?Wafa sɛ yɛ ɔ fata kɛ amun tu amun mma’m be fɔ ɔ?

“Loto kwlaa nga bé sín’n, n nian sɛ min wa Zɔrdani o be nun o. Sanngɛ, ngbɛn ɔn. Kɛ ɔ́ fíte’n, n kle i dɔ trele ng’ɔ fata kɛ ɔ sɛ i sin awlo’n. Sanngɛ i kpɛ nsan yɛ, ɔ faman ndɛ nga n kan kle i’n su. N usali min wun kɛ: ‘?Nin yɛ w’a ɔ ekun ɔn?’ ‘?Sa wie w’a ɲɛn i ti ɔ?’ ‘?Ɔ siman kɛ, kɛ e wunmɛn i’n, e wla guaman ase?’ Kɛ ɔ bali awlo’n, ɔ ka kan naan m’an tu min ya’n m’an guɛ i su.”​—ZƆRZU.

“Cɛn kun n wo lɛ’n, n tili min wa bla kan’n i kpanlɛ kekle kpa. Min klun suannin min kplalala. N ko niannin like nga ti yɛ ɔ kpan yaya sɔ’n. Kannzu, i niaan kan’n yɛ w’a fin i like ɔ.”​—NIKƆLU.

“Cɛn kun’n, n wunnin be sa nga kun min wa Natali sa nun. Natali le afuɛ nsiɛn. Kɛ n usɛli i sran ng’ɔ mɛnnin i nga sɔ’n, ɔ seli min kɛ: ‘M’an wuaman, n isali.’ Kɛ e si kɛ ɔ wuali naan ɔ diman nanwlɛ’n, ɔ yoli e ya dan. Ɔ maan, e sunnin.”​—ETIƐNI.

?SIƐ nin niɛn mun, sa kɛ ngalɛ sa’m b’a ju amun awlo lɔ le? ?Kɛ amun wa’n yo sa wie m’ɔ timan su’n, ngue yɛ amun yo ɔ? ?Ɔ yo amun kɛ an tu i fɔ? ?Ba’m be fɔ tulɛ’n ti like tɛ?

?KƐ BE SE KƐ BE TU SRAN FƆ’N, I BO’N YƐLE BENIN?

Biblu’n nun’n, kɛ be se kɛ be “tu sran fɔ’n,” nɛ́n i ngunmin yɛle sran’n i bolɛ’n. Sanngɛ, ɔ ti sran’n i like klelɛ, i ndɛ kan klelɛ nin i ngwlɛlɛ klelɛ. Sran’n i fɔ tulɛ’n, ɔ timɛn i like yaya yolɛ annzɛ i tɛtɛ yolɛ.​—Nyanndra Mun 4:1, 2.

Fɔ nga siɛ nin niɛn’m be tu be mma mun’n, e kwla fa sunnzun like nga fie difuɛ’n yo naan waka ng’ɔ ta’n w’a yo kpa’n. Kɛ fie difuɛ’n ta waka’n, ɔ guagua su nzue, ɔ tutu i wun naan ijre tɛ nin kakaa mun b’a kunman waka’n. Kɛ waka’n ɲín’n, ɔ kpɛkpɛ i sa mma wie mun naan waka’n w’a ɲin flolo. Nanwlɛ, fie difuɛ’n yo ninnge fanunfanun naan i waka’n w’a yo kpa. Siɛ nin niɛn’m be kusu’n, ɔ fata kɛ be yo ninnge fanunfanun naan be mma’m b’a yo kpa. Ɔ fata kɛ wie liɛ’n, be tu be fɔ. I sɔ’n yɛ be fa sunnzun waka’n i sa mma wie’m be kpɛkpɛlɛ’n niɔn. Sanngɛ, waka’n i sa mma mɔ fie difuɛ’n kpɛ́kpɛ́’n, ɔ fata kɛ ɔ si i kpɛkpɛ naan waka’n w’a wuman. Siɛ nin niɛn mɔ be tu be mma’m be fɔ kusu’n, ɔ fata kɛ be si i tu. Yɛle kɛ, maan be tu i klolɛ su.

Zoova kle siɛ nin niɛn’m be ajalɛ klanman kpa. Wafa ng’ɔ tu i sufuɛ’m be fɔ’n ti’n, be ‘kplin su kɛ ɔ tu be fɔ.’ (Nyanndra Mun 12:1) ‘Like ng’ɔ kle be’n, be tra nun kpa, be yaciman nun.’ (Nyanndra Mun 4:13) Kɛ Zoova tú sran fɔ’n, (1) ɔ tu i klolɛ su, (2) ɔ tu i ngwlɛlɛ su, kpɛkun, (3) ɔ jran su kpa ɔ kaciman. Siɛ nin niɛn mun, sɛ amun nian Zoova i ajalɛ’n su’n, amun mma’m bé kplín fɔ tulɛ’n su.

