolɛ w’a tru’n, Satan yɛ ɔ wlawla sran mun yɛ be yo ɔ. (2 Kor. 4:4; 1 Zan 5:19) I sɔ’n ti’n, sɛ e waan Zoova klun jɔ e wun naan ɔ yra e su’n, ɔ fata kɛ e fa afɔtuɛ nga Rɔmfuɛ Mun 12:2 man’n su.—An kanngan nun.
4. ?Like suanlɛ nga nun’n, kosan onin yɛ é wá tɛ́ be su ɔ?
4 Like suanlɛ nga nun’n, é wá tɛ́ kosan cinnjin nsan su naan y’a kwla wun Rɔmfuɛ Mun 12:2 i wlɛ kpa. (1) ?Ngue ti yɛ ɔ fata kɛ e “kaci” ɔ? (2) ?Ngue yɛ ɔ fata kɛ e kaci i ɔ? (3) ?Ngue yɛ é yó naan y’a kaci ɔ?
LIKE NGA TI YƐ Ɔ FATA KƐ E KACI’N
5. ?Wan mun yɛ Pɔlu mannin be afɔtuɛ ng’ɔ o Rɔmfuɛ Mun 12:2 nun’n niɔn?
5 Pɔlu klɛli Rɔmfuɛ Mun fluwa’n ko mannin Klistfuɛ nga Ɲanmiɛn kpali be sieli be ngunmin mɔ be o Rɔmu lɔ’n. Afuɛ nga be flɛ i 56 i nun yɛ ɔ klɛli fluwa sɔ’n niɔn. (Rɔm. 1:7) Ɔ seli be kɛ be kaci naan ‘nán be yo kɛ sran mun bɔ be o lɛ ndɛ’n be sa’ kun. Yɛle kɛ nán be nian Rɔmufuɛ mun mɔ be suman Ɲanmiɛn’n be ninnge yolɛ’n, nin be akunndan bulɛ wafa’n, ɔ nin be wun wlawlalɛ wafa’n su. Kɛ ɔ́ fá jú mɔ Pɔlu se be kɛ ‘nán an yo’n,’ ɔ kle kɛ aniaan sɔ’m be nun wie’m be tɛ nian Rɔmufuɛ’m be ayeliɛ’n su. ?Ngue ti yɛ aniaan sɔ’m be tɛ yo sɔ ɔ?
6, 7. ?Pɔlu blɛ su’n, ngue ti yɛ seiin nantilɛ’n yoli kekle mannin Rɔmu lɔ Klistfuɛ mun ɔn?
6 Be nga be kɔ Rɔmu lɔ niannianlɛ andɛ’n, be wun Rɔmufuɛ mun be lalafuɛ amuɛn sua, nin asieliɛ, nin ninnge wafawafa nga be kplannin be mɔ b’a bubu’n. Ninnge sɔ’m be nun wie’m be o lɛ w’a di afuɛ kɔe 2.000. Kɛ a wun be’n, a kwla si wafa nga laa Rɔmufuɛ’m be dili be mɛn’n, ɔ nin wafa nga be sɔli be amuɛn mun’n. Fluwa nga be kan laa sa’m be ndɛ’n be nun wie’m be waan laa Rɔmu lɔ’n, safuɲrɛn’m be tu tokofi nun ngondin lelee kun fa wu. Asa ekun’n, sran’m be si kakaklolo’m be wanndilɛ’n nun akplowa. Wie’m be kan ngowa tɛtɛ yɛ be yi anɔ mɔ be kle ɲannzuɛn sa mun’n. I kwlaa sɔ’n, sran’m be yia be nian. Like kun ekun ng’ɔ o su’n, yɛle kɛ Rɔmu yoli aboje klɔ. Yɛ i su aata dilɛ nin sika kunndɛlɛ yoli pɔpɔ.—Rɔm. 6:21; 1 Piɛ. 4:3, 4.
7 Rɔmufuɛ’m be sɔ ninnge kpanngban yɛ be amuɛn sua’m be sɔnnin. Ɔ nin i sɔ ngba’n, be nun sunman be diman be amuɛn’m be su. Sɛ á wún kɛ be su sɔ amuɛn’n, nn be su fite ba nɔnman mun, annzɛ be su ja bla annzɛ kusu be su yo sɛ. Wafa nga seiin nantilɛ’n yoli kekle mannin lɔ Klistfuɛ mun’n, amun bu i akunndan be nian! Laa be nun wie’m be sɔ amuɛn. Yɛ be wa wlali nzuɛn tɛtɛ wie’m be ase naan b’a yo be batɛmu. Sanngɛ be nin a wieman kaci. Ɔ fata kɛ be mian be ɲin ekun naan be kaci mlɔnmlɔn.
