BIBLU’N I SU KOSAN’M BE SU TƐLƐ

?Ngue ti yɛ Ɲanmiɛn yili asiɛ’n niɔn?

Ninnge kpanngban kpa be o asiɛ’n su naan nguan nun tranlɛ’n w’a yo ye. I wie yɛle kɛ, nzue o asiɛ’n su kpanngban kpa. Asa ekun’n, asiɛ’n i siewlɛ wafa’n, ɔ nin i wun kpɛlɛ wafa’n, ɔ ti su sɛsɛsɛ. Ɔ maan, jenvie’n kaciman laglasi. Kpukpuwa kun bo sin yia asiɛ’n. Kpɛkun, wunmiɛn wie o asiɛ’n nun kɛ blalɛ nga be flɛ i dinamo’n i wunmiɛn’n sa. Ninnge sɔ’m be sasa e. Ɔ maan, nglo lɔ ninnge tɛtɛ nin wia’n i kpajalɛ ng’ɔ ti tɛ’n, be kwlá juman asiɛ’n su wa naan b’a kun e. Asiɛ’n su wa’n, waka nin nnɛn’m be sɔnnin kpa. Sanngɛ, ɔ leman be nun kun m’ɔ o lɛ ngbɛn ɔn. Wafa nga waka’m be uka nnɛn mun, mɔ nnɛn’m be kusu be uka waka mun’n, ɔ ti abonuan. I sɔ’n ti’n, sran kpanngban be se kɛ like kun ti yɛ Ɲanmiɛn yili asiɛ’n niɔn.​—An kanngan Ezai 45:18 nun.

Sanngɛ, atrɛkpa’n amun usa amun wun kɛ: ‘?Ɲanmiɛn yili asiɛ’n kɛ e tran su naan e wun ɲrɛnnɛn?’​—An kanngan Mmla’n 32:4, 5 nun.

?Sa nga ti yɛ Ɲanmiɛn yili asiɛ’n ɔ́ kpɛ́n su?

Ɲanmiɛn yili asiɛ’n kɛ sran mɔ be klo i mɔ be klo be wiengu’n, be tran su naan be klun jɔ. Ɲanmiɛn w’a yiman e kɛ nnɛn nin waka mun sa. Yɛle kɛ e liɛ’n, e kwla si e Yifuɛ’n. E kwla niɛn i sran klolɛ’n, nin i sa nuan su yolɛ’n.​—An kanngan Akunndanfuɛ’n 12:13 nin Mise 6:8 nun.

Like kwlaa nga e Yifuɛ’n waan ɔ́ yó’n, saan ɔ́ yó. I sɔ ti’n, e kwla lafi su kɛ, ɔ́ wá yó maan asiɛ’n káci lika klanman kpa. Yɛ sran’m bé dí aklunjuɛ.​—An kanngan Jue Mun 37:11, 29 nin Ezai 55:11 nun.

Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 3 nun. Zoova i Lalofuɛ mun yɛ be yili ɔ.

A kwla ko fɛ i ɛntɛnɛti lika nga nun lɔ: www.jw.org