NDƐ NG’Ɔ KLƐ FLUWA’N SU’N | A KWLA FA Ɔ WUN MANTAN ƝANMIƐN

?A yo like ng’ɔ jɔ Ɲanmiɛn klun’n?

“Like ng’ɔ sa miɛn i wun’n, kan kle min.” Titi’n, sran nga be si i kpa’n, annzɛ sran ng’ɔ ti be janvuɛ’n, yɛ be kwla kɛn i sɔ ndɛ’n be kle i ɔ. I sɔ’n kle kɛ, janvuɛ kpa’m be yo like be man be wiengu naan i klun jɔ.

Biblu’n kle kɛ Zoova yo ninnge kpakpa mun mɛn i sufuɛ mun titi. Famiɛn Davidi m’ɔ nin Ɲanmiɛn be afiɛn mantannin kpa’n, ɔ seli kɛ: “Anannganman min Nyanmiɛn, abonuan sa nga a yoli’n, be sɔnnin. Yɛ akunndan kpakpa nga a bu i e wun’n, be sɔnnin. [...] N kwlá kaman be ngba.” (Jue Mun 40:6) Sanngɛ, nán be nga Zoova si be’n, be ngunmin yɛ ɔ yo be kpa ɔ. Ɔ yo be nga be nin a simɛn i’n be kpa wie. Yɛle kɛ, ‘ɔ man be aliɛ kpanngban, yɛ ɔ maan be klun jɔ.’​—Sa Nga Be Yoli’n 14:17.

Ninnge ng’ɔ kwla jɔ e klun’n, Zoova yo be man e. Sɛ e waan é yó i janvuɛ’n, ɔ fata kɛ e kusu e yo like nga mɔ maan i ‘klun jɔ́’n.’ (Nyanndra Mun 27:11) ?Ngue bɔbɔ cɛ yɛ é yó naan Ɲanmiɛn i klun w’a jɔ ɔ? Biblu’n se kɛ: “Nán an yaci sa kpa nin sran ye yolɛ’n, afin i sɔ like’n yɛ be yo-ɔ ɔ jɔ Nyanmiɛn klun-ɔn.” (Ebre Mun 13:16) ?Like nga é yó naan w’a jɔ Ɲanmiɛn klun’n, i ngunmin yɛle sa kpa nin sran ye yolɛ’n?

Biblu’n se ekun kɛ: “Sɛ be lafi-mɛn i su’n, i klun jɔ-man be wun mlɔnmlɔn.” (Ebre Mun 11:6) Abraamu “lafili Nyanmiɛn su,” ɔ maan “Nyanmiɛn flɛli i i janvuɛ.” (Zak 2:23) Zezi kusu kleli kɛ sɛ e ‘lafi Nyanmiɛn su’n,’ Ɲanmiɛn yrá e su. (Zan 14:1) ?Ngue yɛ a kwla yo naan w’a lafi Ɲanmiɛn su kpa naan a nin i be afiɛn w’a mantan ɔn? Suan Biblu’n nun like. Sɛ a yo sɔ’n, á ‘sí i klun sa’n kpa.’ Kpɛkun, á sí like nga á yó mɔ ‘i kwlaa jɔ́ i klun’n.’ Kɛ ɔ́ cɛ́ kɔ́ mɔ á sí Zoova kpa’n, á nánti i mmla’m be su. Yɛ, á láfi i su kpa. Ɔ maan, a nin i be afiɛn mántan kpa wie.​—Kolɔsfuɛ Mun 1:9, 10.