NDƐ NG’Ɔ KLƐ FLUWA’N SU’N | ?NGUE TI YƐ ƝANMIƐN I KLOLƐ TI KEKLE MAN SRAN WIE MUN ƆN?
Be bua ato kɛ Ɲanmiɛn leman dunman
NDƐ NGA SRAN KPANNGBAN LAFI SU’N:
Be flɛ like klefuɛ dan kun kɛ David Cunningham. Ɔ seli kɛ: “E nuan w’a sɛman su kɛ Ɲanmiɛn le dunman naan se kɛ é kúnndɛ dunman sɔ’n.”
NDƐ NGA BIBLU’N KAN’N:
Ɲanmiɛn seli kɛ: “N ti Anannganman, [Zoova, NW] min dunman’n yɛ o lɛ-ɔ.” (Ezai 42:8) Dunman Zoova’n fin Ebre aniɛn nun. I bo yɛle “ɔ kaci sran’n i wafa ng’ɔ klo kɛ ɔ́ káci’n.”
Zoova kunndɛ kɛ e bo i dunman’n. Biblu’n seli kɛ: ‘Amun kpan flɛ i, i sa dandan ng’ɔ yo be’n, amun kan be nvlenvle’m be nun. Amun kpɛn sran’m be wla kɛ i dunman’n ti fuwa.’—Ezai 12:4.
Zezi boli Ɲanmiɛn dunman’n. Kɛ ɔ́ srɛ́’n, ɔ seli kɛ: “N fa ɔ dunman’n kleli be [yɛle kɛ min sɔnnzɔnfuɛ mun] yɛ ń wá fá klé be.” ?Ngue ti yɛ Zezi fɛli i Si dunman’n kleli i sɔnnzɔnfuɛ mun ɔn? Zezi bɔbɔ tɛ su. I waan: “Kɛ ɔ́ yó naan klolɛ nga a fa kloli min’n w’a tran be [...] nun ti.”—Zan 17:26, Anuãsɛ Fuflɛ.
LIKE NGA TI YƐ NDƐ SƆ’N TI CINNJIN’N:
Ɲanmiɛn sulɛ wafa’m be like klefuɛ kun suan Walter Lowrie. Ɔ seli kɛ: “Sɛ sran kun siman Ɲanmiɛn dunman’n, nn ɔ lafiman su kɛ ɔ o lɛ sakpa. Sɛ ɔ lafiman su kɛ ɔ o lɛ sakpa’n, ɔ kwlá klomɛn i.”
Bian kun suan Viktɔr. Ɔ kɔ asɔnun le mɔcuɛ kwlaa nun. Sanngɛ ɔ lafiman su kɛ ɔ si Ɲanmiɛn. Ɔ seli kɛ: ‘Be kannin Ɲanmiɛn i ndɛ kleli min titi. Sanngɛ kɛ n wa sili kɛ i dunman yɛle Zoova’n, ɔ yoli min kɛ blɛ li yɛ m’an si Ɲanmiɛn bɔbɔ kpa ɔ. N wa wunnin i wlɛ kɛ ɔ o lɛ sakpa naan n kwla trɛ i janvuɛ.’
Be nga be boman Ɲanmiɛn i dunman’n kleman sran mun annzɛ be fa dunman uflɛ be flɛ i osu’n, ɔ ti kɛ b’a fa Biblu’n bɔbɔ ba’n kpɛkun b’a kpɛ i lika nga be klɛli Ɲanmiɛn i dunman lɛ’n b’a yi sa.
Be nga be si Zoova’n, ɔ si be wie. Biblu’n se kɛ: “I sɔ’n ti, Anannganman, kɛ e o wɔ atin’n su’n, e wla o ɔ su. Ɔ kpanflɛlɛ’n nin ɔ dunman’n i bolɛ’n yɛ ɔ ti like mɔ e kunndɛ kɛ é yó ɔ.” (Ezai 26:8) Be nga be bo Ɲanmiɛn dunman’n, Ɲanmiɛn yo be ye. Biblu’n waan: “Sran kwlaa ng’ɔ flɛ e Min Nyanmiɛn’n, ɔ́ fíte nun.”—Rɔmfuɛ Mun 10:13.