BIBLU’N I SU KOSAN’M BE SU TƐLƐ
?Ngue ti yɛ e srɛ kɛ maan Ɲanmiɛn Sielɛ blɛ’n ju ɔ?
Ɲanmiɛn Sielɛ’n ti famiɛn diwlɛ kun, yɛ ɔ o ɲanmiɛn su lɔ. Sran’m be kwlá yoman naan ninnge kɛ sran lufle bulɛ’n, nin tukpacɛ’n nin be wiengu’m be like yaya yolɛ’n b’a tranman lɛ kun. Sanngɛ, Ɲanmiɛn Sielɛ’n kwla yo naan i sɔ ninnge’m b’a tranman lɛ kun. I kpa bɔbɔ’n, i sɔ yɛ ɔ́ wá yó ɔ. Asa ekun’n, Ɲanmiɛn Sielɛ’n ti’n, nanwlɛ dilɛ’n trɛ́ asiɛ’n su. Yɛ sran’m bé trán fɔundi. I sɔ’n ti, Zezi seli i sɔnnzɔnfuɛ mun kɛ be srɛ kɛ maan Ɲanmiɛn Sielɛ blɛ’n ju. Ɲanmiɛn fɛli i Wa Zezi sieli Famiɛn. Kpɛkun, ɔ fali Zezi i sɔnnzɔnfuɛ akpasua kun kɛ be nin Zezi be di famiɛn ɲanmiɛn su lɔ.—Kanngan Lik 11:2; 22:28-30 nun.
Ɔ ka kan’n, Ɲanmiɛn Sielɛ’n wá núnnún sran’m be famiɛn diwlɛ mun. Ɔ maan, kɛ e srɛ kɛ maan Ɲanmiɛn Sielɛ blɛ’n ju’n, e kunndɛ kɛ ɔ wa tu sran’m be famiɛn diwlɛ’n kwlakwla be bo naan ɔ tran be osu.—Kanngan Daniɛl 7:13, 14, ɔ nin Sa Nglo Yilɛ 11:15, 18 be nun.
?Ngue yɛ Ɲanmiɛn Sielɛ’n wá yó mán sran mun ɔn?
Zezi sí sran’m be síe, afin ɔ si aunnvuɛ. Sran kwlaa ng’ɔ leman wie m’ɔ sun flɛ i’n, ɔ́ dé i. Afin, ɔ ti Ɲanmiɛn Wa. Yɛ ɔ le i sɔ yolɛ’n i wun alaje.—Kanngan Jue Mun 72:8, 12-14 nun.
Sran nanwlɛfuɛ kwlaa nga be tu be klun be srɛ kɛ maan Ɲanmiɛn Sielɛ blɛ’n ju’n, be liɛ wá yó ye. Sɛ a suan Ɲanmiɛn Sielɛ’n i su ndɛ nga Biblu’n kan’n, ɔ liɛ yó ye wie.—Kanngan Lik 18:16, 17, ɔ nin Zan 4:23 be nun.
Sɛ amun kunndɛ kɛ amún sí nun ekun’n, an nian fluwa ng’ɔ o lɛ’n ?Ngue like yɛ Biblu’n kle i sakpasakpa ɔ? i ndɛ tre 8 nun. Zoova i Lalofuɛ mun yɛ be yili ɔ.
A kwla ko fɛ i ɛntɛnɛti lika nga nun lɔ: www.jw.org