NDƐ NG’Ɔ KLƐ FLUWA’N SU’N | ?NDƐ ONIN YƐ Ɔ O BIBLU’N NUN ƆN?
Like nga ti yɛ ɔ fata kɛ Biblu’n nun ndɛ’n yo ɔ cinnjin’n
Asiɛ’n su fluwa nga w’a tru kpa’n, yɛle nga be flɛ i Biblu’n. ?Ngue ti ɔ? Like sunman ti ɔ. I kun yɛle kɛ, Biblu’n kan wafa nga lalafuɛ sran wie’m be nin be wiengu, yɛ be nin Ɲanmiɛn be trannin’n i ndɛ. Ndɛ sɔ’m be wlɛ wunlɛ yoman ya, yɛ afɔtuɛ nga be man e’n, e kwla fa be su. Kpɛkun, be kwla kaci ndɛ sɔ mun aniɛn kaka nun naan blɛ kwlaa nun’n, ɔ nin lika kwlaa nga sran’m be tran lɛ’n, be wun i nun ndɛ’n i wlɛ. Asa ekun’n, Biblu’n i nun ndɛ’n yo e wun sa ye titi.
Like cinnjin kpafuɛ’n yɛle kɛ Biblu’n bɔbɔ kle kɛ nán Ɲanmiɛn i su ndɛ ngbɛn sa yɛ ɔ kan ɔn. Sanngɛ ɔ kle kɛ ɔ ti Ɲanmiɛn Ndɛ. Asa ekun’n, Ɲanmiɛn i dunman’n o nun. Kpɛkun, ɔ kle e Ɲanmiɛn i nzuɛn’n, ɔ nin like nga ti yɛ Ɲanmiɛn yili asiɛ’n nin sran’n. Biblu’n kle kɛ akplowa kun tɔli kpa’n nin tɛ’n be afiɛn. Akplowa sɔ’n kpili kpa, yɛ w’a yoman lika kunngba nun ndɛ. Sanngɛ i bo guali klanman. Sran ng’ɔ lo i wun kanngan Biblu’n nun’n, ɔ wun i wlɛ kɛ be kwla lafi i nun ndɛ’n su naan ɔ gua sran awlɛn su nzue.
Kosan wie’m be o lɛ’n, Biblu’n kunngba cɛ yɛ ɔ tɛ be su ɔ. Be nun wie mun yɛ:
▪ ?Klɔ sran fin i liɛ nin? ?Ngue ti yɛ e wun e ɲrun ɔn?
▪ ?Wafa sɛ yɛ Ɲanmiɛn deli sran mun ɔn?
▪ ?Ngue yɛ Zezi yo mannin e ɔ?
▪ ?Cɛn wie lele’n, asiɛ’n nin sran’m be liɛ yó sɛ?
É wlá ɔ fanngan kɛ a fa blɛ kan naan a kanngan ndɛ nga bé bá lɛ’n be nun!
[Foto, bue 3]
[Kuku, bue 3]
BIBLU’N I SU NDƐ KPE KAN YƐ:
I nun ndɛ’n i kpɔlɛ bolɛ: Wafa nga Ɲanmiɛn Sielɛ’n wá yó mɔ sran’m bé yó sa kpa kɛ i klikli nun sa’n, ɔ nin wafa ng’ɔ́ yó naan fɔundi w’a tran asiɛ’n su’n.
I nun fluwa mun: I akpasua kun ti fluwa 39. I klikli nun be klɛli wie Ebre aniɛn nun (yɛ i kan Arameɛn nun.) Yɛ i akpasua kun ti fluwa 27. I klikli nun be klɛli i Glɛki nun.
I klɛfuɛ mun: Be ti sran kɔe 40. Be boli i klɛlɛ bo afuɛ 1.513 ka naan y’a ju Zezi blɛ su’n nun. Kɛ afuɛ nga be flɛ i 98 wá jú’n yɛ be guɛli i bo ɔ. Junman’n dili afuɛ kɔe 1.600.
Aniɛn: Aniɛn nga b’a kaci i wunmuan’n i nun’n, ɔ nin nga b’a kaci i akpasua kun i nun’n, be kwlaa be nuan ti 2.500 tra su.