“Klo ɔ wiengu kɛ a fa klo ɔ bɔbɔ wun’n sa”
“I nnyɔn su b’ɔ fɛ’n yɛ ɔ o yɛ: ‘Klo ɔ wiengu kɛ a fa klo ɔ bɔbɔ wun’n sa.’”—MAT. 22:39.
?WAFA SƐ YƐ AMÚN TƐ́ KOSAN’M BE SU Ɔ?
?E wiengu’n yɛle wan?
?Ngue ti yɛ ɔ fata kɛ e klo e wiengu ɔ? ?Wafa sɛ yɛ e kwla yo sɔ ɔ?
?Sran klolɛ’n i su ndɛ benin yɛ 1 Korɛntfuɛ Mun 13:4-8 kan ɔn?
1, 2. (a) ?Zezi seli kɛ mmla’m be nun dan’n, i nɲɔn su’n yɛle benin? (b) ?Kosan benin mun yɛ like suanlɛ nga wá tɛ́ be su ɔ?
CƐN kun’n, Farizifuɛ kun waan ɔ́ sá Zezi nían. Ɔ maan, ɔ usali Zezi kɛ: “?Nja, mmla’n i nun dan’n yɛlɛ onin?” Zezi tɛli i su kɛ: “Klo ɔ Min Nyanmiɛn’n kpa, fa ɔ wla’n kwlaa guɛ i su, maan wɔ akunndan’n kwlaa trɛn i su. I yɛ ɔ ti mmla klikli nin i nun dan nin-ɔn.” Like suanlɛ ng’ɔ sinnin’n, ɔ yiyili ndɛ sɔ mɔ Zezi kannin’n i nun kleli e. Zezi seli bian’n i ekun kɛ mmla’n “i nnyɔn su b’ɔ fɛ’n yɛ ɔ o yɛ: ‘Klo ɔ wiengu kɛ a fa klo ɔ bɔbɔ wun’n sa.’”—Mat. 22:34-39.
2 Zezi seli kɛ ɔ fata kɛ e klo e wiengu. ?Sanngɛ, e wiengu’n yɛle wan? ?Yɛ wafa sɛ yɛ e kwla kle kɛ e klo e wiengu ɔ? Like suanlɛ nga wá tɛ́ kosan sɔ’m be su. Kpɛkun, ɔ́ klé e kɛ sran ng’ɔ klo i wiengu’n, Zoova klun jɔ i wun. Asa ekun’n, sran klolɛ’n i su mmlusuɛ nga sran kwlakwla ɲɛn i’n, ɔ́ klé e wie.
?E WIENGU’N YƐLE WAN?
3, 4. (a) ?Sunnzun ase benin yɛ Zezi fa tɛli Farizifuɛ’n i kosan’n su ɔ? (b) ?Wafa sɛ yɛ Samari bian’n ukali Zuifu nga kodiawiefuɛ’m be boli i’n niɔn? (An nian desɛn ng’ɔ o kan like suanlɛ’n bo i bo lɛ’n.)
3 Sran sunman be bu i kɛ be mantanfuɛ’n, annzɛ be janvuɛ’n, yɛ ɔ ti be wiengu’n niɔn. (Nya. 27:10) Sanngɛ, nɛ́n i sɔ yɛ Zezi kannin ɔn. Farizifuɛ’n usali Zezi kɛ: “?Wan yɛ ɔ ti n wiengu nin-ɔn?” Kɛ Zezi tɛ́ i su’n, ɔ fali Samari bian kun i su sunnzun ase. (An kanngan Lik 10:29-37 nun.) Yɛle kɛ cɛn kun’n, Zuifu kun su kɔ lika wie. Ɔ tɔli kodiawiefuɛ’m be nun, be deli i wun ninnge’n kwlaa, be boli i lele, kɛ ɔ ka kan ɔ́ wú’n, be yacili i lɛ ɔli. Ɲanmiɛn ɲrun jranfuɛ kun sinnin lɛ. Sanngɛ, w’a nianman bian’n i lɔ. I sin’n, Levifuɛ kun sinnin lɛ wie. Ɔ wunnin bian sɔ’n, ɔ sɛnnin i wun ɔli. Sanngɛ nn bian m’ɔ o ɲrɛnnɛn nun’n, ɔ ti be niaan Zuifu. Samarifuɛ kun m’ɔ su kɔ lika’n, ɔ wunnin bian’n naan w’a ukɛ i. Kusu nn blɛ sɔ nun’n, Samarifuɛ mun nin Zuifu mun diman.—Zan 4:9.
