NDƐ NG’Ɔ KLƐ FLUWA’N SU’N | ?NGUE TI YƐ ƝANMIƐN I KLOLƐ TI KEKLE MAN SRAN WIE MUN ƆN?

Be bua ato kɛ Ɲanmiɛn klun yo wi

NDƐ NGA SRAN KPANNGBAN LAFI SU’N:

Katoliki’m be fluwa kun se kɛ: “Kɛ sa tɛ yofuɛ’m be wu cɛ’n, be wawɛ’n kɔ sin dan m’ɔ ti ‘anannganman sin’n’ nun. Sin sɔ’n yɛ be fa tu be fɔ yɛ be fa kle be ɲrɛnnɛn ɔn.” (Catéchisme de l’Église catholique) Ɲanmiɛn sulɛ wafa ng’ɔ timan su’n be su kpɛnngbɛn wie mun ekun be waan be nga be o sin dan nun’n, Ɲanmiɛn nianman be lɔ mlɔnmlɔn.

NDƐ NGA BIBLU’N KAN’N:

Biblu’n waan “be nga b’a wu’n be liɛ’n be wun-man sa fi wlɛ.” (Akunndanfuɛ’n 9:4, 5) ?Kɛ mɔ be wunman sa fi wlɛ’n niɔn, ɔ yo sɛ yɛ Ɲanmiɛn sé kɛ ɔ nianman be lɔ ɔ? ?Yɛ be wun ɲrɛnnɛn “anannganman sin” kun nun, ɔ yo ye?

Biblu’n kan “sin dan nin sufru” be ndɛ. (Sa Nglo Yilɛ 20:10) Sanngɛ ɔ kle e like nga be flɛ i sɔ’n. Ɔ se kɛ: “Sin dan sɔ’n yɛ ɔ ti wie’n i nnyɔn su nin-ɔn.” (Sa Nglo Yilɛ 20:14; 21:8) Ɔ maan sin dan’n timan sin jrɛin m’ɔ o lika kun mɔ be kwla to sran mun yi nun ɔn. Kɛ Biblu’n se kɛ ‘bé wún be nyrun tititi’ sin dan nun’n, yɛle kɛ be su cɛnman be. I kunngba’n yɛ ɔ ti “wie’n i nnyɔn su’n nin-ɔn.”

LIKE NGA TI YƐ NDƐ SƆ’N TI CINNJIN’N:

Sɛ Ɲanmiɛn klun yo wi’n, e su kwlá faman e wun mɛntɛnmɛn i. É wánndi i. Be flɛ bla kun kɛ Rosio, ɔ tran Mɛksik. Ɔ seli kɛ: ‘Min bakan nun’n, be kleli min sin dan’n i su like. Ɔ kunnin min srɛ kpa. Ɔ maan n seli min klun lɔ kɛ Ɲanmiɛn leman nzuɛn kpa fi. Ɔ ti ya fafuɛ, yɛ ɔ yaciman sa cɛman.”

Sran’m be jɔlɛ nga Ɲanmiɛn wá dí’n, ɔ nin wie’n be su ndɛ nga Biblu’n kan’n ti weiin, yɛ ɔ ti nanwlɛ. Ndɛ nanwlɛ sɔ mɔ Rosio sili i ti’n, w’a buman Ɲanmiɛn kɛ nga laa ɔ fa buli i’n sa kun. Ɔ seli kɛ: ‘Kɛ n sili ndɛ nanwlɛ’n, min wun kpajali min. Ɔ yoli min kɛ trɔ nɔnnin wie yɛ b’a sike min sa. N wa lafili Ɲanmiɛn su kɛ ɔ kunndɛman kɛ sa ɲan e, ɔ klo e naan n kwla klo i wie. Ɔ ti kɛ siɛ kpa kun m’ɔ sɔ i wa’n i sa, m’ɔ kunndɛman kɛ sa ɲɛn i’n sa.’—Ezai 41:13.

Sin dan’n i ndɛ mɔ be kan fa wlanwlan sran mun’n ti’n, sran kpanngban be tu be klun be su Ɲanmiɛn kpa. Sanngɛ Ɲanmiɛn w’a seman kɛ ɔ́ wlánwlán e naan e su i. Zezi seli kɛ: ‘Amun klo amun Nyanmiɛn’n kpa.’ (Mark 12:29, 30) Y’a wun kɛ Ɲanmiɛn klun yoman wi. I sɔ’n ti’n, e lafi su kɛ jɔlɛ nga ɔ́ wá dí’n, ɔ́ dí i kpa. Ndɛ nga Elii kan kleli i janvuɛ Zɔbu’n, ɔ ti e liɛ su. Ɔ seli kɛ: “Klunwi yolɛ’n nin ndɛ kwlɛ bulɛ’n, be ti-man Nyanmiɛn i nzuɛn mlɔnmlɔn.”—Zɔb 34:10.