BIBLU’N I SU KOSAN’M BE SU TƐLƐ

?Ngue ti yɛ ɔ fata kɛ e srɛ Ɲanmiɛn ɔn?

Ɲanmiɛn Zoova kunndɛ kɛ e kan e klun ndɛ e kle i titi. (Lik 18:1-7) Sɛ e yo sɔ’n, ɔ́ síe i su e nuan bo. Afin e ndɛ lo i. Kɛ mɔ Ɲanmiɛn waan e srɛ i’n ti’n, nán e sisi e bo, maan e srɛ i.​—An kanngan Filipfuɛ Mun 4:6 nun.

Nán asamian’n i nun ngunmin yɛ ɔ fata kɛ e srɛ Ɲanmiɛn ɔn. Sanngɛ, e srɛ Ɲanmiɛn naan é fá e wun é mɛ́ntɛn i. (Jue Mun 8:4, 5) Nanwlɛ, kɛ e kan e klun ndɛ e kle Ɲanmiɛn’n, e nin i e afiɛn mantan kpa kɛ sran kun nin i janvuɛ sa.​—An kanngan Zak 4:8 nun.

?Wafa sɛ yɛ ɔ fata kɛ e srɛ Ɲanmiɛn ɔn?

Kɛ e nin Ɲanmiɛn é kókó yalɛ’n, ɔ kunndɛman kɛ ndɛ nga é kán’n, ɔ kle kɛ e su tu e wun. Kusu’n, ɔ kunndɛman kɛ ɔ yo ndɛ mɔ e suannin mɔ é kán flán nun ɔn. Sanngɛ, Zoova kunndɛ kɛ e kan e klun ndɛ. (Matie 6:7) I wie yɛle laa Izraɛli lɔ bla kun mɔ be flɛ i Ani i liɛ’n. I awlo’n nun sa m’ɔ o i su’n, ɔ tuli i klun kan kleli Ɲanmiɛn. I sin’n, kɛ Ɲanmiɛn tɛli i su klanman’n, ɔ srɛli Ɲanmiɛn ekun lɛli i ase.​—An kanngan 1 Samiɛl 1:10, 12, 13, 26, 27; 2:1 nun.

Ɲanmiɛn srɛlɛ’n ti e cenjele like dan. Afin sa ng’ɔ o e su’n, e kwla kan kle Ɲanmiɛn. Asa ekun’n, e kwla lɛ i ase ninnge ng’ɔ yo man e’n ti. I sɔ’n ti’n, nán e fa e cenjele like sɔ’n e tratra e sa bɛ nun.​—An kanngan Jue Mun 145:14-16 nun.

Sɛ a kunndɛ kɛ á sí nun ekun’n, nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 17 nun. Zoova i Lalofuɛ mun yɛ be yili ɔ.

A kwla ko fɛ i ɛntɛnɛti lika nga nun lɔ: www.pr2711.com