Maan e bo yo kun e jran kekle mɛn’n i awielɛ blɛ’n nga nun
“E kwlaa e ti sran wunmuan.”—EFƐ. 4:25.
?WAFA SƐ YƐ AMÚN TƐ́ SU Ɔ?
?Ayeliɛ benin yɛ ɔ fataman kɛ gbanflɛn nin talua nga be su Zoova’n, be nian su ɔ? ?Yɛ ngue ti ɔ?
?Ngue ti yɛ ɔ fata kɛ e bo yo kun ɔn?
?Ngue yɛ a kwla yo naan w’a kle kɛ a nin aniaan’m be kwlaa be “ti sran wunmuan” ɔn?
1, 2. ?Ngue yɛ Zoova kunndɛ kɛ i nvle nunfuɛ’m be yo ɔ?
NVLE sunman nun’n, be nga be fa be wun man Zoova mɔ be yo be batɛmu’n, be dan lika be ti gbanflɛn annzɛ talua. Kɛ e wun i sɔ liɛ’n, nanwlɛ, ɔ yo e fɛ dan. ?Amun o gbanflɛn nin talua sɔ’m be nun wie? Sɛ amun o be nun wie’n, maan amun klun jɔ. Afin, amun ti Zoova i nanndoliɛ sran.
2 Gbanflɛn nin talua mun, kɛ amun nin amun wiengu gbanflɛn nin talua’m be o likawlɛ’n, amun wun kpaja amun. ?Nɛ́n i ɔ? I yo, e kwlakwla e kunndɛ kɛ e nin e wiengu tukpɛ mun é bó nzɛmundɛ aklunjuɛ su. Sanngɛ Zoova liɛ’n, ɔ kunndɛ kɛ i gbanflɛn o, i talua o, i kpɛnngbɛn o, e kwlakwla e bo yo kun e su i. Akoto Pɔlu seli kɛ sa ng’ɔ yo Ɲanmiɛn fɛ’n, yɛle kɛ “ɔ́ dé sran’m be kwlaa naan be wun sa ng’ɔ ti nanwlɛ’n i wlɛ kpa.” (1 Tim. 2:3, 4) Sa Nglo Yilɛ 7:9 kusu kle kɛ be nga be ba Ɲanmiɛn sulɛ’n, be fin “mɛnmɛn’n kwlaa nin nvle-nvle’n kwlaa nun, sran wafa-wafa’n kwlaa o be nun, be ijɔ aniɛn wafa-wafa’n kwlaa.”
3, 4. (a) ?Ngue yɛ gbanflɛn nin talua nga be suman Zoova’n, be yo ɔ? (b) ?Kɛ nga Efɛzfuɛ Mun 4:25 fa kan’n sa’n, ngue yɛ be nga be su Zoova’n be yo ɔ?
3 Gbanflɛn nin talua nga be su Zoova’n, be nin be wiengu nga be sumɛn i wie’n, be nzuɛn’n timan kun mlɔnmlɔn. Afin gbanflɛn nin talua nga be suman Zoova’n, be nun sunman be bu be ngunmin be wun akunndan. Like nga be klo kɛ bé yó’n, yɛ be yo ɔ. I sɔ’n ti, sran wie’m be se kɛ ajulisu gbanflɛn nin talua’m be bu be ngunmin be wun akunndan dan. Nanwlɛ, andɛ gbanflɛn nin talua’m be ijɔlɛ wafa’n, ɔ nin be wun wlawlalɛ wafa’n, ɔ kle kɛ be ɲin yiman sran. I li bɔbɔ sran kpɛnngbɛn mun li yɛ be buman be sran mlɔnmlɔn’n niɔn.
