Maan e nzuɛn’n fa Ɲanmiɛn liɛ’n sa’n kwlaa nun

“Maan amun nzuɛn liɛ’n kusu fɛ i liɛ’n sa’n kwlaa nun.”​—1 PIƐ. 1:15.

?WAFA SƐ YƐ AMÚN TƐ́ SU Ɔ?

?Ngue ti yɛ ɔ ti cinnjin kpa kɛ Klistfuɛ’m be nanti Ɲanmiɛn i mmla’m be su ɔ?

?Ngue yɛ é yó naan y’a kle kɛ Zoova yɛ ɔ sie e ɔ?

?Kɛ nga Ebre Mun 5:7, 11-14 fa kan’n sa’n, wafa sɛ yɛ ɔ fata kɛ e bu Biblu’n nun like suanlɛ’n niɔn?

1, 2. (a) ?Ngue yɛ Ɲanmiɛn kunndɛ kɛ i sufuɛ’m be yo ɔ? (b) ?Kosan benin mun yɛ like suanlɛ nga wá tɛ́ be su ɔ?

ƝANMIƐN maan akoto Piɛli boli Nyanmiɛn Nyrun Saun Yolɛ fluwa’n su kannin ndɛ. Ɔ seli kɛ maan Klistfuɛ’m be nzuɛn’n fa Ɲanmiɛn liɛ’n. (An kanngan 1 Piɛr 1:14-16 nun.) Ɲanmiɛn “i nzuɛn’n nin klɔ sran liɛ’n ti-man kun.” Ɔ maan, ɔ kunndɛ kɛ be ng’ɔ kpali be sieli be ngunmin’n, be nin be nga be ti Klist i “bua’m be wie” mun’n, be nzuɛn’n fɛ i liɛ’n sa’n kwlaa nun.​—Zan 10:16.

² Like suanlɛ nga wá fá e ɲin é síe Nyanmiɛn Ɲrun Saun Yolɛ fluwa’n i nun ndɛ wie’m be su. Kpɛkun, wafa nga e kwla nian ndɛ sɔ’m be su e nanti naan e nzuɛn’n w’a fa Ɲanmiɛn liɛ’n sa’n kwlaa nun’n, ɔ́ kɛ́n i ndɛ wie. Asa ekun’n, é tɛ́ kosan nga’m be su. ?Ngue ti yɛ ɔ fata kɛ e nanti Ɲanmiɛn i mmla’m be su ɔ? ?Ngue yɛ Nyanmiɛn Nyrun Saun Yolɛ fluwa’n kle e mɔ sɛ e yo’n, é klé kɛ Ɲanmiɛn yɛ ɔ sie e ɔ? ?Ngue yɛ tɛ nga laa Izraɛlifuɛ’m be yili be’n, be kle e ɔ?

MAAN E NANTI ƝANMIƐN I MMLA’M BE SU

3, 4. (a) ?Ngue ti yɛ ɔ fata kɛ e nanti Zoova i mmla’m be su ɔ? (b) ?Ngue ti yɛ ɔ fataman kɛ e tu e klunngbɔ annzɛ e fa e wiengu i wun ndɛ e sie e klun ɔn?

³ Sɛ e waan Zoova klun jɔ e wun’n, ɔ fata kɛ e nanti i mmla’m be su. Andɛ’n, e diman Moizi Mmla’n su. Sanngɛ mmla sɔ’m be ti’n, e si like nga Zoova klo i’n, ɔ nin ng’ɔ klomɛn i’n. I wie yɛle kɛ, ɔ seli Izraɛlifuɛ mun kɛ: “Nán amun se kɛ sran nga sa w’a yo amun sa ti amún yó i wie. Nán amun fa amun wiengu wun ndɛ be sie amun klun. Ɔ fata kɛ sran kun klo i wiengu kɛ ɔ fa klo i bɔbɔ i wun’n sa. Min yɛ n ti Anannganman nin-ɔn.”​—Sau. 19:18.