4 Samarifuɛ’n guaguali bian’n i kannin’m be nun ngo nin nzan, naan w’a cici be su. Ɔ fɛ i ɔli aofuɛ sua kun nun naan be niɛn i lika. Sika ng’ɔ fa mannin aofuɛ sua’n i sunianfuɛ’n, ɔ ju cɛn nɲɔn junman akatua. (Mat. 20:2) Wafa nga Samari bian’n niannin sran m’ɔ o ɲrɛnnɛn nun’n i lika’n, ɔ kle kɛ ɔ klo i wiengu. Zezi i ndɛ sɔ’n kle kɛ ɔ fata kɛ e klo sran, yɛ maan sran yo e annvɔ kɛ Samarifuɛ’n sa.
5. ?Kɛ sanvuɛsa kun juli Amlɛnkɛn’m be lɔ klɔ kun su’n, wafa sɛ yɛ Zoova i Lalofuɛ’m be kleli kɛ be klo be wiengu ɔ?
5 ‘Mɛn’n su kɔ i bue nuan.’ Ɔ maan, sran’m be siman aunnvuɛ. Be nun sunman be yo wlɛ, be kloman sran. (2 Tim. 3:1-3) Maan e fa sa kun e nian. Afuɛ 2012, Ɔktɔblu anglo nun’n, aunmuan dan kpa kun tu sinnin Amlɛnkɛn’m be lɔ klɔ nga be flɛ Niyɔki’n i akpasua kun su. Ɔ sacili sran’m be ninnge mun, kannin kpɛli be su. Ɔ maan, be trannin ble’n nun. Ɲrɛnnɛn blɛ sɔ nun’n, sran wie’m be ko wuali be bo ninnge mun ekun. Zoova i Lalofuɛ’m be liɛ’n, b’a yoman sɔ wie. Kɛ mɔ be klo be wiengu’n ti’n, be fali ajalɛ wie mun naan b’a uka be niaan Klistfuɛ mun nin sran uflɛ mun. ?Ninnge benin mun yɛ e kwla yo e kle kɛ e klo e wiengu ɔ?
WAFA NGA E KWLA KLE KƐ E KLO E WIENGU’N
6. ?Kɛ e bo jasin fɛ’n, ngue yɛ i sɔ’n kle ɔ?
6 Maan e kle be Ɲanmiɛn ndɛ’n. Kɛ é bó jasin fɛ’n, e fa ‘Ɲanmiɛn i ndɛ’n e wla sran’m be fanngan.’ (Rɔm. 15:4) Ɲanmiɛn Sielɛ’n i jasin fɛ mɔ e bo’n, ɔ kle kɛ e klo e wiengu. (Mat. 24:14) Nanwlɛ, kɛ e kan “Nyanmiɛn bɔ e nyin o i sin’n” i Sielɛ’n i jasin fɛ ndɛ’n, i sɔ’n ti e cenjele like dan.—Rɔm. 15:13.
7. ?Ndɛ benin yɛ Zezi kɛnnin i Matie 7:12 nun ɔn? ?Sɛ e nanti ndɛ sɔ’n su’n, wafa sɛ yɛ i bo gúa ɔ?
7 Maan e yo be kpa. Kɛ Zezi kán Ɲanmiɛn ndɛ oka’n su lɔ’n, ɔ seli kɛ: “Like kwlaa nga an klo kɛ sran yo man amun’n, an yo i kunngba sɔ’n man be, i yɛ ɔ ti Moiz mmla nin Nyanmiɛn nuan ijɔfuɛ’m be ndɛ nin-ɔn.” (Mat. 7:12) ‘Moizi mmla’n,’ fɛ i Bo Bolɛ fluwa’n su lele fa ju Mmla’n i nun Flanlɛ fluwa’n su. Zoova klo i nvle nunfuɛ mun. Yɛ ɔ kunndɛ kɛ be kusu be klo be wiengu. Ɔ maan, ɔ fali ‘Moizi mmla nin Nyanmiɛn nuan ijɔfuɛ’m be ndɛ’n,’ ɔ mannin be. Andɛ kusu’n, Zoova kunndɛ kɛ e klo e wiengu. I nuan ijɔfuɛ Ezai seli kɛ: “Amun yo sa ng’ɔ ti i nuan su’n, amun yo sa kpa. [...] Sran ng’ɔ fa ndɛ bɔ m’an kɛn i yɛ’n su’n, [...] i liɛ su ti ye!” (Eza. 56:1, 2) Nanwlɛ, sɛ e klo e wiengu mun naan e yo be kpa’n, e liɛ yó ye.