4 Ɲanmiɛn i klun sa yolɛ’n, ɔ timan pɔpɔ gbanflɛn nin talua’m be sa nun. Afin ɲin kekle ayeliɛ’n w’a tru dan. Klistfuɛ klikli’m be blɛ su’n, Pɔlu seli i wiengu Klistfuɛ mun kɛ be nian be wun su. Afin Satan “yɛ ndɛkɛn ɔ wlawla sran nga be nyin yi-man Nyanmiɛn nin-ɔn.” (An kanngan Efɛzfuɛ Mun 2:1-3 nun.) Gbanflɛn nin talua nga be su Zoova’n, be nin mo yolɛ fata. Afin be liɛ’n, be nin be niaan Klistfuɛ’m be kwlaa be bo ti kun be su Zoova. I sɔ mɔ be yo’n, ɔ kle kɛ be wun i wlɛ kɛ asɔnun’n ti kɛ sran’n i wunnɛn’n sa. Sran’n i wunnɛn’n i lika’m be sɔnnin. Sanngɛ i lika sɔ’m be kwlaa be uka be wun. I sɔ’n ti’n, Pɔlu seli kɛ “e kwlaa e ti sran wunmuan.” (Efɛ. 4:25) Ɔ ka kan’n, Satan i mɛn’n núnnún mlɔnmlɔn. I sɔ’n ti’n, ɔ ti cinnjin kpa kɛ e nin e niaan Klistfuɛ mun e bo yo kun e su Zoova. Like suanlɛ nga, ɔ́ wá fá e ɲin síe i sran wie mɔ Biblu’n kan be ndɛ’n be su. Ɔ maan like nga ti yɛ ɔ fata kɛ e bo yo kun e su Zoova’n, é wún i wlɛ.
BE BO YOLI KUN
5, 6. ?Ngue yɛ Lɔtu nin i wa bla’m be su ndɛ’n kle e ɔ?
5 Lalafuɛ nun’n, sa kekle kpanngban be tɔli Zoova i sufuɛ’m be su. Kɛ blɛ klekle sɔ’m be nun be bo yo kun be suan be wiengu bo’n, Zoova sasa be. Zoova i sufuɛ sɔ mɔ Biblu’n kan be ndɛ’n, be kle e kwlaa e ajalɛ kpa. Maan e fa Lɔtu i su ndɛ’n e nian.
6 Lɔtu nin i yi nin i mma’m be tran klɔ kun mɔ be flɛ i Sodomu’n i su. Blɛ wie nun’n, lika’n yoli kekle kpa be su. Afin Zoova seli kɛ ɔ́ wá núnnún klɔ sɔ’n. Zoova sunmannin anzi mun Lɔtu sin. Be ko seli i kɛ ɔ fɛ i awlobo’n naan be fin klɔ’n nun fite. Yɛ be wanndi be wɔ oka’m be nun lɔ. Anzi’n kun seli Lɔtu kɛ: “Wanndi kɔ naan w’a nyan ɔ ti.” (Bob. 19:12-22) Lɔtu nin i mma nɲɔn’n be yoli like nga anzi’m be seli be kɛ be yo’n. Sanngɛ, Lɔtu i sifuɛ wie’m b’a yoman kɛ be sa. Lɔtu seli i wa bla’m be wun mun kɛ be jaso klɔ’n su ndɛndɛ. Sanngɛ, ɔ yoli “be nyrun ndɛ finfin.” Ɔ maan, be wuli. (Bob. 19:14) Lɔtu nin i wa bla’m be ngunmin cɛ, yɛ be fiteli nun ɔn. Afin be yoli aɲinyiɛfuɛ yɛ be bo yoli kun.
7. ?Kɛ Izraɛlifuɛ’m be bo yoli kun be tuli Ezipti lɔ’n, ngue yɛ Zoova yoli ɔ?