⁴ Zoova kunndɛman kɛ e tu e klunngbɔ. Yɛ ɔ kunndɛman kɛ e fa e wiengu i wun ndɛ e sie e klun. (Rɔm. 12:19) Sɛ y’a nantiman mmla sɔ’n su’n, é gúɛ i ɲin ase. Kpɛkun, Satan klun jɔ́. I sɔ’n ti’n, kɛ sran lo e ngasi’n, nán maan e fa ya ble. Sɛ e fa ya ble’n, e bɔbɔ é wún i su afɛ’n. Ɲanmiɛn Ndɛ’n waan e ti kɛ “sɛ” mɔ ninnge kpakpa’m be o nun’n sa. Ninnge kpakpa sɔ’m be ti like kun i nzɔliɛ. Yɛle jasin fɛ’n mɔ e bo’n. (2 Kor. 4:1, 7) I sɔ’n ti’n, e kunndɛman kɛ é fá sran wun ndɛ é síe e klun naan ɔ saci e.

5. ?Ngue yɛ Aarɔn i mma yasua’m be wie’n i su ndɛ’n, ɔ kle e ɔ? (An nian desɛn ng’ɔ o kan like suanlɛ’n bo i bo lɛ’n.)

⁵ Saun Yolɛ 10:1-11, ɔ kan sa kun m’ɔ juli Aarɔn i awlo’n nun’n i ndɛ. Yɛle kɛ Zoova i sin’n, ɔ yrali Nadab nin Abii kpɛkun, be wuli. Aarɔn i mma mun yɛle sran nɲɔn sɔ mun. Kɛ be wuli’n, Ɲanmiɛn seli Aarɔn nin i mma onga mun kɛ nán be yo be sɛ. Kɛ ɔ yoli sɔ’n, w’a yoman pɔpɔ w’a manman be. ?Sɛ be tu e osufuɛ kun, annzɛ e sran kpa kun asɔnun’n nun’n, ngue yɛ é yó ɔ? ?É fá e wun é mántan sran sɔ’n i ekun? ?Annzɛ kusu’n, é klé kɛ e nzuɛn’n fa Ɲanmiɛn liɛ’n sa’n kwlaa nun?​—An kanngan 1 Korɛntfuɛ Mun 5:11 nun.

6, 7. (a) ?Sɛ é trán atɔnvlɛ falɛ kun i bo asɔnun sua wie nun’n, annzɛ e su trɛnmɛn i bo’n, ngue yɛ ɔ fata kɛ e bu i akunndan ɔn? (An nian nzɔliɛ’n i su ndɛ’n nun.) (b) ?Sɛ e osufuɛ m’ɔ timan Zoova i Lalofuɛ’n, ɔ su fa atɔnvlɛ i asɔnun’n nun lɔ naan e su trɛnmɛn i bo wie’n, wafa sɛ yɛ e kwla yiyi nun e kle i ɔ?

⁶ Sa ng’ɔ ɲannin Aarɔn nin i awlobo’n, i wie su ɲanman e le. Sanngɛ, maan e se kɛ e osufuɛ wie m’ɔ timan Zoova i Lalofuɛ’n, ɔ su wa ja bla annzɛ bian be asɔnun liɛ’n nun lɔ. Kpɛkun, ɔ yia e kɛ e trɛn i aja’n i bo naan ɔ́ mán e junman wie kɛ e di. ?Ngue yɛ é yó ɔ? Ɲanmiɛn Ndɛ’n seman trele kɛ e kplin su annzɛ nán e kplin su. Sanngɛ, e kwla niɛn i nun ndɛ wie’m be su e fa ajalɛ ng’ɔ ti kpa’n.a

⁷ Kɛ e mian e ɲin e nanti Zoova i mmla’m be su sa’n kwlaa nun’n, e osufuɛ nga be timan Klistfuɛ’n be kwla kan e ndɛ tɛ. (1 Piɛ. 4:3, 4) Sanngɛ, ɔ fataman kɛ e yi e man be. Like nga ti yɛ e yoman kɛ be sa wie’n, maan e yiyi nun amanniɛn su e kle be. I wie yɛle e osufuɛ mɔ w’a yia e kɛ e trɛn i atɔnvlɛ falɛ’n i bo’n i liɛ’n. E akunndan m’ɔ buli mɔ i ti yɛ ɔ yiali e’n ti’n, maan e yo i kwla. Kpɛkun, e kwla se i kɛ i atɔnvlɛ falɛ cɛn’n, ɔ ti aklunjuɛ cɛn. Naan sɛ e trɛn i bo be asɔnun sua’n nun lɔ’n, e su yoman be ninnge mun wie. Ɔ maan, ɔ cɛman naan w’a yo i bɔbɔ nin sran ng’ɔ yiali be’n, be kɛnsrɛn. Maan e dun mmua e kɛn i sɔ ndɛ’n e kle i weinwein lele naan atɔnvlɛ falɛ’n i cɛn’n w’a ju. Like nga e kwla yo naan y’a fɔnman Ɲanmiɛn mmla’n, i kun yɛ ɔ o lɛ ɔ.