8. ?Ngue ti yɛ ɔ fata kɛ e klo e kpɔfuɛ mun ɔn? ?Sɛ e yo sɔ’n, wafa sɛ yɛ i bo kwla gua ɔ?
8 Maan e klo e kpɔfuɛ mun. Zezi seli kɛ: “An tili i kɛ be seli kɛ: ‘Klo ɔ wiengu, yɛ kpɔ ɔ kpɔfuɛ.’ Sanngɛ n liɛ’n, ń kán klé amun kɛ, an klo amun kpɔfuɛ mun, yɛ be nga be wua amun amuɛn’n, an yra be nguan. Be nga be kpɔ amun’n, an yo be kpa, yɛ be nga be yo amun tɛtɛ bɔ be kle amun yalɛ’n, an srɛ Nyanmiɛn kɛ ɔ yo be kpa. I sɔ’n nun’n, amun wá yó amun Si b’ɔ o nyanmiɛn su lɔ’n i mma mun.” (Mat. 5:43-45) Akoto Pɔlu kannin ndɛ kunngba sɔ’n wie. Ɔ seli kɛ: “Sɛ awe kun ɔ kpɔfuɛ’n, mɛn i like maan ɔ di. Sɛ nzue we kun i’n, mɛn i nzue maan ɔ nɔn.” (Rɔm. 12:20; Nya. 25:21) Moizi Mmla’n nun’n, be klɛli i kɛ sɛ trɔ su tin sran kun i kpɔfuɛ i nnɛn’n su’n, ɔ fata kɛ ɔ ukɛ i naan be man nnɛn’n su naan ɔ jaso jran. (Tul. 23:5) Kɛ sran kun ukɛ i kpɔfuɛ’n kɛ ngalɛ sa’n, wie liɛ’n, be kaci janvuɛ. E mɔ e ti Klistfuɛ’n, e kusu e klo e kpɔfuɛ mun. I sɔ’n ti wie liɛ’n, be nun wie’m be kaci be nzuɛn’n. I kpa bɔbɔ’n, wie’m be kaci Zoova i sufuɛ.
9. ?Zezi i ndɛ benin yɛ ɔ fata kɛ e nanti su naan e nin e niaan mun y’a siesie e afiɛn ɔn?
9 Maan ‘e nin sran’m be kwlaa e nuan sɛ e wun.’ (Ebr. 12:14) Sɛ ɔ fata kɛ e nin sran’m be kwlaa e nuan sɛ e wun’n, nán e nin e niaan Klistfuɛ mun yɛ e nuan su sɛman ɔn. Afin, Zezi seli kɛ: “Sɛ á fá like wie kó mán Nyanmiɛn’n, bɔ w’a ju i sɔwlɛ lɛ naan sɛ ɔ wla kpɛn su kɛ ɔ wun ndɛ o ɔ niaan wie klun’n, yaci like sɔ’n lɛ, an ko siesie amun afiɛn ka, i sin bla w’a fa ɔ like sɔ’n man.” (Mat. 5:23, 24) Ndɛ sɔ’n kle kɛ, ɔ fata kɛ e yo like ng’ɔ ti su’n naan e nin e niaan mun e afiɛn’n sɛ. Sɛ e yo sɔ’n, é klé kɛ e klo be. Kpɛkun Zoova yrá e su.
10. ?Ngue ti yɛ ɔ fataman kɛ e bu sran fɔ ɔ?