7 Maan e kan Izraɛlifuɛ’m be ndɛ wie e nian. Kɛ bé tú Ezipti lɔ’n, sran kun w’a fɛmɛn i atin liɛ. Sanngɛ, be kwlaa be bo yoli kun yɛ be ɔli ɔ. Asa ekun, kɛ Moizi “tinngɛli i sa’n jenvie’n su” mɔ Zoova kpɛli jenvie’n nun’n, Moizi w’a seman kɛ ɔ nin Izraɛlifuɛ wie’m bé kɔ́, naan ɔ́ yáci wie’m be lɛ. Yɛ kusu’n, i ngunmin w’a kplimɛn i ti. Sanngɛ, ɔ nin Izraɛlifuɛ’m be ngba yɛ be kpɛli jenvie’n niɔn. Yɛ Zoova kusu sasali be kwlaa. (Tul. 14:21, 22, 29, 30) Kɛ bé kɔ́’n, “sran sunman bɔ be ti nvle uflɛ wie’m be nun sran’n,” be nin be yɛ be ɔli ɔ. (Tul. 12:38) ?Blɛ sɔ’n nun’n, gbanflɛn annzɛ talua benin yɛ ɔ́ sé kɛ ɔ́ fɛ́ i ngunmin i atin liɛ ɔ? Sran ng’ɔ yo sɔ’n, ɔ si kɛ i liɛ su yoman ye. Afin, Zoova su sɛsɛmɛn i.—1 Kor. 10:1.
8. ?Zozafati blɛ su’n, ngue yɛ Ɲanmiɛn i nvle nunfuɛ’m be yoli m’ɔ kle kɛ be bo ti kun ɔn?
8 Zida famiɛn Zozafati blɛ su’n, nvle kun nin Zozafati be bali alɛ kunlɛ. Nvle sɔ’n le “sonja kpanngban kpa.” (2 Nyo. 20:1, 2) ?Blɛ sɔ’n nun’n, ngue yɛ Zidafuɛ’m be yoli ɔ? B’a lafiman be bɔbɔ be wun su. Sanngɛ, be srɛli Zoova naan ɔ uka be. (An kanngan 2 Be Nyoliɛ 20:3, 4 nun.) Nanwlɛ, sran kun w’a fɛmɛn i ajalɛ liɛ. Biblu’n se kɛ: “Zidafuɛ’m be kwlaa, be nin be anunman mun, nin be yi mun, ɔ nin be mma mun, be jrannin Anannganman nyrun lɛ.” (2 Nyo. 20:13) I sɔ’n kle kɛ i ba kanngan o, i kpɛnngbɛn o, be kwlaa be bo yoli kun. Ɔ maan Zoova sasali be. (2 Nyo. 20:20-27) I lɛ’n nun’n, be kle andɛ Zoova i sufuɛ’m be ajalɛ kpa. Yɛle kɛ sɛ be kle e yalɛ’n, ɔ fata kɛ e bo yo kun e jran kekle.
9. ?Ngue yɛ Klistfuɛ klikli’m be yoli m’ɔ kle kɛ be bo yoli kun ɔn?
9 Klistfuɛ klikli’m be kusu’n, be bo yoli kun be blɛ su. Maan e fa sa kun e nian. Kɛ Zuifu nin be nga be kacili Zuifu’n be nun kpanngban be yoli Klistfuɛ’n, be yia “be fa be su sie be bɔ Jésus sunmannin be’n be ndɛ’n su kpa, be tran aniaan tranlɛ, be di like likawlɛ, be nin Nyanmiɛn be koko yalɛ tititi.” (Yol. 2:42) I li bɔbɔ kɛ sran’m bé klé be yalɛ’n, yɛ be bo yoli kun kpa’n niɔn. (Yol. 4:23, 24) Sɛ sran’m be kle e yalɛ’n, maan e kusu e bo yo kun e suan e wiengu bo.
KƐ ZOOVA I CƐN’N MÁNTAN KOKO’N MAAN E BO YO KUN TRA LAA’N
10. ?Blɛ benin nun yɛ ɔ fata kɛ e bo yo kun kpa ɔ?