MAAN E KLE KƐ ZOOVA YƐ Ɔ SIE E Ɔ

8. ?Wafa sɛ yɛ Nyanmiɛn Nyrun Saun Yolɛ fluwa’n kle kɛ Zoova yɛ ɔ fata kɛ ɔ sie e ɔ?

⁸ Nyanmiɛn Nyrun Saun Yolɛ fluwa’n kle kɛ Zoova yɛ ɔ fata kɛ ɔ sie e ɔ. Fluwa’n sɔ’n nun’n, e wun i kpɛ 30 tra su kɛ Zoova bɔbɔ yɛ ɔ kan ndɛ’n niɔn. Moizi sili sɔ. I sɔ’n ti’n, ɔ niannin Zoova i nuan ndɛ’n i su yoli. (Sau. 8:4, 5) E kusu’n, ɔ fata kɛ e yo e Si Zoova i klun sa’n blɛ kwlaa nun. I sɔ yolɛ nun’n, e niaan Klistfuɛ’m be suan e bo. Yɛ aɲia nga e yo be’n nin fluwa nga anuannzɛ’n yi be’n, be uka e wie. Sanngɛ wie liɛ’n, kɛ sa wie tanndan e ɲrun’n, sran fi nunman lɛ naan w’a uka e. I sɔ sa juli Zezi su wie. (Lik 4:1-13) Sɛ e wun i wlɛ kɛ Zoova yɛ ɔ ti Anannganman’n naan e lafi i su kpa’n, e su yoman srongble. Sanngɛ, é nánti i mmla’m be su sa’n kwlaa nun.​—Nya. 29:25.

9. ?Ngue ti yɛ nvle’n kwlaa nun’n, be kpɔ Ɲanmiɛn i nvle nunfuɛ mun ɔn?

⁹ Kɛ mɔ e ti Zezi i sɔnnzɔnfuɛ mɔ e kunngba’n e ti Zoova i sufuɛ’n ti’n, sran’m be kle e yalɛ mɛn wunmuan’n nun. I sɔ’n boman e nuan. Afin Zezi seli kɛ: “Bé wá fá amun wlá nyrɛnnɛn nun, bé kún amun, yɛ nvle’n kwlaa bé kpɔ́ amun n dunman nun.” (Mat. 24:9) Kannzɛ sran’m be kle e yalɛ’n, sanngɛ e bo jasin fɛ’n i titi, e di nanwlɛ, yɛ e yoman sa sukusuku. Asa ekun’n, e nanti nvle nga e tran su’n i nun mmla’m be su. Ɔ maan, e nzuɛn’n fa Ɲanmiɛn liɛ’n sa’n kwlaa nun. ?Yɛ ngue ti yɛ sran’m be kle e yalɛ ɔ? (Rɔm. 13:1-7) Yɛle kɛ, Zoova yɛ ɔ ti e Min’n niɔn. E su i “kunngba cɛ.” Kpɛkun, e nanti i mmla’m be su.​—Mat. 4:10.

10. ?Kɛ be miannin aniaan kun kɛ ɔ di sonja m’ɔ kplinnin su’n, ngue yɛ be seli i kɛ ɔ yo ɔ?