10 Nán e bu sran fɔ. Zezi seli kɛ: “Nán an bu sran fɔ maan Nyanmiɛn bu amun fɔ, afin fɔ kunngba nga an fa bu sran’n, yɛ Nyanmiɛn wá fá bú amun-ɔn, yɛ like nga an fa sunnzun sran’n, i kunngba sɔ’n yɛ Nyanmiɛn wá fá súnnzun amun-ɔn. ?Ɔ yo sɛ yɛ a wun wla’n b’ɔ o ɔ niaan i nyin su’n, sanngɛ a wun-man janvlɛ’n b’ɔ o ɔ bɔbɔ nyinma su nin-ɔn? ?Ɔ yo sɛ yɛ a se ɔ niaan kɛ: ‘Jran maan n yi ɔ nyin su wla’n,’ sanngɛ janvlɛ o ɔ bɔbɔ ɔ nyin su nin-ɔn? Dunman klofuɛ, yi janvlɛ’n b’ɔ o ɔ nyin su’n ka, naan w’a wun ase a yi ɔ niaan’n i nyin su wla’n.” (Mat. 7:1-5) Zezi i ndɛ sɔ’n kle weiin kɛ, kɛ e niaan’m be fɔn’n, ɔ fataman kɛ e fa yo ndɛ. Afin, e bɔbɔ e fɔn sa sunman nun wie.
LIKE CINNJIN KPAFUƐ NGA E KWLA YO’N
11, 12. ?Like cinnjin kpafuɛ nga e kwla yo e kle kɛ e klo e wiengu’n, yɛle benin?
11 Ninnge nga e kwla yo e kle kɛ e klo e wiengu’n, be sɔnnin. Sanngɛ, Zezi kleli kɛ like cinnjin kpafuɛ ng’ɔ fata kɛ e yo’n, yɛle kɛ e bo Ɲanmiɛn Sielɛ’n i jasin fɛ’n. (Lik 8:1) Ɔ seli i sɔnnzɔnfuɛ mun kɛ be ‘kle nvle-nvle’n kwlaa be like maan be kaci i sɔnnzɔnfuɛ.’ (Mat. 28:19, 20) Kɛ e bo jasin fɛ’n, e uka sran mun naan be jaso atin dan’n mɔ i awieliɛ’n ti ɲrɛnnɛn’n i su. Naan be fa atin mɔ i awieliɛ’n yɛle nguan’n i su. (Mat. 7:13, 14) I sɔ mɔ e mian e ɲin e yo’n, ɔ jɔ Zoova i klun dan.
12 Zezi ukali sran mun naan be wun i wlɛ kɛ be di Ɲanmiɛn ninnge’m be yalɛ. (Mat. 5:3) Kɛ e “bo [Ɲanmiɛn] i jasin fɛ’n,” e kle kɛ e nian Zezi i ajalɛ’n su. (Rɔm. 1:1) Be nga be tie jasin fɛ’n mɔ be fa su’n, be nin Ɲanmiɛn be siesie be afiɛn Zezi Klist dunman nun. (2 Kor. 5:18, 19) Nanwlɛ, like cinnjin kpafuɛ nga e kwla yo e kle kɛ e klo e wiengu’n, yɛle jasin fɛ bolɛ’n.
13. ?Kɛ e uka sran mun mɔ be nanti Zoova i mmla’m be su’n, i sɔ’n yo e sɛ?
13 Be nga be sɔ e nun’n, e siesie e wun kpa e ko nian be osu. Kɛ e yo sɔ’n, e uka be naan be nanti Ɲanmiɛn i mmla’m be su. Ɔ maan, be nun wie’m be kaci be nzuɛn’n. (1 Kor. 6:9-11) Kɛ Ɲanmiɛn uka “sran kpa” mun mɔ be kaci i janvuɛ’n, i sɔ’n yo e fɛ dan. (Mat. 10:11) Sran sɔ mɔ laa be wunman be wun fɛ’n, siɛn’n, be klun jɔ. Yɛ be fa be wla gua Ɲanmiɛn su. Jasin fɛ bolɛ junman mɔ e di’n ti e cenjele like. Afin, ɔ kle kɛ e klo e wiengu.
SRAN KLOLƐ’N I SU NDƐ NGA PƆLU KLƐLI’N
14. ?Sran klolɛ’n i su ndɛ benin yɛ Pɔlu kɛnnin i 1 Korɛntfuɛ Mun 13:4-8 nun ɔn?
14 Ɲanmiɛn maan Pɔlu klɛli sran klolɛ’n i su ndɛ. Sɛ e nanti ndɛ sɔ mɔ Pɔlu kannin’n su’n, Ɲanmiɛn klun jɔ́ e wun. Kpɛkun, ndɛ sunman su tɔman e nin e wiengu e afiɛn, yɛ é klun jɔ́. (An kanngan 1 Korɛntfuɛ Mun 13:4-8 nun.) Maan e yiyi ndɛ sɔ mɔ Pɔlu kannin’n nun naan e wun wafa nga e kwla nanti su’n.