10 Ɔ ka kan’n, lika’n wá yó kekle kpa asiɛ wunmuan’n su. I kekle m’ɔ́ yó’n, be nin a wunmɛn i wunsu sɔ le. Ɲanmiɛn nuan ijɔfuɛ Zoɛli waan “cɛn sɔ’n ɔ́ yó aosin tritritri, cɛn sɔ’n ɔ́ yó nzue mlanlɛ lika sa tuun.” (Zoɛ. 2:1, 2; Sof. 1:14) Blɛ sɔ’n nun’n, ɔ fata kɛ Ɲanmiɛn i sufuɛ’m be bo yo kun kpa. Afin Zezi seli kɛ: “Sɛ famiɛn kun i sran b’ɔ sie be’n be bu be wun nun’n, i mɛn ɔ́ sáci.”—Mat. 12:25.
11. ?Ngue yɛ Jue Mun 122:3, 4 be nun ndɛ’n, ɔ kle andɛ Ɲanmiɛn i nvle nunfuɛ mun ɔn? (An nian desɛn ng’ɔ o kan like suanlɛ’n bo i bo lɛ’n.)
11 Blɛ kekle m’ɔ su wa ju’n i nun’n, ɔ fata kɛ e bo yo kun kpa. I lɛ’n nun’n, maan e fa Zerizalɛmu klɔ’n i su sunnzun ase. Klɔ sɔ’n i su sua’m be mantanmantan su. Ɔ maan, sɛ sa ɲan sran kun’n, i mantanfuɛ’m be kwla ukɛ i ndɛndɛ. I sɔ’n ti, kɛ jue tofuɛ’n kán Zerizalɛmu klɔ’n i ndɛ’n, ɔ se kɛ b’a ‘kplɛn i klanman.’ Wafa nga Zerizalɛmu lɔ sua’m be mantanmantan su’n, jue tofuɛ’n fa sunnzun wafa nga Izraɛlifuɛ’m be bo yo kun be su Zoova’n. Ɔ se kɛ: “Izraɛl akpasua’m be kwlaa be yia.” (An kanngan Jue Mun 122:3, 4 nun.) Blɛ nga nun’n, ɔ nin blɛ kekle ng’ɔ́ bá lɛ’n nun’n, ɔ fata kɛ e bo yo kun sɔ wie.
12. ?Kɛ Gɔgu wá kpɛ́ i ɲin e mɔ e ti Zoova i sufuɛ mun e su’n, ngue yɛ é yó naan y’a fite nun ɔn?
12 ?Blɛ kekle ng’ɔ́ bá lɛ’n nun’n, ngue ti yɛ ɔ fata kɛ e bo yo kun kpa ɔ? Ezekiɛl 38 nun’n, Ɲanmiɛn nuan ijɔfuɛ’n se kɛ “Magɔg mɛn’n su lɔ, [...] famiɛn ng’ɔ suan Gɔg” ɔ́ wá kpɛ́ i ɲin Zoova i sufuɛ’m be su. Blɛ sɔ’n nun’n, ɔ fata kɛ e bo yo kun naan y’a fite nun. Afin nán Satan i mɛn nunfuɛ mun yɛ é kó tálo be ɔ. Sanngɛ, e nin e niaan mun yɛ é wá súan e wiengu bo ɔ. E si kɛ nán Zoova i sufuɛ mɔ e o be nun wie’n, i ngunmin ti yɛ é fíte nun ɔn. Sanngɛ, ɔ fata kɛ e tinuntinun e lafi Zoova su yɛ e nanti atin ng’ɔ kle e’n su. Sɛ e yo sɔ’n, Zoova nin Zezi bé jrán e sin. Ɔ maan é fíte nun. (Zoɛ. 2:32; Mat. 28:20) Sanngɛ nɛ́n i ngba ɔ. Ɔ fata kɛ e nin e niaan mun e kwlaa e bo yo kun wie. Afin sran ng’ɔ fɛ i ngunmin i atin liɛ’n, Zoova su demɛn i.—Mis. 2:12.
13. ?Ngue yɛ sa nga y’a kan be ndɛ’n, be kle gbanflɛn nin talua mun ɔn?