¹⁰ E “ti-man mɛn’n nunfuɛ.” I sɔ’n ti’n, e kunman be alɛ mun wie yɛ e jranman alɛ kunfuɛ wie fi sin. Asa ekun’n, e kpliman mɛn’n i sielɛ’n wie. (An kanngan Zan 15:18-21, ɔ nin Ezai 2:4 be nun.) Klistfuɛ wie’m b’a nantiman sɔ titi. Sanngɛ i sin’n, ɔ yoli be nun sunman be nzisɔ. Kpɛkun, be sali be sin Zoova wun ekun. (Jue. 51:17) Be nun kunngun yɛ b’a yoman sɔ wie ɔ. I wie yɛ alɛ dan nɲɔn su’n nun sa ng’ɔ juli aniaan wie’m be su’n. Abloki lɔ nvle nga be flɛ Ɔngli’n i su lɔ’n, be wlali aniaan kpanngban be bisua. Be kwlaa nga be nin a ɲanman afuɛ 45 mɔ be wlali be bisua blɛ sɔ’n nun’n, be ju sran 160. Be miannin be kɛ be di sonja. Be dan lika b’a kplinman su. Sanngɛ, be nun sran ngwlan be kplinnin su. I afuɛ nɲɔn m’ɔ́ jú’n, be seli be ngwlan sɔ’m be nun kun kɛ ɔ kun aniaan nga b’a kplinman su kɛ bé dí sonja’n. I bɔbɔ i niaan mɔ be si ti kun, yɛ be nin ti kun’n, ɔ o be nun wie. ?Ngue yɛ ɔ́ yó ɔ? Kpɛkun Ɲanmiɛn sa, be wa seli kɛ nán be kun aniaan mun kun.

MAAN E TU E KLUN E SU ZOOVA

11, 12. ?Ngue yɛ tɛ nga laa Izraɛlifuɛ’m be yili be’n, be su ndɛ’n kle e ɔ?

¹¹ Mmla nga Zoova fa mannin Moizi’n i nun’n, ɔ seli Izraɛlifuɛ mun kɛ be yi tɛ fanunfanun be mɛn i. (Sau. 9:1-4, 15-21) Nnɛn nga bé fá yí tɛ’n, ɔ fataman kɛ lɛ trɛn i wun. Afin tɛ sɔ’m be ti tɛ nga Zezi wá fɛ́ i wun yí’n i nzɔliɛ. Yɛle kɛ, fɔ nunman Zezi nun. Tɛ kwlaa nga Izraɛlifuɛ’m bé yí’n, ɔ le kun nin i su mmla mɔ Ɲanmiɛn mannin be ɔ. I wie yɛle tɛ m’ɔ fata kɛ bla ta’m be yi’n. Saun Yolɛ 12:6 se kɛ: “Kɛ i wun fiɛn kplolɛ blɛ’n ko sin’n, sɛ ɔ ti ba yasua yɛ ɔ wuli i o, sɛ kusu ba bla yɛ ɔ wuli i o, maan bla’n ɔ ko to min nyrun jranfuɛ’n tannin sua nga n yi min wun nglo nun’n i nuan lɔ. Ɔ́ kɔ́’n, ɔ fa bua bɔ w’a kpɛ cro’n, bɔ w’a di afuɛ kun’n, ɔ ti tɛ nga be yrɛ i nnɛn’n kɔlikɔli’n i nnɛn. Ɔ fa ablioso kun, wie kusu ɔ okunmomo kun. Be liɛ be ti min kpatalɛ tɛ’n i liɛ.” Ndɛ sɔ’n kle kɛ Zoova si aunnvuɛ. Afin bla ta’n m’ɔ kwlá ɲanman bua’n, ɔ kwlá fa okunmomo nɲɔn, annzɛ ablioso nɲɔn fa yi tɛ’n. (Sau. 12:8) I sɔ tɛ mɔ yalɛfuɛ’m be yi’n, Zoova klun jɔ su. ?Ngue yɛ i sɔ’n kle e ɔ?

¹² Akoto Pɔlu seli Klistfuɛ mun kɛ maan ‘manmanlɛ nga be manman Ɲanmiɛn titi’n ɔ yo kɛ asenna like sa.’ (Ebr. 13:15) Kɛ e kan Zoova i ndɛ e kle sran mun’n, i sɔ’n ti e asenna like mɔ e fa mɛn i ɔ. Aniaan nga be ti bobo’n, be kan Zoova i ndɛ bobo aniɛn’n nun be mɛnmɛn i wie. Klistfuɛ wie’m be liɛ’n, tukpacɛ’n annzɛ sa uflɛ wie ti’n, be kwlá fiteman. Ɔ maan, be klɛ fluwa be bo jasin fɛ’n, annzɛ be flɛ sran mun telefɔnu nun. Annzɛ kusu’n, be bo jasin fɛ’n be kle sran nga be ba be osu nianlɛ’n mun. Sɛ e timan juejue’n, e kwlá seman kɛ é bó jasin fɛ’n kɛ be nga be ti juejue’n be liɛ’n sa. Asa ekun’n, ɔ le sran kun i like m’ɔ si i yo’n. Sanngɛ i kwlaa yoli o, maan e tu e klun e yo e liɛ nga e kwlɛ i yo’n.​—Rɔm. 12:1; 2 Tim. 2:15.