AMUN TU AMUN MMA’M BE FƆ KLOLƐ SU

Kɛ mɔ Zoova klo i sufuɛ mun’n, i ti yɛ ɔ tu be fɔ ɔ. Ɲanmiɛn Ndɛ’n waan: “Sran nga bɔ Anannganman klo i’n, yɛ ɔ tu i fɔ-ɔ. Siɛ b’ɔ klo i wa’n kɛ ɔ yo i sɔ-ɔ.” (Nyanndra Mun 3:12) Ɔ se ekun kɛ Zoova “ti Nyanmiɛn aklunyefuɛ, nin aunnvuɛ sifuɛ, [ɔ] fa-man ya ndɛndɛ.” (Ezipt Lɔ Tulɛ 34:6) I sɔ’n ti, kɛ Zoova tú sran kun fɔ’n, ɔ yomɛn i tɛtɛ. Kusu ɔ yomɛn i finfin yɛ ɔ kanman ndɛ m’ɔ “yra fiaan kɛ kue yɛ b’a fa wɔ sran sa” ɔ.​—Nyanndra Mun 12:18.

Siɛ nin niɛn mun, wafa nga Ɲanmiɛn trɛ i awlɛn’n, e si kɛ amun kwlá nianman su guɛmɛn i ti nin i bo. Wie liɛ’n, amun awlɛn be amun klun kpa. Sanngɛ blɛ sɔ nun’n, maan ɔ kpɛn amun klun kɛ sɛ amun tu amun wa’n i fɔ klunngbɔ su’n, ɔ su yoman sa fi ye. Sran mɔ be tu i fɔ klunngbɔ su’n, ɔ timɛn i fɔ tulɛ. Ɔ ti i tɛtɛ yolɛ.

Sɛ amun tra amun awlɛn naan amun tu amun mma’m be fɔ klolɛ su’n, i bo gúa kpa. Zɔrzu nin Nikɔlu mɔ e kannin be ndɛ i bo bolɛ nun’n, maan e nian like nga be yoli’n.

Zɔrzu waan: “Kɛ Zɔrdani bá awlo’n, nn min nin min yi y’a fa ya dan. Sanngɛ, e trali e awlɛn e sieli e su i nuan bo. Kɛ mɔ e wun kɛ lika’n w’a ɔ mmua’n ti’n, e seli kɛ maan e ko la naan sɛ aliɛ cɛn’n, nn y’a kan. E srɛli Ɲanmiɛn yɛ e ko lali ɔ. Kɛ aliɛ cɛnnin’n, e kwla kannin ndɛ’n i amanniɛn su. Ɔ maan, ɔ wunnin i wlɛ kɛ w’a yoman like kpa. Fɔ nga e tuli i’n, ɔ kplinnin su. E wunnin i wlɛ kɛ fɔ nga be tu i ya su’n, i bo guaman kpa. Sanngɛ, kɛ be sie be su sran’n i nuan bo’n, fɔ nga be tu i kasiɛn su’n i bo gua kpa.”

Nikɔlu waan: “Kɛ n wunnin like yaya nga min wa yasua kan’n yoli i niaan bla’n, min wla beli min klun. Sɛ min waan ḿ bó i’n, ɔ́ yó tɛ mɛ́n i. I sɔ’n ti’n, n seli i kɛ ɔ jaso min ɲrun lɛ wɔ i sua ba’n nun lɔ. Kɛ min wla guali ase’n, n flɛli i. N fali like yaya ng’ɔ yoli i niaan bla’n i osu’n n kleli i. Kpɛkun, n yiyili nun n kleli i kɛ sran like yaya yolɛ’n timan kpa. Ɔ wunnin i sɔ liɛ’n i wlɛ. Ɔ maan, ɔ tɔli i niaan bla’n nun, ɔ seli i yaci.”

I sɔ’n kle kɛ, kɛ bé tú sran kun i fɔ’n, kannzɛ bɔbɔ ɔ fata kɛ ɲantiaan tran nun’n, ɔ fata kɛ be tu i klolɛ su.

AMUN TU AMUN MMA’M BE FƆ NGWLƐLƐ SU

Kɛ Zoova tú sran kun i fɔ’n, ‘sa nga sran yoli’n su yɛ ɔ nian’ tu i titi ɔ. (Zeremi 30:11; 46:28) I sɔ yolɛ nun’n, ɔ bu sa’n i ɲrun nin i sin’n kwlaa i akunndan. ?Wafa sɛ yɛ siɛ nin niɛn’m be kwla yo sɔ wie ɔ? Etiɛni mɔ e kɛnnin i ndɛ i bo bolɛ nun’n seli kɛ: “Kɛ Natali se cinnjin kɛ w’a wuaman be sa nga’n mɔ e si kɛ ɔ diman nanwlɛ’n, ɔ yoli e ya dan. Sanngɛ e buli i bakan m’ɔ ti’n, ɔ nin sa’m be wlɛ m’ɔ nin a wunmɛn i kpa’n i akunndan.”