8. ?Ngue ti yɛ seiin nantilɛ’n ti kekle man andɛ Klistfuɛ mun ɔn?
8 Wafa nga seiin nantilɛ’n yoli kekle mannin laa Klistfuɛ nga be o Rɔmu lɔ’n, i kunngba’n yɛ ɔ ti kekle man andɛ Klistfuɛ mun ɔn. Afin akunndan tɛtɛ nga sran’m be bu’n w’a tru dan. (An kanngan Efɛzfuɛ Mun 2:2, 3 ɔ nin 1 Zan 2:16 nun.) E wun i sɔ liɛ’n ninnge kwlaa nga sran’m be yo’n nun. Ɔ maan ɔ fata kɛ e nian e wun su naan y’a buman akunndan sɔ’n wie. I sɔ ti yɛ afɔtuɛ nga Pɔlu mannin’n, ɔ fata kɛ e nanti su’n niɔn. Ɔ seli kɛ: “Nán an yo kɛ sran mun bɔ be o lɛ ndɛ’n be sa.” Yɛ ɔ ukali su kɛ: “An kaci.” ?E kaci wafa sɛ?
?NGUE YƐ Ɔ FATA KƐ E KACI I Ɔ?
9. ?Ka naan b’a yo sran kun i batɛmu’n, ajalɛ benin yɛ ɔ fa ɔ?
9 Kɛ sran kun bo Ɲanmiɛn Ndɛ’n i nun like suanlɛ bo m’ɔ fa su’n, ɔ fa ajalɛ wie m’ɔ kle kɛ ɔ su kaci ɔ. I wie yɛle kɛ ɔ tu Ɲanmiɛn sulɛ wafa ng’ɔ timan su’n i nun. Kpɛkun ɔ fa nzuɛn uflɛ, yɛ ɔ nian Zezi i ajalɛ su. (Efɛ. 4:22-24) Afuɛ kwlaa nun’n, sran akpi akpi ya kpanngban be fɛ i sɔ ajalɛ’n. Kpɛkun be fa be wun man Ɲanmiɛn Zoova yɛ be yo be batɛmu. Nanwlɛ, i sɔ’n yo e fɛ. Sanngɛ e si kɛ nán e ngunmin yɛ ɔ yo e fɛ ɔ. Ɔ yo Zoova fɛ wie. (Nya. 27:11) ?Ajalɛ ng’ɔ fata kɛ sran kun fa m’ɔ́ klé kɛ w’a kaci’n i ngba yɛle nga y’a kan be ndɛ lɛ’n?
10. ?Ngue ti yɛ e kwlá seman kɛ sran nga w’a yo kpa w’a tra laa’n, w’a kaci mlɔnmlɔn ɔn?
10 Kannzɛ sran kun fa ajalɛ wie m’ɔ kle kɛ ɔ su fɛ i wun mantan Zoova’n, annzɛ ɔ su yo kpa tra laa’n, i sɔ’n kleman kɛ w’a kaci mlɔnmlɔn. Maan e fa sunnzun ase kun e nian. Wie liɛ’n, be se kɛ b’a kaci like nga annzɛ b’a yi i uflɛ annzɛ w’a yo kpa w’a tra laa’n. Blɛ sunman nán like bɔbɔ ba’n yɛ be kacili i ɔ. Sɛ fluwa o like sɔ’n wun’n, wie liɛ fluwa sɔ’n yɛ be kacili i ɔ. Annzɛ kusu like kunngba cɛ yɛ kɛ bé yí’n, be fa ukali su annzɛ be fa tɛli i wun ɔn. Fluwa kun m’ɔ tu Biblu’n nun ndɛ’m be bo’n waan kɛ Rɔm[fuɛ] Mun 12:2 se kɛ ‘kaci’n,’ yɛle kɛ Ɲanmiɛn wawɛ’n fanngan nun sran’n ɔ fa akunndan uflɛ. Ɔ maan, Klistfuɛ ng’ɔ kaci’n, ɔ kaman sa tɛ’n nin ijɔlɛ tɛtɛ’n nin sa sukusuku yolɛ’n i ase wlalɛ’n i ngunmin su. Afin be nga be siman Biblu’n nun ndɛ bɔbɔ’n, be nun wie’m be nian be wun su naan b’a yomɛn i sɔ ninnge mun. ?I sɔ ti’n niɔn, kɛ Pɔlu se kɛ e mɔ e ti Klistfuɛ’n e kaci’n, ngue yɛ ɔ fata kɛ e kaci i ɔ?
