NDƐ NG’Ɔ KLƐ FLUWA’N SU’N | ?NGUE TI YƐ SRAN KPA’M BE WUN ɲRƐNNƐN ƆN?

?Ngue ti yɛ sran kpa’m be wun ɲrɛnnɛn ɔn?

Ɲanmiɛn Zoovaa yɛ ɔ ti like kwlaa be Yifuɛ’n niɔn. Yɛ like fi nunmɛn i sin. I sɔ’n ti, sran sunman be waan sa kwlaa ng’ɔ ju’n, i kpa o, i tɛ o, ɔ fin i. Sanngɛ, maan e nian Ɲanmiɛn i su ndɛ nga Biblu’n kan’n.

• “Ninnge nga Anannganman yo be’n, be kwlaa be kle kɛ ɔ yo sa’n i nuan su.”​—Jue Mun 145:17.

• “[Ɲanmiɛn] i atin’m be ti seiin. Ɔ ti Nyanmiɛn kun b’ɔ kaci-man, ɔ di-man ndɛ kwlɛ. Ɔ yo sa’n i nuan su sɛsɛsɛ, ɔ di nanwlɛ.”​—Mmla’n 32:4.

• “Sran yo e Min’n i annvɔ, yɛ ɔ si i aunnvuɛ.”​—Zak 5:11.

Nán Ɲanmiɛn yɛ ɔ kpɛ sa tɛ’m be ba ɔ. Asa kusu’n, nɛ́n i yɛ ɔ wlawla sran mun kɛ be yo sa tɛ ɔ. Afin, Ɲanmiɛn Ndɛ’n waan: “Sɛ be laka sran kun’n, nán maan ɔ se kɛ, Nyanmiɛn yɛ ɔ lɛkɛ i-ɔ. Afin be kwlá laka-man Nyanmiɛn sa fi nun, yɛ i bɔbɔ laka-man sran fi.” (Zak 1:13) Nanwlɛ, Ɲanmiɛn lakaman sran kɛ ɔ yo sa tɛ. Kusu, ɔ faman sa tɛ yiman sran su. ?Sɛ ɔ ti sɔ’n niɔn, sa tɛ’n fin wan?

SANVUƐSA ƝAN SRAN’M BE KWLAA

Ɲanmiɛn Ndɛ’n kan like kun nga ti yɛ e wun ɲrɛnnɛn’n i ndɛ. I waan: “Kɛ blɛ’n fa ti bɔ sa’m be fa ju’n, i su like yɛ be wun i-ɔ.” (Akunndanfuɛ’n 9:11) Kɛ sa ju lika kun’n, be nga be o lika sɔ’n nun’n, sa sɔ’n kwla ɲan be. I wie yɛle kɛ i afuɛ kɔe 2.000 yɛ, Zezi Klist kannin sua fleiin m’ɔ bu guali sran 18 be su kunnin be’n, i ndɛ. (Lik 13:1-5) Kɛ sua fleiin sɔ’n bú’n, sran 18 sɔ’m be o i bo, i ti yɛ be wuli ɔ. Nán be sa tɛ’n i su sa yɛ ɔ ɲannin be ɔ. Afuɛ nga be flɛ i 2010 nun Zanvie nun’n, asiɛ’n kejeli nvle nga be flɛ i Aiti’n, i su lɔ. Sran 300.000 tra su be wuli. I sran kpa o, i sran sran tɛ o yɛ be wuli ɔ. Asa ekun’n, sran kwlakwla kwla tɔ tukpacɛ blɛ kwlaa nun.

Sran wie’m be kwla usa kɛ: ‘?Ngue ti yɛ Ɲanmiɛn w’a jranman sa sɔ mun naan b’a juman ɔn? ?Ngue ti yɛ Ɲanmiɛn w’a sasaman sran kpa mun naan i sɔ sa w’a ɲanman be ɔ?’ Kɛ ɔ ko yo naan Ɲanmiɛn w’a tanndan sa kun i ɲrun naan w’a juman’n, ɔ fata kɛ ɔ dun mmua si kɛ sa sɔ’n su wa ju. I yo, sa nga be nin a juman’n, Ɲanmiɛn kwla si be. ?Sanngɛ, sa kwlaa yɛ Ɲanmiɛn si nun ɔn?​—Ezai 42:9.