15. (a) ?Ngue ti yɛ ɔ fata kɛ e tra e awlɛn sran wun, naan e yo aklunye ɔ? (b) ?Ngue ti yɛ ɔ fataman kɛ e ɲin blo sran like su ɔ? (c) ?Yɛ ngue ti yɛ ɔ fataman kɛ e tu e wun ɔn?
15 “Sran b’ɔ klo sran’n, ɔ trɛ i anwlɛn sran wun, sran b’ɔ klo sran’n, ɔ yo aklunye.” Zoova trɛ i awlɛn yɛ ɔ yo sran’m be kwlaa be ye. E kusu’n, kannzɛ sran’m be yo e tɛ’n, nán e yi man be. Sanngɛ, maan e tra e awlɛn yɛ e yo be ye. Asa ekun’n, sran m’ɔ klo sran’n, i “nyin blo-man sran like su.” E niaan wie’m be o lɛ’n, be le junman asɔnun’n nun. Annzɛ be le ninnge wie mɔ e leman wie ɔ. Sɛ e klo e niaan sɔ mun sakpa’n, e ɲin su bloman be like’n su. Yɛ e su tuman e wun annzɛ e su diman tutre. Afin, Biblu’n waan “sa tɛ yofuɛ’m be like b’ɔ o be wun’n yɛlɛ be wun nyinman-nyinmanlɛ nin be wun tulɛ.”—Nya. 21:4.
16, 17. ?Wafa sɛ yɛ e kwla nanti ndɛ ng’ɔ o 1 Korɛntfuɛ Mun 13:5, 6 nun’n, i su ɔ?
16 Sran m’ɔ klo sran’n, i nzuɛn’n ti kpa. Yɛle kɛ sɛ e klo e wiengu’n, e su kpɛmɛn i gblɛ, e su wuɛmɛn i like, yɛ e su yoman like ng’ɔ jɔman Zoova klun’n. Asa ekun’n, sɛ e klo e wiengu’n, e su buman e ngunmin e wun akunndan. Sanngɛ, e wiengu’n i ndɛ ló e wie.—Fil. 2:4.
17 Sran m’ɔ klo sran’n, “ɔ fa-man ya finfin, ɔ fa-man sa sie-mɛn i klun.” Ɔ maan, kɛ e wiengu yo e sa’n, e faman ya ndɛndɛ. Yɛ sɛ é kwlá sé’n, e klɛman sa sɔ’n sieman. (1 Tɛs. 5:15) Afin sɛ e fa sran’n i wun ndɛ sie e klun’n, e kwla wun i su afɛ. Annzɛ kusu’n, e kwla kan sran’n i ndɛ tɛtɛ, annzɛ e yo i like yaya. (Sau. 19:18) Kɛ mɔ e klo sran ti’n, ‘sa tɛ’n yoman e fɛ,’ nanwlɛ dilɛ’n yɛ ɔ yo e fɛ ɔ. Ɔ maan, sɛ bɔbɔ e kpɔfuɛ su wun i ɲrun’n, e klun jɔman.—An kanngan Nyanndra Mun 24:17, 18 nun.
18. ?Sran klolɛ’n i su ndɛ benin yɛ 1 Korɛntfuɛ Mun 13:7, 8 kan ɔn?
18 Pɔlu se ekun kɛ sran m’ɔ klo sran’n, “sa’n kwlaa sɔn i nun.” Kɛ mɔ e klo e wiengu ti’n, sɛ sran yo e sa naan ɔ kpata e’n, e yaci cɛ i. Sran m’ɔ klo sran’n, “sa’n kwlaa nun ɔ lafi Nyanmiɛn su.” I sɔ’n ti, ndɛ kwlaa nga Biblu’n kan’n, e lafi su. Kpɛkun, like nga Zoova i anuannzɛ’n kle e’n, e sɔ nun klanman. Sran m’ɔ klo sran’n, i “wla’n wo [Ɲanmiɛn] su.” Ɔ maan, ninnge kwlaa nga Zoova seli kɛ ɔ́ yó mán e’n, e wla o su kpa kɛ ɔ́ yó. (1 Piɛ. 3:15) Asa ekun’n, sa kwlaa ng’ɔ ju e su’n, e fa wlɛ i Zoova sa nun. Kpɛkun, e wla o su kɛ ɔ́ úka e. Sran m’ɔ klo sran’n, ɔ “trɛ i anwlɛn sa’n kwlaa nun, yɛ ɔ si-man afɛ.” Ɔ maan, kɛ be yo e sa’n, annzɛ be kle e yalɛ’n, e tra e awlɛn. Sran m’ɔ klo sran’n, ɔ “klo i guɛ i ti nin i bo.” I sɔ’n ti, e mɔ e ti Zoova i sufuɛ mun’n, é kló e wiengu mun tititi.