13 ?Gbanflɛn nin talua mun, like nga ti yɛ ɔ fata kɛ an fa amun wun mantan aniaan’m be kwlakwla’n, amun wun i wlɛ kpa? Nanwlɛ, nán amun cuɛn amun wun be tran amun liɛ ngunmin. Yɛ nán an fa amun wun mantan amun wiengu gbanflɛn nin talua’m be ngunmin. Blɛ ng’ɔ́ bá lɛ’n, ɔ́ wá yó kekle kpa mán e ngba. Ɔ maan dɔ nga su’n, ɔ fata kɛ e nin e niaan mun e bo yo kun e su Zoova aklunjuɛ su. Sɛ e yo sɔ’n, i bo’n gúa kpa mán e.
“E KWLAA E TI SRAN WUNMUAN”
14, 15. (a) ?Ngue ti yɛ andɛ’n, Zoova kle e like ɔ? (b) ?Afɔtuɛ benin yɛ Zoova man e naan e bo w’a yo kun ɔn?
14 Zoova bɔbɔ i fanngan nun’n, e ‘kwlaa e bo yo kun’ e su i. (Sof. 3:8, 9) Andɛ’n, Zoova kle e like. Afin, ɔ kunndɛ kɛ ɔ́ “kán sran’m be kwlaa nin asiɛ’n su like’n kwlaa nin nyanmiɛn su lɔ liɛ’n kwlaa bó nun, yɛ ɔ́ fá Krist síe be su.” (An kanngan Efɛzfuɛ Mun 1:9, 10 nun.) Nanwlɛ, Zoova kunndɛ kɛ asiɛ’n su like’n kwlaa nin ɲanmiɛn su lɔ liɛ’n kwlaa be kaci kɛ awlobo kun sa naan be su i. Yɛ ɔ́ yó sɔ sakpa, like fi su tɛnndɛnmɛn i ɲrun. ?Gbanflɛn nin talua mun, amun kunndɛ kɛ amún yó Zoova i awlobo sɔ’n i nunfuɛ wie? Sɛ ɔ ti sɔ’n, maan amun nin Zoova i nvle nunfuɛ’m be bo yo kun be su i.
15 Zoova kle e like naan kɛ é sé yɛ’n, e nin aniaan mun e bo yo kun. I liɛ’n, mɛn klanman’n nun lɔ kusu’n, e nin be é kwlá trán fɔun tititi. I sɔ’n ti’n, ɔ se e titi kɛ e ‘klo e wun kpa kɛ sran nin i niaan sa.’ Ɔ se e ekun kɛ e ‘kwlaa e uka e wun.’ Yɛ maan ‘e cici e wiengu wla maan ɔ yo sran.’ (1 Kor. 12:25; Rɔm. 12:10; 1 Tɛs. 4:18; 5:11) Zoova si kɛ fɔ o e kwlaa e nun. Ɔ maan, kɛ ɔ́ yó naan e bo w’a yo kun’n, ɔ timan pɔpɔ. I sɔ’n ti’n, ɔ se kɛ: “Sa nga amun wiengu yo amun’n, an yaci cɛ i.”—Efɛ. 4:32.
16, 17. (a) ?Like nga ti yɛ Zoova kpɛli aɲia’m be ba’n, i kun yɛle benin? (b) ?Ajalɛ kpa benin yɛ Zezi kle gbanflɛn nin talua mun ɔn?
16 Zoova kpɛli aɲia’m be ba naan e bo yo kun wie. Ebre Mun 10:24, 25 kle sɔ weiin. Ɔ se kɛ: “Maan e bu e wiengu’m be akunndan e wla be fanngan naan be klo be wun yɛ be yo sran ye.” Aɲia’m be bo tranlɛ’n ti cinnjin. I sɔ’n ti’n, kɛ e “wun kɛ e Min’n i cɛn’n su mantan’n,” maan e yo i sɔ tra su.