Ɲanmiɛn Ndɛ’n se kɛ: “E Nyanmiɛn’n ɔ wo nglo lɔ, like nga i klun klo su kɛ ɔ́ yó’n yɛ ɔ yo ɔ.” (Jue Mun 115:3) Ndɛ sɔ’n kle kɛ like nga Ɲanmiɛn klo kɛ ɔ́ sí i’n, yɛ ɔ si i ɔ. Maan e fa sunnzun ase e nian. Kɛ Sodɔmufuɛ mun nin Gomɔrufuɛ’m be sa tɛ’n yoli dan’n, Ɲanmiɛn seli Abraamu kɛ: “Ɔ ti bɔ n jra n nian sɛ sa nga be yo’n nin be wun ndɛ nga n ti’n sɛ ɔ ti nanwlɛ o.” (Bo Bolɛ 18:20, 21) Blɛ wie nun’n, Zoova bɔbɔ i klunklo su w’a fɛmɛn i ɲin w’a sieman Sodɔmufuɛ nin Gomɔrufuɛ’m be sa tɛ’n su. I sɔ kunngba’n, sa nga be nin a juman’n, Zoova kwla se kɛ ɔ fɛmɛn i ɲin siemɛn i ngba su. (Bo Bolɛ 22:12) ?I sɔ’n kle kɛ, Zoova klo sa tɛ’n ti ɔ? Cɛcɛ. Afin Ɲanmiɛn Ndɛ’n waan “sa ng’ɔ yo be’n be ti kpa lele tra su.” Zoova tɔman sa’m be su yoman. Sa ng’ɔ nin i klun sa’n i su kpɛnlɛ’n kɔ likawlɛ’n, yɛ ɔ yo ɔ. Kusu, ɔ mianman sran kɛ ɔ yo like.b (Mmla’n 32:4) Ɔ maan, é sé kɛ like nga Zoova klo kɛ ɔ́ sí i’n, yɛ ɔ si i ɔ.

SA TƐ SUNMAN FIN KLƆ SRAN’M BE BƆBƆ

Like kun ekun nga ti yɛ sran’m be wun ɲrɛnnɛn’n, ɔ fin sran’m be bɔbɔ. Ɲanmiɛn Ndɛ’n waan: “Sran kun i lakalɛ’n fin i bɔbɔ i konvi’n, yɛ maan be lɛkɛ i be nyɛn i-ɔ. Sɛ konvi’n ti sran’n, wuun é sé kɛ, ɔ wunnzɛ, yɛ ɔ wu sa tɛ’n. Kɛ sa tɛ sɔ’n i nyin ko ti kpa’n, i like b’ɔ su i su’n yɛlɛ wie’n.” (Zak 1:14, 15) Ɔ maan, kɛ sran’m be yo be konvi tɛ’n i su sa’n, be wun i su afɛ’n. (Rɔmfuɛ Mun 7:21-23) Kɛ ɔ fɛ i mɛn’n i bo bolɛ nun lele m’ɔ́ fá jú andɛ’n, sran’m be yoli sa tɛtɛ dan be kle sran’m be ɲrɛnnɛn. Asa ekun’n, sran klunwifuɛ’m be wlawla be wiengu mun kɛ be yo sa tɛ’n wie. Ɔ maan sa tɛ’n w’a tru.​—Nyanndra Mun 1:10-16.

?Ɔ fata kɛ Ɲanmiɛn i sa tran ninnge nga sran’m be yo’n nun naan b’a yoman sa tɛ? Maan e nian wafa nga Ɲanmiɛn boli sran’n. Ɲanmiɛn Ndɛ’n waan Ɲanmiɛn yili sran’n kɛ i bɔbɔ sa. Ɔ maan, sran’m be kwla fa Ɲanmiɛn i nzuɛn’n. (Bo Bolɛ 1:26) Ɲanmiɛn mianmianman sran. E tinuntinun e kwla se kɛ é kló i naan e yó sa ng’ɔ yo i fɛ’n. (Mmla’n 30:19, 20) Sɛ Ɲanmiɛn waan ɔ́ míanmían sran’n, nn w’a manman sran’n i atin kɛ ɔ kwla fɛ i tiaun ajalɛ. Sran’m be timan kɛ mannzin mɔ junman trele kun i dilɛ ti yɛ be yili be’n sa. Kusu’n, Ɲanmiɛn dunman mmua sunnzunman sa ng’ɔ ju sran’m be su’n naan w’a ju. Nanwlɛ, kɛ e si kɛ Ɲanmiɛn mianmianman e’n, ɔ yo e fɛ dan. Afin, i sɔ’n kle kɛ ɔ bu e sran. Sanngɛ, i sɔ’n kleman kɛ ajalɛ tɛ nga sran’m be fa’n, bé wún i su afɛ’n trilili.

?SA TƐ NGA E YOLI BE LAA’N I TI YƐ E FƐ Ɔ?

Be nga be kɔ asɔnun nga be flɛ i Ɛndu nin Buda’n, be flɛ be mmla kun kɛ Karma. Yɛle kɛ “like nga sran kun yoli naan b’a wu i ekun’n, i su sa yɛ ɔ tɔ i su ɔ. Ɔ maan, like nga sran’m be yo’n i su sa yɛ be ɲɛn i ɔ.”