Nikɔlu mɔ e kɛnnin i ndɛ’n i wun Robɛli kusu’n, ɔ bu sa’m be ɲrun nin i sin’n be akunndan wie. Kɛ i wa kun yo sa ng’ɔ timan su’n, ɔ usɛ i wun kɛ: ‘?Sa ng’ɔ yoli i lɛ’n, andɛ kunngba yɛ w’a yo ɔ, annzɛ kusu ɔ su fa kaci i nzuɛn? ?Afɛ kan wie o i su ti yɛ ɔ yo sɔ ɔ, annzɛ like uflɛ ti yɛ ɔ yo sɔ ɔ?’

Siɛ nin niɛn nga be ti akunndanfuɛ’n, be si kɛ bakanngan’m be ɲin nin a timan naan b’a wun sa wlɛ kɛ kpɛnngbɛn mun sa. Akoto Pɔlu wunnin i wlɛ sɔ. Ɔ seli kɛ: “Kɛ n ti bakan’n, n ijɔ bakan ijɔlɛ, m bu bakan akunndan, yɛ n kan bakan ndɛ.” (1 Korɛntfuɛ Mun 13:11) Robɛli seli kɛ: “Kɛ min wa’n yo sa m’ɔ timan kpa’n, like ng’ɔ uka min naan m’an faman ya tratraman su’n yɛle kɛ, m bu like nga m bakan nun’n n yoli’n i akunndan.”

Siɛ nin niɛn mun, ɔ ti su kɛ amun mma’m be nin a siman ngwlɛlɛ. Nɛ́n i sɔ’n kusu ti yɛ amun ɲin kpá sa tɛ nga be yo’n su ɔ. Amun bu like nga ba’m be kwla yo annzɛ be kwlá yoman’n, ɔ nin ninnge uflɛ wie mun ekun be akunndan. I liɛ’n, fɔ tulɛ’n su tratraman su. Sanngɛ, amún tú i klolɛ su ngwlɛlɛ su.

NDƐ NGA AMUN KAN’N AMUN DI SU

Malasi 3:6 nun’n, Zoova se kɛ: “N ti Anannganman n kaci-man.” Zoova i nzuɛn sɔ’n ti’n, e mɔ e ti i sufuɛ’n e wla gua ase. Siɛ nin niɛn mun, kannzɛ amún tú amun mma’m be fɔ’n, sanngɛ ɔ fata kɛ be wla gua ase. Sɛ amun kan ndɛ kun naan amun jranman su’n, ba’m be su wunman like trele kun ng’ɔ fata kɛ be yo’n. Ɔ maan, be wla su guaman ase.

Zezi seli kɛ: “Sɛ an se kɛ ɛɛn, maan ɔ ka su, yɛ sɛ an se kɛ cɛcɛ’n, maan ɔ ka su.” Siɛ nin niɛn mun, amun kwla niɛn i sɔ’n su wie. (Matie 5:37) Like nga amun si kɛ amun su yoman’n, nán amun kan kle amun mma mun kɛ amún yó. Sanngɛ, sɛ amun wa’n yoli sa tɛ naan amun se i kɛ amún tú i fɔ’n, nán amun kaci. Amun jran su.

Siɛ nin niɛn mun, maan amun nuan sɛ amun mma’m be fɔ tulɛ’n su wie. Robɛli seli kɛ: “Sɛ ba’m be waan bé yó like kun naan be nin’n w’a kplinman su’n, sɛ n siman nun naan be kan kle min’n, m bo su n kle min yi naan y’a fa ajalɛ kun.” Sɛ amun wunman ajalɛ trele kun nga amún fá’n, maan amun koko i su yalɛ aamiɛn naan amun nuan sɛ su.

BA’M BE FƆ TULƐ’N TI LIKE KPA

Zoova tu i sufuɛ’m be fɔ klolɛ su. Asa ekun’n, ɔ tu be fɔ ngwlɛlɛ su. Kpɛkun, ndɛ ng’ɔ kan’n, ɔ kacimɛn i ɔ jran su. Sɛ siɛ nin niɛn’m be niɛn i sɔ’n su’n, fɔ nga be tu be mma mun’n i bo’n gúa kpa. Yɛle kɛ ba’m bé ɲín klanman, yɛ be ɲin tí. Biblu’n se kɛ: “Atin b’ɔ ti klanman bɔ bakan’n ko fa su’n, kle i i bakan nun. I liɛ’n, kɛ ɔ́ fá yó kpɛnngbɛn’n, ɔ su yaci ko fa-man uflɛ.”​—Nyanndra Mun 22:6.

[Kuku, bue 31]

Biblu’n kle kɛ be tu fɔ’n...

Klolɛ su: Fɔ nga be tu mɔ i bo gua kpa’n, be tu i klolɛ su, be tumɛn klunngbɔ su. Sɛ amun wa’n yo sa m’ɔ be amun awlɛn’n, maan amun wla gua ase naan amun a tu i fɔ.

Ngwlɛlɛ su: Amun bu like nga ba’m be kwla yo annzɛ be kwlá yoman’n, ɔ nin ninnge uflɛ wie mun ekun be akunndan.

Be jran ndɛ nga be kan’n su, be kacimɛn i: Sɛ amun wa’n yoli sa tɛ naan amun se i kɛ amún tú i fɔ’n, nán amun kaci i. Amun jran su.