11. ?Kɛ nga Pɔlu fa kannin sa’n, ngue yɛ ɔ fata kɛ sran kun kaci i naan b’a kwla se kɛ w’a kaci ɔ?
11 Pɔlu seli kɛ: “Maan Nyanmiɛn kaci amun akunndan’n.” Fluwa nga Pɔlu klɛli ko mannin Rɔmufuɛ mun’n i ndɛ tre kun nun’n, ɔ kannin sran mɔ ‘akunndan tɛtɛ bali be ti nun’n’ be ndɛ. I waan i sɔfuɛ’m be “sa tɛtɛ yolɛ’n kwlaa w’a kun be kpo, be ti sran tɛ, be konvi ti kpli, be klun yo wi, be nyin ci sran nin like, be kun sran, be klo utre, be ti gblɛ.” Yɛ be yo sa tɛtɛ wie mun ekun. (Rɔm. 1:28-31) Ɔ maan kɛ Pɔlu se Klistfuɛ nga be tran sran kɛ ngalɛ sa’m be afiɛn’n, be kɛ be ‘kaci be akunndan’n naan be kaci mlɔnmlɔn’n,’ i ndɛ yo fɛ.
12. ?Akunndan benin yɛ sran kpanngban be bu i andɛ ɔ? ?Ngue ti yɛ ɔ fata kɛ e nian e wun su ɔ?
12 Sran nga e nin be tran’n, be nun sunman be ti kɛ be nga Pɔlu kannin be ndɛ lɛ’n sa. Be waan mmla su dilɛ’n ti lalafuɛ like naan like kwlaa nga sran kun klo kɛ ɔ́ yó’n, maan ɔ yo. Siɛ nin niɛn nin suklu klefuɛ sunman be tran lɛ be nian ba mun be yo like nga be klo’n. Afin be se kɛ sran kwlakwla lɛ atin yo like kwlaa kpan. Be bɔbɔ nga be waan be su Ɲanmiɛn’n, be nun sunman be se kɛ sɛ b’a diman Ɲanmiɛn i mmla’m be su’n, ɔ timan like tɛ. Naan sran kun i like liɛ ng’ɔ bu i kɛ ɔ ti kpa’n yɛ ɔ yo ɔ. (Jue. 14:1) Sran kɛ ngalɛ sa’m be afiɛn tranlɛ yo ya. Afin sɛ y’a nianman e wun su’n, ɔ cɛman naan y’a kpa afɔtuɛ nga Ɲanmiɛn i anuannzɛ’n man e’n be nun. Kpɛkun sɛ asɔnun’n nun be yoman like wie kɛ e fa klo sa’n, y’a plan. Asa ekun’n, be ɲin su yiyilɛ ɔ nin ɛntɛnɛti, ɔ nin suklu dan dilɛ’n be su afɔtuɛ nga be jran Biblu’n i nun ndɛ’n su be man e’n, ɔ cɛman naan y’a kpalo wie mun.
13. ?Ngue ti yɛ ɔ fata kɛ e bu e klun lɔ kpa e nian ɔn?
13 Sɛ e kunndɛman kɛ é yó kɛ sran nga be o lɛ andɛ’n be sa’n, ɔ fata kɛ e bu e klun lɔ kpa e nian naan wafa nga e ti’n, e di e wun nanwlɛ. E usa e wun kɛ: ‘?Ngue su yɛ min akunndan’n wo ɔ? ?Akunndan tɛ wie o n klun lɔ? ?Mmla benin su yɛ n nanti ɔ?’ Kosan sɔ’m be ti cinnjin kpa, afin sran siman e klun akunndan’n saan e bɔbɔ yɛ e si i ɔ. Atrɛkpa kɛ sran’m be wun e’n, be yi e ayɛ. Sanngɛ sɛ e fa Biblu’n nun like nga e suan’n su’n naan y’a kaci’n, e bɔbɔ yɛ e si i ɔ.—An kanngan Zak 1:23-25 nun.
