BIBLU’N I SU KOSAN’M BE SU TƐLƐ

?Ngue yɛ maan ba’m be kwla klo Ɲanmiɛn ɔn?

Sɛ ba’m be wun i wlɛ kɛ Ɲanmiɛn o lɛ sakpa naan ɔ klo be’n, be kusu bé kló i wie. Sran nga be si i’n, yɛ be kwla klo i ɔ. Ɔ maan, sɛ ba’m be si Ɲanmiɛn’n, bé kló i. (1 Zan 4:8) I sɔ’n ti’n, ɔ fata kɛ amun mma’m be wun ndɛ wie’m be wlɛ. I wie yɛle kɛ: ?Ngue ti yɛ Ɲanmiɛn yili sran mun ɔn? ?Ngue ti yɛ Ɲanmiɛn o lɛ mɔ sran’m be wun ɲrɛnnɛn ɔn? ?Ngue yɛ cɛn wie lele Ɲanmiɛn yó mán sran mun ɔn?​—Kanngan Filipfuɛ Mun 1:9 nun.

Sɛ amun mma’m be wun kɛ amun bɔbɔ amun klo Ɲanmiɛn’n, bé kwlá nían amun ajalɛ’n su. Yɛle kɛ, bé kló Ɲanmiɛn wie.​—Kanngan Mmla’n 6:5-7, ɔ nin Nyanndra Mun 22:6 be nun.

?Ngue yɛ amún yó naan like nga amun kle’n w’a wluwlu amun mma’m be wun ɔn?

Ɲanmiɛn Ndɛ’n, ɔ wluwlu sran wun. Ɔ maan, sran’n kaci. (Ebre Mun 4:12) I sɔ’n ti’n, an fa Ɲanmiɛn ndɛ’n i bo bolɛ ninnge mun kle amun mma mun. I sɔ yolɛ nun’n, amun nian Zezi i ajalɛ’n su. Kɛ Zezi klé sran’m be like’n, ɔ usali be kosan mun, ɔ sieli i su be nuan bo. Kpɛkun, ɔ yiyili Ɲanmiɛn Ndɛ’n nun kleli be. Ɔ yoli sɔ naan like ng’ɔ kle’n, ɔ wluwlu sran’m be wun.​—Kanngan Lik 24:15-19, 27, 32 nun.

Asa ekun’n, Biblu’n kan wafa nga Ɲanmiɛn nin sran wie’m be trannin’n i ndɛ. Sɛ amun fa kle amun mma mun’n, bé kló Ɲanmiɛn. I sɔ yolɛ’n nun’n, amun kwla fa fluwa wie mun ɛntɛnɛti adrɛsi nga su: www.jw.org/bci.​—Kanngan 2 Timote 3:16 nun.

Sɛ a kunndɛ kɛ á sí nun ekun’n, nian fluwa ng’ɔ lɛ’n ?Ngue like yɛ Biblu’n kle i sakpasakpa ɔ? i ndɛ tre 14 nun. Zoova i Lalofuɛ mun yɛ be yili ɔ.

A kwla ko fɛ i ɛntɛnɛti lika nga nun lɔ: www.jw.org. Annzɛ kusu’n, klɛ adrɛsi nga be o fluwa nga i bue 2 su’n be nun kun su naan be blɛ wɔ fluwa liɛ. A su toman.