13. ?Ngue ti yɛ ɔ fata kɛ e man jasin fɛ’n nga e bo’n i su rapɔru ɔ?

¹³ E klo Zoova. I sɔ’n ti’n, e mɛnmɛn i e klunklo su. (Mat. 22:37, 38) ?Sanngɛ, kɛ anglo’n wie mɔ be se kɛ e man jasin fɛ’n mɔ e boli’n i su rapɔru’n, ngue yɛ e yo ɔ? Nanwlɛ, ɔ fata kɛ e mian e ɲin e fa man. Kɛ e man rapɔru’n, i sɔ’n kle kɛ e nin Ɲanmiɛn e afiɛn mantan. (2 Piɛ. 1:7) Sanngɛ, nán maan ɔ yo kɛ dɔ manlɛ’n i ngunmin ti yɛ e bo jasin fɛ’n niɔn. Afin be nga be kwlaman nun’n, annzɛ sran oke’m be kwla bo jasin fɛ’n i miniti 15. Kpɛkun, be mɛn i su rapɔru. Zoova klun jɔ i sɔ’n su. Afin like nga aniaan sɔ’m be kwla yo’n, yɛ be yoli ɔ. Zoova si kɛ aniaan’m be klo i naan be kunndɛ kɛ bé mɛ́nmɛ́n i. I sɔ’n ti’n, like nga be tu be klun be yo be mɛn i’n, i klun jɔ su. Laa Izraɛli lɔ’n, yalɛfuɛ’m be yi tɛ be man Ɲanmiɛn wie. Andɛ kusu’n, aniaan oke nin be nga be kwlaman nun’n, be kwla man jasin fɛ’n nga be bo i su rapɔru. Ɔ fataman kɛ be wla bo be wun. Rapɔru nga e man’n ti’n, anuannzɛ’n kwla si junman nga e di i mɛn wunmuan’n nun’n. Kpɛkun, ɔ nian su fa ajalɛ ng’ɔ nin i fata’n. I sɔ’n ti’n, jasin fɛ’n nga e bo’n, ɔ fata kɛ e mɛn i su rapɔru.

BIBLU’N NUN LIKE SUANLƐ’N NIN ƝANMIƐN MANMANLƐ’N

14. ?Ngue ti yɛ ɔ fata kɛ wafa nga e suan Biblu’n nun like’n, e bu i akunndan ɔn?

¹⁴ Like nga ti yɛ Nyanmiɛn Ɲrun Saun Yolɛ fluwa’n wo Ɲanmiɛn Ndɛ nga be klɛli’n i nun wie’n, y’a wun i wlɛ kpa siɛn’n. (2 Tim. 3:16) Ɔ maan atrɛkpa’n, e tinuntinun y’a fua kpa kɛ é yó like kwlaa nga e kwla yo’n, naan e nzuɛn’n w’a fa Zoova liɛ’n titi’n. Zoova kunndɛ kɛ e tu e klun e su i. Ɔ nin i sɔ’n fata kpa. Asa ekun’n, e kwla fua kɛ é súan Ɲanmiɛn Ndɛ wunmuan’n i nun like kpa. (An kanngan Nyanndra Mun 2:1-5 nun.) I lɛ’n nun’n, maan e srɛ Ɲanmiɛn naan ɔ uka e. Maan e tinuntinun e usa e wun kɛ: ‘?Televiziɔn nianlɛ’n, annzɛ min wun kpinngbinlɛ’n, annzɛ min ɲin su yiyilɛ wafa uflɛ ti’n, n ɲanman min ti naan m’an suan Biblu’n nun like?’ Sɛ e wun kɛ ɔ ti sɔ’n, maan e wla kpɛn ndɛ nga Pɔlu klɛli ko mannin Klistfuɛ Ebre mun’n i su.

15, 16. ?Fluwa nga Pɔlu klɛli ko mɛnnin i niaan Ebre mun’n i nun’n, ngue ti yɛ ɔ dili be nanwlɛ weiin ɔn?