LIKE NGA É YÓ NAAN Y’A KACI’N
14. ?Ngue yɛ maan e kwla kaci ɔ?
14 Kɛ be se kɛ sran kun w’a kaci’n, i awlɛn’n nun lɔ yɛ ɔ kaci ɔ. ?Ngue yɛ maan e kwla kaci ɔ? Biblu’n nun like mɔ e suan’n yɛ maan e kwla kaci ɔ. Afin kɛ e suan Biblu’n nun like’n, e wun like nga Ɲanmiɛn kunndɛ kɛ e yo naan i klun w’a jɔ e wun’n. Kɛ e fite i sɔ ndɛ’m be su’n, wafa nga e sɔ be nun’n, yɛ ɔ yi akunndan nga e bu’n i nglo ɔ. I sɔ’n uka e maan e wla nzuɛn ng’ɔ fata kɛ e wlɛ i ase naan y’a ‘yo kpa’n’ i ase.—Rɔm. 12:2; Ebr. 4:12.
15. ?Sɛ e lo e wun man Zoova naan ɔ wu e’n, i bo gúa sɛ?
15 An kanngan Ezai 64:7 nun. Ɲanmiɛn nuan ijɔfuɛ Ezai waan e ti kɛ ufa sa naan Zoova yɛ ɔ ti e ufuɛ’n niɔn. ?Wafa sɛ yɛ Zoova wu e ɔ? Nán e sran waka’n yɛ Zoova wu naan e yo sran klanman ɔn. Sanngɛ ɔ kle e like naan e awlɛn’n kaci. Kɛ e lo e wun e mɛn i’n, e kaci sakpa. Ɔ maan akunndan nga sran’m be bu’n, e kwla jran kekle naan y’a buman wie. ?Titi’n, ngue yɛ sɛ ufuɛ’n yo ufa’n naan w’a fa wu sɛ ɔ?
16, 17. (a) ?Ngue yɛ sɛ ufuɛ’n yo ufa’n naan w’a fa wu sɛ ɔ? (b) ?Wafa sɛ yɛ Ɲanmiɛn Ndɛ’n uka e naan y’a kaci ɔ?
16 Nán ufa ngba yɛ be fa wu sɛ ɔ. I sɔ’n ti’n, ufa nga be kwla fa wu sɛ’n, yɛ talie ufuɛ’n kunndɛ ɔ. I sin’n, ɔ yo like nɲɔn. Ɔ kpukpu ufa’n su, ɔ yi i nun wlawla nin yɛbuɛ mma’n. Kpɛkun ɔ guagua ufa’n su nzue, ɔ fɔtɔ i. Ɔ yo ufa’n i sɔ lele ɔ sɔ kplɔkuun. Ɔ maan, ɔ kwla fa wu sɛ’n.
17 ?Amun wun like nga ti yɛ sɛ ufuɛ’n kpukpu ufa’n su, kpɛkun ɔ guagua su nzue’n? Kɛ ɔ ko yo naan fiɛn w’a tranman ufa’n nun naan w’a kwla fa di junman’n, i ti yɛ ɔ yo sɔ ɔ. I sɔ kunngba’n yɛ Ɲanmiɛn Ndɛ’n uka e ɔ. Kɛ e suan Ɲanmiɛn Ndɛ’n, ɔ uka e naan y’a buman akunndan nga sran’m be bu’n wie kun. Ɔ ti kɛ Ɲanmiɛn w’a wu e uflɛ sa, yɛ e kaci i liɛ. (Efɛ. 5:26) I sɔ’n ti yɛ titi’n, be kpɛn e wla kɛ nán e kpɛ aɲia’m be bo kɔlɛ’n i nun cɛn naan e kanngan Ɲanmiɛn Ndɛ’n nun cɛn kwlakwla’n niɔn. Afin kɛ e yo i sɔ ninnge mun’n, e lo kplɔkuun kɛ ufa sa Zoova sa nun. Kpɛkun ɔ fa e di junman kwlaa ng’ɔ klo’n.—Jue. 1:2; Yol. 17:11; Ebr. 10:24, 25.
