NDƐ NG’Ɔ KLƐ FLUWA’N SU’N | ?NGUE TI YƐ Ɔ FATA KƐ E SRƐ ƝANMIƐN ƆN?

?Ngue ti yɛ sran’m be srɛ Ɲanmiɛn ɔn?

Sran sunman be srɛ Ɲanmiɛn titi. Be nga be waan Ɲanmiɛn nunman lɛ bɔbɔ’n, be srɛ i. ?Yɛ ɔ li, a srɛ Ɲanmiɛn titi wie? ?Ngue ti yɛ sran’m be srɛ Ɲanmiɛn ɔn? Aflansi lɔ’n, be fɛli i sɔ kosan’n be usali sran wie mun. Be nun kpanngban be seli kɛ, kɛ ɔ ko yo naan be “wla w’a gua ase bɔbɔ ngbɛn’n,” i ti yɛ be srɛ ɔ. Akunndan kunngba sɔ’n yɛ Abloki lɔ sran sunman be bu ɔ. Nán kɛ be su Ɲanmiɛn ti yɛ be srɛ i ɔ. Sran wie mɔ be waan be lafi Ɲanmiɛn su’n, kɛ be sa mian’n yɛ be srɛ Ɲanmiɛn ɔn. Kpɛkun, be kunndɛ kɛ Ɲanmiɛn tɛ be su be ja nun lɛ.​—Ezai 26:16.

?Ɔ kusu a bu i sɛ? ?A bu i kɛ Ɲanmiɛn srɛlɛ’n ti like ngbɛn m’ɔ uka sran mun naan be wla w’a gua ase ɔ? Wienun ɔn, a lafi Ɲanmiɛn su yɛ a srɛ i. ?A wun kɛ ɔ tɛ wɔ su, annzɛ sɛ? Ɲanmiɛn Ndɛ’n kwla uka ɔ naan w’a wun i wlɛ kɛ Ɲanmiɛn srɛlɛ’n timan like ngbɛn m’ɔ uka sran mun naan be wla w’a gua ase ɔ. Sanngɛ, ɔ uka sran mun naan be nin Ɲanmiɛn be afiɛn w’a mantan.