17 Zezi kle e ajalɛ kpa. Yɛle kɛ, ɔ trannin aɲia’m be bo titi. I nun m’ɔ le afuɛ 12, ɔ nin i si nin i nin be ɔli aɲia kun bo. Kɛ bé sá be sin’n, ɔ mlinnin sran’m be afiɛn. I si nin i nin be kunndɛli i lelee. Kɛ bé wún i’n, ɔ timan i wiengu’m be afiɛn. Sanngɛ, ɔ ti Ɲanmiɛn i sua’n nun Zuifu’m be ninnge klefuɛ’m be afiɛn. Ɔ nin be su koko Ɲanmiɛn Ndɛ’n i su yalɛ.—Lik 2:45-47.
18. ?Kɛ e srɛ Ɲanmiɛn e man e niaan mun’n, ngue yɛ i sɔ’n kle ɔ?
18 Kɛ e kɔ aɲia’m be bo titi mɔ e klo e niaan mun’n, ɔ ti kpa. Sanngɛ, maan e srɛ Ɲanmiɛn e man e niaan mun wie. Kɛ é srɛ́’n, maan e kan like trele nga e kunndɛ kɛ Ɲanmiɛn yo man be’n i ndɛ. Sɛ e yo sɔ’n, é klé kɛ e niaan’m be ndɛ lo e kpa sakpa. ?Gbanflɛn nin talua mun, amun tran aɲia’m be bo titi yɛ amun klo amun niaan mun? ?Asa ekun’n, amun srɛ Ɲanmiɛn man aniaan’m be kwlaa? Sɛ amun yo i kwlaa sɔ’n, amun nin aniaan mun be bo yó kun. Nanwlɛ, sɛ e waan é fíte nun’n, ɔ fataman kɛ e yo mɛn’n nunfuɛ. Sanngɛ, ɔ fata kɛ e nin aniaan mun e bo yo kun.
MAAN E KLE KƐ “E KWLAA E TI SRAN WUNMUAN”
19-21. (a) ?Ngue yɛ e yo m’ɔ kle kɛ “e kwlaa e ti sran wunmuan” ɔn? An fa sa wie mun yiyi nun. (b) ?Kɛ a wun kɛ Zoova i Lalofuɛ’m be suan be wiengu bo’n, ngue yɛ i sɔ’n wla ɔ fanngan kɛ a yo ɔ?
19 Rɔmfuɛ Mun 12:5 se kɛ: “E kwlaa [...] y’a yo kun.” Andɛ’n, Zoova i Lalofuɛ’m be kle kɛ be ti kun sakpa. Ɲrɛnnɛn blɛ’n nun yɛ be kle sɔ kpa’n niɔn. Be flɛ Azi mɛn’n nun lɔ nvle kun kɛ Filipini. Nvle sɔ’n i klɔ kun suan Mindanao. Nzue bo sin yia klɔ sɔ’n. Afuɛ nga be flɛ i 2011, Desamblu nun’n, nzue kun tɔli klɔ sɔ’n su. W’a yoman blɛblɛ. Ɔ bubuli sua 40.000 tra su. E niaan sunman be sua’m be bubuli wie. Lika sɔ’n nun lɔ Betɛli komite’n seli kɛ, kɛ aniaan nga be o lika uflɛ’n be tili’n, “be fali ninnge kpanngban be bali naan be fa man aniaan sɔ mɔ sanvuɛsa w’a ɲan be’n.”