18. (a) ?Sɛ e waan Ɲanmiɛn Ndɛ’n kaci e’n, ngue yɛ ɔ fata kɛ e yo ɔ? (b) ?Kosan benin yɛ ɔ fata kɛ e fa usa e wun ɔn?
18 Sɛ e kanngan Biblu’n nun cɛn kwlaa naan e suan nun like’n, i sɔ’n úka e naan y’a kaci. Sanngɛ nɛ́n i sɔ ngunmin yɛ ɔ fata kɛ e yo naan y’a kaci ɔ. Afin sran kpanngban be kanngan Biblu’n nun. Yɛ be si i nun ndɛ sunman. Kɛ é bó jasin fɛ’n, e fite i sɔfuɛ wie’m be su. Be nun wie’m be kwla bobo Biblu’n nun ndɛ mma’m be su guɛ i lɔ. Sanngɛ be akunndan nin be nzuɛn’n nin a kaciman. Afin be loman be wun naan Ɲanmiɛn Ndɛ’n wluwlu be wun ju be awlɛn’n nun. Sɛ be kanngan Ɲanmiɛn Ndɛ’n nun naan be bu su akunndan’n yɛ i sɔ liɛ’n yó ye ɔ. I lɛ’n kle kɛ like nga e suan’n, ɔ fata kɛ e bu i su akunndan. Maan e usa e wun kɛ: ‘?Asɔnun ndɛ ngbɛn yɛ n su suan ɔn? ?Min nantilɛ nun’n, n sieli i nzɔliɛ kɛ ndɛ sɔ’n ti nanwlɛ? ?N wun i wlɛ kɛ nán min wiengu’m be ngunmin be like klelɛ’n ti yɛ n suan like naan m bɔbɔ min liɛ ti ɔ? ?Kɛ ń súan’n, n wun i wlɛ kɛ Zoova yɛ ɔ su kan ndɛ kle min ɔn?’ Maan e bu kosan sɔ’m be su akunndan kpa. I liɛ’n, é kló Zoova yɛ e nin i e afiɛn mántan kpa. Kɛ like nga e suan’n wluwlu e wun’n, e akunndan’n i kacilɛ’n timan kekle kun.—Nya. 4:23; Lik 6:45.
19, 20. ?Biblu’n nun ndɛ benin yɛ sɛ e fa su’n, i bo gúa kpa mán e ɔ?
19 Pɔlu seli kɛ: ‘E wla e nzuɛn laa b’ɔ maan e yo sa tɛtɛ’n i ase, yɛ e fa nzuɛn uflɛ b’ɔ maan e yo kɛ sran bɔ Nyanmiɛn yili i uflɛ’n sa.’ Kɛ e kanngan Biblu’n nun mɔ e bu i su akunndan’n, yɛ e kwla yo sɔ ɔ. (Kol. 3:9, 10) Nanwlɛ, sɛ e wun like nga Biblu’n kle’n i wlɛ sakpa naan e fa su’n, é fá nzuɛn uflɛ. Ɔ maan e su tɔman Satan i aya’m be nun.
20 Akoto Piɛli kpɛn e wla se kɛ: “Maan amun nyin yi Nyanmiɛn, like nga [...] amun nyin blo be su bɔ an yoli be’n, nán an yo be kun. [...] Maan amun nzuɛn liɛ’n kusu fɛ i liɛ’n sa’n kwlaa nun.” (1 Piɛ. 1:14, 15) Maan e mian e ɲin e wla akunndan tɛtɛ nin e nzuɛn tɛtɛ laa’n be ase naan e kaci. Sɛ e yo sɔ’n, Zoova yrá e su. Wafa ng’ɔ́ yrá e su’n, like suanlɛ ng’ɔ́ bá lɛ’n wá yíyí nun.
[Foto, bue 17]
[Foto mun, bue 18, 19]
Ɔ ti cinnjin kɛ sran kaka be fin Satan i mɛn’n nun fite naan be kaci. (An nian ndɛ kpɔlɛ 9 nun.)
[Ndɛ kwle, bue 19]
‘An wla ya falɛ’n, nin ndɛnngan’n, nin sran wun sacilɛ’n, be kwlaa be ase.’—Efɛ. 4:31.
[Foto, bue 21]
Kɛ sran kun kaci’n, ɔ si sa siesie. (An nian ndɛ kpɔlɛ 18 nun.)