MAAN TITI E KLO E WIENGU KƐ E FA KLO E BƆBƆ E WUN’N SA
19, 20. ?Ɲanmiɛn Ndɛ’n i nun afɔtuɛ benin yɛ ɔ kle kɛ ɔ fata kɛ e klo e wiengu mun titi ɔ?
19 Sɛ e nanti Ɲanmiɛn Ndɛ’n su’n, é kló e wiengu kɛ e fa klo e bɔbɔ e wun’n sa titi. Nán be nga e nin be e finwlɛ’n ti kun’n, be ngunmin yɛ é kló be ɔ. Sanngɛ, é kló sran wafa’n kwlaa. Maan ndɛ nga Zezi kannin’n ka e klun kpa. Ɔ seli kɛ: “Klo ɔ wiengu kɛ a fa klo ɔ bɔbɔ wun’n sa.” (Mat. 22:39) Ɲanmiɛn nin Klist be kunndɛ kɛ e klo e wiengu. I sɔ’n ti, sɛ e wun kɛ e kpa sran nun’n, maan e srɛ Zoova naan ɔ fɛ i wawɛ’n man e. I liɛ’n, é kwlá kló e wiengu. Kpɛkun, Zoova yrá e su.—Rɔm. 8:26, 27.
20 Ɲanmiɛn Ndɛ’n waan “mmla nga wie nun-mɛn i sin’n,” yɛle kɛ maan e klo e wiengu kɛ e fa klo e bɔbɔ e wun’n sa. (Zak 2:8) Moizi Mmla’n nun’n, Zoova kleli sa wie m’ɔ fata kɛ Izraɛlifuɛ’m be yo be fa kle kɛ be klo be wiengu’n. Kɛ afuɛ kpanngban sinnin’n, Zoova maan Pɔlu seli kɛ: “Sɛ mmla wie o lɛ, sɛ ɔ ti sɛ ti sɛ o, i kwlaa sɔ’n be bo i kpɔlɛ se kɛ: ‘Klo ɔ wiengu kɛ a fa klo ɔ bɔbɔ ɔ wun’n sa.’” (Rɔm. 13:8-10) Ɔ maan, ɔ fata kɛ e klo e wiengu mun titi.
21, 22. ?Ngue ti yɛ ɔ fata kɛ e klo Ɲanmiɛn nin e wiengu ɔ?
21 Ndɛ kun ekun mɔ Zezi kannin’n, ɔ uka e naan y’a wun like nga ti yɛ ɔ fata kɛ e klo e wiengu’n. Zezi seli kɛ i Si’n “bo wia’n man be bɔ be ti tɛ’n nin be bɔ be ti kpa’n, yɛ ɔ tɔ nzue’n man nanwlɛfuɛ nin be bɔ be ti-man nanwlɛfuɛ’n.” (Mat. 5:43-45) Maan e kusu e klo sran wafawafa kwlaa. Like suanlɛ nga nun’n, e wunnin kɛ like cinnjin kpafuɛ nga é yó é fá klé kɛ e klo e wiengu’n, yɛle kɛ maan e bo Ɲanmiɛn Sielɛ’n i jasin fɛ’n. Sɛ sran’n ti naan ɔ fa su’n, i liɛ kwla yo ye.
22 Like suanlɛ ng’ɔ sinnin lɛ nun’n, e wunnin like nga ti yɛ ɔ fata kɛ e klo Ɲanmiɛn kpa’n, naan e fa e wla’n kwlaa guɛ i su, yɛ e akunndan’n kwlaa trɛn i su’n. Like suanlɛ nga nun’n, y’a wun wafa nga e kwla kle kɛ e klo e wiengu’n. Nanwlɛ, sɛ e klo Zoova nin e wiengu’n, nn y’a nanti mmla dan nɲɔn’m be su. Ɔ maan, e Si Zoova klun jɔ́ e wun.