20 Sa kekle kun tɔli Zapɔn lɔ akpasua kun su wie. Yɛle kɛ asiɛ’n kejeli jenvie’n i bo lɔ. Ɔ maan, jenvie’n mɛnnin i wun su dan, ɔ sacili ninnge kpanngban. Blɛ sɔ’n nun’n, aniaan sunman be ninnge’m be sacili wie. Wie’m be liɛ bɔbɔ’n, be ninnge’n kwlakwla sacili. Be flɛ aniaan bla kun kɛ Yosiko. I tranwlɛ’n nin Ɲanmiɛn Sielɛ sua’n be afiɛn’n ti nun kilo 40. Aniaan sɔ’n i sua’n bubuli mlɔnmlɔn. Ɔ seli kɛ: “Kɛ aliɛ cɛnnin’n, akpasua sunianfuɛ’n nin aniaan kun be bali e osu nianlɛ. I sɔ’n boli e nuan dan.” Aniaan bla’n sri puɛɛ kpɛkun, ɔ seli ekun kɛ: “Aniaan’m be niannin e lika naan e nin Ɲanmiɛn e afiɛn w’a mantan titi. I lifuɛ’n, ɔ yoli e fɛ dan. Sanngɛ, nɛ́n i ngba ɔ. Aniaan’m be blɛli e tralɛ nin ngbabua, ɔ nin pata mun.” Aniaan nga be sɔ ninnge’m be nun naan b’a fa man be nga sa ɲannin be’n, be nun kun seli kɛ: “Aniaan’m be fin Zapɔn i lika kwlaa su be bali be niaan’m be bo suanlɛ. Be kwlaa be bo yoli kun. Aniaan wie’m be liɛ’n, be fin Amlɛnkɛn’m be lɔ yɛ be bali ɔ. Be usali aniaan sɔ mun kɛ ngue ti yɛ be fɛ i be mɛn’n nun lɔ lele be bali ɔ. Be tɛli su kɛ: ‘E nin aniaan nga be o Zapɔn wa’n e ti kun. Ɔ maan e bali be ukalɛ.’” Kɛ e si kɛ Zoova i nvle nunfuɛ’m be klo be wiengu naan e o be nun wie’n, i sɔ’n yo e fɛ dan. ?Nɛ́n i ɔ? Kɛ Zoova wun kɛ e bo ti kun’n, e si kɛ i sɔ’n yo i fɛ wie dan.
21 Sɛ dɔ nga su e nin aniaan mun e bo ti kun naan e suan e wiengu bo’n, blɛ kekle nun’n, like kunngba’n yɛ é yó ɔ. Blɛ sɔ’n nun atrɛkpa’n, e nin aniaan nga be o nvle uflɛ nun’n, e su timan e wiengu nganniɛn. Sanngɛ, e nin be nga e o lika kunngba nun’n, e afiɛn mántan titi. Be flɛ aniaan bla kun kɛ Fumiko. Ɔ tran Zapɔn lɔ. Blɛ wie nun’n, aunmuan dan kun tu sinnin be akpasua’n su. Ɔ seli kɛ: “Mɛn’n su wa wie. Ɔ fata kɛ e nin e niaan mun e suan e wiengu bo lele e fa ju blɛ mɔ sanvuɛsa su ɲanman sran fi kun’n.”
22. ?Sɛ e kwlaa e bo ti kun ikisa’n, ngue yɛ cɛn wie lele’n é kwlá yó ɔ?
22 I gbanflɛn o, i talua o, i kpɛnngbɛn o, maan e kwlaa e bo yo kun ikisa e su Zoova. I liɛ’n, é kwlá jrán kekle Zoova i cɛn dan’n nun. Ɔ ka kan’n, Zoova wá núnnún Satan i mɛn’n. Blɛ sɔ’n nun’n, ɔ́ dé i sufuɛ mun kɛ nga laa ɔ fa yoli’n sa. (Eza. 52:9, 10) Maan ɔ tran e klun titi kɛ sɛ é waan é fíte nun’n, ɔ fata kɛ e nin Zoova i nvle nunfuɛ mun e bo yo kun. Like kun ekun m’ɔ fata e yo’n, yɛle kɛ Zoova i su like nga be kleli e’n, maan e tra nun kpa. I sɔ ndɛ’n yɛ like suanlɛ ng’ɔ́ bá lɛ’n, ɔ́ wá yíyí nun ɔn.