¹⁵ Pɔlu dili i niaan Ebre’m be nanwlɛ weiin fluwa ng’ɔ klɛli ko mannin be’n i nun. (An kanngan Ebre Mun 5:7, 11-14 nun.) Ɔ seli be kɛ: “Amu’an yo sran bɔ amun wun-man sa wlɛ ndɛndɛ.” ?Ngue ti yɛ Pɔlu dili be nanwlɛ sɔ ɔ? Yɛle kɛ, ɔ klo aniaan sɔ mun kpa kɛ nga Zoova fa klo be’n sa. Ɔ maan, be ndɛ lo i kpa. Ɔ sieli i nzɔliɛ kɛ Nyanmiɛn Ndɛ’n i bo bolɛ ndɛ’n i ngunmin yɛ i niaan sɔ’m be si i ɔ. Sɛ é kwlá sé’n, be ti sran mɔ be nin ɲɔnflɛn nɔnlɛ fata ɔ. Be kwlá diman aliɛ. Sɛ be waan bé yó sran Ɲanmiɛn i sulɛ’n nun’n, ɔ fata kɛ “be di aliɛ.” Yɛle kɛ, maan be si ndɛ nanwlɛ nga be bo ti kploun mɔ be o Ɲanmiɛn Ndɛ’n nun’n.

¹⁶ Klistfuɛ Ebre’m b’a ju sran uflɛ’m be like klelɛ. Sanngɛ kusu’n, be te kunndɛ kɛ be kle be like ekun. Afin Ɲanmiɛn i sulɛ’n nun sɛ é kwlá sé’n, be te yo bakan, be kwlá “di-man aliɛ.” ?Yɛ e li? Maan e fa kosan nga mun e usa e wun. ?Like nga Biblu’n kle mɔ be wlɛ wunlɛ ti kekle’n, wafa sɛ yɛ m bu be ɔ? ?N klo be su like suanlɛ, yɛ n klo Ɲanmiɛn srɛlɛ? ?Annzɛ kusu’n, n sro ninnge sɔ’m be yolɛ? Sɛ é nían naan ɔ ti sɔ sakpa’n, atrɛkpa’n, wafa nga e suan like’n yɛ ɔ ti ndɛ’n niɔn. Sɛ e suan Biblu’n nun like kpa’n, e su yoman jasin fɛ bofuɛ ngbɛn. Sanngɛ, é kwlá klé sran’m be like naan b’a kaci Zezi i sɔnnzɔnfuɛ wie.​—Mat. 28:19, 20.

17, 18. (a) ?Ngue ti yɛ Ɲanmiɛn ndɛ’n m’ɔ ti kɛ aliɛ sa’n, ɔ fata kɛ e di ɔ? (b) ?Cɛn nga bé yó aɲia’n, Klistfuɛ kun kwla nɔn nzan m’ɔ bo’n?

¹⁷ Zoova su mianman e kɛ e suan Biblu’n nun like. E si kɛ nán e ngba yɛ e klo like suanlɛ ɔ. Sanngɛ, Ɲanmiɛn ndɛ’n m’ɔ ti kɛ aliɛ sa’n, ɔ fata kɛ e mian e ɲin e di. Kannzɛ e su Ɲanmiɛn w’a cɛ kpa bɔbɔ’n, sanngɛ maan e suan Biblu’n nun like titi. I liɛ’n, e nzuɛn’n fá Ɲanmiɛn liɛ’n titi.