?Wie’n i su ndɛ benin yɛ Biblu’n kan ɔn? Kɛ Ɲanmiɛn boli Adam, ɔ fɛ i sieli i Edɛni fie’n nun lɔ. Kpɛkun Ɲanmiɛn seli i kɛ: “Fie’n nun waka mun yɛ be o lɛ-ɔ, be mma kwlaa nga ɔ waan á dí’n, di. Sanngɛ sa kpa’n nin sa tɛ’n be silɛ waka’n i mma liɛ’n, nán di i li. Sɛ a di’n, saan wulɛ cɛ yɛ á wú-ɔ.” (Bo Bolɛ 2:16, 17) Sɛ Adam w’a yoman ɲin kekle Ɲanmiɛn su’n, nn ɔ kali lɛ tititi. Ɲin kekle m’ɔ yoli i Ɲanmiɛn su’n, i ti yɛ ɔ wuli ɔ. Yɛ “i ti yɛ maan wie’n wo sran’m be kwlaa be su-ɔ.” (Rɔmfuɛ Mun 5:12) Ɔ maan, “sa tɛ’n i akatua’n yɛlɛ wie.” (Rɔmfuɛ Mun 6:23) Biblu’n se ekun kɛ: “Kɛ sran’n ko wu’n, i ndɛ nun-man sa tɛ yolɛ nun kun.” (Rɔmfuɛ Mun 6:7) I sɔ’n kle kɛ, sran nga w’a wu’n w’a tua i sa tɛ’n i ti kalɛ’n.

Andɛ sran kpanngban be fa mmla mɔ be flɛ i Karma’n su. Ɔ maan kɛ sa ɲan be bɔbɔ ɔ nin sran uflɛ’n, be waan i su ɔ. Sɛ ɔ ti sɔ sakpa’n, é sé kɛ sran’m be lemɛn i yowlɛ. Sa’m bé tɔ́ be su tititi. Be se kɛ sɛ sran kun ɔ́ yáci ɲrɛnnɛn wunlɛ’n, ɔ fata kɛ ɔ wu. Kpɛkun, kɛ ɔ sɛ i sin ekun’n, ɔ fata kɛ ɔ fa sa kpa yolɛ’n cici i ti. Yɛ maan ɔ si ninnge kpanngban. Nɛ́n i sɔ yɛ Biblu’n kan ɔn.c

SRAN NGA ƝRƐNNƐN’N I DAN LIKA FIN I’N

Ɲrɛnnɛn ng’ɔ tɔ sran’m be su’n, i dan lika fin mmusu’m be si Satan. I bo bolɛ nun’n, ɔ ti Ɲanmiɛn i anzi kpa. Sanngɛ, w’a “di-man nanwlɛ mlɔnmlɔn.” Ɔ maan, ɔ fali mɛn’n yili i sa tɛ’n nun. (Zan 8:44) Ɔ yoli maan Adam nin Ɛvu be yoli ɲin kekle Ɲanmiɛn su Edɛni fie’n nun lɔ. (Bo Bolɛ 3:1-5) Zezi Klist flɛli i kɛ “Lakafuɛ’n,” yɛ “sran ng’ɔ sie mɛn nga’n.” (Matie 6:13; Zan 14:30) Sɛ é kwlá sé’n, sran’m be kwlakwla be yaci Ɲanmiɛn lɛ be su Satan su. (1 Zan 2:15, 16) 1 Zan 5:19 se kɛ: “Klunwifuɛ’n sie mɛn wunmuan’n.” Anzi wie’m be suli Satan su be yoli ɲin kekle’n wie. Biblu’n kle kɛ Satan nin anzi sɔ mɔ be flɛ be mmusu’n, be “laka mɛn wunmuan nunfuɛ’m be kwlaa.” Yɛ be fa ɲrɛnnɛn yi i sran’m be su. (Sa Nglo Yilɛ 12:9, 12) Ɔ maan, ɲrɛnnɛn nga sran’m be wun i’n, i dan lika fin mmusu’m be si Satan.

I kwlaa sɔ’n kle kɛ nán Ɲanmiɛn yɛ ɔ fa ɲrɛnnɛn sa mun yi i sran’m be su ɔ. Kusu, ɔ kleman sran fi ɲrɛnnɛn. Sanngɛ, ɔ tali nda kɛ ɔ́ wá yó naan sran’m b’a wunman ɲrɛnnɛn kun. Ndɛ akpasua ng’ɔ́ bá lɛ’n, wá klé e like nga Ɲanmiɛn wá yó’n.

[Ja ngua lɛ ndɛ mun]

[Ndɛ kwle bue 5]

Sran’m be yoli sa tɛtɛ dan be kleli sran’m be ɲrɛnnɛn.