¹⁸ Sɛ e suan Ɲanmiɛn Ndɛ’n i nun like kpa naan e yo like nga Ɲanmiɛn kle e’n, e nzuɛn’n fɛ́ i liɛ’n. Maan e wla kpɛn Aarɔn i mma yasua Nadabu nin Abii be su. Kɛ be fali sin m’ɔ “timan Anannganman liɛ’n” be kleli i’n, be wuli be ja nun lɛ. (Sau. 10:1, 2) Kɛ ɔ yoli sɔ’n, maan e wla kpɛn ndɛ nga Ɲanmiɛn kan kleli Aarɔn’n i su. (An kanngan Saun Yolɛ 10:8-11 nun.) ?I sɔ’n kle kɛ cɛn nga e le aɲia’n, ɔ fataman kɛ e nɔn nzan ng’ɔ bo’n i kaan sa mlɔnmlɔn? Andɛ’n, e diman Moizi Mmla’n su. (Rɔm. 10:4) Nvle wie nun’n, kɛ aniaan’m bé dí aliɛ’n, be nɔn nzan kan. Ɔ leman kɛ cɛn sɔ’n nun’n, bé yó aɲia. Kɛ Zezi nin i sɔnnzɔnfuɛ’m bé dí Delɛ-cɛn’n, be fali divɛn klowa nnan be bɛli i bo. Kɛ Zezi kpɛ́ e Wla kpɛnlɛ i cɛn dilɛ’n i ba’n, ɔ nin i sɔnnzɔnfuɛ’m be nɔnnin nzan. Nzan sɔ’n ti Zezi i mmoja’n i nzɔliɛ. (Mat. 26:27) Ɲanmiɛn Ndɛ’n se kɛ nán e yo nzanboɛfuɛ. Yɛ nán e yo nzan nɔnfuɛ dan. (1 Kor. 6:10; 1 Tim. 3:8) Klistfuɛ wie’m be o lɛ’n, cɛn nga bé wá yó aɲia’n, be nɔnman nzan m’ɔ bo’n. Afin sɛ be yo sɔ’n, be akunndan’n bú be fɔ. Like nga be yo i nvle kun nun’n, nɛ́n i kunngba’n yɛ be yo i nvle uflɛ nun ɔn. Sanngɛ i kwlaa yoli o, ɔ fata kɛ e wun ‘like ng’ɔ ti Ɲanmiɛn liɛ annzɛ ng’ɔ timɛn i liɛ’n,’ i wlɛ. I liɛ’n, e nzuɛn’n fá Ɲanmiɛn liɛ’n. Kpɛkun, i klun jɔ́ e wun.

19. (a) ?Kɛ é sú Ɲanmiɛn awlo lɔ’n, annzɛ kɛ e ngunmin é súan Biblu’n nun like’n, ngue yɛ ɔ fata kɛ e yo ɔ? (b) ?Ngue yɛ a fuali kɛ á yó naan ɔ nzuɛn’n w’a fa Ɲanmiɛn liɛ’n niɔn?

¹⁹ Ɲanmiɛn i mmla’m be ti weiin, fiɛn kaan sa nunman be wun. Yɛ be diman be yalɛ. Sɛ e bo e ɲin ase e suan Ɲanmiɛn Ndɛ’n i nun like’n, é wún Ɲanmiɛn i mmla sɔ mun. Asa ekun’n, ninnge kpanngban o lɛ mɔ e kwla fa suan Biblu’n nun like ɔ. Kɛ é sú Ɲanmiɛn awlo lɔ’n, annzɛ kɛ e ngunmin é súan like’n, maan e fa ninnge sɔ mun e di junman. Maan e mian e ɲin e si Zoova. Yɛ maan e si ninnge ng’ɔ seli kɛ ɔ́ yó be mun. Kpɛkun, maan e fa e wun e mɛntɛn i. (Zak 4:8) Wafa nga jue tofuɛ’n srɛli Ɲanmiɛn’n, maan e srɛ i sɔ wie. Ɔ seli Ɲanmiɛn kɛ: “Tike min nyin maan n wun ɔ mmla’n b’ɔ be yo nyɛnmɛn’n.” (Jue. 119:18) Maan e ɲin yi Ɲanmiɛn titi. Ɲanmiɛn i “nzuɛn’n nin klɔ sran liɛ’n ti-man kun.” I sɔ’n ti’n, maan e nanti i mmla’m be su. Yɛ maan e bo “i jasin fɛ’n” i juejue su. (1 Piɛ. 1:15; Rɔm. 15:16) Mɛn’n i awieliɛ blɛ nga nun’n, ɔ fata kɛ e nzuɛn’n fa Ɲanmiɛn liɛ’n i titi. Nanwlɛ, maan e kwlakwla e mian e ɲin naan e nzuɛn’n fa Ɲanmiɛn liɛ’n sa’n kwlaa nun. I liɛ’n, é klé kɛ i yɛ ɔ sie e ɔ.

[Ja ngua lɛ ndɛ’n]

[Foto, bue 20]

(An nian ndɛ kpɔlɛ 14 nun.)